মেয়েরেগা কবিতা থুপ ১৩

 ৬২।ঝারবো ফুল

০১/০৭/২০১৩, সোমবার

মুই ঝার’ ফুল,
ঝারত ফুদোং ঝারত ঝরং।
যুনিও মুই ঝারর দোল, ঝারর সাজন
কির্বে ধঘে ঊম গরং,
এলাফেলায় ঝরং মুই অনালে পাধারে
নানু ছারা গরিনে।

মরে কিয়োই চেইয়ে নেই
ধরিয়ে নেই তুলিয়ে নেই
আল্যেঙে যত্তন গরিয়ে নেই।
মুই নানুমরা খুত্যে টেঙেরা
দুনিয়ের এলাফেলা,
মর গধন দোল রং তুম্বাচ চোনা ^*আরাঙ।             (*আরাঙ = আঝল)
তুও দ’ মর গা’ক নেই
আদর মেয়ে নেই
চুমিয়ে নেই রাঘেয়ে নেই।

মর জাগা মর নেই
মরে ফেলেই মরে ধাবেই
ম আজায় জাগা অহ্ই কন্ ফুলোর!
বিলেদি ডাঙর কন জাদর।
জাগা জুরে গদা মর
কুবে শিঙর পাগোর,
মর বদল অহ্ই বেক
বদলে জাত, জাগা ঘরপাদা

মুই ওহ্ই পাং পরঙ বর পরঙ
অপধে অঘাদে অহ্য় মর মরন।
---০০০--                     (রাঙাদুরছুড়ি)

 

 

 

 

 

৬৩। জুম্মবি পরানি   
২৪/০৪/২০১২, মঙ্গলবার, ৪:৩৫ পি.এম

নোনেই মনান মর পেদ চায় তরে 
ও চিক্কবি, ও পরানি! 
বনা বনা আল্যেং মেয়েজাল বুনি যায় 
তর আধুলী কির্বের ধারাজে, 
মন রিবেঙত খরপাক বদিযায় বেনাল্যে চিদেয়ানি। 

জিংকানির আহ্ঢানা পত্থান 
বেঙাকঙা আধং পেজেরা, 
আদেঘা মুলধুজীত লুমোনার গরজে
লর্বো পধত এয মুই আহ্ঢারা!
চাঙ তর কোচপানা চিদো মেয়ে এক্কেনা
রুচ্যেল সমার ওক লাড়েয়োর ফার্মাত, 
এগাজারা জনমত চিকচিক্যে ন এযোক 
আল্যম সাঙেত ওহ্ই অবাঙে পাং পারা। 

পরানি! তুই মুরোত পরি ভাবিচেস 
পেংগুল মনানত খোল্গেই ঝাগেরেস, 
বানা মরে বিলি নয় 
ভেই বোন সংসমারি, 
গদা জুম্মজাদ তরে মরে আঘন রেনি। 
আমার শিক্ষে আল্যেক রিদিসুদোম 
হ্লক ধরি আহ্ঢিবাক গুরো ভেই বোন, 
দেজ জাদর কোচপানা যুনি ন পেলে 
আল্যেঙ মেয়ে রেগা আমি ন বানেলে; 

বিজগর নাঙপাদাত ফাগারা কি ন অহ্‌বং? 
পড়বুঅ ওহ্ই যুনি নাদংছারা অহ্‌লে! 

বেনাল্যে জিংকানি বেপাগত পরিলে 
দবদবা সংপধ ওল অহ্‌নেই আহ্‌রেলে, 
তুও কেনেহ্ আমি উলমত্য অহ্দং! 
সাংসাঙ্যে আক্কলান কজরাত ডুবেবং! 
সেক্কে কি তোগে নপারি জাদর সুদোম? 
পড়বুঅর মঙ্ঘা নাঙান অজলত তুলি ন পারি?
জাদর মান রিদিসুদোমর বাণা টাঙে ন পারি? 
খালিক কিত্তেই তুই মন ভাঙি ফেলাস, 
মর চিদো কোচপানা কেনেহ্ পুরিফেলাস; 
কার ফাগত মিঝি যাস খাক্‌খেনে 
লুগে দোচ মর নাঙ জাদ’ রীদি, 
সাদাঙা ভাবি তুই দুরোত যাস এরি।

মুই এয' তরে কোচপাং কোচপেম জনমান

তরে লোই দোলে সাজেম ম জুম’ ঘরান,
সবন দেঘং তরে নিনেই অতালিয়ে ভালেদি
দেজ জাদর লাড়েয়ত তরে পেম সমারি।
মর আরাঙ কোচপানা মিঝে মনে নগরিচ

সেদামছারা কোয় মরে পাজারা ন ফারিচ,

তুই মর উধন্দি বেলর ছদক ধরোনি
বলা খেদর বলা ভুই, বলা পিত্থিমি।
আহ্‌রেবার নচাঙ তরে জাদ’ চিন রাঘনি
জুম্মর আগাজত সুবপের সুবনি,
ও মর জুম্মবি আহ্ওজর পরানি।

=======০০=======       

 (বিলছড়া)

র ভেদঃ ১। বাণা= নিশান; পতাকা

৬৪। কোহ্‌বুলো

১০/৪/১৪ ব্রেসুপবার ৫.৪৫ পিএম

 

মুই কধা কঙ্ বোয়ের’ সমারে,

ও বোয়েরান ! তর বেঈ যানাত ফুলো তুম্বাজ কিয়ে নেই ?

চেরোপালা দ ফুত্‌থোন নুঅ নুঅ তুম্বাজ ফুল,

বিঝু দ এঝঙ্ এঝঙ্ ফুলে রঙে সাজিনেই ।

তর আহ্‌ভাত ন উরের কিত্তেই মন মাত্তলর মিধেয়ে বাজসানি ?

রোমান্টিক গীদোসুর দ ভাঝি এভার কধা,

নেই কিত্তেই ?

এজের কিয়ে বানা কালবৈজেগীর ছজানী !

চোদো খরানত দ চিতজুরেই দিবার কধা,

এজের কিয়ে উমছাজ্যে গরম ভাপ্পানী ?

জুরো, র নেই ।

বুঝ্‌সোং তর জুওব নেই, দি পাত্তেয়ো নয় ।

 

সেহ্‌ক্ পেয়োং,

তুম্বাজ কুত্থুন এভ’ !

ফুল দ নেই । ফুত্যে ফুলুন ঝরি যেয়োন

সুগুনোহ্ কংগ্রং পাঘোর মাদি লঘে মিঝেয়ে ।

এলেয়্যে বাগান আঙি যেইয়্যে দাঙা আঘুনে ।

কুত্থুন আর ফুদিবাক ফুল ?

বাহ্লা তুলিয়ের কজ্জালত ফুলোবীজি,

চারা গাজ নার্সারীত বান্যেহ্ ।

কুত্থুন এভ’ আয় মিধেয়ে বাজ !

ফর্মালিন বিজ মিঝিনেই যে ফুল ফুদে,

চদগর মালী সাজী যে বেবার গরে ।

 

যিয়োত ফুল নেই, পেঘো নেই

পত্তাপত্তির নানা রঙ নেই,

ভঙরার মধু নেই যে ফুলে ফুলে

রোমান্টিক অহ্‌য় সিয়োত কন গাভুরে !

 

সেনত্তেই এ ছজানী,

এ ছজানী কেনা মারেবার ছজানী

আহ্‌ভিলেজর ধগানী,

জাম খেয়ে দুঘোর ব নিঝেইচ ।

গরুলোর আকসোয়ে পবন’ বোয়ের ।

কালবৈজেগীর বর ব সান বেক কোজেই নিদো মাঘে ।

রম’ গুন্ধেলর লোহ্ পাত্থরদেবাল ভাঙি-

নিঘিলিবার চায় খেলাং জাগাত ,

ভজ্ মারেবার চায় বোনবোন্যে নরগর আঘুন ;

ফাগু বানেবার চায় যমরাজার বিজের’ কিদেব ।

ঈনজুরো গরিবার চায় সোয় ন পাজ্জ্যে বর্মা ত’

এক ফজত সুঞ্ঝুগোর ধেক ফেলেই ।

 

মুই পুঝোর গরঙ অঝার দেবাবোরেহ্,

ও দেবাবো ! তর বুগোত কালামেঘ কিত্তেই ?

তর দোল সোজ রঙান কুধু আহ্‌রেয়োজ ?

চেরোকিত্যে ঘুর খো, আমাবান্যেহ্ চোঘোসান,

ত সাঙেইত তারাঊন কুধু ?

কুধু এচ্ছ্যে চান্দোবী ?

বেক দ আহ্‌রেয়োজ, ঘুপঘুপ্প্যে আন্ধারত এগাঝারা তুই ।

মুরোত গুজুরি পাদারা কিজেইক,

তেপ তেপ পরের কিয়ে চোঘোপানি ?

তুই কোই পারিবে নি মরেহ্ ?

 

বেক অলর ।

খবর পাহ্‌ঙ্, এ পুঝোরর কন’ জুওব নেই ,

দাংদারাজ্জ্যে নমাত্যে ঈরুক রুহ্মুচ্সান ।

কালা আন্ধার ন অহ্‌বে কেনেহ্ !

জুম্মদেজর ঘরপোরা কালা ধূমো কুধু লুগেবে ?

ঘুর ন ওহ্‌ই কেনে থেবে !

আর্মি বুন্দুগোর বারোজো ধূমো কুধু রাঘেবে ?

জাগা আহ্‌রা জুম্মো জাদর চোঘোপানি-

ব নিজেইজ’ ভাপ কুধু পুঝিবে ?

তর্ গুজুরোনি মুকালা রুহ্মুজ,

সেটেলারর বলাজুরত পরান যাদে; বাজিবের ধারোঝে-

সবিতা তুমাচিং সুজাতার কিজেইক

ফুল’করি অকালে ঝরে বানাহ্ আহ্‌বিলেজ।

======০০======                  (রাঙামাত্যে)

 

৬৫। এইল মনর কোচপানা

২৯/০৫/২০১৩ বুধবার, ৩:২৫ পিএম

 

তুই আহ্‌যি যেয়োচ ভালুদ্দুরোত

মরে এগালা বানেই,

এগাঝারা জনমান আঘে এয’

তর আঝায় তর পধে চেহ্‌ই।

 

তুই এবে আর’ ফিরি

মর এ চিগোন টং ঘরত,

টাঙেবং গিরিত্তি সাজেবং জিংকানি

ওহ্‌কনা মঞ্জাই লদক্‌দদক।

টানাটান্যে নাগানাক্যে রুচ্যেল ডুলোমায়

পুঘে খেয়ে ঝেলাং বেরত বেগা খুলি যায়,

মক্তবা তল চাজা কেদাকতুক উইয়ে ধরা

তুও যে আমি  কন’ নয় নাদংছারা।

সচপদর ভরনভিরন ঝালাব্বর রিদিসুধোম

তুইমুই সং অহ্‌লে থক বজেই পারিবং।

অবাঙে ব খেলে এইল মুহ্‌রোত্তলে

ঝরঝরি নোনেই সুরে ডাগে তরেমরে,

বেল’ ছদক্কান ফদাংতাং দিজনর গাওলি লগে

জুন’ পহ্‌রান পতপত্যে আমা মন’ ধগে;

ঝারবো রাদা দুরোত ডাককারে

সগদাবো সেকসেগায় ঝকপরি কন সারে!

পাল বদি সত্তা পেইক দবাকাধি বিরেজ’ লঘে

আদার তগায় নিমন ধারাঝে।

 

ভরন্দি আদামর গুরোঝাগত পত্তি গুদু খারাত

নাডেঙর দেবংসি পাগত একদিন মিঝি থেদে,

নুক্কুরুক নচন্দি ঘিলে মারি সাল্যেঙত

নোনেয়ে বিগিদিলৈ বাযিদং আল্যেঙত;

ইজিবিজি চারাহ্‌ মালা টুকটুকজনাত

বো খারা মুগুজো বনত সমাজ্যে ঝাগত।

কুঝি মনে খুঝি গরি

সংসারর চিদেচজ্জা কুদ্দুর পাজারা ফারি

খেলাং মনত উচ্ছো তুলি খল’ খল’ র গরি,

কেদেক কেদেক আহ্‌ঝি লঘে

দিন মাদান যেদ’ কাদি।

মোনো দেজত মোনো আহ্‌ভায়

এইল মনর কোচপানায়,

আলাঝালা মেয়েবানত থেদং জরা বদি।

 

ইক্কে তুই নেই, নেই তর আহ্‌ঝি

দিচোঘত ভাঝে বানা কগরা নিজেনি,

যিদু তুই যেয়োচ বেদমে কুচ ফেলেয়োচ

সিদু কি মর এইল মনান আঘে?

এইল মোনোর সুঞ্জুক্যে আহ্‌ভা উভোত গরি পেবে?

বেক্কানি ইদু এল’ ঝালাব্বর চেরোপালা।

কিজেনি তর কুবোনর রাত এল’?

যিয়েন মুই পুরেই দি নপারং!

কালিক! তুইদ’ মরে সে যু’বো ন দোচ

দিবারও ন চাহ্‌চ!

জুরো গরি চুবে চুবে মরে পাজারা ফাচ্‌সোচ।

মুই যিদ্দুর তত্তেই চিদে গরং

মত্তেই দ’ তর ইত্তুকও নেই,

সিত্তেই দ’ যেয়োচ তুই মরে পাদারত ফেলেই।

নবুঝোচ তুই এইল মনর কোচপানা

কালা মনান সদর ভাবি গরিলে মে সাদাঙা।

অহ্‌লে দেঘচ ওবিল এব’ সবনে

সে ধারোঝে বেরান্যে সাজি উরি এযচ মনে মনে,

অহ্‌লে সিয়ে কহ্‌চ ওবিল মর কধা সিদু কারে কারে

নাঙঈনি মেয়ে পেবার চাহ্‌য বান্যে দোরর আরে আরে।

মুই বিচ্ছেচ ন গরং, ম ধক্যেন ধল চিত তারার অহ্‌ব’

আল্যেঙে সদরে তরে কির্বে দেঘেব’!

কামাক্কাই লুদুক মনত ঈল নেইয়ে গরি

কাদাকাত্যে দুঘোত আগচ বান্যে সুধোম ধরি।

---০০০---

(বিলছড়া)

 

ডালি দেনা : মর জুম্ম লাঙনির উদিজে, যিবেই চুচ্যেঙনাগার আহ্‌দত ধরি ফেলে যেয়েগৈ মরে, আঃ বুবর সবনত দুঘোত আঘেগৈ।

====০০====                           

৬৬। অঘালারেঈ

২৭/১১/২০১৪, ব্রেসুপবার, ১০:১১ পি.এম

 

যে মরেহ্ কোচপেইয়্যে তে মরেহ্ বিজ দেঘে

যে মরে মধু দিয়্যে এচ্চ্যে তে বিজ জাজে,

যার কহ্‌রত্ মাধা গুজাং তে দিলো ঠেং পাদি

আজাআচ্চ্যে অহ্‌দং যার্‌লৈ তে মাল্যো পিছলাধি।

 

যার পরানান ম পরান একবুগর এক নিজেইচ

এক পোইয়ত্ যে খানা এক জেবর এক ইহ্‌জেব,

এক পিলের ভাদ’সাচ্ এক এহ্‌রার রাঙা লো

এক কধার এক আঝা এক সবন এক উদো।

কি অহ্‌ল’ এচ্চ্যে তর্, কি দঝা এল’ মর

কন ভুদো করম্ গরি ভাঙি দিলো গমসদর্,

ভাঙিলো দোল জধা, পুরিলো সচপদর

ছারানাধা সুঘোর গিরিহ্ ওহ্‌য় গেল চদরভদর্।

 

এচ্চ্যে তুই কন জাগাত মুই আঘং কন পারাত

পেত তরের ভর দিনেই পরেয়ের্ চাংচারাত,

এক সাজর ভিগেরী আহ্‌তপাদি যেইর মাঘি

থাগোয়ের মেইর-মুগোর বাদা পেইর্ চুওর-লাধি।

আধাপধত দিজনর পত্তিদিন দেঘা অহ্‌র্

চিনপুচ্চো নেই ইক্ক্যে জাঙারে খেয়ে এ মনর্,

দিচোঘত মালাবান্ন্যে কন জাদুগরর

তরমর্ দেঘানাত্ চিনেচিনি ন অহ্‌র্।

চর্মা লঘে বদলি যেইয়ে বুঝনার্ আক্কলান

ফারক ওহ্‌য়ে সদস্স্যেত্তেই ন পুরে পরানান্,

উগুদো বিজকাদায় ঈংজেয় আঙে চিত

দাতভিরি দাত খেয়্ মারিবের উধে জিত্।

অসুরর কালা ঈধু গিরগিরেই উধে মর

মুধভিরি ঠিয়াচ্ তুই ধিকধিগেই কাবে রন্,

তরমর লারেই অহ্‌য় ভদাভদি বদাবদি

ধার নঘে আঙুদিনে’ ধারাধারা রগনি।

বলখিজি হ্মেরাহ্মেরি ঠেলাঠেলি চেই

কারে কন্না দি পারে পরানান খেয়্,

ধুমুলুক খেলানিত চেরোপালা আঙি যায়

মেদিনির এহ্ইল বুক রাঙা লোয়ে ভরি থায়।

মরঙর মুই মরি যর তুই আর মরিবং

এ লারেই কিত্তেই তুঅ ন বুঝিবং?

 

তর মর ফারগত দিসেরর মাদিআন

কোজে যার যেধকপাই সরকেই যার আমা মান,

পরি যার আমা বল লেদা ওহ্‌র দিন দিন

ভাগ্যচাক্কা ন ঘুরের আর বাঝি আঘে ঠিংঠিং;

ন আবুজের যেদক্‌খন আমা মনত বুঝ

সেদক্‌খন খেয় পেভং ধুজো উগুরে ধুজ্।

আমারে লোই খেলি যেব জাদুগরে খেলা

সাপ-বিজির ঢং দেঘেই বজেব’ মেলা,

কাঝি বান্ন্যে বান্দরর থিবুরুক্ নাচ্

বানে থব’ আমারে নমনসুক্ ভাজ্।

 

গমেদালে চিদে গরং চিদে গর তুই

লারেয়র কি গরজ্ এক কবালর গুই,

পল্লানর অক্‌থ এলে তরে মরে খেব’

যেদক্কন মালাগান আমা চোঘত থেব;

চর্মা খুলি খালি চোঘে চেই গমে রেনি

চিনিবোং গেচ্ছ্যে গরি আঝল রঙানি,

থামিবো অঘালারেঈ জুরেব’ পিত্থিমি

এগত্তরর কোচপানালৈ ভরিবো মনানি।

পুরোনি সুঘো দিনুন এভাক উল্লোফিরি

থিদব্বরে সুক্কোন থেব গদা উমোর ধরি,

নুঅ গরি ঘরগিরিত্তি ঝলপল’ অহ্‌ব

মোনে মোনে আলাঝালা খুঝির আহ্‌ভা বেভ’।

=======০০========                     

(রাঙামাত্যে)

র ভেদ: ১।ভাজ= বন্ধ্যা