কুধু দোল *বি.বি চাঙমা মেয়েরেগা(১৮০)

১৭। কুধু দোল?

২৫/১১/’১৩ সোমবার বেল্যা ৩:৩০ বাজি

দোল দোল কি দোল?

কেয়্যা না মন দোল?

কাম না কধা দোল?

আহ্‌ঝি না কানানি দোল?

খুঝি না বেজার দোল?

চালাক না গ্যেনি দোল?

ফুল না পেইক দোল?

কি দোল, কি দোল?

বেক দোল, বেক দোল।

দোল দোল, দোল দোল

চেরোপালা বেক দোল

সোজদেবা চাহ্‌দে দোল,

মেঘচাগা আহ্‌দে দোল।

আগাজর তারা দোল

জুনোপহ্‌র চাহ্‌দে দোল।

এইল দোল, রাঙা দোল

মুরোহ্‌-মুরিহ্ যদ’ দোল।

গাজ-বাজএ তারুম দোল

ঝর্‌ঝরি লামে দোল,

রানজুনি খিঝে দোল

বোয়েরান বাঝে দোল।

বেলানর ছদক দোল

খেলাঙে পিত্থিমি দোল।

দোল দোল, দোল দোল,

মিলিঝুলি বেক দোল।

দোলো সেরে নেই দোল

আহ্‌জিক দোলে ওলোঝোল।

সংসারান গদা দোল

মানেয়ুনে নেই দোল,

দোল ফেলেই চেহ্‌ই দোল

দোল তোগেই বাঝে কোল।

ঘর থেলে গিরীহ্ দোল

দোল গিরীহ্‌র্ সুধোম দোল,

দোল সুধোমে মানুজ দোল।

দোল মানুজে জাগা দোল, দেজ দোল।

নেই দোল, নেই দোল

দোল সাজি কুজুরো বেগে-

মঝানে-তঝানে।

দোল দোল, দোল দোল

কামে-কর্জে বেগে দোল!

সীলে নেইয়্যা ঠাগুর দোল!

বেআকল্যা নেতা দোল!

তুস্যাবলা রেজ্য দোল!

ঘুজ মাঘে বাবু দোল!

কাবর-চুবোরে গুন্ডো দোল!

কু-কাস্যাগী মানুজ দোল!

বেক দোল, বেক দোল!

দারুদিয়্যা জিনিজ দোল!

আজলত্তুন নগল দোল!

দোল দোল, দোল দোল

দোল তোগেই ওল্‌ঝোল।

নেই দোল, নেই দোল

দোল নাঙে ভান্যালৈ-

কাদি যার জিংকানি

যাদন-এত্থন দিনানি,

সমাজ আর দোল নেইয়ার

দেজদুনিয়ে বরবাদ যার।

কুদু দোল? কুদু দোল?

চগলা দোলোত্ জনম পোল।

===০০০===

র ভেত:

১) সোজদেবা=নীলআকাশ

২) আহ্‌জিক=অতি;

৩) ওলোঝোল=বিভ্রান্ত

৪) গিরীহ্=পরিবার

৫) কুজুরো=হিংসুক; কপট

৬) বেগে=সকলে

৭) তুস্যাবলা রেজ্য=অত্যাচারী রাষ্ট্র

৮) কু-কাস্যাগী=দুশ্চরিত্রবান

৯) দারুদিয়্যা=বিষ মেশানো; ফরমালিন যুক্ত

১০) আজল=খাঁটি

১১) নগল=নকল

১২) ভান্যা=খারাপ

১৩) দেজদুনিয়ে=বিশ্বজগৎ; সংসার

১৪) চগলা=বহিরাবরণ; খোলস

১৫) পোল=পরিল’র তেককাবা ধক (পোল=পড়ল)

======================

একগজর ফুল *বি.বি চাঙমা মেয়েরেগা(১৭৯)

১৬। একগজর ফুল

৩০/১১/’১৩, সনিবার, ৯:৩০ এ এম

একগজর ফুল বানা তত্তেই

তুই নিবেনি আওজ গরি?

চুমিবে ফুলো তুম্বাজ

মন গভীনোর আল্হ্যেঙে?

মর চিতরিবেঙর ফুল্‌বাগানত্তুন

আন্যোং বানা ত নাঙে।

কোচপানার রেনু-পাগোরে ফুদেয়োং সে ফুল

সুঞ্জুক্যে আল্হ্যেঙর তিপ্‌তিপ্পে মিযেইলে,

চেরোপালা গল্‌গলেব’ তুম্বাজ

আধুলি মেয়ে’র ঈর্‌বানে-

যুনি নেযাচ মর এ ফুলুন।

নিবেনি নাগরি? নিবেনি তুই?

গুজেবে এ ফুলুন ত চুল্‌জুধোবুঅত,

নহ্‌লে, চিক্‌ছরা বানেই পিনিবে বুগোত।

গুজেবে দিকানত, আদর গরি তুলিবে কহ্‌রত

মুই চেই থেইম্ একরেনি, বানা তর দোলা’নী।

তর পাদল উত্‌তানী, ভেঙা-ভেঙা চোঘোভং

গুল-গাল মূহ্‌ওসীরি, কোগিল-কোগিল চোক্‌খুন।

পরী সান কেয়্যেন্ তর, গোজেনর ভরন বর্

কন’কিচ্ছু ঊনো নেই, বেক দোলা’ন তর।

সেনে মর লাঙোনি বানেদুং সমারী

মর জীংকানির পত্তি মাদানত,

অঘুর লারেয়োত, সুঘে-দুঘে সপ্পানত।

যুনি গজ’চ তুই মর এ ফুলুন।।

=================

তিননোহ্ লামাহ্ *বি.বি চাঙমা মেয়েরেগা(১৭৮)

১৫। তিননোহ্ লামাহ্

২৬/১১/’১৩, মঙ্গলবার, ১০:৩০ পিএম

(১)

পেইক্‌কুঅ ডগরের চিং চিং চিং

খঞ্জন নাহি বর টুদিং

এহ্‌দে আগেরে উরি যার

ছরা ধুরোত বেরেই চাহ্‌র

এক্‌নিমনে পুন নাজেই

নালেহ্-মোরেহ্ মাচ তোগেই

পেলে ধরি খায় পুধি মাচ

আদেপেদে পুরাই সাজ।

(২)

লোঙ্যা বাজত মারাঙা

কেয়ে সোজ তার ঠুত রাঙা

সিরে তিগুদে জুরখাবত

মাছ ধরিবার তার আওজ

পানি ভিদিরে পুদি মাছ

রান্দাল-নাবালাং-গুধুং মাছ

গং ন বুঝে তে চরে

টুদিং-মারাঙার খাপ লরে

দিলো নী ঝাম তে মাচ তাগী

ধরা ন পল্ল রান্দালী,

চুধো চুধো মারে বূর

শক্তি-সাওজ অহ্‌ল’ চুর,

মন’ এগেমান ন ছারে

টুদিং-মারাঙায় মাছ ধরে,

ধোয্য-সোয্যই কাম গরে

পেদ’ খরাগী তার ফলে।

(৩)

মানেই কুলোত জনম যার

গ্যেন সাগরত খরাক তার,

টুদিং-মারাঙায় মাছ ধরে

মানেয়ে সুদোম-গ্যেন ধরে,

আক্কল-বুদ্ধি জুরিবে

গ্যেন সাগরত বূরিলে,

গ্যেন্ সাগরর ডাঙর মাচ

শীলে-বিনয়ে ধর্মরাজ।

সিক্খে-দীক্খেই সুধোম ধর্

গুন-সুদোমে ফুদোক্ পহ্‌র্,

গ্যেনে-বিগ্গ্যেনে পরবুঅ ওহ্‌ই

কাবিল-কদগী অহ্‌লেগৈ,

ধর্ম ধরি দিনানি

কাদেই যেবে জিংকানি,

দান-শীল-ভাবনা

গরি লবে তবনা,

শীল-সমাধি-প্রজ্ঞা

বুদ্ধোর পত্থান দবদবা,

ধুঅ পধেদি আহ্‌দিলে

ধ্যানে গুরু সাধিলে,

মার্গফলে ঝালাব্বর

অহ্‌ব’ জনমান থিদব্বর্।।

=======

জদন ঘরত বাস্সে থেইম *বি.বি চাঙমা মেয়েরেগা(১৭৭)

১৪। জদন্‌ ঘর’ত বাস্সে থেইম

২৬/১১/’১৩, মঙ্গলবার, ৬:৩৫ পিএম

আগাজর ঐ ধুপ মেঘচাগা সেরে

ওহ্‌ম মুই ছারাল্যা চিল।

যুনি তুই এগালা অক্তত্, গুঝিগুঝি কানে তর মন-পরান

বেরঙা সবনানি তরে লেভেই যায়,

কাদাকাত্যে দুঘ্‌কানি বুক ধিবে দি দে

বনাবনা বনিজেইচ যুনি নিঘিলে গদা চিত কজরেই

সেক্কে তুই মরে ঈধোত্ তুলিচ;

পেবে সুঞ্জুক মরে নাঙঈনিলে,

দিজনর আল্হ্যেঙানি আজুল গরি লোচ তুই

কোচপানা নিজেনি চোঘোত্ ভাঝেই।

দুরোত্ ঐ রিপ্‌রিপ্ এহ্‌ইল মোনুনোত্

ওহ্‌ম্ কির্বে সোনাত্তালি।

দাংদাঙ্যে চোত্-কাবারি উমুস্যা খরানত্

যুনি তর্ চিদোভুই ফাদি ফাদি যায়,

কোচপানার তিরোজে পরান তাক্‌তাক্যা ওহ্ই উধে।

চেরোপালা বোয়েরান্ যুনি থামি যায় নিধুর্ অগ’মানে

সেক্কে তুই আহ্‌দি যেইচ গাঙ’পারে

দিআহ্‌ত্ বাভেই পদনাঝুবোত্ ধরিচ আল্হ্যেঙে।

মনে মনে মরে ডাগিচ্

ম কধা ঈদোত্ তুলিচ, যি’নি কয়োং তরে।

ত কোচপানার ফুল্‌বারেংঙো সিধি থোচ ম নাঙে,

ওকুলে জদন্‌ঘর’ত্ বাস্সে থেইম্ তরে।

===০০০===

র ভেত:

১) জদনঘর=বাসরঘর

২) বাস্সে/বারচে=অপেক্ষা

৩) আজুল=অঞ্জলি; দুই হাতে কুড়িয়ে লওয়া

৪) নিজেনি=স্মৃতি

৫) উমুস্যা=ভ্যাপসা গরম

৬) তিরোজ=তৃষ্ণা

৭) তাক্‌তাক্যা=অদম্য; রাগী স্বভাব; জাঁদরেল

৮) গুঝিগুঝি=গুমরিয়ে কাঁদা

৯) নিধুর্=নিষ্ঠুর

১০) অগ’মান=অপমান; মনোবেদনা

১১) ওকুলে=পরপাড়ে

১২) ‍সিধি=সিলগালা দেওয়া

==================

মন’ বঞ্জাম *বি.বি চাঙমা মেয়েরেগা(১৭৬)

১৩। মন’ বঞ্জাম

২৬/১১/’১৩, মঙ্গলবার, ১১:২৫ পিএম

মন’ বঞ্জামা’ন্ নিত্তো উরে ধুঝি নেইয়ে আগাজত্

দেঝে দেঝে উরি ভঙে নানান্ পৈদেনত্।

বন্দর তার ঠিক নেই কুবোত্ পরিবুঅ

ইন্দি যাদে উন্দি যায়, পথ তার ঠিক নেই, কুবান ধরিবুঅ।

পাজিন্ধার ভেবেরাদিয়্যা কাক্কে কুর বদন্

কাক্কে ইতে কাক্কে উতে উত্থন-লামদন্।

লুভ-তিরোজ-ঈংজে-পিঝুম, রাগ-রিস্সো পিরে,

বার্বো-অগ্গেইন্-মধা কূলী-তিনেং-উলোমত্যো,

ভেবেরাদিয়্যা চরিয়েত্তুন্ ইয়ুন্ কয়েকজন্

আহ্‌ঝি-রঝে, রং-তামাঝায় অক্ত ফেলাদন্।

পাচ্ চালেয়েই পাইলত্ অহ্‌নে তারে চালাদন্

পাঝিন্ধারর্ কধায় কধায় উত্থোন্-বজদন্,

চোক্-কান্-নাক্-জিল্-কেয়্যে পাচ্‌জনে

বলাবল্যে মনান্ চালান্ তারা ধগে ধগে,

দোল্ চেহ্‌বার্ দে’ই চোক্খুন্ মজন্

গম র সুনি কান্,

নাক্ ডুবি থায় তুম্বাচ্ দরবত্

সদ্যে খায় জিলা’ন্।

কেয়্যে’ন্ তগায় সে জিনিচ্সান্ বাঝিলে সুঞ্জুক্ পায়

পাচ্‌জনে টানন্ পাচ্ কিত্তেদি মনান্ কুন্ধি যায়!

সে সেরেদি পাজিন্ধারুন্ জাগুলুক গরি উদোন্

চিলাংতিক্‌তিক্ পাইলত বেগে ঊহ্‌ব্ আহ্‌রা ওহ্‌ই মুদোন্।

জাগুলুগে তিনাংফালাং পাইলত দুমুরে

উর্গো বঞ্জাম ব্রেকফেইল অহ্‌ই গরেহ্ এক্সিডেন্ট!!

=====০০০=====

র ভেত:

১)বঞ্জাম=বিমান

২)পৈদেন=বিষয়

৩)পাজিন্ধার=যাত্রী

৪)ভেবেরাদিয়্যা=অনেক

৫)বলাবল্যা=পরিপূরক; একে অপরের সহযোগিতা

৬)চেহ্‌বার্=দৃশ্য

৭)চিলাংতিক্‌তিক্=হতভম্ব; ভয়ে বেগে দৌঁড়ানো

৮)তিনাংফালাং=লাফালাফি;

৯)উর্গো=উড়ন্ত

=======