মেয়েরেগা কবিতা থুপ ৩০

 ১৪৭। কোচপানার তানাপোজ্যেন

2/9/'18, সোনিবার, রেইত 10:45

 

যুনি কোচ পেলে মরে ন ধগরেচ

সরকারি চাগরিত্তে মরে ন ধেদ্রেচ

যুনি কোচ পেলে মরে ন খেদেচ

পাচ জন সান্যেন মরে ন বানেচ।

নেয়ে মান্সোর পো মুই, নেই লাখ টেঙা

ঘর' ভিধেবো আঘে বানা, সিয়োত থান বাবালৈ মামাহ্,

মুই সিধেভুল এক মানুচ, ন জানঙ্ কন পাকচক্কর

সত পধে মুই চলি যেবার চাঙ-

সেবাদে কিচ্ছু গরিবের নেই মর;

তুই বেক খবর পাআচ মুই কেঙিরি চলঙ

খবর পাআচ আর' আমনর বংস গরহ্'ন।

সেদামত নেই মর লাখ টেঙা ঘুচ দিম

তরে সুঘে রাঘেবার অজল বিল্ডিঙ তুলিম।

টিভি, ফ্রিজ, ইংলিস খাট পাত্তুঙ নয় জুরি

টাইলস দ্যে ফ্লোরত দামি সোফা ভরি,

তেলপেদা দাঘি সান ঝমঝম গরি চলিম

তেলেঝালে এহ্'রা মাজে সোত্যে পৈয়োত তুলিম।

 

যুনি কোচ পেলে এজ ভাঙা ঘরত

জুরিহ্ থুমোত মোনো লেজাত চিগোন আদামত

ইধু মর পরি আঘন গুরো ভেই ভোন

নেয়ে বাপ-মার রঝ'মলা সাতরাজার ধন

ভাদ' রাদত পিদেয়ে কেয়েত ফাদা লেঙেরা

সিক্খের রাদত তারা বেক ঊরোইঝারা,

তারার সুঘোত ঢালিবার চাঙ মর বিদ্যেআনি

দিএক অহ্'রক সিঘেপরেহ্ সাজে দিবার জিংকানি।

ঘরে ঘরে বিএ এমএ অহ্দাক আদামত

যুগর তালে আহ্দি যাদে অহ্দাক তারা তনক,

সে সবনে বাজি থানা কোচপানা গমপানা

যুনি তুই সরিত অহ্'লে আয় লগে সোনা,

মোনমুরোহ্ আঙুদি পেকমাদি কজদি

মাধা ঘাম ফেলেনেই থেম জনমভরি

আমন সুঘোর জু রাহ্ বেক দুরোত ছারি

বেগর সুঘোত উচ্চোরেলুঙ মর সুঘকানি

যুনি তুই গেস্যেক গরি মরে কোচপেলে

বল দিবে মুজুঙ পধত আহ্দেকদালে,

আ' যুনি ন পারিলে মরে সাঙেত দি

কোচপানার সস্তা মঝান মরে ন দিচ্সি;

মুই যেম এগালা আহ্দি মর তাক পধত

ত আহ্'লে তুইও যেচ তর যিদ্দুর অহ্ত।

          =0=                 

                                          (রাঙামাত্যে)

র ভেদ:

ন ধগরেচ= শর্ত ন দিচ; ধগরান= শর্ত;

ধগরানা= শর্ত দেনা; সমক খাবানা

ন ধেদ্রেচ= যেনপায় কধা ন সুনেচ; ঝোল ন গরিচ

ধেদ্দেরানা= ঝোল গরানা; ঝমঝম= ভাদে-কাবরে আলা।

==========

 

১৪৮। ও মন

২১/০৮/২০১৫, শুক্কোরবার, ৯:৩৮ পি.এম

 

ও মন! তর কি এদক গঙ্

ঝিমিদোত কুধু যাস

ঝিমিদোত কুধু থাস,

ন পারঙ্ তরে রাঘেই ধরি।

বলে বুরেই ন এঝঙ্ ত লঘে

আহ্’দি বুরেই ন এঝঙ্

মনজক্খায় ঘুরাস মরে

তর ঘান্দি কলত,

লাঙল জুঙোলে মরে তর আহ্’ল্ সুঅস।

ত লঘে মুই ন জিনঙ্

তরে দ’ মুই ন চিনঙ্,

বানা তর কধা রুজে

অহ্’রান মুই তর ধুজে।

 

চিদো খুলুঙোত তর ঘর

বেরাকরাহ্ কেয়্যে’ন্ মর

তুঅ দ’ তরে ন দেঘঙ্,

ধরিয়ো দ’ ন পারঙ্

ম লঘে থেয়্ ম উগুরে উত্থোমুত্থো গরস।

ত গিরোস মুই, ম আরত তুই

মরে তুই ওধেয়োস

ম রেজ্যো লয়োস তুই

মরে তুই শাসন গরস

মরে তুই অডার গরস,

ত চাগর মুই

ম গিরোস তুই,

ত ধগে চলে বেক

ত এ’নে আহ্’দে বেক

উহ্’গুমোর গোলাম মুই

বানা তর ধাপ পুরোদে

জিংকানি যায় পাদারত।

===========         

                        (রাঙামাত্যে)

১৪৯। সময় মাক্খে

০৮/০৯/১৮, সোনিবার, রেইত ০৯:৫৫

 

ডায়েরির পাদানি বেক খালি আঘে

লেঘা নেই তেগা নেই বানা দাগ টানা

উগুরে পুর তারিক মাস বঝর' ঘরানি-

চুধো বোই আঘে; পুরোন ওহ্য় বিদি যেয়।

আগর অক্থ আ ঈরুক অক্থ কত্তমান ফারক

চিদে গরি বুঝঙর দিন বদল কারে কহ্য়;

সময়র লঘে বদলে আক্যেঙ সময়ে মাঘিলে

মনে কহ্'লেও ফিরি ন পারে আহ্জার আঘুদিলে।

ডায়েরির বদলে ইক্খু স্মার্টফোন নোটপ্যাড-

পিসি ম্যাকবুক; জেবত আ' বক্সাত

কলমর কালি ফুরেবার ডর নেই

দিআহ্দর আঙুলুন লাইফটাইম পেন

দিনঠিগে খুত্তেনেই তুও অহ্'রান নেই

পত্তি দিনোর যদ' কধা ঘটনা লেঘি

ডিস্টেঠিগে কাগোচ ডজনঠিগে কলম

লাগিবার কধা; খালিক যে ঊনো থায়

ডিভাইসর ভার্চুয়াল দেবংসি পাদানি।

 

কবিলগর কবিতার বনাবনা পান্ডুলিপি

লেখক সাহিত্যিগর কুর্ কুর্ লেঘা

আধঙ ন গরে আর টেবিল জঘা,

আলমারির থাগত ধুলপোজ্যে ডায়েরির

পুঘে খেয়ে পাদা; গজক ন গরে অন্য বোইয়োর জাগা

কাবাকুদো লেঘার ফাদা কাগোচ্সোই

র ভেদ: লাঘাখাস্যেঙ্ = ডাস্টবিন

ভরন ন অহ্য় আর লাঘাখাস্যেঙ্,

ভাবিবের মাধান নেই কলম কামেরেই নিমনে;

উভো মুহ্ গরি কীবোর্ডত আহ্ত বাঝেই-

ঈরুক ভাবনাত ডুবি থায় লেঘিয়েই।

উপন্যাস কবিতা পজ্ঝন যা' লেঘা

নিবন্ধ পবন্ধ গীত নাটক আ'-

বেক্খানির পান্ডুলিপি ইক্খু হার্ডডিস্ক

মেমোরি স্টিক নানা ধগর স্টোরেজ ডিভাইস

জিবনর সমারে লেবেধা যেয়ে সময়র ডাগনিত।

          ==0==                          (রাঙামাত্যে)

১৫০। কন্নাহ্ সে দেবংসি

১৬/০৯/১৮, রবিবার, রেইত ০১:৩৫ এএম

 

পোগোনগুলোর দুঘুত দুঘুদোত মিঝেল নিঝেঝত

নারি কাঝির থিবুত থিবুদত রগে সিইরে উম লোত,

ঘনাত্যে বনাত্যে এহ্'রা দমা ছাজে ছাজে আহ্'র মগজত

এ কেয়ের বেক রোমে রোমে ধুজুরি নিঘুচ ধুজুরিত

মিলগুল ওহ্য় দির্মিজত মিলেই যেই চের মহাভূদত

কন্নাহ্ সে দেবংসি গাঝা আগুলাই কিত্থেই তুগুত তুগুত?

নুও ছেম উধি দিকপাদা মেলি উরিফারি যায়!

তোগেনেই উদিচ নপায় কুধু তার সাগিন তোজি

রাজত্ত গরে ঊত্তোমুত্তোয় ছাগল ঘরর বাঘসান

কন্না তে দেবংপহ্'রর গঙত্তুন বেচ ঝাদি ধাবা দে

দেজমুলুক খেয় ফুরাই এক তেবদর আগে

তে চেগার ছোর্ছোস্যে বিজোল বির্বিস্যে পারাদলা সান

ধরিবারি চেহ্বার চেহ্'লে ন পারে ধরি, আমনর তাক লরে

তে যে অহ্দত থায় অহ্দত বঝি ঘত ন লরে

অহ্'রান পেরেসান তাত্তেই ভিলি তার তুস্যেত্তেই

এ জগত গদা দির্মিচ ওলোঝোলো ধুলুমুলু

চলি যায় আজিরেন তার তুমুরুর খেল

আঙি যায় বানা আঙারা দলা ছেই ওহ্ই উরে

খজেয়ে পিরেল্যে সান নিলমরা জিংকানি

বার বার টানি বার বার আনি আর' নুও গরি

ঘেচঘেজেই যায়; বার বার কাবুগোত পোজ্যে চঙরা সান

সিক গরা যেয়; কত্তমান দুঘোত কাজাবাচ পুরি যায়।

তারে তগানা ধরানা যে ধারাদিঘোল থায়-

যেদক্খন লাহ্ক ন পায়।

============           

                                            (রাঙামাত্যে)

 

র ভেদ :

১। পোগোনগুলো = হৃদপিন্ড ২। ঘনাত্যে= ঘনিষ্ট ৩। বনাত্যে= বন্ধুত্বপূর্ণ

৪। ধুজুরি= অণু ৫। নিগুচ ধুজুরি= পরমাণু ৬। দির্মিচ= ব্রহ্মান্ড

৭। চের মহাভূত= আগুন, পানি, মাদি, বোয়ের। এ চেরান কেয়েনর সিরিত্তির রুচ্যেল।

৮। দেবংপহ্‌র= বিদ্যুৎ ৯। ঘেচঘেজানা= নিপীড়ন করা।

 

 

১৫১। ও কাবিদেঙ! ও কালিগর!

১৬/০৯/১৮, রবিবার, ০৭:৪০ এএম

 

এভ' ঘুরঙর এভ' তগাঙর তরে

রহস্সো ন বুঝং তগানাত আঘঙ

ভবাঙ্গ চিত্তোই ঘুর ঘুর মনে

আঃনলে ফদাংতাং গ্যেনে বুঝনে

তুও ন মিলে তর দেঘা, তরে পাহ্'না।

কয় বার, কয় জনম ঘুরিফিরি এলুঙ

যেম আর' ফিরি আর' এম নুও গরি,

বানা তরে তগাদে, তরে বুঝদে

ও কাবিদেঙ্! ও কালিগর!

তুগুত তুগুত জুগোলেই যর মর এই ঘর।

তুই এধক কাবিল কেনেহ্!

ন বুঝে ন দেঘে ঘর সুদো দেদে

এধক নিগুচ বুননে তুননে তুই রাজকাবিল

তর দর'মর' সচপদর সক্তমক্ত বান

আহ'রত্তুন আহ্'র দর' খুদো মুরখাম।

সেদামত ন কুলাই বলে ন উদুরাই

ভাঙিছুরি ফাগু বানেই মাজারা লুগেবার,

কদক লারেই, কদ' ঘাম বল ফেলেই

আহ্জার উস্সোতুলি চেরেত্যা গরি

তরে ওধেবার, লারেয়োত জিনিবার

এগামার এগেম লোই সমগত থিদো ওহ্য়।

কদক সমক ভাঙি, যেইয়্যে এগেম লরি

জিনিবার ধারোজত ধারাদিঘোল ওহ্য়,

আর' তাদানা ফুরি উধানা নুও গরি

এগেম বানি; ইক্খুনু ইদ্ধুর, আর' কুদ্ধুর কিজেনি;

চলি যেব লারেই এগামার পৈনালে

মুজুঙে যিদ্ধুর ধচ আঘে থুম আঘে।

===0===                  

(রাঙামাত্যে)

র ভেত: ১। ভবাঙ্গ চিত্ত(পালি)= অবচেতন মন

মেয়েরেগা কবিতা থুপ ২৩

 ১১২। মুই ন থেলে

02/12/2016, সুক্কোরবার, 04:37

 

মুই ন থেলে ত হুরে মরে তগেবে
বুকপোরা অঃব’ তর দুগ আঃভিলেজে।
দি চোঘোত ধারা বেভ মরে চিত পুরি
সাঙুদোরত বোই থেবে চুধোমূ গরিঃ।

আগাঝর অগনন তারা ঝাগত পারিলে তগেজ
ঝরি যেয়্যে ফুলোর হগরা তুম্বাজত পারিলে তগেজ।
যুনি রেদোর আন্ধারত মনানে হিদিঙ গরে
তুলবুল্যে ওঃয় উধে মর ধারোজে
জুনো পঃরান হেয়েত গুলিজ মরে আল্যেঙে।

সাঝন্যে পঃরর ঝিমিলেনীত পারিলে তগেজ
ঘজা আঃরা গীদো হেলাঃত্ পারিলে তগেজ।
যুনি এগালা অক্থত সলামারি মনানে হানে
উরম্বা ওঃয় উধে মর তিরোজে
জুরো আঃভা’ন হেয়েত গুলিজ মরে আল্যেঙে ।

              =0=                               

(রাঙামাত্যে)

১১৩। ভাঙা কবাল
01/12/2016, ব্রেসুপবার, 10:30pm

 

ধারেয়ে তাগলান খেগা ওহ্য় গেল
বেরঃত গুজেয়ে বাদে
ভাত পিলেবো পাঃ আগাত থেল
বানাঃ পেচ্চাল বাদে।
বাগ'কামত লামিম আঝা নুও জুম কাবিবার
জাইজুক্কোলে এলুঙ মুই বিজধানুন কুজিবার।
ন অহ্’ল' জুম কাবা তাগলান ধস্সে জাঙারে
ফেলা রান্যে কাজেই পাঙর পেজাল্যে আব' সমারে।

কুজি রান্যেত জুম গরানা ধানানী ন বলে
আল্লো বালা যাদন বানাঃ ছ মাঝ' খরাগী ন ফলে।
ভাদে-কাবরে নাগানাক্যে রুচ্যেল জুরন নেই
খানা রুজে সোত্যনাত্যে পরেয়ে সেদাম দেঈ।
মান্সো ঘরত সজপদরে ভরন গিরিত্থি
বুনোকাদায় নিরোচ মুই নেই আমনর সিরিত্তি।
খানা জবর কামত আলসি কামেই ন পারঙ ভাত পানি
জাগায়ো নেই জরায়ো নেই কেনেঃ বাজিম কিজেনি।

             =0=                                      (রাঙামাত্যে)

 

১১৪। জিংকানির আন্দলে

29/11/2016, মঙ্গলবার, 10:00am

 

একদিন যেম্বোই লুগি মুই খামাক্কাই

থেয় ন পারিম যুনিয়ো পরানানে চায়,

ম নাঙে দোর-ফুগুদি খুলিবো পিত্থিমি

পরি থেব সঙঘরত ম ছাবাবো মুই ভিলি।

পরি থেব বানা বন্নাঙর ভুধিবো

মর বেসেদামর ব নিজেচ,

বিজগত ম নাঙে নাক চিবিবাক

মরে লোই ফ্যেস গরি মান্সে আহ্জিবাক।

যে জনে আগে যেইয়ে মর ধুর কাজেই

ধুল্যে ওহ্য় সে পধত আঘজ মু লুগেই

সে পধে মুই যেম তর খুচ আহ্দেঈ

বেল’ পহ্’র মাধাত লোম সে ধুল্যে কোলোই।

পরি থেব বানা মর পাঞ্ঝা কধানি

কদ’ গীত কবিতে জঘা সাদচ্ছে আঝানি,

জিংকানির আলামান মান্সে রেনিবাক

তলবিজোত এগাকরা বজঙান দেঘিবাক।

যে জনে আগে যেইয়ে মর ধুর কাজেই

ধুল্যে ওহ্য় সে পধত আঘজ মু লুগেই

সে পধে মুই যেম তর খুচ আহ্দেঈ

বেল’ পহ্’র মাধাত লোম সে ধুল্যে কোলোই।

             =0=                                 (রাঙামাত্যে)

 

১১৫। জিংকানির খাতা

(নচিকেতার জীবনের খাতা গান্নোর ভাচবদল।)

ভাচবদল : মেয়েরেগা

29/11/2016, মঙ্গলবার, 11:20 pm

 

অক্থে অক্থে পিত্থিমিয়ান খাদ’ পারাপাঙ

হুবোত খুচ ফেলেম আহ্দানা কধা বাদ,

গুজোঙ এ পিত্থান মর এক্কা জিরেন পোক 

এঃদক সবনর ভুধি লোই হুধু ঠিয়েই থেম।

 

সবনর দোল ফুলুন সময়র ধুল্যেলৈ

কাজরে ন ফুদোন মারুভাঙা ওহ্য়।

মুই দোঙ বানা কোরোলিলৈ গধা

সবন আর সময়র কোল বাঝে এগজা

চুধো আহ্দে বেন্যে বেল্যে।

 

জিংকানির এ খাতা খাল্যে তার পাদা

ঈহ্জেবত বজিলে ন বঞ্জায় এক নাদা।

মুই দেঘঙ তুও সবন এভ

মনানরে সাজাঙ যে ধ

খাজাত বান্যে সত্থাপেঘো সান।

           =0=                    (রাঙামাত্যে)

১১৬। তর দোলে মাত্তল মুই

২৭/১১/২০১৬, রবিবার, ৪:৪৬ পিএম


পৈল্যে দেঘাত মরে পাগল বানেয়োজ

ও দোলবী, ডো নেইয়ে পুরী,

থাদার পজ্যে মাঞ্জোসান ছরল পরি আঘঙ

তর কেয়ে রঙর ঝিমিলেনীর তেজে।

আহ্! কি গধন তর, কী তেজ

মুই মরি যেম তরে ন পেলে।


এঝ মুই অদ্ধেক মদিছন্ন তর মাত্তলে

কংগ্রঙ ওয় আঘঙ যন্ত্র মানেয়োসান

তুই ন এলে ম কেয়েত ন বাঝিলে

মর ঝালাবুলো ন যেব।

বিঝরে বিঝে কাবে এ কধার ধগে

তর হিরেধার দি মরে বিচ তুলি দে

যুনি সোই ন পারঙ মুরিবার চাঙ ত নাঙে

নঅঃলে বাজিবার চাঙ ইত্তুক আল্যেঙে।


খবর পাঙ তুই আর পিঠদি থেয় পাত্তে নয়

দুরোত সরি ন যেবে

পূজারী আগুদিয়ে মা লক্খীসান ম কায় এবে।

মনান পাত্থর বানেয় থেয় ন পারিবে

কারন সিয়েন ইঞ্জেবর সাগিন,

মর নোনেয়ানে তরে ঝাগেরেব

ভক্তর ভক্তিয়ে পাত্থরত পরান অঃয়

তরও সেসান গলিবো মন ম কোচপানার টানে।

=0= (রাঙামাত্যে)

মেয়েরেগা কবিতা থুপ ১৬

 ৭৭। সুঞ্জুক

০৪।০৪। ১৫, সোনিবার, ১০:১৩ পিএম

পুনোং জুনানে রুবো রঙ ঢালি মরে গাধেয় যার
দোঘিনোর জুরো আহ্ভাআনে আইল্যেঙ গরি যার
মাধবী ফুলুনে তুম্বাজ ছিদেনেই মাত্তল বানেয়োন
চেরোপালা পুকজুক্কুনে মর সাঙেত অহ্ইয়োন।
একঝাক জুনিউনে জধা তেম্মাঙ বজেয়োন
করকরি বেঙুনেয়ো গীদো মেলা ফেলেয়োন,
ঘরঅ কনাত তুত্তুবি আ' খক্কেঙ্ঙো খাক্খন থেয় থেয় সার দি যান;

তারায়ো আঘন ম লঘে,
ঐ দুরোত উরিঙে মোন ধিমে ধিমে গরি থেয়ো জাগি আঘে।
উধোনত জবা ফুল্লোই দুলি দুলি যেন মরে দেঘার তা মনঅ খুঝিয়ান
নয়নতারা ফুলুনে যেন লোবিয়োত গর'দন মরে-
গোঝে দিনেয় আহ্জিয়ান।
কি সুঞ্জুক লাগের এচ্যে মর গদা রেত্তো
ঘুমানেয়ো মল্লোই বেলক ওহ্ইয়ে পারাপাঙ,
সেনত্তেই পরানে কহ্'র রেত্তোভো জাগি থাঙ।
এসান অক্থ এসান জু বাস্সেই আঘে সিধু
লাঙ্যে-লাঙোনির নিঘুচ নিঘুচ নোনেয়্যে নাগরানি
আহ্জি যায় যিধু সবনর জাল বুনি সাত গাঙ সাত মুরোহ্ ফারি
চিদোর মেয়্যে সদরে দিজনর আজাআজি
মত্যকুলে টানি আনি সর্গর সরপ সুঘখান।
কনঅ লাঙ্যে এঙিরি চোঘোত ভাঝার অবিল
তার আহ্ওজর লাঙনিরে লোই
অহ্'লে লাঙনিয়ো সেঙিরি তা লাঙ্যেলৈ।

অহ্'লে আরঅ কনঅ এক সংসার ত্যেগী সাধু মানেয়
যে তবত বোইনেয় জগদর শান্দির কধা ভাবের
ভাবের তার মনঅ ভিদিরোর যদঅ পের্গা কাজনি দবদবা পত্থান
সে লঘে পিত্থিমি মানেয়োর লুভ তিরোঝর সুদোআনি।
নহ্'লে সুঞ্জুক পার ওবিল তে তার নিচিদে জিংকানীর কধা ঈদোত তুলি
বানা গোঝেনর ভক্তিলোই ধ্যান সাধনর এগেমান ধরি।

এচ্যের এ মাধানান কাত্তেই কেজান রাহ্ মিলেই দের
কনে কন জু তোগেই কি তাক গরি মনঅ আহ্ওজ পুরার,
কারত্তেই সুক অহ্'র কারত্তেই অহ্'লে দুক
বানা মুই ন বুঝঙর কি চাঙর কি পাঙর
কনঅ উদিজ ন মিলের; তুঅ মুই গম পাঙর
এচ্যে রেত্তোর এ অক্থয়ান মুই সুঞ্জুক পাঙর।

             --00--                                     (তাংগুম)

 

 

৭৮। অমানেয়োর জাক্কো যু

২৩/০৩/২০১৫, সোমবার, ৯.২৬ পিএম

 

কেদাফল চাদে রাঙা খেলে তিদে
কাবরচুবরে দোল মানুজ কধায় কামে তুলে ভিধে।
বাহরে ভিদিরে সাপ জুদো
কুবোত সমেই পেভঅ উদো
দুম্মো সাবর দি কিত্যে মু
অমানেয়োর জাক্কো যু।

           --00--              (রাঙামাত্যে)

 

 

৭৯। উমোর বানোক কোচপানান

২৫/০৩/২০১৫, বুধবার, ৮.৩৪ এ.এম

ভরন্দি আদামর রাদা ডাক গোরু পালত মনাঝাক, তিনশিরে আহ্দের তত্তরেই তাঞ্জাঙঅ পানি পরের ঝরঝরেই, সারাল্যে উরের আগাঝত গাবুরি কুম্মলৈ যার কুও গাঙত, দাঙা আগুনে ঝার পুরে লাঙঅ আগুনে মন পুরে। হরিঙ চরের রোঅ বনত তুই আঘজ অনসুর ম মনত, বারিঝে দেবা ঝর ফেলায় পরান ছতপদায় তর জালায়, মুরিচ পাগানাত জুরবো পেইক তরে ভাবঙ্গে দিনে রেইত, আগাঝত উদে সুবতারা চিত ন জুরোয় তুই ছারা, পেক্কো ছরাত কাঙারা তবনা তরে পাঙ পারা। চগদা ডগরের চেজেকচেক ন যায় ছারি মর মনঅ সেহ্ক, গরম খরানে সুগোই গাঙ তরে আহ্‌রেম্বে পারাপাঙ, ঘুত্যে মাধাত মারাঙা ন গরিচ চিত্তি মন বেঙা, চানঅ বেলর সত্যসান উমোর বানোক কোচপানান। -0-                         (রাঙামাত্যে) ৮০। উভোগীত ০২/০৪/২০১৫, ব্রেসুপবার, ৪.২৫ পিএম (খবংপজ্যেত্তুন জুম্বোবি খেদারমারা তা মোল্যে ঘরত বেরা এনেয় পধত বেরাদে বেরাদে জুম্মোধন পরান্যেলোই লাঘত পা'ফি অলাক। সিয়োত তারা কি কি কোহ্ভুলো গত্থন এক্কা চঅ।) ১ মরত: কুত্থুন এস্সোস ও গাভুরি ন ধ চিনঙর চিনেপুচ্ছো অবার তল্লোই বারীহ্ মনে কর। মিলে: ন চিনিবে তুই মরে দাদো চেঙে কুল্যে মুই আহ্ওচ গরি পুঝোর গরঙ কন আদাম্মে তুই? মরত: যিধু এস্সোস খেদারমারা ইধু ম ঘরান দোয়ে গরি কবেনি মরে কুধু ত আদামান। মিলে: চেঙেই পারত খাগারাছুরি খবংপজ্যা নাঙ সিয়েন অল' চিগোন দা মর আওজো আদামান। মরত: চেগার খুঝি অলুং বেদো সুনি ত কধাআন বেজার ন পেলে এক্কা গরি কবেনি ত নাঙান। মিলে: বাপ মায় মরে নাঙ থোইদন্দে ডাগন জুম্মোবি দোয়ে গরি কনা দাদো ত নাঙানো কি। মরত: কেহ্'ল্যে নাঙান পরান্যে আ' নিজনাঙ জুম্মোধন ইধু কা ঘরত বেরা এস্সোস সদস্যে কন্না অহ্'ন? মিলে: তোমা আদামর চিগোন চানএ সিবে ম মোল্যে তারা ঘরত বেরা এঝঙ সময়ে তাঙল্যে। মরত: চিনেপুচ্ছো ওয়নে তল্লোই চেগার গম লাগের পরানে কত্থে এক্খান কধা পুঝোর গরিবের। মিলে: কনকিচ্ছু মনে ন গরি ন লাজেই ন ডরেই কোজোলি গরঙ যিয়েন মনে কয় পুঝোর গরিভের। মরত: এবার ভজা'ন সাহস পেলুঙ তল্লোঈ মাদিবের লেঘাপরা গরস নাকি চাঙর জানিবের। মিলে: খাগারাছুরি মহিলা কলেজত আই.এ ফাস্ট ইয়ার মুই পড়ঙর; তুই কি পড়স কনা তুই এবার। মরত: রাঙামাত্যে সরকারী কলেজত ইংরেজি লোঈ বি.এ অনার্স সেকেন্ড ইয়ার পড়ঙত্তে মুই। মিলে: খুঝি অলুং চিগোন দা মুই তর পরিচয় পেঈ যেম্বে এবার বেলানও যার মামিয়ো ঘরত নেই। মরত: কেনে কেনে আবাদা গরি তল্লোই লা'ক পা'পি অলং আর' খানক্খন থাক না বেদো খাক্খে ফারক অবং। মিলে: ঘরত যেনেই গাধি পেম্বোই আর' রানিম্বোই ভাত ইক্খুনু ইয়োত ফারক ওই না মুই যাঙর তুই থাক। মরত: যা যা সালেন বলে বলে তরে ন রাঘেম ধরি ত মামু আ' মামিরে কস্সোই বেল্যে বেরেম্বি। ২। (বেল্যে বেরা যেইনেই) মরত: কি লোই ভাত খর ও নাগরি কি তোন রান্যোস তুই বেল্যে বেরেম্বি কোয়োং তরে বেরাঙল্লি মুই। মিলে: ইয়োরেং সাকখোয় বিগুন রান্যোং আর' সিদোল তোন আয়না খাগি চুধোমুধো ভাতপোই বারী দোঙ। মরত: ন খেম নাগর মুই খেয় এস্সোং পেত্তা ভরন আঘং খেয় উধিউধায় আজের অনা তল্লোই গপ মারিবোং। মিলে: খানক্খন বাস্সাক ও চিগোন দা থাল-কদরা ধং ঘর-দোর বেক্খান পুঝিসারি মুইও আজের অঙ। ... (জুম্মোবি আজের ওয়আই) মিলে: ভাত জাজিনেই ন ধ খেলে আঘজ চুধো মুওয় পান চিগিরেট চলে নেনা আনি দিদুংগোয় মরত: নাধে বেদো পান চিগিরেট কিচ্ছু ন খাঙ মুই ইধু আয় না ধাগত বস্সি দিজনে কধা কোয়। মিলে: ধাগাধাক্যে বঝিবের দাদো মুই ধ লাজাঙর মামুলোঈ মামি বজং ভাবিবেক চিদে গরঙর। মরত: আবাদা গরি চিনেপুচ্ছো সমাস্যে সমারি ধাকাধাক্যে বোই কধা না কোত্থে বজং ধ ন গরির। কিত্থেই তারাহ্ বজং কধাক? সবাই বিস্সেচ ন যাঙ তারা দুনঅ জন সিধে মানুজ মাদি ঘিলে সান। মিলে: ইধু না তারাহ্ কিচ্ছু ন কবাক ঘরত কোয় দিলে মা বাত্তুন অকধা খেম্বোই ঘরত ফিরিলে। মরত: সেধক কেনে গরস্সে তুই নয় ধে চিদে'নি চিগোনত্থুন ধরি খবর পাঙ মুই তারা মনানি। মিলে: ওইয়ে দাদো মুই বজিলুং তরও ধাকঘাজি কি গপ দিবোং কি কধা কবং গর না আরগানি। মরত: আবাদা গরি বেরা এস্সোস ইধু কয়দিন থেবে বিঝু ধ আর বেজ দেরি নেই কুধু বিঝু খেবে? মিলে: বিঝুর যেরে পরিক্ষে আঘে লেঘা মাদেই পেম ইধু দাদো বিঝু ন খেম পরশু ঘরত যেম। মরত: এধক কিত্থেই কিজেকিস্যে আরঅ কয়েকদিন থাক আমা আদামান কেঝান লাগে গদা বেরেয় চা। মিলে: গম লাগের ধ তোমা আদামান চাধে চিত জুরায় বলপেয়্যে পাঙ ভরন্দি আদাম আমা দেঝঅমায়। মানুচ্ছুনো লোক্খী আঘন কনঅ ভেজাল নেই নিজো আদামত আঘঙ পারাপাঙ তরে সমার পেঈ। মরত: তুই অলেদে তাওনঅ কুল্যে জেলা সদরত ঘর আমা সান্যেন রুক্ষেঙঅ জাগাত কেনে চিতভিজের তর? মিলে: যে গাচ্ছো দাদো পধত পরে সে গাচ্ছো ন কাবিজ সেঙিরি কনেয় মরে ও দা লালি ন মারিস। মরত: বেজার ন পেইস ও নাগরি চলানা কধালৈ তরে বারীহ্ চিতপুরিবো পরসু গেলেগোই। মিলে: আদা ন অহ্ঙ বাহ্লা ন অহ্ঙ মুই ধ কনঅ তর মাগানা কিত্থেই ও চিগোন দা দুক কারিদ্যে ভর? মরত: তরে যে'ন্যে দেক্খোং নাগর বারীহ্ গম পেয়োং মনে মনে এক্খান কধা কধুঙ লাজেয়োং। মিলে: মানসোরে মানসে গম ন পেলে কারে গম পেবে কি কধা দাদো কবার চেয়োস এচ্যে কোয় পেবে। মরত: কিঝু কিঝু কধা আঘে ভাঙি কবার নয় মন গভিনোত ছাগিনেয় চেলে কাচকাবাস্যে অহ্য় মিলে: মুরোহ্ লেজা কলক্খানত চরের রাঙি ক ইঙিরাঙারে কধা ন বুঝোঙ পাঙ পাঙ ভাঙি কহ্। মরত: বৈদ্য লেঘে দারু তালিক আর তুলে আঙ আওজ গরি কঙর তরে জুরিবেনি লাঙ। মিলে: মুরো লেজা কলক্কানত চরের এক্কো গুই লাঙ গরিবার ও চিগোন দা অক্ত ন অহ্ঙ্ মুই। মরত: গেস্যে গরি কঙর বেদো তরে মুই কোচপাঙ্ তর সমারে উমোরত্তেই ঘর ধরিবার চাঙ্। মিলে: বাবাদাঘির আঝা দাদো তারা মনজক্কায় ধগেদিঝের জামেই চেনে বো দিবাক খামাক্কায়। সেনে দাদো মুই ন পারিম ত কোচপানা লোই বাপ-মা মনত দুঘ দিদুঙ নয় তারার উল্লো ওহ্য়্। মরত: বাপ-মা কন ত মনানত সমেই ন আঘন তুই যে কারে ঘর ধরিবে সিয়েন দ তর মন। মিলে: কদক আঝা আওচ গোরি মরে পালেয়োন বাপ মা কধা ন ধরিলে মুই দ পাবী ওম্। মরত: চিদে ন গোরিচ ও পরানি বাপ মা কধা লোই ধোই পানিয়ে কুলোত লদাক কোজোলি গরিম্বোই। মিলে: মামা লৈ বাবা খুঝি থেলে মর জনমান সুক উল্লো গোরি মই তারারে দিবার ন চাঙ দুক। মরত: আঝা গরঙ মানি লবাক বিরুদ অদাক নয় ইক্খে বানা ত মনত্তুন ঈঁ পুরেলে অয়। মিলে: ওয়ে দাদো এদক মরে কোজোলি ন গরিচ মর এ মনান তরে দিলুঙ গমেদালে ধরিচ। মিলে+মরত: কুজি কুজি বোয়েরে আলাই লাঙেল ছনানি ইক্খুত্তুন ধরি তল্লোই আমি লাঙ্যে-লাঙনি। মরত: পোরসু যুনি ঘরত যাচ নাগর চিকচিক্কে লাগিবো তরে ন দেলে গায় গায় থাক্কে মনান কানিবো। মিলে: ফেসবুক আইডি আ ফোন নম্বর ফেলেই দি যেম মুই কল গরিনেই আ নঅলে মেসজ পাদেচ তুই। মরত: ত ফোনান দে ম নম্বরবো সেব গরি দোঙ সিয়োত ফ্রেন্ড রিকোয়েস্ট পাদেই দঙর তরে ফেসবুগোত। মিলে: রেদো বেচ অর ও চিগোন দা কধা থুম গোরি এচ্চে নাঙে ফারক ওইনা এক অবঙ যেরেদি। মিলে+মরত: আদত ধরি আল্যেঙ গোরি কোচপাপী মনানী সংসমারে কাদেই যেবং মুজুঙো দিনানী। ... ... ... মরত: দেবায় গস্সে চকচক কালা কাক্কে দিবো ঝর আবাধা গরি এচ্যে তরে ঈদোত উধের মর। ভালকভিলোন ফারক তল্লোই দেঘাদেঘি নেই কুধু আঘজ কেঝান আঘজ মনে কর জানিবের। উত্তোর ধাক্কে পানকধাত্তুন ছিনঙর পানানিহ্ তরে নাগর ঈদোত উধিলে এঝে কানানি। যেবার কাদাল্যে কোয় যেয়োস্সে ঝাদি এবেগৈ বিস্সেস ন যাঙ এঙিরি তুই ছারি যেবেগৈ। এধকভিলোন বিদি গেলঅ তর ধ দেঘা নেই মনত রাঘেস তরে ন পেলেহ্ মরিম নাত দিনেই। মিলে: মূরো লেজা কলক্কানত চরেত্তে ফরাগুই নাত দি মরি নযেচ পরান ফিরি এস্সোং মুই। আগাঝন্দি উরি যাদন একজুর মোন বগা মরে এধক কত্তমান কোচপাস চাঙ্ঘে মন জঘা। যেয়োঙধরি তরে পরান নিত্তো ঈদোত থায় তরে ভাবি দিবে চোঘত্তুন এগজা পানি যায়। ছরা পারঅ প্রেজাঙ গাচ্ছোত ধস্সোন্দে প্রেজাঙ দেঘেই পাত্তুং দেঘেলুঙুন কত্তমান তরে কোচপাঙ। মরত: এধক বঝর লাঙ গরিনেয় মনঅ জঘা চাস এধক কেনেহ্ স্যংসামা মন মরে বিস্সেজ ন যাস। মিলে: সাল্যেঙত্তুন ঘিলে মারি ঘেইয়ো উগুরে ঘেই ইক্কুনু দিনোর মরত্তুনরে কনঅ বিশ্চেজ নেই। মরত: উধোনেধি লাগেই থয়োং দুবো দুবো বচ মুওত ন বাস্যে চিতনেই কধা কেনেহ্ কয় পারস। মনে পরানে কোচপাঙ তরে ম কেয়্যেত্তুন বেজ তুঅ কেনেহ্ তুই গর্‌অজ মরে এধক অবিশ্চেজ। সেঙিরিনেই বিশ্চেজ ন গেলে কিত্থেই মনান দ্যচ লাঙর নাঙে গুরো পুঅ খেলা মল্লোই খেলেয়োস। মানসো মনদোয় খারা অনা মিলের আরাঙ কাম আঝা দিনেই পাঝা দেনা নাঙে দেঘেনেয় লাঙ। মিলে: ছি ছি দাদো সেঙিরিনেয় মরে ন তাগিস এধক্খানি কনেই মরে ইজ্জোত ন মারিস। ম পরানান ত কেয়্যেনত ইয়েন তুই জানিস বিগিদি কধায় ত মনানত বেজার ন আনিস। কোচপাঙ তরে কোচপেম মুই যেধকদিন বাজি থাঙ মরি গেলেয়ো জর্মে জর্মে গরিম তল্লোই লাঙ। মরত: কিত্থেই তরে বেজার পেধুং ও পরানবি তুই খবর পাস বানা তত্তেই মর এ জিংকানি। বেলান জুনান যেধকভিলোন উধি ডুবিবো সেধকভিলোন ম কোচপানা তত্তেই ফুদিবো। তরে কোচপাঙ কোচপেই যেইম সবনে পত্থমে মরি গেলেয়ো কোচপেম তরে জনমে জনমে। মিলে+মরত: এচ্যে আমি সমক খেবং ধর্ম গোঝেন ধরি সংসার পাধারি ওয় গেলেয়ো ন অহ্বং এরা এরি। বেলান জুনান যেঙিরিনেই সত্য ধরি চলে আমা কোচপানার সত্য আঘে তারাহ্ ধগে ধগে। জনম লয়েই এ পিত্থিমিত একদিন মরি যেবং আমা কোচপানার আরাঙ সত্য পিত্থিমিত দেঘেই যেবঙ।। --00-- (রাঙামাত্যে)         ৮১। আহ্’দিম মুই কাদা বনত ৬/২/’১৬, শনিবার, ১:১৭ এ.এম   জিংকানির পত্থান মর ফুল বিজেয়্যে নয় কাদার উগুরে খুজ ফেলেই মুই আহ্‌দঙর। নরম বিচ্ছোনত সুখ্যা কেয়্যের উভুংপুং ঘুম নয় সিয়েন ম নাঙে বেগেয়্যে জুনোপহর্‌। এয়ার কণ্ডিশনর বির্বিস্সে গুধি ঘর চোনা চোনা তুম্বাজে ‍যুনি গলগলায়, নিদুকতুক সুখ মর সে’নি বেক দিন কাদে আনুদোর দুঘোর চিবায়্। নিত্য মর পুনে পুনে মরে লরাই তে নাদংছাড়া মানেয়োর ভাদ’ গরাজে রুক্যেঙ’র কনাছেরে লক্খী চিজি দারু রাধে পিদেয়ে কেয়্যে অহ্‌’রান তিরাজে। শিক্যের বেল’পহ্’র্ যে ঘরত ন সমায় অঘারাম আন্ধারে বানা বিজিরায়, টেঙা পয়জের নিরেতিত্যে তেঞ্জক গিরিত্তি শান্দি নাঙর কুসবনে তারে নিত্য খজায়। অদেগা গোজেন খলেই কবালর ভার সুরসুরেই দুমুরাই এগজা লাজে, পুঁজিবাদে শুজে তার লো এহ্’রা সাজ ভোগবাদে বেরেঈ ধরি এগজা খাজে। নিমনে নিগুজ গরি আদরর মঝান দেঘেই রদবল পরান কারেহ্ ভিদে মাদি চাজে দেজ দুনিয়ের কু সুদোম অসমান কারবার অসিভিল রাজসুদোম বেলাইন্যে সমাজে। ভ আহ্’রা সে মানেয়োর ‍সুঞ্জুক ন থেলে কেনে থাঙ মঝিগলি সুঘোর মাত্তলে, কেনে কহ্’ঙ্ কোচপাঙ্ চেগার জাদরে বাবু ওহ্’য় চেলা ওহ’য় তারারে পেরেলে। ইঞ্জেবে সলাসলি গরে মর লগে কেনে থেবে গাই সুঘে আহ্’জার পুঝোর, কানরে ন আহ্’দেলে লেঙরে ন বুগীলে দুখ্যার কবাল যুনি অহ্’য় ধোর ধোর। সেনে মর সমক খায় ইহ্’ধো রিবেঙে গায় মুই যেদুঙ নয় স্বর্গ নির্বাণে, যেদক দিন বেগর সুখ ন অহ্’য় সমানে সেদক দিন আহ্’ধিম মুই কাদা বনে বনে।।                      -০-                            (তাংগুম)   র ভেদ: ১। খজায়= বিষ খাবায় বা জাদু, টনা গরে। (খজানা= দারু(বিষ) খাবানা)। ২। খাজে= চেরো কিত্যে গুল গরি গাঝ’ বাগল সুলি দেনা যেনে গাজসো মরি যায়। (খাজানা/খাজেই দেনা)। ৩। মঝান= অভিনয়। ৪। ভ আহ্’রা= সুবিধা বঞ্চিত। ৫। চেগার=খুব ৬। পেরেলে= লুটেপুটে খেলে। (পেরানা= লুটেপুটে খাওয়া) ৭। ইঞ্জেব= বিবেক। ৮। সলাসলি= কধা টানাটানি। -০-