মেয়েরেগা কবিতা থুুপ ৩৮

 ১৮৭। ফিরি এইম মুই

              07/12/'18

 

আর' এইম ফিরি এই মুরোহ্ তারুমোত

সিল্লোছরা উজোনি যেইম এই জারকালত,

নাগত বাচ্ছে মোন উধিম পাত্থরত খুচ ফেলেই

ওই চুগোত মোনো তুগুনোত-

একজিরেন তাত্যে কেয়ে জুরেম।

 

এই মোন-মুরোহ্ ঝার-তারুম

চিতজুরোনি তজিমখলা

ইধু বলপেয়ে, ইধু সুঞ্জুক,

আর্যো অরহত কাদে যেয়োন দিন

তপ সাধনত রইয়োন এগামার।

ইধু মানেয়োর জোল নেই, নেই কোলোকালা

ইনজিপ জুরো বানা পেগো র ছারা,

চগদা, বান্দর ডগরি উধোন সময়ে

সেনেহ্ ইধু যা নিয়োমে তে নিয়োমি

অসময়ত কন' অনিয়োম নেই।

 

ফিরি এইম মুই হেইল মোনচাবত

এই পাত্থর পত বেএই-

হাদি যেইম এগালা সারাল্যে,

কাচ্ছায়ন, মহাকাস্যপ যেঙিরি যেয়োন

তারারে লেইক হাদেবার হাওচ পুরেম।

            =০=                           (তাংগুম)

 

১৮৮। পবারনার ছদক

          22/10/18

 

পবারনা দোল দিনোত বেক্কুনো মনানি হোক দোল

ন থোক কন দুক জাগুলুক ন থোক কারর কোল।

ভরন ভিরোন হোই উধোক পুনোঙ চানর গরনে

আন্ধারানি ভচ্ নেযোক কোচপানার পহরানে।

 

এ দিনোত গোঝেন বুদ্ধো তার সিস্সো সংঘরে

দুচ অপরাত খাম খেনেই খমা দেদি গরিনেই-

থেবার কোয়ে এগত্তরে।

মিলিঝুলি যুনি থেলে সাসনত হয় উন্নতি

দেচ সমাচ দোল হয়, বেগে হাদান সেই নীতি।

ভিক্খু সংঘ আকমুলিম যুনি হাদন সং পধে

দায়ক দায়িকা লেইক হাদান ধর্মগুরু যদেবদে।

 

যুনি হলে একজধা রাচসুদোমি মানুচজন

দলে দলে ভাক ন হলে জাদর ভালেত হয় অগনন।

নানা চিদে নানা পত্ যুনি হলে ধুঝি এক

সে ধুঝিত লুমোদে বারিহ্ সলেমলে-

ন খোক সালেন কন থেক।

হাদেহাদে ধরাধরি বানেতানে হাদিলে

ধর্ম সমাচ রাচসুদোম থিদ হব গমেদালে।

ধর্মগুরু সমাচগুরু জাদর মাধাজুধো

যুনি হলে থির উজু, ন খায় খদাউজুদো।

 

বুদ্ধোর এ দোল বিনয়ান মানি ধরি চলি যেই

থেবং সুঘে ঝালাব্বরে হিংসে পিঝুম এরিনেই।

বুদ্ধো কধা মধু কধা তেবেই পরের পিত্থিমিত

আজুল গরি লোইনে বেগে থেবং সুঘে জিংকানিত।

               =০=                     (রাঙামাত্যে)

 

১৮৯। এই মুরোহ্ পধত

         04/12/18

বলপেয়ে বাচবন বলপেয়ে ভুলোংবন

তারুমোর গাচ্ছুন সুর সুর

সংমধ্যে মুরোহ্ পত্ বেঙাকঙা

সে পধত যাদে যাদে মুই ইত্তুক হরান।

তুও দরহ খুঝে হাদঙর অন্সুর,

পধ’ পাজারাত উলুগো খেরত রুবোরঙা সিরোপানি-

বাজিলে গিরগিরেই তুলে

রোমান্সে কেচ উভো জারেবানে

মন্দা বোয়েরানে যেন্ ফুজুফুজু গরি যায় কানে কানে।

মুই যাঙর দুরোত তাকচেই

ঊ মোনো কাবত খোওই ঢাক্কে কাবরর ঊমোত

একমুত তিত্তি পেবার পক্কিতিরে কোচপেই।

 

এই মোন লাঙেল দচেল

থলে দাবে কলক ভুইয়ানি

গাচ-বাচ ঝার তারুমানি আমা পরান, নিজেচ;

এই তাঞ্ঝাঙ কিজিঙানি গরগরি মোর নাল

হাবাপানি রানজুনি বেল’সদক জুনপহর

রেদোর তারাউন জীবনর সমার।

ইধু বাজি থানা আলুলোদুলুলো গরি

কোচপানা আল্যেং বুগোত ভরি,

ন থোক জোল জঞ্জাল, রিস্সো পিঝুম।

তারুমোর গাচ-বাচ্ছুন তারা কদক সদর

মোন-মুরোহ্উন কদক সিধে

বারবো নেই, নেই কন চেলভাব

খালিক অজল হলেও।

পক্কিতি কেঝান সাচ্যেগুচ্যে; থরে থরে-

দারাই দারাই দোলান রাঘেয়ে,

সেই দোল সিরিবিরি মানেয়োর হোক

সুক-সান্দি লিবি থোক পিত্থিমিত।

      =০=                    (তাংগুম)       

র ভেদ:

তিত্তি= তৃপ্তি; পক্কিতি(পালি: পকতি)= প্রকৃতি

সিরিবিরি= শৃঙ্খলা

১৯০। আহ্দানা পধত

         ২৪০৮২০

আহ্দানা পধত উজুধো খেবে

উজুধো খেলে খুচ দর' অহ্'বে

এগামনে আহ্দিবে নলা গুজুরেই

যেধক আহ্দিবে সেধক লুঙিবে

পুরি ফেলেবে উজুদোর দুক

তাগি যেয়ে জাগাত লুঙিলে সুঞ্জুক।

যেধক মাদেবে সেধক জানিবে

যেধক জানিবে সেধক বুঝিবে

যেধক বুঝিবে সেধক তাদিবে

তাদি পারিলে ঠগা ন খেবে

পিত্থিমিত ভুলরে বেগে সচ পাহ্'ন

সেনেহ্ ভুলোত পরি ন থেচ জনমান।

          =০=                  (তাংগুম)

১৯১। জিংকানির বেলান দুবি যায়

০১০৭২৪, সোমবার, বেল্যে- ০৪:২৮ বাজি

জিংকানির বেলান যিয়োত দিবোর অহ্‌দে অহ্‌দে দুবি যায়

পহ্‌র ছিদেবার ছলাত আন্ধার লামি রেত অহ্য়,

তনক তোকতোক্কে সময়ান বেঅক্থে থুম অহ্য়,

জুরো পরি যায় গদা সংসার, বোয়েরানো যেএন মহ্ অহ্য় সে ছলাত।

উগোরছলা মারি নিঘিলি গেলে ব

আমনর চিন মাজারা কিচ্ছু আর ন থায়।

অনিত্য খাক্খন্যে মক্তবা জিংকানি, সিরিত্তি বেক্কানি

আঝা ধারোচ মেয়ে তিরোচ্ছানি

লুপধাপ অপুরনে থুম অহ্য়, অতিত্তিয়ে মহ্ অহ্য়,

রোংচোঙ্যে এক্খান সিনেমা পদ্দা যেএন কালা ওহ্য় উধে।

মানুচ তুও আঝালৈ বাজি থায়

অনিচ্চিত মুজুঙত খুচ বাবেই তুও তে আহ্‌দি যায়

খক্কে মুরি যায়, পীরেত পরে, খক্কে কি ঘদি যায়-

মানুচ বুঝি ন পারে, উদিচ ন পায়, মেহ্ত ন পায়

অগ্যেনে কদক সবন দেঘে, সবনর যেরে সবন বুনে

আঝা গোরি থায় লাম্বা মুজুঙোর।

কামর যেরে কাম’বাক আরাই, গম-ভান্যে কদ কি গরিবার চাই

ন পারে বাক ধুজেই, ন পারে কাম ছিরেই

নিধুকতুক সময়ানত সাধিবার যু ন পায়।

কামসিরি জানদে জানদে, কাবিল কাত অহ্‌দে অহ্‌দে

সিঘি পরি তনক অহ্‌দে অহ্‌দে

তার ঘেই ভাঙি যায়, বানত বানা খায়।

এঙিরি একদিন বেককিঝু ভাঙিচুরি

দির্মিচ থাহ্’র গোরি ন পারি

মনে ন কোয়ে গোরি, পিত্থিমি মেয়ে বুগোত গোরি

তে মুরি যায়, ছরল অহ্য়, ঈল নেইয়ে থুম অহ্য়-

এক্খান জিংকানির; অদ্ধেগত দুবি যায় রাঙা বেল।

                 =০=

                                          (রাঙামাত্যে)

মেয়েরেগা কবিতা থুপ ৩৭

 ১৮২। জুমকাবা বাগত্তুন লাঙনিরে চিধি

০৫০৪২০২২

 

জুম্মোবি পরানি,

জুমকাবা বাগত্তুন তরে লেঘঙর এ চিধিআন

যুনি পেলে মনদি মাদেচ আ’ মত্তেই বুদ্ধো সিধু একজুর বাত্তি আঙেচ।

চিক্কোবি কির্বেবি,

তর মন গাঙান কি সুগুনো লাগে এই চোতকাবারিত?

কানফাদা দাঙদাঙ্যে রোদো তই আঙে নেজায় মনতারুম?

পরান তুলবুল্যে ওহ্য় উধে এভ দিবুচ্ছে কভো কুরিলে?

চিকচিক্কে পাআচ নাকি বেলদুবোনি অক্থত বেলপুক দগরিলে?

বিঝু দ এঝং এঝং ভাতজরা ফুলুনে কদন

লুদিনাক্সই তুম্বাচ ছিদেই মরে বাত্যাদন

বিঝু পেক্খোই খবর আনে মরে দাগি কয়

“লাঙোনি তরে বাচ্ছে আঘে চেয় পধমায়

তর আঝায় দিন গুনে রেতবাইনে সবন বাজায়

লাঙ্যে দা কেঝান আঘে কুধু আঘে ঘুমসবনত তরে তোগাই

বিঝুর অক্থত বিঝু সমার তরে পেধ’ চায়”।

লাঙোনি, পরানি মর, পোগোনগুলোর ধুগুত্থান

চিদে ন গোরিচ, তুই মন মরা গোরি ন থেচ

মনর সাহজে বুকদর’ গোরি দিনুন রেত্তুন কাদেচ।

এ বঝর নই ন এলুং বিঝু পরবত

মুজুঙে যে বিঝু এবাক সিউন যেনে বেক্খুন অহ্’ন আমাত্থেই সমার

সে ধারোঝে আহ্ওচ গরি আঘঙ্ মুই কামত

বানা তুই মুই নই,

আহ্জার লাঙ্যে-লাঙোনিও যেন খুঝিরাঝি আইলেঙ গরি-

বেক বিঝুউন পালেই পারন

সে গরজে মুই আঘঙ জুমকাবা বাগত।

জুমান দোলে ন কাবিলে আরাকরা ন কাজেলে

গিরিত্থির সুক ন থেব কনদিন, ন থেব বিঝুর উচ্ছো

রাধত পলে পরেয়ে গাভুর ওহ্’য় পেলে

কুধু পেবে সুক পেরেসানিত থেলে?

তুই মামারে আ’ বাবারে দোলেই চেচ

নাক্স চারাবো নিত্তো পানি দিচ

ফেজাকজা সেনি দোলে কাজেই দিচ

মন গরিচ সিবে আমা পুও।

নাক্স গাচ বচদিঘোল আ জাদি গাচ

দাঙর অহ্’লে দোল ছাবা দিবো, তুম্বাচ ফুল ফুদিবাক

আহ্’র দর’ গাচ কিনেই বিয়োঙ বানাদে কাবিল অহ্ব

আ’

ঘরর থুনি দিলেও সত্ বঝরে কিচ্ছু অহ্দ নই।

খালিক দাঙর অহ্দে এক্খা সময় যেব

বঝরতিগে বাচ্ছেই থা পুরিবো।

ধোজ্জো ধরি যুনি চেরেত্যা গরিলে

একদিন তে দাঙর দিঘোল ওহ্য় ঝুবুর বোদিবো।

নাগরি,

মুই এম একদিন জুম কাবি ফুরেলে

আধং কাজর দো অহ্’লে

ভাতজরা ফুলুন নুও গরি ফুদিলে

ভুজুগো ফুলুন ফুদিলে,

কান্দোরি ফুলুন ফুদিলে।

——-০———                       (রাঙামাত্যে)

 

 

১৮৩। একগঙ্যে

১৮০৫২০২৪

এ চোইদেল ছোর্ছোচ্ছে মাদিত্ খুচ্ দি

থিদ হ়োয়্ থিরুজু থিয়েবার্ চেল্হে,

খুচ্ নরম্ বিজিদি যায়্ ঝরা মাদি লঘে

তুগুনোত্তুন লেজাত যানা এক্কু ঝুরুদে;

মুই সে ছোর্ছোচ্ছে মাদিত খুচ্ গারাঙ্

রম্হ হ়োয়্ নহ়ালেই লংখ্রং থিয়েই থাঙ্।

আঙুলছিনিবের গঙার নাল্হত্ মুই উজোনি যাঙ্

কেইবান্যে বিজোল চাদারাত ধাবা ধাবা বেরাঙ্,

মুই উল্লো মুই উঝুদি মুই অসাধ্যরে সাধং

ম পধে মুই একগঙ্যে হ়াদানাত্ কার মানা ন মানঙ্।

মুই তিগিনিছিনে মুই উরোম্বা তিনেঙ্ মর্ অজত্

কাররে ন দরাঙ্ কাররে ন লাজাঙ্ তাদদে মর্ হ়গত্,

মুই একগঙ্যে মুই একমন্যে একছুত্যে মর্ হ়াদানা

একতাক্কে মুই এগাগুল্হি মর্ তাকতুগোত ল্হুঙোনা।

———০——–

(এম্পেন, অরুনাচল)

 

১৮৪। অরুণাচল ডায়েরি

১১০১২৪

 

বরগাঙ উজোনি ঊরিঙ্ ধাবা দি যাদে যাদে

উত্তোরকুলোত আভর খেই

কুগিমোন লাপদি আঝাম্ করতদি

আগরি নেফাত লুহ্‌মি ধিংগাঙ' পারত বোই-

অগন্দি সিলো কুরোত; ঈন আহ্বা, জুরোপানি লঘে সমার বদিলুং;

অরুনাচল' গাভুরির লোবিয়োত, গাভুচ্ছের সংপরানা

বুরো-বুরি মেয়েদোয়ে আলুলোদুলুলোত

মন পরান জুরেলুঙ্।

দুঘোর পচ্ছন সুনি সুনি চুধো মূ ওহ্য়

ভালক অনবিনো কাদিউধি

রনদুক খিজি চেদনে চেরেচ্থায় সেরেকুনে ঝালাব্বর গিরিত্থি দেঘিলুঙ্

'আকবাল্যের দুক্খান সার' মনে মনে ভাবি

আহ্জি মূয়ে ভেগেদেই দুঘো সেরে সুক্খান জুরিলুঙ্।

বরগাঙ গদাপানিয়ে দুবেই দ্যেহ্ তারার বাবজাগা ঘরপাদা

জাগা আহ্’রা মাদি আহ্’রা একতাল বন্দা গেলাক বরপরঙ।

পীরে পুরি মুরিধুরি যাদে যাদে অদ্ধেগর সংভাগ লুহ্‌মিলাক নেফা,

ধিংগাঙ পারে পারে সাবাক কলক ভুইয়োত বর বর তারুম ভাঙি

আগাচ নদেক্খে ঘুপ ঝার, জিংবন ধোও গোরি ঈরুগর আগর পিরী

জাগা জুরি নিজেচ লবার থক বোজেয়োন; জুম-ভুই ভাঙি লারে লারে

সুগুরি বাগানে চাগালা সাজেলাক, দপদবা গিরিত্থির সবন সাজেলাক;

মাত্তর সিয়োদো তারার ফি দঝা ন ধেল জনম জিংকানিত্তুন

রিফুজি নাঙে তোজি বাহ্-রা থেয়, অন্য জাদর ফ্যেচ ঘিনোত-

রেজ্য-রাজার সাদাঙা মেয়েলৈ জিংকানি যাদন গঙেই যুক যুক ধোরি, পিরীত্তুন পিরী।

দেঝত যেএন বরগাঙে দুবেই মাচ্ছে, ইধুও মারে ধিংগাঙে বঝর বাগেনে

বরবান গোরি ভাঙি ভাঙি নেযায় মাদি, সাজেয়ে বাগান, ঘর-দোর;

যে মাদি ভর গোরি পরান বাজে সে মাদি কারিহ্ লয়্ উভো ধিংগাঙে

মানুচ বারহ্-ন জাগা কমে, সে মায় খেই দে রেক্খজি গাঙানে

এঙিরি নিত্তো ধিংগাঙান অঝার অহ্‌য়, অঝারত্তুন আর’ অঝার অহ্‌য়

মাত্তর অরুনাচল’ চাঙমা কবাল সেধক খাদ ওহ্‌য় এঝে

ভাগ্যর চাক্কাবো মহ্ অহ্‌বার চায়; সুঘোর বদলে দুক্খানে আঘুদে।

                      =০=

                                                 (অরুণাচল)

 

১৮৫। নিমুচ্ছে আন্ধার

 

নিমুচ্ছে আন্ধারে সাভি এঝের এ পিত্থিমিত

চেরোপালা বানা মরা হিজেক

লোকান্তরিক নরগর নারগীউনো সান

 বিজিরাদন মানেয়্যে আমনর ভালেদি পহ্’র।

তগেবার যেনেই সে পহ্’র বানা আমনত্তেই

মুজুঙোত আঙুদি ধরে আর’ এক মানেয়োরে

সোত্তুরু তে ভালেদর ভাগ লব মারি আমনরে।

সাত্থর আজুরোহ্ই মাত্তল বেগে মাধা ঝালাবুলো

পর মারিনেই হেনে উদি পারে বানা এ চিদে,

‘মানুজ মানুজত্তেই’ ইরুক গাল্লো হধা

হোচপানা মেয়ে দোয়ে জেদা ছন্দভাচ;

লাঙর মঝানে ইক্কু টেঙা মারে লাঙ্যে-লাঙনী

মন মানুজোর নকভাজ চলে অত্থ-সাত্থ রেনি।

বর জাত বর দেজ বর বারবো ভুধি

গুরি জাত দেজ মারে মারুভাঙি হজদি

ঊত্তোমূত্তো গরি পারে কা উগুরে কন্না

কারে সুঝি কারে মারি কার বলবারেহ্,

নানান বাবদর বিজুল্যে আঃত্যেরর ঝনঝনানি

ইয়ানিই ঈরুক দিনমাইনর আরুক।

জাংকরাল্যে মানেয়োর মানসুদোম

বেনীতিত নীতি চলে,

বেউজিত্তান উজিত অহ্য়; অন্যায় বলবলা ন্যায়র বদলে।

            =০=

                                              (রাঙামাত্যে)

১৮৬। লেঘিলুং এক্খান চিদি

‡KvPcvbvi I civbx †jwNjys Z‡i GK&Lvb wPw`

gb w` gv‡` †Pm, gy‡ivZ cwi GK&Lv fvwe †Pm

jv‡i‡qvi wbwewj caZ †evB †jwNjys Z‡i

‡KvPcvbv my‡`v Av‡aB M`v D‡gv‡i

AvI‡R wK‡e© Mwi wbg‡b gv‡`m|

hywb gyB G b cvis G RvMvËzb wdwi

hywb c‡i KzwS cv`v AKv‡j Swi

‡KvPcvbv wb‡Rbx awi ey‡MvZ evwb wfwi wfwi

g‡i ev‡m&mB †_m,

B‡avZ Zzwj AvB‡jOvwb w` †Pv‡NvZ cvwb b S‡im|

hywb Aq wdwievi hy gi ‡kRevi

mebi †`m&mvb gi A‡j jvivmviv‡j¨

R‡g †_v‡q¨ SvjveŸi †KvPcvbv‡jvB

my‡Nvi wMwiwÌ Zv‡Oes w`R‡b G‡M‡g

wg‡` †iv`, Ry‡iv e ivbRywb mgv‡i

gy‡iv †`SZ RxsKvwb Kv‡`es

H †cB°z‡bv a‡M|

=০=                                 (রাঙমাত্যে)

মেয়েরেগা কবিতা থুপ ৩৬

 ১৭৭। যিয়েনত্তেই মুই তোমাত্তুন জুদো

১০/০৩/২৩

 

তুমি যিউন ‘অর্কিড’ নাঙে কহ

মুই ছিউন ‘কান্দুরিফুল’ নাঙে চিনোঙ্,

তুমি যারে ‘ডিম ভাজি’ নাঙে দাঘ’

মুই তারে ‘তেলত মাচ্চে বদাখলা’ কহঙ্𑅁

তুমি যিয়েন ‘চিকেন রোল’ কহ্

মুই ছিয়েন ‘কুরোহ এহ্-রা ছেক্কে’ কহ্ঙ্,

তুমি যিয়েন ‘সিদ্ধ’ কহ্

মুই ছিয়েনরে কহ্ঙ্ঘে ‘উচ্ছে’

যিয়েন তুমি ‘মাংস’ কহ্

ম কধাভান্দালত ছিয়েন ‘এহ্-রা’ নাঙে লেঘা আঘে,

তুমি যিয়ুন ‘টয়লেট’ ‘বাথরুম’ কহ

ছিয়ুন মুই ‘আহ্ঘনি ছাল’ ‘গাধনি ছাল’ নাঙে চিনোঙ𑅁

তোমার যিউন-

‘পিসী-পেসো’ ‘মাসী-মেসো’ ‘জেঠা-জেঠি’ ‘দাদু-দিদা’

মর ছিউন-

‘পিঝেই-পিঝা’ ‘মুঝি-মোঝেই(মৈঝে)’ ‘জিধু-জেধেই’ ‘আজু-বেই’ অহ্-ন্।

তুমি খামাক্খাই বর ভোনরে ‘দিদি’ দাগ’

খালিক মুই ‘বেই’ দাগদে বলপেয়্যে পাআঙ্।

অহ্-লে তুমি কহ্-বা তুমি সিক্খিত, বর বর ডিগ্রি আঘন

রুক্খেঙ মুরোহ্ ছেরে নয়, থাগ তুমি সহ্-রত, লিত্তিরিগো পহ্-রত,

তেহ্ মুই?

মুইও দ কম লেঘা ন সিঘোঙ্

ভালক জাগা, দেচ-দুনিয়ে বেরেয়োঙ, বেরাঙর;

ঈরুক দ চাদি-চেরাক ধরেয়ে মানুচ এনেহ্ কমও দেঘা যায়।

তেহ্ মুই কুন্দি উনো অহ্-লুং তোমাত্তুন!

ঈঁ, বুচ্ছোঙ্! এক্খানন্দি মুই তোমাত্তুন উনো

ছিয়েন অহ্-লদে-

মা ভাচ্ রিদি ছুদোমরে তোমা ধোক্কেন পুনোত তলে দি ন পারঙ্

সিক্খিত কোহ্-লেই নিজোর চিন এরি

পোরেয়ের চিনদোই বার্ গোরি ন পারঙ্,

তোমা ছান নিজো ভাচ কহ্দে ন লাজাঙ্

নিত্তাগে পোরেয়ে ভাঝে মাদদে মর চোক থবা বোদি এঝন।

—-০——-                                             (রাঙামাত্যে)

 

১৭৮। কাল বোজেক

২১০৩২৩

 

এ কাল বোজেগত যুনি বর ব লামে

ছিল’ ঝর এঝে পেরাগ’ লঘে লঘে

যুনি ইয়োর ওহ্য় যায় মেদিনির বুক

বর বর চিবিত গচ্ছঙ্ অবাঙে ধুলি পরন।

যেবাত্তেই দিচ, বেই যোক বর ব

পোরিবার দিচ, পোরোক ঝর।

ধুল্যে উরোনা ছান যুনি ঘরদোর কোজোদি নেযায়

ছালেন থক ফিবেক দিবার নচেচ

অহ্বাত্তেই দিচ, ধুলুমুলু ওহ্ক।

একদিন বর ব মহ্ অহ্’লে

পেরাক গরানা জুরেলে

নুও অক্থ ফুদিবো

ছেরাংবেরাং গোরি বেলান আহ্জিবো,

নুও ঘর ছেক্খে তুলিবোং

তচ্ পেয়ে মাদিত নুও বিজি চারেবঙ্

ছিধু আমি পরঙ্ অহ্বঙ্

নুও দিনোর নুও আহ্জানা আহ্জিবোঙ্।

—-০—-                       (রাঙামাত্যে)

 

 

১৭৯। দিনজুরো

৫৪২৩

 

এই পুনোঙ্ রেদোতও যেএন আঙোচ্ছেই ধাগি যায়

কালাছাবার গন্ধা আন্ধারত,

চেরোকিত্যের আহ্ভাআন মহ্ ওহ্য় যায়

নিঘিলে বুগোত্তুন বানা ব নিঝেচ।

যেএন ঝক পোরি উরি যান গুলো গাঝ পেইক

র নেই ছ নেই দিনজুরো দেচ।

—০—                                      (রাঙামাত্যে)

 

 

১৮০। ওহ্’বোলা আদামত্তুন চিদি এচ্সে

২৬০৭২৩ রা

 

ওহ্’বোলা আদামত্তুন যমরাজা চিদি পাধেল

ধোকধোক্কে রাঙা কালি লৈ

সে চিদিত লেঘা আঘে-

‘যে কন’ সময়্ তর এঝা পুরিভো ম দরবারত্

কাজেই জুগুলেই থাক আহ্জিলে দিবার’।

লঘে পাধেল’ চেরভো পাচ্ছো এওজি ধাবেঙ্

তারাহ্ এলাহ্ক-

পুনে পুনে ধাগে পাজারাই ঘিরিলাক,

যিধু যাঙ্ সিধু যান্ অন্সুর পুনে পুনে

যমদুত্ কালদুত্ ন চিনোঙ্ মুই

তারাহ্ চিনে দিলাক।

মা পেদত্তুন নিঘিল্যে কুঝি গুরো

ঘু-মুত্তৈ লেত্পেত্,

লুঙ্গুর্ বুরোহ্ মানুচ্ যার্ নিত্তো লদকধদক কেয়ে,

রুক্যে পিরেল্যে ধুলোত গোচ্ছেই জনমদুক যার,

সেজাত পোচ্চে আজামি থেঙে আহ্দে যে বানাহ্ খেয়্যে,

আর মরা মানুচ্ ছরল এগালা গোরিহ্ কন র ছ নেই;

এ পাচজন আরাঙ্ যমদুত যমরাজার এওজি

তারা আঘন মরে ঘিরি মরে চুবি

যে কন সময় নিবাক ধুরি।

মুই ফেরারি আজামি, যমরাজার পরোয়ানা জারি

যে কন সময় মুই বানাহ্ খেম

মরনর কাই মুই সেলেন্দার(সারেন্ডার) গোরি পেম‌।

—–০——                                         (রাঙামাত্যে)

 

১৮১। বিঝুবি ত সিধু উজোর

০৭০৪২৩

 

বিঝুবি

একগজর ভুজুগো ফুল তরে গোঝেলুঙ্,

তুম্বাচ ছিদেই দিচ ম মনত-

বেগ’ মনত, সমাজত, জাদকুলোত।

নুও তম্বারে চিনেই দিচ জাত্কুলোর দোয়ে-মেয়ে’নী

দেঘেই দিচ আকপিরির সিরি’নী

মান-পুজোন, এগেম ভক্তিআনী।

চিনেই দিচ সিভিল আইলেগর দপদবা পত্থান

যেনে তারাহ্ দিক্কাবুলো ন অহ্’ন

সময়র মাত্তল গঙারত ভাজি ন যান

মডার্ন এজর চক্করত পোরি-

পুরোনি ছিঙোরপাগোর পুরিহ্ ন ফেলান।

বিঝুবি

তুই কোয় দিচ ছুদোমর ছুদোনালত তারাহ্ বান্ধা থাদোক

কনদিন ছিনিকুদি নিঘিলিবার ন চাহ্দোক্

আমনর ঘিরেবেরাহ্ আমনে দেদোক

পোরেয়ের ঝোকঝোক্কে উদনত খুচ ন বাবাদোক

নিজো উধোন নিজে সাজাদোক

ফুলে-বাগানে বলপেয়ে গরোদোক।

বিঝুবি

জুমোদেঝর গাভুর মরদর ওহ্চ তুই লাঙনি

গাভুর মিলের দিঘোল চুলোত থেচ তুই গুজি

দোল গরহ্’নে চালচলনে জাতপিরিত্যে মিলে ওহ্চ

নাকছালে যেয়ে তম্বাউনোর ঊচ ফিরোনি দারু ওহ্চ।

বিঝুবি! তুই থেচ, তুই এচ নিত্যো অন্সুর

পিরীত্তুন পিরী; একলাগারে সুঘে-দুঘে এচ ফিরিফিরি।

——০——                                         (রাঙামাত্যে)