মেয়েরেগা কবিতা থুপ ১২

 ৫৭। মুই দায়ী

৯/১১/’১৪ রবিবার, ১০:২৮ এএম

 

এচ্যাত্থুনধরি সতবঝর যেরে

পিত্থিমির চেরোপালা ভজমান বদলিবো সেক্খেনে

ধকবদলর ধারাদিঘলিত মুইয়ো বদলি যেইম

বদলিবো মর রেনানা ধক্খান, সুদোম সয়সাগর ।

যুগ ফিরি যুগ এভ নুঅ তম্বা জনম লভ’

অহ্‌লে এচ্যার লারেই আর’বেজ্ গ্যের অহ্‌ব’

আহ্‌ন’লে আহ্‌ভালর বাবদা পলাত পলাত উরিবো।

সেক্খে বিজগর পাদাত দেঘিভে মর নাঙ্

মর আমল্ আ’ গর্‌জ্যে যদ’ কাম,

যেক্খে পৈনালে মাদেই যেবে বিজক

কবালত তিনভাজ ফেলেই চোক ডাঙর ডাঙর গরিহ্ ।

খামাক্খাই লাজেঘিনে মরে গ্যেল দিবে

সেদামছারা বেআক্কল কোহ্‌ই গেজা মারিবে

সেক্খেনর ত তুজিম ধক্খান চেহ্‌য়্ মরে দুজ্ দিবে ।

কিত্তেইকহ্‌লে সেক্খেয়ো তুই আঘজ ভালুদ্দুর তলাত পরি

ভালেদর জিদেজিত্যেত্ আক্কোই ন পারর্ কার’ লঘে

নাবুং অকাবিল তুই আহ্‌ঢি পর্ পরেয়ে পুনে পুনে ।

 

তর সে অবস্থাআনর পৈধেনে খামাক্খাই মুই দায়ী

মর এচ্যার্ কাম, তর কেল্যার্ ফল্ ওহ্‌ই ঠিয়েইয়ে,

অকাবিল চালানায় ভাগ্যচাক্কাত্ পাংচার ওহ্‌ইয়ে

অকাল্যে বোয়েরে ঝিগেফুল ঝরেইয়ে ।

মর ভুল ওহ্‌য়ে সিয়েনই মত্থুন্ খাম্ খা পরিবো

মর অগ্ঘামা খাচ্ছ্যেক্ মানি লয়া পরিবো

মাধা পাদি লয়া পরিবো উবোয়্ দ নেই

নাক অজলে বুকফুলেই ভারেবার নেই ।

 

বেককিজু খাম্‌ খেলুং মাত্তর-

মরো দ কহ্‌বার্ আঘে, বুঝেবার্ আঘে

এ অক্‌থআন্ দ গায়্ মুই নহ্‌ বানাহ্‌ঙ্,

ওহ্‌জ্ গরিহ্‌য়ো দ পেভার নহ্‌ চাহ্‌ঙ্

কালর বিধেনে ডাগি আন্যে সে সময়ান;

কুজক্ মানেয়ে কেরাবত ফেলেইয়ে

ইয়েং দেবেদায় দিত্তি গজ্যে।

পাগারা সমারে মরে পাঝা মারি

দিয়োন এগজা খুলোত বারি

বের ভাঙা ঘর, কমর খেয়ে ঠুনি

চাল কানা, পুঘে খেয়ে রো

আহ্‌মিজে পরে ঝর তেপতেপ গরিহ্ ।

চেরোপালা আঢঙ্, নিবিলি ঝার

রাহ্ ন মিলেহ্ ধো গরিহ্ ছুলি রাঘেবার।

 

মাত্তর চেরেচ্টার্ কন’ উনো ন রাঘাং

সেদাম বাজেই, রদবল দি গরিহ্‌ যেয়োং কাম,

লো যোক পরান যোক সে উদিজ্ নেই

এক্খান ধারোজ্ বানাহ্ কেনেহ্ ঠিগি থেয়্

ঠিগি থেবার এ লারেয়োত্, ফেলেয়োং যদ’ লো

কদক্ চোঘোপানি; বনিজেচ বনাবনা, ঝরসান ঘামানি

ঘরপোরা আঘুনো জিল, জাগা আহ্‌রানার্ বুকপোরা

আহ্‌ওজোর ইত্তোকুদুম মরানার চিত্‌পোরা;

ঘরছারি জাগাছারি গাজ-বাজত্তলে

কেঝিঘরত পল্লেই থানা কন’ ঝুবুরোত্তলে,

নেঘুমে রেইত কাদানা, উবোজ্‌কাবাজ্ দিন

এধক্যেন্ দুক সোয়েনেই রাঘানা জাদর চিন

কিত্তেই সালেন্ ত দিচোঘত মরে লাগে ঘিন?

এ যুগোত যুনি অহ্‌দ’ তর জনমান

বুঝিদে গমেদালে দাঙর কা দুক্খান্

তর সুঘোর পুঝোর তুলি মরে গ্যেল দেদে

ভাবিলেন মুরোত পরি দুচ্ছান তগাদে ।

===========০০==========                       

(রাঙামাত্যে)

 

 

 

 

 

 

 

 

৫৮। মাজারা লুগেইম্

০৪/০৮/’১৪ সোমবার, ১১.০০ পিএম

 

দি চোঘোত্ আঘুন জলে সে কিদেব দে’লে
যে কিদেব মরে লুগেই দে চিন্-
মর ভাচ, ধর্ম, রিদিসুদোম্,
মন্‌জক্খায় মরে নাঙ বঝেই দে
মর কধা লেঘে ধুজুরী লেবাং দিনে’ ।

 

দি কানত্ গরম ভাপ উরে সে কধা সুনিলে
যে কধাত বিস মিঝেয়্যে মিধে রস
গাল্লো পাগারার্ খরফাগর ভুধি ভুধি,
যে কধাত মিঝে সমক-

আঝার সবন দেঘেই মারুভাঙি নেযায়
মূ বেগাত্যে বেগেয়্যে হাজি,
নিলোস্যে ভদাং চোক্ কুজুরো ইজিরে মিঝেইলে ।

 

দি হাদত্ মূত্ বিরে যায় দি ঠেঙত্ রন কাবে
মুওমি হলে তা লগে-
যে মরে পত্তি খেনত্, দিন রেইত্ মাজ বঝর ধরি
‘দাবানল’ ‘উত্তরণ’ নাং দি সাসন গরে,
উত্তোমুত্তো ম উগুরে আইল্যম রাঙাচোঘে
পদে পদে তচ্ছার গরে নানান কলেবলে;
ম জাগাত থেয়্ ম চিন্ মাঘে নিত্তো নুঅ গরি
আধাপধে থামেই রাঘেই উঝনিলামনিত !
‘ডিভাইডেড্ রোল’ যার মুলূক্ তালিক
ঝারাপুরো সিয়েন্ধোই গরে বান্দর নাজানিত ।

 

দাত ভিরি দাত খাং বত্ত্রিস দাদরে
জেইম ভিরি কুরকুরেই চাবেবার চাহ্ং তারে
ম জাগা ঘর’ভিধে, লাগেয়ে বাগান-
গজক গরে বলেবলে বাপজাদার ধন’সান্,
বেবারত্ ঠগাই মরে, গম লোই ভান্যে খাবাই
সজ্তা জিনিজরে মংঘা বানেই ম টেঙাউন সুজে;
যাওনি-বোয়ানিত্ ভারা বেজ লয়
মূপেজালাম গরিলে তাকতাগেই উধে
আমনরে খেইমদেইম উগুধো গরিহ্
ভ বুঝি অলর থানা আমনে নিগুরি !
চোক দেঘা দিনডাগেইত মরে গরি যার
কিঝু কোই কেনা সুঝিম নেই অধিগার।

 

মূওত্ মর নিত্তো এঝে উল্লো কধা
ওজোদির কধা; কিঝু কোম, পতিবাদ গরিম

লারেয়োর কিজেইকসারিহ্ বুগোধিবে খুলিম।
মর জাগা মর থোক, ম হাভাল মর এঝোক
ম আঞ্ঝামে মুই চলিম, ম ধগে ধগে,
ম নাঙ্, ম চিন্ মুই লেঘিম
আগাঝর পেইঘোসান মন্জক্খায় উরিম ।
কিঝুকাঝু গরি যাঙ, মাত্তর-
সিয়ান কি যদাজ্‌তর ? মুই দ লিলিপুত্
কানে লেহ্ ন গরে সে গালিভার।
তুঅ মুই অলর ন থেইম
কিজেইগর পর কিজেইক দি যেইম
যেধক্খন ন পাঙ্ মর উত্তোমুত্তো,
মন এগেইমে উজেই যেইম
একদিন মুই তার মাজারা লুগেইম্ ।
---------------------------       (রাঙামাত্যে)

র ভেদ : ১। লেবাং = কবিতায় ট্যাগ বা টাইটেল বা উপাধি অর্থে । (লেজ=লেভাং)
২। খরপাগ = প্যাঁচানো; জটিল । ৩। তচ্ছার = অত্যাচার ।
৪। কলেবলে = বলেকৌশলে । ৫। মুলূক্ = প্রধান; আসল ।
৬। যাওনি-বোয়ানি = যানবাহন । ৭। কেনা সুঝানা = প্রতিশোধ নেওয়া । (কেনা = প্রতিশোধ) ৮। যদাজ্‌তর = যথেষ্ট; পর্যাপ্ত ।
৯। এগেইম = সংকল্প; প্রতিজ্ঞা । ১০। মন এগেইমে = সংকল্পিত মনে; প্রতিজ্ঞাবদ্ধ চিত্তে ।

==============০০===========

 

 

 

 

 

 

৫৯। আয় পাত্তলি

৮/১১/’১৪, সুনিবার্, ১১:২৫ পিএম

 

ডুবং ডুবং অহ্‌য়্যে জাদর ন,

পাত্তলি নেই;

ধুর আহ্‌রেই ওলোজোলো দার বেইয়্যে

কন্ পাগল ভুদে ওল গজ্যে কিজেনি!

পধ আহ্‌রেই উহ্‌ব আহ্‌রা বেক পাঝিন্ধার

পাদারাই ‍সুরন লদন গোঝেইনর সেপ

উদ্ধোর পেভার ঘুর বিবদত্থুন;

কুধু সে গোঝেইন? ন সুনে মরা কিজেক্!

ন বুঝে মন ধাপ, তিরোজর্ ইজিরে;

ন দেঘে দুঘোর ঘবা, ন চিনে বাআন্ধোই।

 

সাজ গুমেনেয়্ আন্ধারানে জাবেরেই ধজ্জে

এভসং ভাজের্ ন অকুল দোজ্যে বুগোত।

চক্কর তুবোলত এহ্‌লোনিখেলোনি

আজারেই পরে অডংক্রল’ বোয়েরে,

উঙুদোই ঘুল তুলি চুজি টানে তল্‌মোক্খ্যে

এ ডুবের্, এ ভাঙের্, কাজা উল্লেই বুকপারের্ ।

পল পল ভাজদন পাজিন্ধার গদা

দার বেয়্যে আধামরা;

আহ্‌ঙর্ কুমোরে আধার্ জুগোনিত খুঝির নাচ্ দেদন্

নেই কন’ ডলফিন তারারে বাজেবার।

 

পাত্তলি তুই আয় নুঅ গরি

কালিগর কাবিল ওহ্‌ই সচপদর লঘে গরি,

আয় ফিরি গোঝেইন্ সাজি ঝিগেফুল আহ্‌দত ধরি

ভাঙা ন ল তুনি দরহ্মর’ পাঙেই আনি

উদ্ধোর গর পরাকবাল্যেরে আহ্‌ঙরর্ মুওত্থুন।

সিঘেই দে পাত্তল দার বানাহ্ কেঙিরি

কন্ ধুরে ন আহ্‌ঢায়, কেনেহ্ যায় তুবোল করতদি

উঙুদো পার ওহ্‌ই পারত এঝে উধি ।

আয় পাত্তলি তুই আয়

ফিরি আয় নুঅ গরি।

*(জুম্ম জাদর মুক্‌পাত্তি মানবেন্দ্র নারায়ণ লার্মার ঈধোদে)

========০০=======                 (রাঙামাত্যে)

৬০। গায় গায়

২/৪/’১৪, বুধবার, বেল্যে ৫সো বাজি

 

এইম এইম গরি আর এঝা ন অহ্‌ল’

যেইম যেইম গরি আর যানা ন অহ্‌ল’,

চেইম চেইম গরি আর চাহ্‌না ন অহ্‌ল’

কোহ্‌ম কোহ্‌ম গরি আর কহ্‌না ন অহ্‌ল’ ।

আহ্‌ঝি যেয়ে মুরে মুরে সে অক্‌তআন

ডুবি যেয়ে দোজ্যে তলাত সাজেয়ে পঙ্ঘিআন ।

নেয়ার নেয়ার জু মুজুঙে

বিজোল ওহ্‌য়ে ধুঅ পধ দেবা গুরুঙে ।

 

জিংকানি তুই কুদ্দুর ?  কুদ্দুর আর এইম ?

ও মন কিত্তে উজুলাচ ? কুধু আর যেইম ?

কি আর চেহ্‌বার আঘে কধক উল্লেই চেহ্‌ইম !

কহ্‌বার আঘে কধুং নয় বুব গরি থেইম

ফুত্যে ফুল ঝুরি যেয়ে কোরি ন তোগেইম ।

উত্যে বেল ডুবি যেয়ে আন্ধারত থেইম ।

দুঘোমায় সুঘকানর আঝা ন রাঘেইম

যে ধঘে জনম যার সে ধঘে কাদেইম ।

নুঅ গরি সাঙেইত সমার কাররে ন গরেইম

এ জিংকানি দিঘোল পত্থান গায় গায় যেইম ।

====০০===                               (রাঙামাত্যে)

 

 

৬১। চিগোন কালর ঢেং
০২/০৭/২০১৩, মঙ্গলবার

ঈদোত উদে চিগোন অক্ত
ঈদোত উদে মর,
ঢেঙর তালে গাজে গাজে
গুলোগুলি তোগানা
পাগানা রোদোত সমার বদি
তিদিরিক তিদিরিক বেরানা।
রোদে ঘামে রাঙাকালা মুহ্
পানি তিরোজে অহ্‌রান
ভঙানা বানা ভঙানা
ন লাগে বারিজে ন লাগে খরান।

আজু বাগানত কাগজি দলা
কালি কুস্যেল দমা কুস্যেল,
কুবোত আঘন পাকানা কলা?
বোরোই পাক্‌কোন গোয়েম পাক্কোন
যেদং সিগুন চুর গরা।
ঘর’ সানাত সাঝি পেরোত আজু থেদ’ বজি
গুলি মেজাং মুজুঙোত তার বাদল এক্কান ধরি,
ঝুপঝুবেলে গুলো গাজত ক’দ’ জোগার পারি
”কন্না উঠ্যে গাজ’ উগুরে গুলো খেদ’ চুর গরি”?
দরে দরে ক’দুং মুই - আজু মুই মুই।
মানা গরি ক’দ’ মরে লাম্‌রে নাদিন লাম্
গুলোগুন দ’ এব’ ন পাগন কাজাকজরা ন খান,
কোজলি গরি লামেদ’ আজু মরে গাজত্তুন
ধাগত বজেই পিদিত পুচ্চেই উদিদো বোইদেত্তুন।
ঘর’ ভিদিরে ওজোলেঙত সমি কানক্কন
পাগানা কলা আহ্‌দত গরি এযেগোই সেদক্কন,
ঢেং ন গরিচ পিদিত পুচ্চেই গজেদ’ কলাগুন

খুঝিয়ে মুই খেদুং সিগুন ডাগি সমাস্যেগুন।
---000---                               (তাংগুম)