মেয়েরেগা কবিতা থুপ ১৪

 ৬৭। মা জাগা

২০০৭

 

যার বুগোত জনম মর যার বুগোত বাঝি আঘং

যার কহ্‌রত পরিনেই সুঘর্‌ সবন দেঘং,

যাত্তে বিলি আহ্‌জার পরান দিলাক জুম্ম ল’গে

কোই ন পারং আর’ কদক্ পরান দিবার আঘে।

রেইত পহ্‌র অহ্‌লে বেলর্ আগে যারে মুই দেঘং

যার কির্বেলৈ নোনেই আল্যেঙে মেয়ের জাল বুনং,

গভীন মনে রেদে দিনে সবনে আহ্‌ঝি যাং

তে মর মা জাগা হিল চাদিগাঙ্।

 

যাত্তে বিলি আহ্‌ত্যের ধরি লারেই অহ্‌ল’ দিযুগ ধরি

বাযেবাত্তেই সত্রুত্তুন্ নিবিরনাবার গরি,

থেদং সুঘে যে জাগানত দুঘোর দেঘা ন পেদং

নিজ্‌সাধিনে মঞ্জুক গরি জাকজমগে থেদং।

নাঙ্ লেঘিদং জুম্মল্যান্ড জুম্মজাগা নাঙ

সিয়েন অহ্‌ল’ মা জাগা মর হিল চাদিগাঙ।

 

যা কারণে এব’চলের্ লারেই গুরুংগারাঙ

সায়ত্তসাসন অধিকারর্ অগুর সংগ্রাম,

পেবং ফিরি কমলে তারে আমা নিজো আহ্‌দত্

বাঘে-মোজে পানি খানা অহ্‌দ’ একঘাদত্ ।

ঘুম কারি লই যে রেদে দিবে চোঘত্তুন

ভাত কারি লই যে জনে নিজরমূহ্‌ওত্তুন্,

এয’ সালেন বাপ ভেই লক লঘে মা বোনুন্

ঠিয়েই উদি দর’মর’ এক অহ্‌নেই বেক্কুন ।

বাঝেই তুলি ফিরেই আনি সত্রুর আহ্‌দত্তুন

নিঘিলেনেই রন’সক্তি আমা বারাত্তুন।

 

বাযে রাঘেই ঠিগে রাঘেই আমা জর্মজাগা

নাঙ দি পারি যেনে আমি আমার মা জাগা,

আঘে আমার জর্ম জাগা আঘে মা জাগা

সিয়েন অহ্‌ল’ হিলচাদিগাঙ বাংলাদেজর এক কাজা।

তিন্নো জেলায় মিলি অহ্‌য়ে যে জাগানর নাঙ

সিয়েন অহ্‌ল’ মা জাগা মর হিলচাদিগাঙ।।

========0========                   (উজ্যাংছুড়ি)

৬৮। শান্দি (Peace)

১৫/০১/২০১৫, ব্রেসুপ বার, ৭:৫৯ পি.এম

 

পধে-ঘাদে আহ্‌দে-বাজারে বেজা-কিনে অহ্‌য় যে শান্দি

সে শান্দির গাহ্‌ক মুই নয়,

জাত-বেজাদে কোজ্জের ফাগত যে শান্দির রং নিগিলে

সে শান্দিলৈ সাজিয়ে মুই নয়।

পরান কারিহ্ মগদা কেয়েত যে অমৃত ঢালে

সে অমৃত খাওয়ে মুই নয়

সয়সম্পুদ লুডি যে বান্ধোই কয়

সে চিতপোরাত খুঝি ওহ্‌য়ে মুই নয়।

বলাজুরে জাগা কারিহ্ যে উন্নয়ন এঝে

সে উন্নয়নর ভাগিদার মুই নয়

আহ্‌দে-ঠেঙে বানিহ্ যে ন খেই ন খেই খাবায়

সে দোয়ে-কোচপানা মর গরজ নয়।

বন্দুগোর ট্রিগারত যে নিরাপত্তা

সে নিরাপত্তাত পরান বাজেয়ে মুই নয়।

 

মনর সদরে আইল্যেঙ নিগিরায় যে বিশ্চেজত

সে বিশ্চেজত মুই শান্দি পাঙ

জাতভাক্কা নেই যিয়োত, বেক্কুন গর্বো সান

সিয়োদই মুই শান্দির খুদো গারাঙ্।

নিচিদেয় যে জাগাত মর বেরান-চেরান

মনজক্খায় খানা-থানা, নেডরে কধা কোই পারং

সিয়োত মুই সুঘোর সবন দেঘং-

গদা উমোরর শান্দি সুধা গিলঙ।

 

মর জাগা সয়সম্পুদ, ঘর-দোর বেক্খানি

থেই ম আঞ্জামে ভুক গরিম আলা গরিহ্

টেঙা পয়ঝেয় ঝালাব্বর অহ্‌ব’ মর গিরিত্থি;

চুচ্যেঙ্যে-কা সিঘিবো মর পুঅ

রুক্খেঙত পড়িবো হাই ইস্কুলোত্,

লাজ বাজিবো যিয়োত মর মা-ভোন-ঝিয়োর

খেলাং মনে পরান তরেবাক বেক জাত ভেইয়ে।

নিরাপত্তার নাঙে নেই যিধু দারায় দারায় কেম্

নুঅ গরি নিত্তো যিধু চিনপুচ্চো দি ন পেইম,

একশ, একজোরা চের, কার্ফিউ নলর ডরে

অডা অডা মনে রেইত দিন ন কাদেম।

সিয়োদই মুই দেঘং মর বনা বনা ভালেদি

তোগে পাঙ মর আলাঝালা সুক

অহ্‌রান্যে চিদোর সুঞ্জুক, উর্ঘুন্যে জিংকানির শান্দি।।

-----------------0---------------------           (রাঙামাত্যে)

 

 

 

 

৬৯। ন ওধিম
০৯.০১.'১৫

লো যুনি ঝুরি যায় যোক
এহ্ড়া যুনি কুইয়ে অহ্য় ওহ্ক
আহ্ড় যুনি ফাগু অহ্য় ওহ্ক
পরান যুনি নিঘিলি যায় যোক ।
মুই কনদিন পিত ন লামিম
পাদারায় ধাবা ন দিম
রনখলাত অহ্ড়ান ওহ্য় মুই এহ্বা ন দিম ।

ব যুনি থামি থায় থোক
বারোজর ধুমো যুনি উধে উধোক
আঘুন যুনি জলি যায় যোক
লো গাঙ যুনি নাল আহ্দে আহ্দোক ।
ভংপাদারে যুনি মগদা পরন পত্তোক
দমা দমা এহ্ড়া যুনি পরি থায় থোক
রাজপধ যুনি চবাসাল অহ্য় ওহ্ক ।
মুই কনদিন সিঅ মরা ন ওহ্ম
লারেয়ত ন ওধিম, ন ওধিম।

-------------------------------           (রাঙামাত্যে)

 

 

 

 

 

 

৭০। বিজোল ঝরত ভিজেনা

১৪/০২/’১৫, সোনিবার ৯.০০ এ.এম

 

ফাগোনর পৈল্যে দিনোত একগজর ছদরক্কোই এধুং ত’ সিধু

ঢালি দিবার মর রিবেঙর কোচপানা,

সে আজায় তত্তুনো মাঘিবার,

রোংচোঙ্যে পাগোন’ দিনোত ত মনান অঝার আঘে পারাপাঙ্

কাজা নদেখ্যে সোজ আগাজ’ সান ত মনর সুন্ধুক্কো আলাঝালা

আঝা গরঙ কুলি ন গরিবে,

বারিহ্ দিবে কোচপানা মরে নিগিরেই।

খালিক ম মনান স্যংসামায় ভরি থায় সে চিদে গরি

কোচপানা নাঙ দি কোচপানা দিনোত মনান কি চদর’ বানেম!

বেগেয়্যে ওহ্‌ম তত্তেই, বানা একদিনত্তেই নাহি গদা জনমত্তেই?

দুঘো কধা পুরি ফেলেম আমনর, গিরিহ্‌র, সমাজর আ’ জাদর

ঈদোত ন তুলিম রাজনীদির খরজাগুলুক কন’ কধা

ন তোগেম সমাধা বেককিঝু ভেবেরা দ্যে রুহ্মুজোর।

গলিযোক সংসার জলিযোক চেরোপালা,

ভজ যোক মানেয়ো চিন

মর কিচ্ছুর আহ্ওজ-লালোজ নেই, নেই কন’ ধারোজ

মুই নিজেও লুগি যেইম, মাজারা আহ্‌যেইম, কালর গঙারত ভাজি যেইম

সিয়েনির কনক্খান মর খেয়াল নেই, ম মনে বানা মুই

তর আইলেঙ আজুল গরি জুচ গরি থেইম ত বুগোত মুর্গুজি।

 

তোগেম তর বাহ্‌রে-ভিদিরে লিলিক্কে পরানে এক চেইঙ্ সুঘ

গিরগিরেই তুলিবো মরে সে ঝার্বো সুঘে, গদা কেয়্যে সদমারেই

ডুবি যেইম উদোনেইয়ে দমদমা ভুইয়োত, কালা সুরুঙোত।

এচ্যে ১৪ ফেব্রুয়ারী, বানা বেগেয়্যে গালানা

ঠুদোত ঠুত কুবি, জিলোত জিল আবেরেই সুঘ তোগানা

পিত্থিমি-আগাজে এক চেবেদাক অহ্‌না, বিজোল ঝরত দিজনে ভিজেনা।

------00--------                    

(রাঙামাত্যে)

 

 

 

 

 

৭১। মর মা

০৪/০২/’১৫, বুধবার, ৯.০০ পিএম

 

কির্বের ঝর্‌ঝরি নোনেয়্যে ছরাসান

হে্‌ইল্‌ তারুমোর দীঘোলী ছাভাসান,

আধুলি মেয়্যেলোই ভরি পেলাংবায়

দোয়ে আইহ্লেঙর জুরো ব হেলায়,

সুদোমে আইলেগে ভরনভিরোন

সিবে মর মা, সিবে মর মা।

 

বেন্যে পেঘো র’য় ত কধানি শুনোং

উধোন্দী বেল’পহ্‌রত ত আহ্‌ঝিবো দেঘং,

বোয়েরান বাজিলে পাঙ্‌ ত মেয়্যেনি

ম মন’ খুঝিমায় পাঙ ত বেক্কানি,

যেক্কে যে ধগে মুই যিধু থাঙ

তরে দেঘঙ মা তরে দেঘঙ।

 

ছরানালে তুবোলত উঙুদোই গঙারত

বর্‌ব ঝরে আ’ দেবা পেরাগত,

দিবুজ্যে সাররোদোত সাঝন্যে অক্থত

জাগনে পত্থমত ঘুমোত আ’ সবনত,

দেঘঙ ত সাসনান শুনোঙ ত শিক্ষেয়ান

যিয়েনির মিঝেলে ওহ্‌য়ে ম জনমান।

===০০===                     

                                        (রাঙামাত্যে)