মেয়েরেগা কবিতা থুপ ১৫

 ৭২। ম মোনোঘরত একবার বেরা এজ

০৬/০২/’১৫, শুক্কোরবার, ১০.১৯ পিএম

 

ম মোনোঘরত একবার বেরা এজ

দেঘিবে হে্ইল মোনুন কদক লোক্ষি নিমাদারা,

খেলাং আগাজসান কেজান মন ডাঙর

দোঘিনো আহ্‌ভাগান কদক ঘনাত্যে।

 

ম ভাঙাঘরত একবার এজ

চেয় পারিবে মর নাগানাক্যে গিরিত্তি

তেঞ্জক তবা আ’ কাজাভাঙা তেলোন

তলা আঘুরযেয়ে চোল’টঙ খুতচোলে ভরন

উজুনো তোনতাবা রুস্যেল ছারা।

যুনি এজস, চেয় পারিবে-

কেঙিরি কাদে রেইত মাঘমাস্যে জারত

কেনে থাঙ এগা কাবরে এম্ভা জারকালত!

কোই পারস মর কেয়েগান ঢালবান্যে

জার-উমুস্যে বেক্কানিলোই সদর ওহ্‌য়ে,

মঝা-পুগি সিগুন নিরেল’ সাঙেত

তাপসাল-আলঝের আঘুন জলে গদা রেইত;

রিপ রিপ তারাগুনে মত্তেই চিতপোরা খান

কেয়েত পুচ্চেই বান্ধোই কয় ধল জুনপহ্‌রান।

 

একতাল দুঘো সেরে একফুদো সুঘ

মরে লেম্ভেই যায়

মূয়ো আহ্‌ঝি ন লুগোয় আহ্‌জার দুঘোমায়,

সাংসাঙ্যে মোনো আহ্‌ভা, ঝোকঝোক্কে খেবারানি

পেত ঊনো খেয় পেলেয়ো লোক্ষী মর জিংকানি।

কন’বার যুনি এজস লোবিয়োত গরিম

জুরোনত যা আঘে নিগিলেই দিম।

সয়সম্পুদে নেইয়্যে মুই আঘে মন’ধন

গর্বা লোবিয়োদী কির্বেলোই ভরন।

ফাগারা কারে কয় মুই ন বুঝোঙ

হিংসে-পিঝুম, গালমাদানা মুই নহ্ সিঘোঙ্,

পর মারিনেয় ভালেইত অহ্‌না লো-এহ্‌রা সুজি

সিধে মনত জাগা নেই থোম কুধু গুজি?

 

ম জুমঘরত একবার বেরা এজ

দেঘিবে লেঘাপরার রাদত থেয়্যে লুজুরুক গুরো-গুরি

আহ্‌দি যাদন কেনে তারা আন্ধার মুঝুঙেন্দি!

মা ভাঝর বাজক নেই তারার লেঘাপরাত

জুদো ভাঝে কারিহ্ লইয়ে গদা মন’ আত্;

রিদিসুদোম গঝক ওহ্ইয়ে, আঘে বেনালত

চেরোপালা আগ্রাসন তাগল বাস্স্যে গত্তনাত।

যুনি এজস, দেঘিবে-

জুম গাভুরি পরান আহ্‌রায় অমানসোর বলাজুরত

ভিনপারাল্যে সাগা দি যায় ম সাঙুদোরত,

জুম-বাগান আহ্‌ঝি যায়, ঘর-দোর পুরি যায়

বেসুঞ্জুগোর দাঙা এঝে জুমোদেঝ মোনমায়।

 

নেই বেজারে থেবার চাঙ গদা জনমান

দুঘোমায় ন লুগেনেয় মুও আহ্‌ঝিআন।

কদক লোক্ষি মুই, উজুউস্যে হিজেব

সিধে মনত ঠগা খাবেই মরে ফেলাই চিবেত-

কন্না সিবে; ফাগারা দলা বজঙ মুনিস্সোর

ইধু এ্যয় চেই যাঘি, গমে লঘি পুঝোর।

===০০====                    (রাঙামাত্যে)

 

 

৭৩। মরে ঠেলি দিলে

২৬/০৭/২০১৩, সুক্কোরবার

 

ছরা নাল অহ্‌দি যায় দজ্যের আহ্‌ওঝে

একবুক বুক আঝা লোই মিলিবার সাহঝে,

দজ্যের কোচপানা আহ্ত্ বাভেই ডাগি যায়

ও ছরা! ঝরঝরেই লামি আয় লামি আয়।

মেয়ে বানত বাঝিভোং তল্লোই দি জনে

জিংকানি গঙেবং খুঝিয়ে সমারে।

 

ছরা পানি যেঙিরি সাগরত মিঝি যায়

কোচপানা গাঝা ওহ্‌ক বেক্খুনো মনমায়,

দজ্যের মেয়্যে যেন পাদাজুরিহ্ ছরারে

মানেয়োর মেয়্যে ওহ্‌ক চিগোনে ডাঙরে।

ঝার যেন সাজি উধে গাজ-বাঝে মিঝেলে

দেজসান সাজিবো নানা জাদে মিল অহ্‌লে।

 

কিত্থেই তুই ডাঙর! মরে চিগোন কহ্‌জ্?

মর গদা কামকরচ নিবের চাহ্‌জ্ ভজ,

মরে ফেলেই কেনেহ্ তুই গায় থেবার চাহ্‌জ?

পুঝি ফেলেই দিবে মর গদা নাঙবাজ।

দজ্যের উজু মন যুনি তর অহ্‌লে

আহ্‌ত বাভেই ন ডাগিনেয় দুরোত ঠেলি দিলে।

----০০------                            (রাঙামাত্যে)

 

 

 

৭৪। চিজির বিঝু
১৩।০৪।'১৫, সোমবার, বেন্যে ৯ ভো বাজি

চিজিরে চিজি এধক আহ্জি
বিঝুর খুঝি বিঝুর খুঝি,
সান্নেপিধে বরাপিধে বিনি আ' কলাপিধে
গাহ্ক গরি খেব'এচ্যে মিচ্চিরি দলা,খাইদ্যে মিধে।
সমাস্যে এস্সোন ঝাগেঝাক
ফালুক ফালুক দেঘার নাচ
নারেইপিধে কেজপিজিভাত
মআলু উস্যে পিলেগুলো সাচ,
খেবাক তারা সমারে
ভাঝিবাক বিঝুর গঙারে।

-----0------           

(রাঙামাত্যে)

 

 

 

 

 

 

৭৫। ডাঘ'কধা গীত
০৬।০৪।'১৫, সোমবার ১১:০০ পিএম

নাগঅ দোরত ফরা উধি যুনি পিরে গরে
মুজুঙত ঘুর বিপদ কন সিয়েনরে।

পুনো ফরা নিজে নিজে খুদি ন পারিলে
উবোয়ছারা রাদ'র মানুজ কন সিয়ুনরে।

মুও গুদিয়ে বেঙ মরানা তুদো কধা কহ্'লে
কোয় জানিলে কধা ন জানিলে আঢা কয় যিয়েনরে।

চিতঘিলে পিঝেদি কয় রহ্মসেদাম(দুঃসাহস) অহ্'লে
পুনোত ত ফুত্যে কয় মের সেজা দেলে।

নিজো বুদ্ধিয়ে তরে আ' পরঅ বুদ্ধিয়ে মরে
এ কধাআন সত্য অহ্য় মিত্রু রুবে সোত্রু পেলে।

বিলেই লৈ কুগুর আ' বাঘে-মোঝে আহ্'ল
একধানর অত্থ অহ্'লঅ সোত্রু উমোর কাল।

ঘরঅ উন্দুরে বের কামারায় জাদর সোত্রু অহ্'লে
ঘরঅ কধা, জাদঅ গুমোর পররে ভাঙি কহ্'লে।

মুওই দাদে কয় তারেহ্ কদঘি পুন্ডিক অহ্'লে
বাঘঅ কেনা ডাগত কয় বিনেদুঝে গরত প'লে।

আহ্ লাম্বা সিবে অহ্য় বাহ্'রা কধা যে কয়
আহ্ ডাঙর মানুজ অহ্'লে খানাপিনে আগুলে লয়।

বেলঅ ট'ত্থুন কোরোলি ট বেচ অহ্য় ডাঙর
গুরু'ত্থুন সিজ্য যুনি ডক দেঘায় বলর।

দাদত্থুন সামি ডাঙর গিরোঝত্থুন চুর ডাদঅ
আজলত্থুন নগল গম এ কধায় বুঝি ল।

বেগেনায় এহ্দো দাত খানা আগাত্ত্যে কামত বাক ধরানা
খুঞ্যং খুঞ্যং লারে গরি আরেয়ে কামর বাক ধুজানা।

মাদি ঘিলে তারে কয় সিধে লোক্খি অহ্'লে
ঘিলেমাগরক সিবেরে কয় বরকধালৈ ভেনভেনেলে।
বান্দরঅ কবাল তারেঙত আ' ঘুইয়ো কবাল সুরুঙোত
এ কধাআন তাত্তেই লাগে যিবেই আঘে উমোর দুঘোত।

কেদাফলজাত্যে সিউন কন যিউন চেগার মন কাজর
উজুসুরুঙ্যে সিউন কন যিউন লোক্খি মন ডাঙর।

... ... ...
এ ধগে বুঝি লভা ডাঘ'কধা গীত
কামত লাগেই ভালেত আনঅ বেগর জিংকানিত।
ভেবেরা দ্যে ডাঘ'কধা আমার অজল চিন
কোয় ন ফুরায় এভ' আঘে যেরেদি আরঅ দিম।

--00—-                              (রাঙামাত্যে)

 

 

৭৬। দুঘো গীত

বাহ্'রে ভিদিরে আঙের বেক অডা মনত চত্তা সেক, আগার পিরে থুরগুলোত পিরেল্যে গচ্ছার যমধুলোত; ধনে-জনে বেক্খান সুম লাঘর জিংকানি অহ্'লঅ থুম।          --00—                     (তাংগুম)

০৫।০৪।১৫, রবিবার, ১০:৩২ এ.এম

দারু ঘঝিনেয় উহ্'রিঙ সিঙ
বুর পারদে ওহ্'লোত ঈঝিঙ,
পেইক্খো ডগরের চিং চিং চিং
মুঝুঙে এঝের বিঝু দিন।

বিঝু দিনোত উচসো নেই
মানসো মনত আহ্স্য নেই,
আহ্জি যেয়েগৈ পুরোনী দিন
দুঘে জিত্যে মানসোর চিন।
ঘরঅ উধোনত ঘুই মরা
সাঙেত সমার বুকপরা,
রাদত পজ্যে নেই আলা
মানুচ বেক্খুন মু কালা।

বাহ্'রে ভিদিরে আঙের বেক
অডা মনত চত্তা সেক,
আগার পিরে থুরগুলোত
পিরেল্যে গচ্ছার যমধুলোত;
ধনে-জনে বেক্খান সুম
লাঘর জিংকানি অহ্'লঅ থুম।

--00—
(তাংগুম)