মেয়েরেগা কবিতা থুপ ২৫

 ১২২। সবনর জুম্মোবি

28/01/'17, সোনিবার, দিবোজ্যে 01:08 pm

 

মুই তারে কোচপাঙ, জুম্মোবিরে
যা মনত জুমো কধা পৈনালে গাদেয়ে
লারেয়োত উজে যাঙ তা কোচপানায়
মনানত সাওজ পাঙ তা উচ্চোনি কধায়।

মুই তারে দোল দেঘঙ, জুম্মোবিরে
যা বুগোত জাদ রিদি জাবেরেই আঘে,
গুলি মুওত বুক দোঙ মুই সলজে
আল্যেঙর সাঝঙ্যে গাঞ্ঝা যে মরে দে।

মুই তারে ঘর ধরঙ, জুম্মোবিরে
যা চোঘোত ভরি আঘে বানা জাদমেয়ে,
লারেয়র গঙারত যে অজংসঙ্
সমারি সুঘেদুঘে গদা উমোরসং।

 

তে বানা মর লাঙ ম আওজর
কোচপানা গমপানা জনম জনমর,
তে মর ধনপুদি পরানর তান্যেবি
জুমো দেঝর দভাকাদি সবনর জুম্মোবি।

=======0========             (রাঙামাত্যে)

১২৩। এঝ ভেই
28/01/'17, সোনিবার, সাঝন্যে 07:55 pm

 

রন ঢুল ডগরের ঐ লাঙেল পধত
লারেঈয়র ডাগনি দেদন এঃইল মূরোউন,
কলগর রেদো জুনি চাক বদি জলদন
সে পঃরত মালেয়ে দিবার আমারে ডাগদন।

লোগাঙ পুজগাঙ চেঙে পানি নালে
মিইনি কাজলঙ এক বরগাঙ লঘে-
যুগধরি ধারা বেই ধের্ধেস্সে গরি
কাদে যার দুঘে দুঘে পরাধীন জিংহানি।

ইধুগোর ফাগোন' আহ্ভা রানজুনি তাঞ্জাঙ
অজাদর সান্ধা চোঘোত নিত্তো জাবা খায়
কজদামজদা ইধু কুজি ফুলোপাগোর
ডরভরে গির্গিস্সে র বেক গীত্তো পেঘোর।

যেই যেই রনঢুল ধরিয়োই লারেঈয়র গঙারে
বান্যে সুঘোত ন মজিনেই যেই ভঙিয়োই পাধারে,
মূরোউনোর ডাগনি সুনি উবোত ধরি যেই
মাদি-পানি আমা পরান জনে জনে বাজেই;
এঝ ভেই গাভুরলক লগে এঝ ভোন
ফেজা কাজেই ধো গরি এঃইল মূরোউন।

======0=====                  (রাঙামাত্যে)

 

 

১২৪। এগেম
07/03/2017, মঙ্গলবার, সাঝন্যে 7:00 বাজি

 

অথির এই তনক মনানে
ইয়ে উহ্'রিঙো সান পাত্থর চাদারা বেঈ যাই
তারেঙর কাবে কাবে; চিনেহ্ জুগো তিরোজে।
রিস্সোল্যে কেতকেত্যে সান-
খুলোত উম্ দিয়্যে রংরাঙি কোচপানাত
সোতসোত্যে পরানে আধার তগেদ' চাই।
বৈজেক্খে গঙ্ দাঙর থুত্যে বোয়ের' ধক 
দলামজা গরি একলঘে আনি বেক আঝা ধারোজ
কোজেই নেঝেদ' মাঘে গদা চাগালা।

অথির এই খেত্রি মনানে
বেসুঞ্ঝুক লভাদঝা এরি আতমরা ভাঙিছুরি
বারন্ধি লোকলোক্যে সাগ' আগা সান
বেঈ যেদ' মাঘে আরাকরা ফারি ঐ রিপরিবোত ।
উহ্'রিঙ্ খাপ দিয়্যে সিগেরী বাঘ' সান
ধার নগে তিঘুত লেঙুর মজরি
ঝবাদত ধরি নরলির লো চুজিবার চাই।
বারোজচঙ্গা মাত্যে তেঘা সান
জধাবত্যে লরবো জাবারাত সিনেকুদো এহ্’রা দমা
ঝিমিদোত বিজোভই পরান ছিনি দিবার চাই।

অথির এই জিত্তো মনানে
খ্যেই নগস্যে গাওদামি গরি
রাঙা চোক ন ডরেই খ্যেজরজেই জগদাঙ বিস্সেজে
আমনর ঊত্তোমূত্তোত থিদব্বর অহ্দ’ চাই।
অজ’হ্মর’ রোঙ্যে ভুদো সান
গাঝা ওহ্য় থেদ’ চাই আমন’ জাগাত মন’ সুঞ্ঝুগে
এগেম গরে দাদাল ওহ্য় দাত কুবি মরিবার।
লারেয়োত ঘিলেদাদ’ বীর লরবো সান
রন’খলাত তাকতাক্যে মরনরে সমার জুরি
এ দেঝর লেজা-তুগুনে জিদানার বাবদা উরেবার চাই।
                 =0=                                  (রাঙামাত্যে)

 

১২৫।একফুদো সিরোপানি 
17/03/2017, সুক্কোরবার

 

কুলনেই দোজ্যে বুগোত
ভাজঙর এক্খান ভাঙা ন বেঈ বেঈ,
পাঙেয়র ঘেইও লঘে সেপ্লক র তুলি
দীঘোল তুভোল আহ্’দি যায় আলেয়ে গরি
পারত আভর নখাদে মিলেই যায় জুরোবাদে গঙমরা সে তুভোল।

চেরোপালা ঝলপল পানি এহ্'ল পেলে পেলে
বোয়েরর ঝল্গানিত এলোনিহেলোনি ইত্তুক তিনেঙে
বেলসদগর আল্যেঙে বিতবিত্তে ওহ্ই উধে মূর্ গাঙ
উরম্বা বারী যায় দোজ্যেবুক ঝিমিলায়-
আয়পায় মেলাহ্ যায় গদা আভাংপাঙ।
মর তুও বুক কাদাকাত্যে তদা গ্যেতদ্যে দুমদুম্যে পরানে
ঝলপল পানিসেরে মরঙর পানিসাজে অহ্'রান তিরোজে,
একধার পানি আঝায় পাচপরান আঙি যায়
অকাল্যে খরান পরে এহ্’দে আগেরে;
চুগুনো মাদি চেইঙ ইয়োর ওহ্ই ফাদি যায়
একফুদো সিরোপানির চেগার রাদ ওহ্’য়ে।

হ্মেলাক দোজ্যেত আহ্’দি যার ন একধার পানি তোগেই
অহ্’রান কেয়্যেত চুগুনো তদা ধুক গিলি ভিজেই যাঙ
একধার পানি খেবার তগাঙর একফুদো তোগেনে ন পাঙ
কুধু যেই কুধু পেইম কন্না দিবো মেএ ঠুদোত লিবি-

একফুদো সিরোপানি?

            =0=                          (রাঙামাত্যে)

 

 

১২৬। সদমরা মন
22/07/2017, সোনিবার

 

কনাছেরে পরি থেয়ে চুচ্চেঙ্ তাগল' সান
জাঙার বোত্যে এ মনান
ইজোরো মাধার লাঘা খাস্সেঙ' সান
এধা পাদায় আধং কাজরে ভরন।
উত্তোমাজাত আন্নো ধোজ্জে মুরিজে কাগ' সান
বারেঙ কাল্লোঙ বুনোকাদা রাদত ফেলা যেয়্যে
ঘুনপোজ্জে সুগুনো কুমকুত্তি সান তচমরা
কনকিচ্ছুর পৈদেনত সদমরা ওহ্ইয়ে
চিন্দেলে পিরে নেই, ভদেলে ওমা নেই
খরান্যের মরা পাদাসান কন অরতআরাত নেই।

ইয়েন কি কন তবত বজানা!
জারকাল্যের খচ্চোবেঙ' সান অলর নিমাদারা
না কি মুনি রিসির কন সাধনা?
মন তারুমোত কন আল্গাআহ্বা ন বাজের।
চেরোপালার তজিম ধক্কান দেঘদে দেঘদে
দিনমাইনর ভাতসাঝ' ধক অনাজার অবিজের

বজঙর জোগারত গমর ধাবা খানা

অসদর বিজেরত সদর সেজা পানা

নিত্তো দেই দেই চোক দর' মন দর'

আমক ন লাগে, ন লাগে বাজুকবাজাক

ইয়েনই নিয়োম ইয়েনই সুদোম

ইয়েনই ধর্ম ঈরুক জগদত।

আ কিত্তেই সালেন সদমরা ন অহ্দ'-

গঙমরা ন অহ্দ' এই মন, মনরুহ্মুচ।

======0====== 

                                (রাঙামাত্যে)