মেয়েরেগা কবিতা থুপ ২৪

 ১১৭। কধক থরি থেম

27/11/2016, রবিবার, 7:15 pm

 

আর’ কুদ্দুর আঘে পথ?

আর কধক ধাবা যেম?

আর’ কত্তমান অহ্’রান অহ্’লে

তারে লাঘত পেম।

কুধু তার ধুজি কন কাদাবনত

আর’ কধক কাদা ফুদেলে

নাল বেঈ লো ঝরেলে

ফুল্লোরে লাঘত পেম।

তুম্বাচ্চানে বানা গলগলায়

ম পরানান পাগল গরায়

নাগ’দোরত নিঘিলে সমায়

কদক থরি থেম।

=0=                         (রাঙামাত্যে)

 

১১৮। তুদি ন থেয়্যে লারেঈ
27/11/2016, রবিবার, 5:50 pm

 

এক আগার পীরেল্যের হধা হঙর
জিংহানিত বাজি থেবার যার লকধক্যে আঝা
বিচ্ছোনত ধুলোত গোজ্জেই মুওত তুও মিদে আঃঝি,
মরণর সাঙুদোরত নানুদোর অঃলেয়ো
আঃজার বঝরর মুঝুঙ সবন পরাক পরাক দি চোঘো পাদাত,
লাম্বা পজ্জন বানেই হোয় যায় আজিরেন-
নুও ঘর, জাগা, মাদি হোলোই, থিদব্বর গিরিত্থি
আদাম্মে পারাল্ল্যে আ' দেজ জাদর ঝালাব্বর সুঘ।
মুরোহ্ আঙুদি যার পরান তরানা,
তে অহ্ব' থল জাগার গিরোজ
নানান পরাধরাই নিত্তো যে লেঞ্জর,
তে অহ্ব' সুঘ-শান্দিলৈ লারাসারাল্ল্যে।
ভাদ' রাধে যার পরান লিকলিক্কে,
তে অহ্ব' ভাদে-হাবরে থাগোয়ে ডাঙর মন
পিরেধিরেই লাগারাক দে যা ঘর' দোর,
তা ঘরত জনম লভাক অহ্মা গুনী ডাক্তর।
বেআইনর হরপাঘত যার ছত্রসান জিংহানী
তা ঘরান অহ্দ' যেন্ এইন সেবনার হুংঘর,
দুর্নীতির হালা ধুমোয় যারা চোঘ মেলি ন পার'দন
ঘরে ঘরে তারার অহ্দ' নীতিসীলের জয়জোগার।
তুস্যে হেয়্যে, হেদা হেয়্যে বেক জনমানুঝোর
মুক্তির বাবদা উরিবো পলাত পলাত গরি,
পরত্তুল্লো সিঙোল ছিনি হাঙ্গেত বান হাবি
সরান পেয়্যে জিংহানির বল পেয়্যে দিনমাধান,
নুও দিনোর নুও আঃভা বেঈ যেব মুরো হলগে
ছরাগাঙর ধুরে ধুরে দচেল হরতদি।

আগার পীরেল্যের চিমোর পরান
উগোরসলা নিজেঝে তাকটানিলেয়ো
আঝার হুয়োঙত পরানান বন্ধক দে,
মানেয়োর মুজুঙ্ ভালেদী হধা হোয় যায় নিজেঝ’ লঘে
যুগ যুগ ধরি বজঙর লঘে গমর লারেঈ
অঃরান এক জিংহানির ফবানি ধারা
বেঈ যায় গরগরেই একলাগারে।
আগার পিরেল্যের অডংহ্রল সবন, আঝা
পাত্থর ফুরি জাগি উধে বোয়েরর লঘে মিঝি-
আগাঝর মেঘফারি গদা ব্রহ্মান্ড সাভে থুম নিজেঝর লঘে
তুও থুম ন অঃয় লারেঈ, জনম অঃয় নুও লারেঈয়র।

                =০=                              (রাঙামাত্যে)

 

 

১১৯। দেবংসী ধাপ
26/11/2016, সোনিবার, 3:43 pm

বলান্যে পেয়োঙ
তুও এয় ন পাল্লুঙ্
এভার মনে হোয়ে চেগার
ধারোজও এল' ভজমান।
সময়র হরপাঘত বানাহ্ যেইয়ে ধাপ
তিধিরিক মনান যে তুলবুল্যে
যেম ভিলি-
লাঘত পেম্বোই একতাল হবি ঝাক
বনা বনা তারাল্যে
হদক হোদোগী তারাহ্ হাবিল হাত,
পরবো পুন্ডিক, চোসামা দভাহাদি।
চিনপুচ্চো অঃদ’ পৈনাঙি গুনোর মানুঝো সমারে
দেজ বিদেজত্তুন থুবো ওয়্যে লেঘিয়্যে হাবিলুন
অহ্মা হাবিদেঙ, হবি, পজ্জন্যা, হদ’ ঔপন্যাসিক
মাদেই সুনেবাক হবিতে, পজ্জন, উপন্যাস
নানান পৈধ্যের সাহিত্য সরভর মিঝেলহঝাল
চাগি চাদে লাগিবো সুখ দোল মিলনী হলাত।

এগত্তরে হোভুলো চাঙমা সাহিত্যর-
আগর, ঈরুক আ’ মুজুঙর হধা,
হদ’হিজু সিঘেনা অঃদ’ আমনর
হবর পা যেদ’ ভালক হিজু
সাহিত্য সুদোমর আলামভেদ।
আঃদানা পধত পেধুঙ রুচ্যেল
লেঘনীর পৈধেনে জরিদো পুস্যেল,
মর মুজুঙ সময়ত ঝালাব্বর গ্যেন
জীবন পধে উজনী যাদে সাগেরেদ ওয়
সাঙেত দিবো মরে বাগে তেগে।

সবনর বোয়েরত চোঘোতভাজেই
উরি যাঙ সেই মিলনি হলাত
আওজর মানুস্সুন্দোই সংপরিবার
আঃঝিরুঝি পারঝার গরি অক্থ হাদেবার।
মুই ধক ধঝরা সাজপোজাগে
সুদোমতও হিঝু জগদাঙ আঘে
মাত্তর চিদেচজ্জায় হধায় হামে
একমন একপরান বেক হবিউনো সমারে
সাহিত্য গিরিত্তির বেক সাবাঙর লঘে মুই সদর
একপিলে ভাদ’র এক বানততলে।
সাধিসমারে থেবার চাঙ তারা লঘে
সাহিত্য বিজগর দারায় দারায় হোনায় ঘোনায়
মোনমূরোহ্ ছরাগাঙে ঝরঝরী নালে নালে হোচপানায় এগেমে।

               =0=                                           তাংসাবি(তাংগুম)

র ভেদ :
১। তারাল্যে= পাজেত্তর; যিউনে তারা বা পাজেত্তারা লেঘন। ২। চোসামা= চোমোখ্যে; বেক হিত্যেন্ধি হাবিল। ৩। জরিদো= মিলিদো; জগার অঃদ’; সুওদ অঃদ’। ৪। পুস্যেল= মাত্রা; ডোজ;  ৫। চোঘোতভাজেই= কল্পনা গরি।

(দিপল্লার আদিবাসী লেখক সম্মেলন-2016’র মিলনি হলাত যেবার রাহ্ ন মিলে। সেনত্যেই তিরোজী মনর দেবংসী ধাপ পুরেলুঙ এ হবিতেবো লেঘি।)

---------------------------

১২০। কোচপানা

25/11/2016, সুক্কোরবার, 9:11  pm

 

বৈজেক্যে মেঘত্তুন পানি মাঘি তুই কানিবে

ঈয়েন মুই ন চাঙ

সবনর গঙারত ভাজি যেয় তুই ডুবিবে

সিয়েন মুই ন চাঙ।

কোচপানা খরানে ফাদিবো মন’ ভুই

আঙিবো তিরোজে তর পাচ পরান।

পদনা দিগোত একফুদো সিরোপানি

বেন্যে ঝরিবার আঘে

কুরেই লোচ আওজ’ মনে

কোচপানায় ম নাঙে,

ভিজিবো চিতমন চপচপ্পে গরি

সাজি থোচ চিদোখুলুঙ গদা আল্যেঙ ভরি।

মুই এইম গীদো সুরে বোয়েরর নাল বেঈ

ছাবা সাঙেত ওম্ তরে আজা গরিনেঈ।

জদনর সাতনালত বানিবোঙ আমা মন

থেবরক নখেব’ এ কোচপানা

পিত্থিমির বুগোমায় লেঘিবোঙ আমা নাঙ

উমোরর সাগাচিন অহ্’ব জনমান।

কোচপানা সোনারেগা মক্তবা ন অহ্’ব

দরমর’ দুলী থেব নিজেনী বিজগত

যুগে যুগে জেদা থেব’ আগুলেই জাগা লব’

পৈনালে বেক জোরা লাঙর মনত।                               

                =0=                        (তাংগুম)

 

১২১। কোচপানা তরে দিলুঙ

২৫/১১/২০১৬, সুক্কোরবার, ৯:৩৫ পিএম

মর কোচপানা তরে দিলুঙ

ও আওজর পরানী

গঝি ল তর চিদোরিবেঙত।

বারিঝে ঝর যেন মাদিরে কোচপেঈ

পরি যায় তেপ তেপ ফুদো ওয় ঝরঝরেই।

এ মনত তুই বানা জুরি আঘজ অন্সুর

তুই ন থেলে পরান কানে জানিচ এ কধাগান।

কোচপানার রঙ ঝরে পঝিমো রানজুনিত্তুন

চনাহ্ চনাহ্ তুম্বাচ গলগলাই চেরোপালা

ওই দোল ফুলোত্তুন।

রানজুনি ধক রঙচঙ্যে ওক

ফুলো ধক তরুনো

কোচপানা দিজনর পরাক পরাক

তিপতিপ্পেই ওক নেইঊনো।

=0=                          (রাঙামাত্যে)