মেয়েরেগা কবিতা থুপ ২৬

 ১২৭। ভব মোরত তলা নেই

26/07/2017, বুধবার

 

ভব মোরত তলা নেই
বুরি বুরি উদো ন পায়
এ কুল ও কুল অঝার দিকুল
রিঙি মাবি কাজা ন পায়।
রস্যা মানেয় সাজুরি গাধে
অহ্'রান কেয়্যেত রস গুলি
ভিদে তগেই উধে বুরে
চুবুরনাবুর কান মলি।

গঙ্গিধারে নেযায় ভাজেই
জীবন ঘরর সচপদর
অজল দুঘোত খার্বো সুঘে
সবনে বানাই নুঅ নগর।
রস্যা মানেয় সরপ তগেই
খর-বিজোলত সাজ পুরাই
চাবেই গিলি ঈল ন মরে
অতিত্তিলৈ চিন লুগাই।

====0=====   

                    (রাঙামাত্যে)

১২৮। জীবন চাদি
30/07/2017, রবিবার

 

জীবন চাদি যাল্লোই আঙি
তেল বুদ্ধি কমি যার
বোয়ের বাজের ঝরও পরের
ধরি রাঘেবার সাধ্য কার!

ও মর জালা আলাঝালা
কন জালা মুই সামেলেম,
ভবরজালা ডাঙর জালা
মরে কেঙরি উদ্ধোরেম।
জীবন যোবন রুপ চদগত
কধক বারবো কধক মান
এই চেরাগর একফুন অজন
ধনর জনর কি সম্মান!

ও মুই বিদ্যে পরি বিদ্যে সিঘি
সিক্খো কদক মুই অহ্-লুঙ্?
আঝল বিদ্যে পরি রল'
নিজরে নিজে ন চিনিলুঙ্।
পরেয়ে কহ্'রত পরেয়ে পহ্'রত
চরী ধরি আহ্দিলুঙ্
নিজোর পধে নিজোর পহ্'রে
একখুজো দ' ন বাহ্'রেলুঙ।

ও মুই নদরকানা পিত্তোমরা
একসাচ্চের মুই চাঝি
ভব সাগর পার ওহ্ই যেবার
ওহ্ই ন পাল্লুঙ্ ঘাত মাঝি।
জুগোল্যে নেই ন আর্ পাঙেই
ঘাত পার ওহ্'ম্ কিয়োত গরি
অকুল দোজ্যেত ডুবি মরিম
জনম জনম সাজুরি।

====0=====                       

                      রাঙামাত্যে)

১২৯। ফুল আ' মুই
31/07/2017, সোমবার

 

এএঃ
ফুল্'লো কদক দোল
কি তেলতেল্যে পাগোরান
রিঙি চেহ্'লে চোক বাঝি থান
মনান অহ্য়দে ওলোঝোল।

 

ও তে
আহ্জং আহ্জং জলং জলং
গলং গলং মেয়ে তার
ম কেয়েআন গিরগিরার
মনে কত্থে আল্যেঙ গরঙ।

 

আ হাঃ
কুঝি ফুলোত আহ্ত ন দিচ
ধার নঘর বিচ বাঝিবো
তার দোলানত দাগ পরিবো
কোচপেলে তুই ন ছিনিচ।

 

ও ফুল্'লো
কজমা ব'ঝে গাবুর রঝে
আঘচ ইক্খু পোতপোত্যে
ন ওহ্চ খালিক চোতচোত্যে
অকালে যে'ন্ ন দঝে।

 

ও তুই
ন ওহ্চ তিনেং ন ওহ্চ ফালাং
মানে বারে ন ফুলিচ
কাদাবোরে ন ঘিনেচ
চেজ্ বেক্খুনর সমান নাঙ্।

 

কদক
পত্তাপত্তি মুপুক এভাক
এভাক আ'র ভঙরা
বোয়ের এভ তঙরা
বেক্খুনে তরে ছোবাক।

ও তুই
মন ন গলেচ চিত ন গলেচ
যার তার লাঙ ওহ্চ
মধু রঝর কুম ন ওহ্চ
ফুলো জাদর নাঙ ন খেচ।

 

ও ফুল
চিধে অহ্'বে ঝরি যেবে
পজি গলি যেব' দোলান
ন থেব' তর মাজারাগান
কার' মনত তুই ন থেবে।

 

ও মুই
ফুলোর দোলোত ফুলোর মেয়েত
চোক দারিদত আঘং মজি
মন ঘেরেঙত যাঙর পজি
লালোচ ধারোচ ভুদি কেয়েত।
ন ক্যে বুঝোঙ বেক দেঘিনেয়
পরেই-মাদেই বেক সুনি
যাঙর যে দ সবন বুনি
মোহ জালত বাঝিনেয়।

       =০=      

                       (রাঙামাত্যে)

১৩০। আন্ধারত ফুত্-থ্যে ফুল
14/08/2017, সোমবার

 

রেদোর আন্ধারত ফুত্-থ্যে যে ফুল
চুবে চুবে ছিদি গেল তুম্বাচ।
ঝরি গেল চুবে চুবে
কিয়োই ঠাহ্'র ন পেলাক।
কদক সদর বোদি আন্ধারর সমারে
কোচপানা মেয়েআনি ঢালি দিলো উভোত গরি
চেরোপালা উরেল' দেবংসি বোয়েরে
ধুরে ধুরে নালে নালে
মুরোহ্য় মুরোহ্য় থলে থলে
আদ্দাবে কলগে।
কিয়োই থান ন পেলাক
কিয়োই ন জাগিলাক।
আজাব'র ঘুমে বেক্কুন জুরো
আ ন অহ্'লে ঊব আহ্'রা জামুরো বিঝে
মদে রঝে মাত্তল পালঙে ঝাবেয়ে
ফুলো তুম্বাচ উদিচ ন পেলাক।

গদা রেত্তো পহ্'র ডাগনি দি
আন্ধারত বজত্তি গরি
চিধে ফুল ঝরি গেল পহ্'র অহ্দে অহ্দে,
এক অঝার আল্যেঙে
সাঙেত দি গেল' রেত্তোরে-
পিত্থিমি মানেয়োরে।
পহ্'র তাগি জাগিবাক ভিলি
আন্ধারত চোক মেলিবাক ভিলি
ফুল্লোত্তুন সিঘিবাক ভিলি
অবাং গ্যেন' তুম্বাজে
রেদ উভেই পারে আন্ধার জিনি পারে,
আন্ধারদও টিগি পারে
আমনর গুন থেলে।

=====০====== 

                                    (রাঙামাত্যে)      

১৩১। সালেন কি গেস্যেক তারাহ্ জিদিলাক
10/11/2017, সুক্কোরবার

দচ্ নভেম্বর উনেচ স তিরাজি জাদ' এহ্'রা খেবার লালোঝে
একপাল ইয়েং-দেইন ধারাধারা লেত্তো ফেলেই
তরে তাক দি গঝক গরিলাক আহ্জার বঝরর সুঞ্ঝুক।
বিজগর ধেলা পাগোর ছিনেকুদো অহ্'ল' অনালে
ধারাধারা লো আহ্দি গেল' নাল বেঈ
যে নাল এঝ' আহ্দের আজিরেন জুম্ম দেঝর ছরা গাঙে।

ত বুগোর উমুম লো ঝরঝরেই ভিজেই গেল চাদিগাঙ
সে লোর্ ভাপ উরের এঝ’ পুরুংপুরুং গরি
লো খেয়্যে ছিজি-মাংসা ভঙদন এঝ’ সিন্ধেবাচ্ চুঃমি
মুরো দেঝত ফেলেই যেয়ে তর সাগেরেত একতাল-
তারাহ্'রে মালুম ভাঙা বানেবার সিউনে তকতগাদন।
‘ফারক গরি সাসন গর’ এ তালিগে খজেনেই
নাককাঝি ফারবান ছিনে অঃল’ বাচপাদা
ঝরা ঝরা ওঃয় গেল’ সিক কেইম ভাঙি।

এচ্যে কয় বঝর বিদি গেল’ কবালর লেঘা ন ধ বদলিল’
পোরা ধরা খেই খেই জাগামাদি বেক আঃরেই
নাধারত পরি গেল’ জাদর গিরিত্থি,
দেইন-ইয়েঙর জয়গীত আঃ জিত্ত্যেবাবদা
ঘরর মূরখামত গাঝা ওঃইয়ে নারদ দেবেদা,
বেলগর খাত্তোঙান অঝারত্তুন অঝার অঃর
জনম অঃর জিদঘিন নেইয়ে ভঝা মানেয়র;
সাকমরা গুলোসান দবাংসা আল্যেগত
সুওত-সাদ্ ছারা চবা জেদেনা
বানা উগোর ছলঙান লাগে তরুনো
ভিদিরে ভিদিরে বেক্খান ঝগলা ঝগলা।
সালেন কি গেস্যেক তারাহ্ জিদিলাক
লো চুজোনি দেইন-ইয়েঙে বজত্তি বজেলাক!
সালেন কি যদেবদে আমি ওধিলোং
বুকপাদা দেঘানাত গুচ্ ঊরি লাংথা অঃলং।

                =০=          

(রাঙামাত্যে)