মেয়েরেগা কবিতা থুপ ৩৪

 ১৬৭। তুমুরু খেল্

১৯০৪২০২২

 

মর মাজারাত নিমুচ্ছে আরুক বজেবার তর যদ জুক্কোল

ঘরপাদা কারিহ্ লভার যদ কুজোক,

বা কি মরে ধাবেবার সাতপাচ ঈজেপ

ছত্রছান গরিম মুই বাজেয়ে দরমর বিধেনে,

তর যদ বান তনা খজানি চালান যেদক বাবদর

আকসোই ফিরন্দিত ভচ মারেবার সয়সাগর বিধেন আঘে মর।

আই এভে কদক গঙারে জগারে কন্ কুনে

আগাচ পাদাল দচকুন বন গরি-

থাদাল ফেলেম মুই ত মাধা উগুরে।

ফু বিদ্যেই মুই সেধক নরম নই

চালান ফিরনিত সেধক অঘা নই

মর গাবন ছচ মনে ন গোরিচ

মরা ফেদেরা ভিলি কিচ্ছু নেই ন ভাবিচ।

আগেও জঘা চেয়োচ, সেক্কেও তুমুরু খেল্লোচ

বল বিধেনর অচ্ সেদামর সেক্খে অজন বুচ্ছোচ।

আ’ যুনি নুও গরি জঘা চেভার চাচ্

আই ছালেন কম্ভা ঝল্গাই

আই তুই যেম্ভা পারে বল নিঘিলেই

মুই বাচ্ছেই আঘং তর লগে যদেবদে  তুমুরু চেভার।

———০——-                              (রাঙামাত্যে)

১৬৮। মুই বার বার ওল ওহ্’ম

২৭৪২২

 

এই পধত ওল ওহ্য় মুই বার বার ফিরং

নুও পত দবদবা লাঘত পেম একদিন

আহ্দানার গঙত মুই মহ্ ন অহ্ঙ্

আজিরেন আবলপোচ্চে মুই আহ্দিম।

যারা কনাছেরে থান পধত ন লামন খুচ ন বারান

তারা ওল ন চিনোন ধুর সুক ন পান,

কনাছেরে বোই থেই পধচিন মাঘিলে

পত পেধে নয় ধুঝি দে’দে নয়।

 

মুই

বার বার আহ্দিম

বার বার ওল ওহ্’ম।

আহ্দানাত ওল অহ্’নাত

পত্থান নিঘিলে।

—-০——                      

                  (রাঙামাত্যে)

 

 

১৬৯। ও পুনোং জুনান

১৪৫২২

 

ও পুনোং জুনান

চেই আঘং তরে গাই গাই।

তর দোল ধক্খান ধল কেয়ে রঙান

ম লাঙনির কেয়েগান-

সিত্থুন দোল তা মনান;

খালিক তে কায় নেই

ম ফাগত এভ নেই,

দাগি দে না তে এঝোক

ম কায় ম কায়।

—-০——               (রাঙামাত্যে)

 

 

 

১৭০। ফুদোদে ফুদোদে

১২৬২২

 

ফুদোদে ফুদোদে ফুল্লো ঝরি যায়

বারদে বারদে গাঙান সুগে যায়

এযদে এযদে বোয়েরান থামি যায়

উদোদে উদোদে বেলান দুবি যায়

পরদে পরদে পেক্খো উরি যায়

ধরদে ধরদে সুক্খান মরি যায়।

——–০——-             

                   (রাঙামাত্যে)

১৭১। ইক্খো কবিতা লিঘিম ভিলি

০২০৮২২

 

ইক্খো কবিতা লিঘিবার ভিলি

যে কবিতাত জলিবো বনা বনা আঘুন

ইক্খো কবিতা লিঘিবার ভিলি

যে কবিতাত ভাজিবো দলা দলা ঈন

ইক্খো কবিতা লিঘিবার ভিলি

যে কবিতাত থুপ থুপ ফুল ফুদিবাক

ইক্খো কবিতা লিঘিবার ভিলি

যে কবিতাত নুও দিনোর সবন ফিরিবাক।

ইক্খো কবিতা লিঘিবার ভিলি

বাচ্ছেই আঘঙ এভ থুদোত কলম কামেরেই

ইক্খো কবিতা লিঘিম ভিলি

অসুক্যে জিংকানিত আঘঙ তনক সাজি

বানা ইক্খো কবিতা লিঘিম ভিলি।

——০——-                 

(রাঙামাত্যে)