মেয়েরেগা কবিতা থুপ ৩৫

 ১৭২। মক্তবা

৫৮২২

 

অজানা কুচিদেই মনানে আমুরাই

সাওনর বারিজে লামে

এ চোঘোত এ বুগোত অগমান আবুজি

সাদাঙা আহ্ওঝত কোচপানা লিবে।

গুমোর সুরুঙোত রোগোনি নাল আহ্দে

অহ্জরে দঙ্গা চিদো কুল ভাঙে

সদরান কোরোলি গদা বানি থেদ চায়

কেনার গঙারে আভাকভাক ভাঙি যায়

 ন থায় ন থায় মেয়েরেগা ভাঙি যায়

মক্তবা খুদো থক উগুরি পরে।

——০——-              (রাঙামাত্যে)

 

 

১৭৩। বাচ্ছেই থেম

১৫০৮২০২২

 

সাওন বিদি ভাদ এল ধুপ মেঘ চাগে

ফুদিলাক ভুলোংফুল ঝাকঝাক,

ধানদুবো ছেরে ঘুমুরোই চারা কারিলাক

একঘিলে জার এল, মাদি তচ সুগেই এল-

এঙিরি কদ বঝর গেল, সাওন গেল ফাওন গেল

তুও তুই ন এলে, ম ধাগত ন ব’লে।

সাওনর এ মনত ফাওনর আহ্বা খেলে

বারিঝের ঝর নালে তেরচ্ছে লালি মারে

কুনকুনেই খুত্থেই যায়,

বেঙা থুদে ফেচ মারি আহ্জি আহ্জি গেজামারি

ফুজুফুজু গরিহ্ কয়

আর কয়দিন, কয় বঝর, কয়যুক

তারে বাচ্ছেই থেবে, তারে চেই থেবে

সবনত দুবিবে, তা আঝায় আহ্দিবে?

যেদকদিন ন এভ, বঝর যেই যুক ফিরিবো

সেদকভিলোন লাঙোনি পরানি-

মর ছরান, এরান, ঊত্তোমুত্তো

ও সাধীনতা তরে বাচ্ছেই থেম,

উমোরবো তরে চেম

জনমান তরে চেম,

মুরি বাজি তরে চেম

ত আঝায় থেম

তরে বাচ্ছেই থেম।

——-০——-             

                     (রাঙামাত্যে)

১৭৪। সবনত ছন্দভাচ

২৭০৮২০২২

 

সবনত সাজাং মুই-

এই দোল দেচ

দোল এই পিত্থিমি,

দোল মানুচ দোল মন

সবনত আনঙ তানি।

মনে মনে সাং খা-খি

চিদেচিত লিবি থায়

চিগোন নয় দাঙর নয়

সং সং আহ্য়পায়।

কেনাকেনি রেনারেনি কারে কয় অজানা

সেই র নেই মূওত বরকধা গ্যেল দেনা

বিচদেঘা কুত্যেরি ন চিনি কি কহ্’না

নেই অরি নেই সোত্রু কোচপানা কোচপানা।

             =0=                                  (রাঙামাত্যে)

১৭৫। নুও পিত্থিমি তুই সাজি উত্

০৫০৯২২

 

আগাচ্ছান কি দুঘে গুজুরি কানি যায়

বোয়েরান মুরে মুরে ধেকবন ওহ্য় থায়,

তারাউন আর আগছান ন জলন

ব্রহ্মাণ্ডর সাবাঙিউন বেসুদোমত বন

নচ্খত্র তার পত্ ঘুরোনি আহ্’রেয়্যে

তারাজাঙালত যেএন জামবদি যেয়্যে,

আহ্বাপানি বদলি রিত ফিরি যেয়্যে

সেনেহ্ পিত্থিমির চেরকুন ভংপরি রোয়্যে;

চেরোপালা মরাকিজেক অসুক্খের কঙানি

ধিবেধিপ্পে বুগোখিল বুকছুলেয়ে কানানি।

নুও পিত্থিমি তুই সাজি উত্ নুও রঙে

পুরোন জাঙার ধোই পুঝি ফেলেই

যদ জঞ্জাল আরাকরা কাজেই

এহ্’লে এহ্’লে ভরি তুল তর গাবুর রঙ্।

তর বুগোত তুই অজল উজুকচুক গরি

গাবুর ফাগোনর আন্ ফুলো করি

কির্বে মেয়েলৈ ওহ্ক আয়পায়

আইলেঙত দুবি যেই জুরবানর সদরে।

——০——-                 

                       (রাঙামাত্যে)

১৭৬। ফি

৬৯২২

 

আর কদক মারুকারু অহ্’লে

আর কদক তলাত পলে

তুই থিয়েই উধিবে?

আর কদক সারানাধা অহ্’লে

আর কদক নাক ঘাদা গেলে

তুই রহ্ম ওহ্য় থিয়েবে?

চেদনর লুরোত আগুন ন ধরেলে

তাত্যে চমগত ছলা ন ঘজিলে

কেনেহ্ পুরিবে তুই নারদর রুবোকুর?

কেনেহ্ বানেবে তার সবাছাল?

যুনি তর ঘরবন ন থেলে

গাবনত দর’মর’ ন অহ্লে

দচকুন দচদোর লাগারাক ন দিলে

উইফি গুইফি কেনেহ্ কাদেবে?

নারদ দেবেদারে কেনেহ্ ধাবেবে?

ফি-ফারা ধোই ফেলেই

সুদ্ধোসাঙ্গ অহ্বে?

—–০——                                     (রাঙামাত্যে)