মেয়েরেগা কবিতা থুপ ৩৩

 ১৬২। সুদোমত ভাঙা নক্খত্র

৬৩২০

 

নক্খত্র তার পত্ বিজিদি বেপধে আহ্দি যায়

নিয়োমর ঘুরন্দিপাগত সুদোমরে আহ্’রেই,

দিঘোল সময় খোরে এঝে এগামার ঘুরনিত

নুও এক বদলানাত নিজোরে আভেরেই

সুদোম ভাঙি বেসুদোমত অহ্য় একলাগার।

——-০——–                               (রাঙামাত্যে)

 

১৬৩। বরগাঙান আ চাঙমাউন

৮৩২০

 

ও মা বরগাঙ দাঙর ছরাআন

লাহ্ক্ মানেয়োর চোঘোপানিলোই ওহ্য়ে তর নাঙ

দাগন কিয়োই কন্নফুলি

রাজকন্যের কোচপানা সে নাঙে লোয়োচ দালি;

নাঙ আঘে আর’ তর দাগন কাচ্চেগাঙ

আনাসান পহ্’ন কেহ্ই গাঙানর পানিয়ান।

কদ চিত আঙনি বিজগর রাজসাক্খি তুই

দিই যর সাক্খিনামা যুক যুক ধরিনেই

চাঙমা জাদর কবাল পুরি যানা রেনি চেই এলেহ্

এঝ চেই যর নিঘুচ নিমনে,

সাতচল্লিচ, খেইত, চোছত্তি, এগাখত্তুর

আর কদক সাল বঝর দেঘিলে ছিয়েঝি উনোনোব্বোই

নোব্বোয়র যেরে কোয়বো বঝর সাদানোব্বোই, আদানোব্বোই,

দিআহ্জার আচ্তো সে যেরে সত্তর’

জাদর কবাল পুরিযেয়ে কাহ্ঙ্ সময়ান,

আর কদক এভাক কিজেনি মুজুঙে কালা দিন

সিয়ুনো তুই দেভে পরাক পরাক চিন।

তুইও যেএন বান্ধা মা মাতবুলে অলর

চোক ফ্যেলে সোহ্য় যেবে দুক্খান তর-পরর

পরঅধিন জিংকানি নেই কন’ আহ্জিরং

তুই মা কক্খে এরান পেভে আমি কক্খে পেভং?

——০——                                    

(রাঙামাত্যে)

 

১৬৪। বেঅক্থত এলে

৬৩২০

 

জাত্যে বেঅক্থত তুই লুহ্’মিলেগি এই সাঝন্যেমাই

লঘে গরি আনিলে সেধক আহ্ইপাহ্ই

জাজি যর এগজা নোনেয়ে কোজোলিত ত লঘে সাঙেইত বদিবার

মুই বেদমা অক্থ খোরেয়ে ঝেইলদ্যে গাঝ’সান

লাঘর নই জঘার নই ত লঘে বদিবার।

কদ রংচঙ্যা চদক দ্যে সবন তর দিচোঘোত

অঝার দোজ্যের ঝল’পল’ পানিসান

খেলাং আগাঝর সোচ্ছান ইত্তুক-

তর আঝা ধারোচ্ছানি যেত্তমান,

তর উদিচ্ছো মুই সুন্যোং-

বেক লাঙনিউনোর যিয়েন এক্কুই থায়।

খালিক না সেই সবন আঝা বেক ধারোচ্ছানি

খোরেই যেইয়ে মত্তুন সময়র গঙারে

আহ্’লেই যেইয়ে জিংকানির গাভুর বেলান,

কয়দিন বা বাজে তনক গাভুরান

যিয়োত ঝাক ঝাক সবনানি চাকবদি থায়;

মুই আহ্জেয়োং সে সবন, ভাঙিচুরি গুরি বানেয়োং

ফেলেই দ্যোং আরাচাগত

নুও গরি আর্ জরা লাগেবার মত্তেই চেগার আনুধোর,

ওহ্’লোত্যে পাদাসান ঝুরি পরং অক্থত

সাদোচ্চে জিংকানির-

রুচ্চেলছারা আনুনি তাবা রানিবার ন চাঙ্।

জাত্যে বেঅক্থত তুই লুহ্’মিলেগি এই সাঝন্যেমাই

লঘে গরি আনিলে সেধক আহ্ইপাহ্ই

জাজি যর এগজা নোনেয়ে কোজোলিত ত লঘে সাঙেইত বদিবার

মুই বেদমা অক্থ খোরেয়ে ঝেইলদ্যে গাঝ’সান

লাঘর নই জঘার নই ত লঘে বদিবার।

—–০—–                                

(রাঙামাত্যে)

 

 

 

১৬৫। দুরোত্তুন কোচপানা

২৬২২২

 

তুই দুরোত থেচ, দুরোত্তুন কোচপেচ

মুইও আঘং দুরোত সাতমুরো আন্দলে,

সাতদোজ্জে ওভোলা, সাতবঝরর পধত

এ জিংকানির কন এক লারেয়ত…

নিঘুচ নিমনে খুচ ফেলেই মুওমি যুনি অহ্য়-

কন একদিন; ভাআলক বঝর যেরে

সেক্খে চিনি লোচ তুই মরে, মুই তরে।

দুরোত্তুন দুরোত ওহ্ক মনকধা ফুর

আইলেঙ মেয়েআনি কুরবদোক, এককুর

বারিঝের ঊরুচ্ছে ঝরছান সেক্খে তেহ্ নিগিরোক।

—-০—–                                              

(রাঙামাত্যে)

 

১৬৬। আমাদি ভাচ

১৫০৪২০২২

 

চোত মাহ্জর এই সেচ রেদোত গভিন সবনত

পাদেলুং তরে ইক্কো রাঙোচ্যা লেপকা

ভিদিরোর ধুপ কাগোজত কিঝু লেঘা নিজেনির কধা

গঙি যেয়ে আহ্জার রেদোর আমাদি ভাচ অহ্’রগে অহ্’রগে

কদ আঙোচ্ছে পুন্নিমা রেত অগনন তারা লঘে,

বিদি যেয়্যে অক্থর দপদবা আরুক বুবর সবনে আভাঙ্যে রোই যেয়্যে

কিঝু বেজার কিঝু খুঝি, গমপানা নোনেয়্যে মিঝেয়ে;

গুমোরত দুবি থেয়ে নিগুচ সুদোত গাদেয়ে কধাতারা

আ কোয়ে থোক ইঙেরে বুঝিনে…

চোত ফুরেই বৈজেক এত্তোক পুনোপুন্যে, বিঝুর যেরে বিঝু

আহ্ওচ কির্বেনি ন মাদি থোক পৈনালে গোদেল গোদেল

জুরো জুরো মুরে মুরে…

——–০——-                                

(রাঙামাত্যে)