মেয়েরেগা কবিতা থুপ ১৮

 ৮৭। সে দেঝত মুই রাজা

১১/০৭/’১৫, সোনিবার, রেইত ৮:৩০সো বাজি

 

গ্যেনর ছদগত নিত্তো ঝালাবুলো মুই, দেঘঙ বেক্খান রিমিঝিমি

বোইয়োর বিদ্যে গিলিগিলি আরাং সাচ্সান অহ্’জম গরি

তলাত বাস্স্যে পির্গোল দিনেই খলাঙর পর্’বো-পুন্ডিক

আমাবান্যে করিকান চোক্কোই মুই চেদাঙর পহ্’রচোক

পরেয়্যে কধা, সুন্যে কধা, ভিলে কধার খৈ ফুদেই

পুজুনো মনা’র সিঘেয় দ্যে কধাসান দিএক এঘরত অলর থেই।

পরবো-পুন্ডিগে কিঝু পুঝোর গরিলে, মাধা খাস্সোই ইয়ে ইয়ে গরি-

মাধানর যেরে মাধান যায়, তুঅ মর জুওপ ন ফিরে

বেজ পুঝোরত গায় ন সোয়েই রাগে মর পাগল উধে; বান্দর পাগল

দাদে দাত কামেরেই, মূতভিরি বদা চোগে গুধুং পাগে ধুমুলুক খেলঙ।

আমনর ভান্দালত কিচ্ছু জমা নেই, বেক ধার-উদোরত ভর

পর’ কধা কোই, বানা পররে সিঘেই, সে সিক্খে মুই ন লঙর

মানসোর মুজুঙোত গম সাজি ভিদিরোর আয়সায় দেঙর ভুদি

সমাজর চোঘোত সিভিল ওহ্য়,

বনা বনা ফাগারা গরঙর ম লঘে, বেগর লঘে

মুই খবর পাহ্’ঙ্ মর ইহ্’ধোঘরত কি আঘে,

পরাক পরাক গরিহ্ দেঘঙ বেক

মুই কত্তমান গম আ’ কত্তমান বজঙ,

সাধু না অসাধু সিয়ান মুই বুঝি পারঙ।

একতাল বজঙ সাগরত বূরি থেলেয়ো, তুঅ মুই গম পরেয়্যে চোঘোত;

কারন, মুই এগজা গম খলেয় যাঙর, গমর মঝান দেঘেয় যাঙর

কিয়োই উদিজ ন পাদন, বুঝি ন পারদন, মুই খুঝিয়ে ধুক গিলঙর।

মর ফালুফালাভাচ, বকসাধন, কু-গ্যেনর খরপাক্কে লাম্বা দুরি বনা

চাদ’বাঘ ওহ্য় পুরপুরেই ধাগ’দি সমেই মাধাদি নিঘিলঙ,

মর ঊত্তোমুত্তো ইধু বেক, ম কধায় ম ধঘে গদা রেজ্যো চলে

মর জোগারত পেত ফাদি নিঘিলে ইধু পেদোলি মিলের পুঅ

মর উহ্’গুমোত গত্তনা পাদি দে ইধুগোর বুদ্ধিদিপ,

পরবো আ’ মাহ্’জনে

মুই ঠেঙ তিদিকতিদিক সিংহাসনত বজি-

মু চিমেই আহ্’জি চান্দলি দাবা চুজোঙ।

যিধু বানা কান মানেয়, অবুঝুনো, আঝরে ধজ্যে গুত্থ্যেবলা মানুজ

যিউনে বানা অয়লবয় পুরোন, মাধা তিঘুত গরি জানন

যিউনোর মুওত কন’ সুওল নেই, নিমাদারাই পাদারা মনে বেক মানি লন

সিউনোরে ঠগেবার, সিউনোরে চুজিবার কার ধারোজ ন অহ্য়!

যিধু চাবেয় খেয়্যে লেঘাপরায় সিক্খিত মানুজোর ঝাক

ধর্ম ন বুজ্’স্যে ধর্মিত্তো মানুজোর জিনজিনেনি

যিধু আধার গাধেয়্যে বর্সি গিলিয়্যে মাজ’সান মানেয় আঘন

যে জাগা পর’ পুন্ লিয়েই দিয়্যে-

চাংছারা পেদেয়্যে নিলোস মানেয়্যে ভরন

যিধু আহ্জার বেকুবোর বজত্তি সিধু মুই এক পাগল দ রাজা ওহ্’ম

সিধু মুই ঝগলাবাদে গম-সাধু, গ্যেনী-পুন্ডিক খলেম।

তারা-ই দ তারারে ন চিনোধন, মরে আর চিনিবাক কেনেহ্!

তারা-ই দ অমি ওহয় আঘন, কন্না গ্যেনী চিনিবাক কেনেহ্

সে জাগাত, সে দেঝত ছন্দরং পাগল মুই-

তারা মাধাত চিদোল দ পুরি খেইম।

মুই একনায়ক, একরাজা, একঝারর এক বাঘ খলেম

সিধু নেই কার’ সাসন, নেই কারর কিচ্ছু কবার আহ্ভাল,

কনকিচ্ছু তারার গরিবার গরজ নেই সে দেঝত-

মর তলবিজোত ইহ্’জেব ন মিলিলে,

মনজক্খায় যক্খেসক্খে বেককিঝু গরি যেইম মুই

ম ধগে-ই আহ্’জেম মানেয়, ম ধগে-ই কানেম

ধার তাগল গত্তনাত বাজেই দি’ ম ধগে তারারে নাজেম।

                     =0=

(রাঙামাত্যে)

 

র ভেত: ১। আহ্’ভাল= অধিকার

           =০=

 

 

৮৮। যুনি পরান আঙে

২৭/০৬/’১৫, সোনিবার, ১২:২৭ এ.এম

যুনি মনান কানে, পরান আঙে

সালেন এজ এক বারিঝে দিনোত

এজ ঊরঊজ্জে দেবা দরত,

ভাঝি এজ কালা মেঘত

মুই সেক্কে বাস্সে থেম তরে ভিজি সাঝি পেরত

গাদিবোং দিজনে ঝর’ফুদোত,

নাজিবোং সমারে মন’ সুঘোত।

 

তুই এজ আহ্‌জার ঝরফুদো ফারি,

ঈনো আহ্‌ভাত উরি

ঝিমিলেনি মাধাত গরি পেরাগর জোগারে

মুই বাস্সে থেম তরে একথুপ রেগেজফুল আহ্‌দত গরি

গুজে দিম ভিজে সুলজুধোত,

গঝি লোম তরে ফুলোঝর দিনেই

ধাবেই দিম তর যদ’ মনদুক বিগিদি কধালোই।

 

তুই এজ বেক লাজ-ডর এরি, স্যংসামা ভাঙি

মন দোজ্জ্যেত আইল্যেঙর তুবোল তুলি

যদ’ আহ্‌ওজ তিরোজ ন আত্ত্যে বুগোত গরি

মুই বাস্সে থেম তরে চিতভরন কোচপানা মিধে রঝিলোই

জুরে’ দিম তর তাকতাক্কে পাজপরান,

ঈলেয় দিম তর চেগার তিরোজ

মারে’ দিম তর ঈহ্‌ধো আগুন নিলোজ বারিঝে ঝরত।

                  =0=                                        

                                                (রাঙামাত্যে)

 

 

৮৯। অদলবদল

২৬/০৬/’১৫ সুক্কোরবার, ১০:৫০ পি.এম

 

মর গদা দিন, মেঘুলো দেবা ঝর তরে গোজেলুঙ

মর বেক চিদোমেয়ে, কোচপানা তরে গোজেলুঙ

সাঝন্যের এক ফুদো পহ্’র্ মরে দিলে অহ্ভ’

সে পহ্’রত মুই লেঘিম যদ’ গীত কবিতে।

 

মর গদা মিধে ব, দোল ফুল তরে গোজেলুঙ

মর বেক কির্বে আহ্‌জি, নোনেয় তরে গোজেলুঙ

সাঝন্যের এক ছলা পহ্’র মরে দিলে অহ্‌ভ’

সে পহ্’রত আহ্‌দি যেইম মুই নিবিলি মুঝুঙত।

 

মর গদা খুঝি, মন’ আঝা তরে গোজেলুঙ

মর বেক চিতপুরানা, আইল্যেঙ তরে গোজেলুঙ

সাঝন্যের একমূত পহ্’র্ মরে দিলে অহ্‌ভ’

সে পহ্‌’রত তোগে’ লোম মুই সুঘোর নিজেনী।

 

মর গদা কেয়্যে পরান, লো ফুদো তরে গোজেলুঙ

মর বেক তিনেঙ আ’ লোক্ষি রুহ্মুজ তরে গোজেলুঙ

সাঝন্যের ধিমে ধিমে পহ্’র্ মরে দিলে অহ্‌ভ’

সে পহ্’রত সাজে’ লোম মুই ম’ জদন ঘর।

                  =০=                                

                                                 (রাঙামাত্যে)

 

 

৯০। সবনর বার্গি

১৯/০৬/১৫, সুক্কোরবার, সাঝন্য ৭:১৭বো বাজি

সবনর বার্গি উরিযায় সবনত
পত্থমে অদেঘা লভাদঝা জনমত
বেগে কন বার্গি কধা, ধারোজ গরঙ পেবার দেঘা
সবনর বার্গি সবনত দেঘা অহ্য়
পত্থমে থায় বানা কিদেবত লেঘা।
বনাবনা কাগোজত বার্গির পজ্ঝন
লাম্বা কিচ্চেয় বিজক ভরন,
মুরুব্বির মুওত্থুন বার্গি কধা-
সুনি যান গুরো-বুড়ো মানেয় গদা
কম্ভা সে বার্গি কিয়োজনে ন দেঘন
লাম্বা না বাদি না পক্থা না কেঙেদা
ধুপ-কালা-রাঙা নাহি চিদিরে-ভদরা?
কুধু সেই বার্গি কুধু তার ঠিগিনে
কেনে পেইম দেঘা তার মুই ঈক্কিনে?

আহ্দি যাঙ এগাঝারা পথ বেঈ দিঘোলী
বাগে-তেগে চোক ফেলেই আগেরে-এহ্দেদী
দিন-রেইত, মাজ-বঝর যুগ যেয় যুগ ফিরি
ছরা-ছরি গাঙ পার ওহ্য় মোন-মুড়ো ফারি,
তোগেই ন পাঙ বার্গি পেইঘো ঝাগ' ভিদিরে
আহ্মিজে দেঘঙ বানা চিল আর সিগিরে,
নেই নেই বার্গি খালখাল্যে বানা নাঙ
পত্থমে বার্গি নেই আঘে বানা সবনান,
বার্গির দেঘা পেইম এ মনত আঝা থায়
সবনর বার্গি বানা সবনত রোয় যায়।

=০=                       

(লেমুছুড়ি)

৯১। গাই যানা সত্যধরি

১৮।০৬।১৫, ব্রেসুপবার, রেইত ৯:৪৬সো বাজি

যুনি, তর ডাগানা কিয়ৈ ন সুনোন
গুনোর কধাত রাত্তি ন দোন
গাই আহ্দি যা এগালা পধে
গাই আহ্দি যা তুই।

যুনি, কিয়ৈ ন মাদান রেনি ন চান
বেসদরে বগলত রাঘান
গাই মাদি যা দোল এগেমে
গাই মাদি যা তুই।
যুনি বেগে বজঙ ফেলেই গমত ন ফিরন
নিজ মনজুগে গাওদামিলৈ তারার খ্যেচ রজান,
গাই গরিনেয় সুখাস্যেগে গম আল্যেগত তুই থেবে
এগাচিদে এগামনে প বারেঈ যা ধো পধে
প বারেঈ যা ধো পধে।

যুনি, বানা মিঝে দেঘস সত্যসুদোম থেলে রাধত
চেরোপালা কুজবালৈ বনবনেলে আহ্'বতঝাবত,
সত্যধরি সেদাম জুরি নেডরে থাক জনম ভরি
নিরোস দিনোত আলাঝালায় জয় এভ তর ঝল্গা ফিরি
জয় এভ তর ঝল্গা ফিরি।

=০=                         

(লেমুছুড়ি)