মেয়েরেগা কবিতা থুপ ১৯

 ৯২। জাদর খাস্যেক

১৬/০৬/’১৫, মঙ্গলবার, রেইত ৮:৫৭তো বাজি

 

এক্খান দুরিত দিভে পাধা বানিহ্ পারিলে

এক্খো পাহ্’লৈ দি পিলে ভাত যুনি ছিজিলে,

সাবে ব্যেঙে এক গাদত বজত্তি গরিলে

বাঘে মোঝে লিয়েনপুঝোনে সদর বনজিলে,

উগুধো অহ্‌ভ’ সংসারান দজ্যে সুগেব’

মোনো রাজা হিমালয় ক’লক ওহ্‌য় যেব’

আহ্মক অহ্‌বার ঘদরমদর কান্ড ঘদিব’

চাঙমা জাদর নিরোস খাস্যেক তুঅ ন বদলিব’!

 

নুনে-ভাদে দিভে খেলে বার চেদানা এক্খে ন খরে

সিক্ষে-দিক্ষেই অজল অহ্‌’লে জাদ ঘিনেনার গুলো ধরে,

পরেয়্যে উগুরে ভর গরিনেয় তরি যেবার ধারোজ গরি

এধাপাদা সাংসারালোই কারাকারিত মরামরি,

ইত্তুক দিনেই একতাল আঝা, বেসেদামর আরাঙ চাজা

বেজ তগাদে প্যেজোত পরি অজ্ আহ্‌’রে ওহ্‌য় ছারানাদা,

কোরবান্যে গোরু, পুজোর ছাগল দুঘো দিনোত দুক ন চিনে

মরন’ মুওত গরত উধি ঘাস চাবেনে’ নিচিদেয় গিলে,

আমিয়ো সেঝান চাঙমা জাদি দুঘোমায় যে নিত্তো আহ্‌জি

চোঘো মুজুঙত মরন দেঘি লো এহ্‌’রা খেয় য্যেয় দ নাজি,

বেক জাত্তুনে বদলি যেবাক, সুখাস্যেগত অজল অহ্‌’নেয়

আমা জাদর অঘা খাস্যেক কন’ উমোরে বদল্ল নেই।

ধর্ম নাঙে অধর্মলৈ ঠাগুর থেবাক মজি

বেআক্কল্যে সুদোম বুগী মানুজ খেবাক লুডি,

রাজসুদোমর বাণা ধরি লারেই লারেই জোগার পারি

অন’ মানেই চেলা তাদি কোজেই লবাক আমন’ ভুদি,

পর ভালেদত চোক সুলেব’ জাদর সুঘোর বাহ্লা তুলি

বেজাদ টানি আল্যেঙ গরি সজাদ ধরি তাগল গজি।

আহ্‌জি যেব’ ধর্মসুদোম, লুগি যেব’ আল্যেগী মান

পোরা বান্দারা কবাল ঘজা অভালেদত যেব’ পরান,

ঘরর ভিদে অহ্‌ব’ চিদে, গাঙ পার অহ্‌ব’ পরর আহ্‌দত

ভাচ লেঘা বেক বদলি যেব’ বিজক থেব’ কালা গাদত,

বানিমরা আঙারা কুরোত আহ্‌’রকরা ছেই থেব’ মিঝি

তেজী আলসে ন ধুমেব’ জাদ মাজারা যেব’ লুগী।

=০=                                      

                                                    (রাঙামাত্যে)

 

৯৩।মুই তগাঙ মরে

১৭।৫।১৫, রবিবার, রেইত ৯:১৯সো বাজি

মুই তগাঙ মরে
নুঅ জুমোর চেরেই পুঘ' সমারে
ফোগেয়্যে ধানখুজর কুঝি পাদা সমারে।

মুই তগাঙ মরে
বোজেগর গাঝে গাঝে কুঝি আগা সমারে
মাদি ফুরি উত্যে ডগা বাচ্ছুরি সমারে।

মুই তগাঙ মরে
জধা থেয়্যে একঝাক সত্থা পেইঘো সমারে
কুরোকুস্যে মুপুক, খুত পিগিরে সমারে।

মুই তগাঙ মরে
তেঙতেঙরির উর্গো নাঝর সমারে
চনাচনা তুম্বাচ ফুলুনোর সমারে।

মুই তগাঙ মরে
মার্ক্স-লেলিন-মাওবাদর সুদোমত
মহাত্মার অহিংস লারেই, মেন্ডেলার আল্যেগত।

মুই তগাঙ মরে
এমএন লারমার আমলত
'খেমা গর পুরি ফেলা' এ গুনানত।
ভুলোত পরি বুঝ পেয়্যে নয় যে মুকপাত্তি
যুগে যুগে জাদর চিদোত অহ্য় যার বজত্তি।

মুই তগাঙ মরে
গোঝেন বুদ্ধোর বিস্সমোত্রি কধাবুন্যে আলামত
নির্বান আরাংসুক অগ্যেনর থুমানত।
কামর গুনে মানুচ ডাঙর জনম গুনে নয়
এ কধানত পরাক পরাক মানসুদোমর জয়।

মুই তগাঙ মরে
মেদিনির বুগোত বেক দোলানিত
আহ্মিজে খুঝিরাজি পোতপোত্যে মুয়ানিত।
মিঝি থেদুং চাঙ মুই বানা সুঘোমায়
দুঘো রঙ নথেব' এক্কা কন জাগায়।
কুধু পেইম কুধু পেইম মুই সে মাধান
শান্দির বোয়েরে নাঝিবো সংসারান,
তগেলে ন পেব যিয়োত ঈংজের মাজারা
সংআহ্ভালে উরিবো বানা মানেয়মুক্তির বাবদা।
সিধু মুই সে জাগাত এগজা তগাঙ মরে
চেরোকিত্যে দচ কুনে সবনে পত্থমে।

=০=                               

(রাঙামাত্যে)

 

 

 

৯৪। সমাজ চিদে

২৫/০৫/’১৫, সোমবার, রেইত ১০:০৭

এ মনত চিদেয়ানি থায় ইঝু জত্‌বদি

সজ্ ঈরি খুলিবার্ মূ তোগেই সুপ্ ন পাঙ্,

নাল আহ্‌দেয়্ বিজিরাঙ্ জাগুলুগোত পরি থাঙ্;

ন পারং জত্ সরেই যাঙ্ বানা ভাবি ।

রেনিলে অনসুর দেঘং সমাজর জাগুলুক

মানেয়োর মনানি সরে ধরি কুলুক্

ঘুঞ্জিমুঞ্জির নিত্য অভাব কেয়ে-কধা-মনে

জধা নেই ঝরাবান বেগে জনে জনে।

রাজনীতি সমাজনীতি অর্থনীতির কধা

ভাবিলে ছরেবার নেই, অমক্‌ঘর আঢা,

থিবুরুক্ ঠেঙ্, দাবানা ভাঙা এ সমাজ আহ্‌দি যায়

গণতন্ত্রর্ খাল্যে ভুদি; নাঙান বুগী থায় ;

মূঅকধা খুলি কবার নেই অধিগার

ব্যেক্তি সাধীন বানেয়ে কধা নেই কন’ লার্‌চার্।

রাজসুদোমি তারাই ডাঙর্ সদানর অক্‌চাত্

দুর্নীতি বোঅল্‌সুদোম তারা মন’ বক্‌চাত্।

তারা ডাঙর্‌, তারা বীর্, মানীগুনী সমাজত

পুঁজিবাদী বুর্জোয়া সুঝি খেয়ে রদ্-

নেইয়ে দুক্‌খ্যে মানেয়োর লাধি মারি কবালত্।

শুজোন যন্ত্রর চিবেত্ পরি উরনঝারা মানেয়

প্রগতি আহ্‌ঢের্ সেনে আমুরেই আমুরেই।

নিত্তোবিত্তো শুনি পাঙর খুন গরানার খবর

বলাজুরত পরান যার গদা মিলে লগর,

খানাপিনেত বিজ মিঝেয়্যে ঠগাবাজি সপ্পানত

আমন’ পরান আমনর নেই আঘে বন্ধগত।

বিদ্যে-শিক্খে লেঘা-পড়াত নেই ঘিলুগোর দাম

ঘুজ বেবারত ঝগলা মানে’র যিয়োত-সিয়োত কাম,

দল’বল, টেঙাবল বেগত্তুন বেজ ডাঙর

মান-মজ্জাদা সেকসেগিলিত শীলে-সুদোমর।

ধর্মখলাত, রাজনীদিত এক্কুই চেলার আহ্‌ল

গাল পাগারা’ ঠগা খানাত পুরের দজকবাল,

নেই মাদিয়ে, নেই বুলিয়ে দিকবনে বেক অলর

বুদ্ধিজীবি সুশীল মানুচ রুহ্মুজ মাত্যে সাবর।

মাও-লেলিন-মার্ক্স সুদোম দঝ’ধারার কধা

যিউনে ধরি চলন-ফিরন তারাও রিবেঙ পজা,

নিজোর লঘে জাদর লঘে পাগারা গরি যাদন

তারার কধা কামানি দে’লে স্যংসামা অহ্‌য় মন।

শুজোক তপ্ফার উভো কাঙেল-গত্তনা ভাঙি দিনেই

নেইয়্যে দুখ্যে মানেয়োত্তেই যারার আঝল লারেঈ,

উগুরে উগুরে দঝ’ভালেত্যে বর গলায়ে জগার পারি

মুরে মুরে শুজি যাদন দঝ’সম্পুত ডাগেত গরি।

সমাজর এ ধক্খান চলিবো কি অনসুর

বদলিবার বদলেবার ন এভ’ কি থিরপুর?

ন এভাক কি বদলেয়্যে অহ্মা লর্বো গম মানেই?

সংধারালোই চলিবো সমাজ তপ্ফা ভাঙিনেয়!

ভাবনানি উধেপরে এ মনত্ পাক খায়

নিঘিলিবো কন্ পাগে নিত্তো ধুর তগায়,

ভাবি যাঙ, ভাবি থাঙ রেইত-দিন যিয়োত পায়

সবন ভাঙি সবন দেঘঙ নুঅ সমাজর আঝায়।

                       =০=

                                                                  (শিজোকদোর)                          

র ভেত: ১। রাজসুদোমি= রাজনীতিক

২। বোঅল্‌সুদোম=(বোঅল মাঝে যেঙিরি চিগোন মাচ্ছুনরে খান সেঙিরি থাগোয়ে মানসেয়ো নেইয়্যে মানসোরে শুজি খাদন। রাষ্ট্র যন্ত্রই নাগরিক্কুনরে তুস্যে লাগার) মাৎস্যন্যায়

৩। অক্‌চাত= ওস্তাদ ৪। প্রগতি= উজন্দি গঙার ৫।আমুরেই আমুরেই= হামাগুড়ি দিয়ে ৬। থিরপুর=পুরথির; গম অক্থ

৭। দঝ’ভালেত্যে= সমাজদরদী ৮। শুজোক তপ্ফা= শোষক শ্রেণী

৯। শুজোন যন্ত্র= শোষণ যন্ত্র ১০। উরনঝারা=(যার কিচ্ছু নেই) দেউলিয়া; নিঃস্ব

১১। তপ্ফা ভাঙিনেয়= শ্রেণী ভেঙে। ১২। সংধারা= সাম্যবাদ;

১৩। দঝ’ধারা= সমাজতন্ত্র

          =০=

 

৯৫। দোল এক্খান আদাম এল'

১৬/০৫/'১৫, সোনিবার, বেন্যে ৭:৩০তো বাজি

ভরন এক্খান গাঙ এল'
গাঙর পানি পহন এল'
লারে লারে গাঙ সুগেল'
মুরর পানি কুলুক অল'।

এইল এক্খান বাগান এল'
বাগানান খুব চেবার এল'
বাগান জঘা দাঙা এল'
এইলেয়ে বাগান ছেই ওয় গেল'।

দোল এক্খান আদাম এল'
ধনে-জনে ভরন্দি এল'
আবাদা দঙ্গা পীরে এল'
মানসো পরান কারী নিল'
বর পরঙত বেল ডুবিল'
ভরন্দি আদাম ছারা পল'।

             =০=                     (রাঙামাত্যে)

 

 

৯৬। আমি জুম্ম লিটারেরি জধাদল

১২/০৫/২০১৫, মঙ্গলবার, বেন্যে ০৯:৪০সো বাজি

 

আমি জুম্ম লিটারেরি জধাদল

কলমত কালি ভরন আমা বল,

ন ডরেই, ন লাজেই কাররে

আমা কধা সুনেবং বেগরে।

নুঅ দিনোর নুঅ গঙ্ আনিবার

ডাগি যেবং বেগরে বারবার,

আমা সুদোম, আমা ভাচ, আমা জাত বাজেবার

মানে-গ্যেনে পিত্থিমিত টিগিবার।

এঝ’ এঝ’ বাপ-ভেই এঝ’ মা-ভোন

কলমর আমাদিভাঝে আমা কধা কোয়।

 

আমি জুম্ম লিটারেরি জধাদল

লেঘানার সাহজত আমা জধাবল,

পিচ্ছে পরি ন থেবঙ, মুজুঙেন্ধি উজেবঙ্

কার’ মানা বরজোগারত আমি হ্ম ন অহ্‌বঙ্।

লেঘিবোঙ দুঘো কধা সমারে

সুঘো সবন দেঘিবোঙ সমারে,

কোচপানা জধাবলে মিলিবং সমারে

সাজেবং জাদ’আলাম সমারে।

এঝ’ এঝ’ বাপ-ভেই এঝ’ মা-ভোন

কলমর আমাদিভাঝে আমা কধা কোয়।

 

আমি জুম্ম লিটারেরি জধাদল

সাহিত্তো উজন্ধিত আমা রদবল,

আগাঝত নাঢেংপুত্তি পেইক অহ্‌বং

আজিরেনে ডোঅ মেলি উরিবং;

পত্তাপত্তি নানা রঙে রানজুনি ছিদেবং

জুমো দেঝর মোন-মূরোয় খুঝি ঝর আনিবং।

ফুলো তুম্বাজ ছিদেবং দঘিনোর বোয়েরে

কাজেবং আরাকরা লেঘাবান’ গঙারে,

দুলেবং পিত্থিমি আমা লেঘা’ ভুঝোলে

আনিবোং সুনামি তুবোলে তুবোলে।

এঝ’ এঝ’ বাপ-ভেই এঝ’ মা-ভোন

কলমর আমাদিভাঝে আমা কধা কোয়।

=০=                                

(রাঙামাত্যে)

 

ডালি দেনা: জুম্ম লিটারেরি সোসাইটির বেক সাবাঙ-সাবাঙিউনোর উদিঝে আ’ জুম্ম জাদর বেক লেঘিয়্যে, সাহিত্তিক্কুনোর উদিঝে।

=০=