মেয়েরেগা কবিতা থুপ ১৭

 ৮২। নুঅ নেই

৩১/১২/২০১৫, ব্রেসুপবার, ১১:১৯ পিএম

 

পুরোন পাদা ঝরি যায় নুঅ পাদা কোর্ উধে

লারে গরি সে পাদা’ন পুরোন অহ্‌য় কি দুঘে?

পহন্ পানি ঝুরি পরে বারিঝের দেবা ঝরে

মাদিত এয় ছড়া-গাঙ কিত্থেয় কুলুক গরে?

নুঅ নুঅ পেন্-সিলুম রঙ্ যায় কি কারন

ধার তাগল ভঘা অহ্‌য় ন কাবে কেনেহ্ ছন?

নুঅ দিনোর নুঅ রঙ্ বানা থায় খানক্খন

দিবে দিন বিদি গেলে কেয়্ বানে বেগ’ মন্,

সেনে মুই মরে কহ্‌ঙ্ নুঅ নেই ম নাঙে

রেত দিন অহ্‌দত রাঘেয় বিদি যায় বঝরে।

আগা নেই গোড়া নেই বধু নেইয়ে বদাসান

নুঅ পুরোন বঝর্ নয় আঝল অহ্‌ল’ এ মনান্,

আহ্‌জিরুজি কোচপানায় কাদি যায় যে দিন

মনানত যুনি ন থায় ঈংজের কন’ চিন;

ডর নেই, সেজা নেই, অডা নেইয়ে যে সময়

কামে কধায় নিচিদেয় চলিবার যু অহ্‌য়,

ম সুদোমে মুই যুনি লারি পাঙ সজপদর

ম নাঙে সিবে নুঅ দিন-রেত-মাজ-বঝর।

               -০-                                     (রাঙামাত্যে)

৮৩। বর্ ব এঝের

০২/০২/’১৫ সুক্কোরবার, ১২:১৯ এএম

 

বর্ ব এঝের আর’ ভুজোল এঝের আমা মুজুঙত্

বর্হ্মামুরোহ্’র্ দাঙা আঘুন আহ্’দি এঝের সাঙুদোরত,

দোজ্যে ফারি তুবোল এঝের উঙুদোর চক্কর্

আঙি যেব’ এহ্‌ইল্ তারুম, ভাজি যেব’ দোর্-ঘর,

ডুবি যেব’ বলাভুই, গলি যেব’ ধান’গলা

ন থেব’ কন’ মাজারা, ওহ্’য়্ যেব’ বেক্ চবাখলা।

 

চিদে কি আঘে তর, বডা চোঘে কী দেঘর?

নাকি বানা সুঘে মজি পুনোকানা নাধর?

চোঘত চর্হ্মা বির্বিস্যে মাধা, অহ্মা ডিগ্রি বুগী থাজা

বাবু চেদেই আঃকি বানা ত আলুবো খুরোর?

চহ্’র কি বানাহ্ ত মুজুঙান, ত পেদত্তেই ফেলর বালা

জাদর কধা, ভাঝর কধা, গর’র কিত্থেই এহ্’লাফেলা?

পর’ভাচ্চোই নাগর মাদস, আমন’ভাঝত্ দায়ছারা

বর্ খলেনেই কিত্থেই গর’র্ জাদর লঘে পাগারা;

তর চেদানা, বাবুনামা উমোরধরি থেদ’ নয়

একদিন এভ’ বুঝিবে সেক্খে আকবাল্যে কারে কয়।

 

বিজক্খান তুই রেনি চা দোলেদালেই বুঝি

দেঘরনি ঘদি যেয়্যে দুঘোর সময়ানি,

কেঝান এল’ বুদ্ধধর্ম, ‍সেক্খেনর কাস্যেগী,

অশোগর ধর্ম শাসন বুদ্ধোর সুদোম মানি,

অহ্মারাজা কণিষ্ক, পালরাজার শাসন

কেঝান এল’ বুদ্ধগয়া, নালন্দা, তক্ষশীলা,

পাহাড়পুর, সোমপুর, ময়নামতির কধা

বামিয়ানর বুদ্ধোমুত্তি অহ্’ল’ ছারানাধা;

ডুবি যেয়্যে মাদিত্তলে, আহ্’জার বঝরর সুঘ

পুনে পুনে রয়্যে বানাহ্ খা ন যেয়্যে দুঘ।

 

সাক্যজাদর লভাদঝা পরাপেয়্যে কবালত

দেজ আহ্’রেই জাত আহ্’রেই পরি রয়্যে বেনালত,

ভাচ-ধর্ম, রিদিসুদোম কুত্থুন কুধু পার-

ওহ্’য় যেয়্যে সেত্তেরা; বিজগত্ বারবার,

চম্পকনগর আহ্’রেই এল’ঙ্ কন্ জাগান্ধি লামি

ন থামে জাদর বুগোত দুমুরোনার ফবানি;

নাঙ পেই নাঙ্ আহ্’রেই, দেজ-জাগা থিদে নেই

ওহ্’য় গেলঙ্ চাঙমাজাত কুত্থুন কুধু এয়্;

জিদিলঙ রেজ্য-জাগা গরি কধক্ লারেঈ

গরিলঙ শাসন নিজে, মানে-গ্যেনে থেয়্,

লারে লারে এল’ আর’ কালামেঘে ঢাগি

চেরোপালা আন্ধার অহ্’ল’ জাদ’জীংকানি।

আহ্’জি গেল’ রাজসাগিন কালাবাঘা, নুরনগর

মইচাগিরি, সাপ্রেইকুল, কদ’ আহ্’ওজর আলিকদম্,

শুকবিলাস, রাজানগর, রাঙামাত্যের রাজঘর-

ডু্বি গেল’ পানি তলাত; রেজ্য অহ্’ল’ চদরভদর্।

আহ্’জার এগর্ ভুই ডুবিল’ লাক মানেয়োর কবাল গেল’

এঙিরিনেয় আধাপধত চাঙমা জাদর বেল ডুবিল’,

সাসন নিয়ম বদলি গেল’ দেঝর যেরে দেজ বজিল’

চাঙমা জাদর বুগে-পিঢে চুচ্যেঙ্ কাদা-সেল ফুদিল;

লারে গরি বেক আহ্’জি যার, রিদিসুদোম, সাজপোঝাক

গজক ওহ্’য়্যে পরর আহ্’দত্, মাজারা লুগার মুওর ভাচ।

 

বেক কিঝু তুই দেঘি-সুনি, কান-বরাহ্ ওহ্’য় যুনি থাস

বেজ দেরি নেই ভজ ওহ্’য়্ যেবে সে সময়ান বাস্যে থাক।

বর্ ব এঝের আর’ ভুজোল এঝের আমা মুজুঙত্

বর্হ্মামুরোহ্’র্ দাঙা আঘুন আহ্’দি এঝের সাঙুদোরত,

দোজ্যে ফারি তুবোল এঝের উঙুদোর চক্কর্

আঙি যেব’ এহ্‌ইল্ তারুম, ভাজি যেব’ দোর্-ঘর,

ডুবি যেব’ বলাভুই, গলি যেব’ ধান’গলা

ন থেব’ কন’ মাজারা, ওহ্’য়্ যেব’ বেক চবাখলা।

                   --0--

(রাঙামাত্যে)

র ভেত্ঃ

১। বর্ ব= সাইক্লোন/ঘুর্ণিঝড় ২। বর্হ্মামুরোহ্= আগ্নেগিরি ৩। কাস্যেগী= সভ্যতা

-০-                                         

 

 

 

 

৮৪।ডর্

১২/০৭/’১৫, রবিবার, ১১:২৬ পি.এম

 

ইধু এহ্'রা খেয়্যে বাঘ' ডর নেই

আঘে চিত খেয়্যে বাঘ ডর

ইধু চেইরঠেঙ্যে বাঘ ডর নেই

আঘে দিঠেঙ্যে মানেয়োর

ইধু বিজুল্লো সাবর ডর নেই

সিত্থুন বেজ বিজ ইধু ঈংসে ভরা মন

ইধু থাদারর আগুনে আঙারাহ্ অহ্'বার ডর নেই

মানেয়োর মুও ভাজে আঙি গরে ছেই,

ইধু আরেঙ পরানবলার কন’ ডর নেই

আঘে মানুজরুবী অমানুজর ডর,

ইধু তাঞ্জাঙর নালত কাচ্যেপানি ন পরে

মানেয়োর রাঙা লো ধারা ধারা ঝরে,

ইধু আহ্বাগুন্ডেলত কন’ আহ্’বা নেই

আঘে বানাহ্ দুঘোর ব-নিজেচ,

ইধু আগাজ ফাদি ঝর ন এঝে

পরে বানাহ্ পরা পেয়্যে মান্জোর চোঘোপানি,

ইধু নেইয়্যে-থাওয়ে এহ্’রা-মাজে খান

কোচপানা রাধত বেগে উভোজ থান,

ইধু সবনর কন’ রঙ নেই

কুসবনে অডামন মুকালা মানেয়

ইধু কোয়পারি’ বুব্, শুনিনেয় কাল

আহ্’ঢি জানি আডুর, কবাল্যে আকবাল

দিকবনত কুব মানেয় দুরাঝায় বাজি থান

চিমোর বুগে ধুগি ধুগি তারা পরান ফেলান।

                              --00--                                     

(রাঙামাত্যে)

 

র ভেত: ১।থাদার= আগাঝ’বাজ ২। আরেঙ= হিংস্র( যে’ন্- আরেঙ মোজ, গব’ এবাবত্যে। ঘর্বো মোজ যিউন পালত্তুন নিগিলি যেয় গায় গায় ভঙন, মানুজ দেঘিলে লরেই আনন্, সিং মারন)

৩। কাচ্যেপানি= বিশুদ্ধ পানি(যে’ন্- তাঞ্জাঙত্তুন ধুব গরিহ্ কারা যাত্তে ধক পানি পরেগী)

৪। আহ্বাগুন্ডেল= বায়ুমন্ডল ৫। অডামন= শংকাযুক্ত মন,

৬। দিকবন= শৃংখলিত অবস্থা(সাবে দিকবন গরিলে যে’ন্ লরিচরি ন পারে আমারেয়ো রাষ্ট্রযন্ত্রয় যেসান্যে গরি থোয়্যে কনধক্যেয় আমি লরিচরি ন পারির)

৭। কুব= লুলো; পক্ষাঘাতগ্রস্ত; প্যারালাইজড

৮৫। ডাঘকধা গীত ২

০৭/০৪/২০১৫, মঙ্গলবার

 

‘তিনসিরে যাত্থুন বুদ্ধি লইয়ো তাত্থুন’

এ কধানর ভেদালাম বুঝি ল ইয়োত্থুন,

লুংগুরবুরো গ্যেনি মানুজ তিনসিরে কয়

এ জিংকানিত সুক এভ' তাত্থুন যে বুদ্ধি লয়।

 

‘নিজো জাগাত আহ্ঘি প’র পর’ জাগাত সেপ ফেলাদে ডর’

এ কধানর হ্মেত্তান বেগে বুঝি পারর,

সাধীন দেঝত ঝালাব্বর থায় আমনঅ অধিগার

পরঅ অধীনত থেয়ে মানসোর চেরোপালা আন্ধার।

 

সেদাম নেই গরি যুনি ডাঙর কিঝু চেলে

‘পুনোত ঘু থেয় গত্তনাত পানি ঢালানা কয় সিয়েনরে’।

 

উজিত কাম এরি থেলে বেউজিত কামত

‘যার কামে যারে সাজে আর কামে লাদি মারে’ বুঝো ইয়েনত।

 

‘আহ্ঘানাত্থুন ভুরুত্তো ডাঙর’ গপ্পো মানুজ কন

মুওধি ফর’ফর’ কামে ন গরন।

 

‘জেদাবাজ পুরোনা’ যিয়েন অঙরাপিদেনা

নহ্’য়ে নহ্’য়ে গরিনেয় দুঘোত ফেলানা।

 

সাপ ওহ্য় খুধে ওঝা ওহ্য় ঝারে

দিমুকখ্যে খাস্যেক কিয়ে যুনি গরে,

এককিত্থেন্দি গম খলেই আরেককিত্থে মারে

চিনি লভা দোলেদালেই এধক্যেন মানসোরে।

==০০===                           

(রাঙামাত্যে)

 

 

 

 

 

৮৬। পিত্থিমির আলামত মানেয় ফুল

১২/০৭/'১৫, রবিবার, রেইত ৮:২০বো বাজি

সংসার এক্খান আলাম' সান
সে আলামত মানেয়ুন ফুলো সান
ইধু ডাঙর মনদৈ বেইনটানা দ্যে পরে
বুদ্ধির সুদোলৈ পজ্যান বুনো পরে
ইনজেবর ব কাধিলৈ জু তুলো পরে
গ্যেনর সজপদরত থাগোয়্যে অহ্ পরে
ইধু নিআলসি নিমনে কাম গরা পরে
কাবিল চেরেত্থায় মুজুঙে আহ্দা পরে
ইধু যোগ্যতায় ভরনভিরন অহ্ পরে
বিদ্যেসিক্খেয় ঝালাব্বর থা পরে
সালেন ফুদি উদে মানেয় জিংকানির পোতপোত্যে ফুল।

ইধু মানসুদোমে মানেয় খলাহ্ পরে
আ ন'লে এহ্'মানে লাজেবাক আমনরে
যে জাগাত মানেয়োর জয়গান হিমালয় মোনোরে ডিয়েই যায়
সাতগাঙ সাজুরি দোজ্যে পার বায়
দেবেদায় পাদারা অহ্'ন যে মানেয়োর নাঙ সুনি
যিধু জনম অহ্য় দেবগুরু সাধু ঋসি মহামুনি
সে জাগাত মানেয়োর মান মানেয়্যে ন রাঘেলে
এ লাজ লুগেবার কারর কি সেদাম আঘে?
মানেয় ডাঙর মানেয় স্রেস্ঠ মানেয় অজল পিত্থিমিত
ইয়েন সত্য বেগে মানন কিয়ৈ ন গরন উল্লোজিত
তুঅ দ মানস্যে মানেয় নাঙে অমানেয়োর কাম গরন
মানেয় স্রেস্ঠ এ কধায়ান পেঘত ডুবাদন।
মানেয়োর লো খেয় মানেয়্যে বাজদন
মানেয়োর বুগো উগুরে ঘর' খাম গারাদন
মানেয়্যে বেজদন মানুজ, কিনদনও মানেয়্যে
মানুজোর ভাগ্যত লর্বরি গরদন সিয়েনও মানেয়্যে,
আহ্মক কি ন লাগে তর মানেয় ভিলি তুই
কি আঘে মানেয়োর সুদোম কি দেঘঙর মুই
পিত্থিমির আলামত ভরি যেইয়্যে ভুল
মানেয় ইক্খু কাদা বানা নয় দ ফুত্যে ফুল।
ইধু মানেয়োর ইক্খু মন চিগোন
কুজুরো বুদ্ধিলৈ তারাহ্ ভরন অহ্য়োন
ইনজেব আহ্'রা মানেয়্যে বেআক্কলে চলদন
অগ্যেনর সজপদরে আলাম বুনদন
সাজন নেইয়ার সেনেহ্ ঈরুগোর আলাম
সুদোমতারাম ভাঙা ইধু ঢেল পজ্যে বেক্খান।

              --0--                                      (রাঙামাত্যে)
র ভেত: ১। লর্বরি= পরিচালক

=০=