মেয়েরেগা কবিতা থুপ ৩২

 ১৫৭। লুকদিয়ে লালোচ

 ২০/০৬/১৯

কোচপানা নাঙে লালোচ জরেলে

নিঘুচ মন কধা নোনেয়ে মিঝেই

সুঘোর সবনত আহ্জন মাদনে

দি জনর আহ্দানা জাঙাল সাজেই।

অঝার আহ্ওজে মেয়েবন আজুরি

বাচ্চেই সে দিন্নো মুজুঙোত এভ

আল্যেঙ আধুলি চরবত সাজুরি

দিঘোল সময়ান যেক্ষে পার অহ্ভ-

চাধে চাধে লারে লারে বদলে রং

কোচপানা ফাওই যায় ধচ ফুরেলে

দি মনে লেইনপধত বিজিদি পরন

লুক দিয়ে লালোজত ছেম উধিলে।

কোচপানা ভাঙি যায় সাত্থত দুবিলে

ব্রেকআপ সিরকাবে বিচকাদা রয়

নুও রঙে সবনে লাম্বা চোক ফুদিলে

কোচপানা গমপানা আধাপধত ভচ অহ্য়।

তুও বারিহ্ মিলে-মরত লাং পাগলত বাঝি

লালোজর ঈলমারেই চাং ওহ্য় গদা

কেয়ে মনে খেয় পুরান সুক ইঞ্জেপ চুঝি

কাদে যান জিংকানি বেক অদা অদা।

       ——০——                         (রাঙামাত্যে)

 

 

১৫৮। নকভাচ্চে কোচপানা

১৮/০৬/১৯

 

মুই দুবি যেম নাগর ত কোচপানাত

মুই আহ্জি যেম পরান ত আল্যেঙত।

পুর্পুচ্যে এ জিংকানিত কোচপানা ওহ্ক সদর।

দমাকদাল্যে এ দিনোত চিমেয়ে মনর মানেয়োর

দেঘে যেবং কোচপানা,

নয় বানা বদলানা-

লাং ভাঙি লাং জুরানা

কোচপানার বেয়ারত।

মুকদুবি পরান ধালি কোচপানাত লেদেবং

ফাগারা মন সাত্থর বন

খুলি দিবোং অঝার মেয়েত,

দিজনে দিজনর আওজর সদরর

মেলি দেঘেবং এ কুলি দিনোত।

—-০—-                    (রাঙামাত্যে)

১৫৯। আমনদালি

১৭/০৬/১৯

 

মুই পুরি যেম সে আঘুনোত

যে আঘুনান তর

নিমুস্যে রেদোর ইনজিপ অক্তত

মুরে মুরে আঙি যেম তুচ পুরোনা ধক।

মুই আহ্জি যেম সে গুমোরত

যে গুমোরান তর

আহ্বাত উরেইদে ফেনাকুর’ সান

দেবংসি ওহ্য় থেম ত কুন্দোলত।

তুই গারালি ওহ্য় দিকবন গরি

অহ্’রে নিলে বেক বেসত গরি

চোক ফ্লে ফ্লে ঘুমপাগল্যে সান

উহ্প আহ্’রা মুই তর চালানত।

মুই দুবি যেম দোচ্যে মুরোত

যে দোচ্যেআন তর

গভিন বেউদোত দুবি মরিম

নউধিম ভাজাদি কুলোচরত।

আবাজা খেয়েসান তুই মর বেক্কিঝু-

ভুক লোয়োচ গঙাদেবি ধক

যেন মুই দালি দিলুং মরে ত নাঙে

আঘুনোত ঝাম দিয়ে রেদো পুঘোসান।

      —–০—–                                                     

                             (রাঙামাত্যে)

*আমনদালি= আত্মাহুতি

১৬০। মনর রুহ্’মুচ

2/10/18, মঙ্গলবার, 2:25 pm

 

মরে মুই এঝ’ ন চিনঙর

ম মনান মুই এভ’ ন বুঝঙর,

কি এধক দমাকদাল্যা এ মন ঘর

কয়জনে বজত্তি গরন আঘন কয়বো চর!

কিয়ে গরে গমর ধাবেঙ কিয়ে বজঙর

কিয়ে সুঘোর কিয়ে দুঘোর কিয়ে খুঝি-বেজারর।

এক্খান মন ঊননব্বই বাবদে ধক বদলি থায়

বাউন্নোজন সাগেরেত লয় দুনিয়ে খলখলায়।

ভিদিরে বাহ্’রে বার’বো গুধি কিয়ে সমে কিয়ে নিঘিলে

একস তিন তিরোজ ঘাদে ভাজি যায় ছয়ত্রিচ নালে।

মূলুক অঝা তিন্নো মিলি বেক ঘদরমদর

তারাই যদ ভেজাল টাঙান গরন চদরভদর।

তারাই মরে ওল গরে থন মন চরঙত সমি

মনান অহ্য় তিনেংফালাং তারার তেজে দমি,

সে মনানে মরে চরাই মর ভিদিরে থেয়

মুই অহ’রান অহ্ঙ তার চালানে নাবুংনাবাং কেহ্ই।

বুঝি ন পাস্যে চিনি ন পাস্যে এ মন রুহ্’মুচ

ন জিনে খারাই তার সমারে আহ্’রা অহ্’লে উহ্চ্।

——০——-                              (রাঙামাত্যে)

১৬১। চিনি লোচ পধ সাঙেত

১৬৬১৯

 

ও বোনজোরোই

পধ’ সাঙেত চিনি লোচ তুই

যারে তারে ফাগত ন লোচ

সলেমলে সদর ন ওহ্চ

মনগভিনান চর ন বানেচ।

আরেতারে কধা কোনেই

তরে চেবাক আলেই তোলেই

মিধে কধাত ভুলোত ন পোরিচ

জন চিনোদে ভুল ন গোরিচ

লোক্ষি আহ্জিত চিত ন গোলেচ

লুভ লালোজর জাগা ন দিচ।

নরম চিদোত গরম রাগেচ

বুগোর ধিবে ভিরি থোচ

দেন-ইয়েঙর লো চুজোনিত

যিয়োত সিয়োত সিগের ন ওহ্চ

আমনরে যত্তন গোরিচ

নিজোর রাক্ষোল তরে জুরিচ।

——–০০——              (রাঙামাত্যে)