মেয়েরেগা কবিতা থুপ ৩১

 ১৫২। বিজগে ডাগে

21/9/18, সুক্কোরবার, 11:19  pm

 

নিজেনিনী ভাজি এঝে মুরে মুরে

সাজেয়ে সবনর লামনি

ভাঙি যায় বারিঝেত গঙারর নালে

ঝুরোতুরো ফাওয়ে আঝানি।

 

আচিন্যে গঙারর মুজুঙোত ঠিয়েনেই

গায় ছিনে এহ্'ল গাঙ উগুরে

থরিবার সবনে জীবন' দজনে

ঘাদুভাঙা সময়ে খাউজেই ধরে।

 

লেমপেদায় পত্তমান অঙরা পিদায়

ধারোজর ঘান্দাত বান্যে চিত

মুজুঙোর খুচ ফেলা'ত ডাগে ওয়াং ওয়াং

পুরোনা বিজগর নিজেনিত।

===0===                         (রাঙামাত্যে)

 

 

১৫৩। কাত্তেই আমি

০৪/০৭/২০১৯, ব্রেসুপবার

 

যেই উই মোনো তুগুনোত

যেই রিজেপ চাগালাত

আন্ধার ঘুপ ঝারানি তোগেয়োই,

সুরআহ্ত্যে ঝারবো সুগোর’ পাল উহ্’রিং চঙরাউন রেনিয়োই।

যেই চেয়োই সত্থাপালত দভাকাধি বিরেজর দক

উধুম্মো চগদার লরালরি এ গাঝত্তুন ও গাঝত,

সোনাত্তালি হ্রংহ্রাং(রংরাং) কেতকেত্যে খুলোত

বোঝেক্খে দেবা দরত কেঝান সুঘে আঘন।

যেই চেয়োই ঝার বেরেই অজল গচ্ছং চাম্বাফুল

জাদি গাচ্ছুন কেঝান আঘন অহ্’লাক নেনা থুম

মোনদুর মালমুরো ঘুই আজব’সাপ-

চরন নেনা আগ’ ধক উধিচ গরিয়োই

বান্দর’ গুত্থি কুধুক্ষুন আঘন যেই গনিয়োই।

বাচবনানি কধক বোলি নাকি ঝেরঝের

কেঝান আঘে ছরাছরি ধুধুক চাদারা

এক্খেনা বেরেই চেয়োই গলা-কেরেত বন

যেই সালেন মোনে ছরাই তোর্বো আহ্দারা।

ইধু কধক সুঘে আগচ এই তাওনত

লিত্রিক পহ্’র কল’পাংঘা ঘরভিদিরে বেক

সিধু যেই মোনচাবত রিজেবর জুম ঘরত

মঝা-পুগি কামর খেয়োই কেয়ে তেলানি পেরেয়োই

যেই চেয়োই আদামানি উজুসুরুং মানুচ্ছুন

কেঝান তারার জনম থিদি কেঝান তারার মুঝুং।

গাত্থাল ধরি বোইদে কধক কুজোক মনত ঘুঝি

থেবং ইধু ধেং গালি সিক্খে খেই পুঝি গুলি,

যেই একবার ইচ্কুল ফেলেই কলেজ ভার্সিটি

সিক্খে ছাড়া লোক্খি মনত চেয়োই সালেন সোমি,

যেই খেয়োই দুঘোভাত্তুন কেয়েত ঘাম পুঝি

সিধু যেই চিদে গোরিয়োই জিংকানির ঈজেপ

মাধাগুত্থ্যে আলেহ্য় গোরি কিত্থেই মুই কাত্তেই আমি।

——০——-                                (রাঙামাত্যে)

 

 

১৫৪। অগ্যেন আন্ধারত

৩০/০৬/২০১৯, রবিবার

 

অগ্যেন আন্ধারত দুবি মরির

সাঝুরি কুল ন পেই দুঘোর  সাগরত

আলাভুলো মানেই আমি গ্যেনচোক ন ফুদে

ইলে-বিলে মুরি পের দাঙাপাধারত। 

গুই-বান্দর’ সান কর্ম বিপাগত

কাদি যার জিংকানি বঝরে বঝর

যুক ফিরি যুক এঝে নুও পিরি বদলে

কর্ম চাক্কাবো ন দ অহ্য় লরচর। 

গ্যেদি ঈংজে মহাপাপ লেভেয়ে আমারে

ভুজিবোং পাব ফল জাদ’কুলোত

ধর্ম পুন্য ন চিনি নীতি সীলে ন মানি

লুগেবং মাজারা পিত্থিমি বুগোত। 

          -০-                              (রাঙামাত্যে)

১৫৫। বারিঝে দিনোত

২৭/০৬/২০১৯, ব্রেসুপবার

 

লামিলো বারিঝে উরউচ্যে ঝর

নাজদন ঝরফুদো মাদিত পরি

চুধোমুহ্ গাচ্চুন ঝরত ভিঝি

লাজে ঘিনে তারা আঘন থবাবদি। 

সরবর নাল আহ্দে বারিঝে পানি

সিধে লোক্খি মেদিনির বুকচিরি

জে উত্যে চিগোন-দাঙর ছরা-গাঙানি

ঝলপল নালে-মোরে পানি আর পানি। 

লাগের চিকচিক্যে গাই ঘরানত

খাক্খাক্যে সুগুনো পাআঙর মনান

ভরন বারিঝেত ন ভিজে চিত

কাত্তেই বানা ছতফদাই ম পরানান। 

—-০—-                         (রাঙামাত্যে)

 

 

১৫৬। মুক্তির বাবদা উরেবং

২১/০৬/১৯

 

বারিঝের দেবা কালা বর দেবা পেরাগত

ন দোরেই ঝিমিলেনি উজেবং মুজুঙোত

জোলেয়ে রাঙাচোক হেই ন গোরি

গং দেঘেয়ে ঝাজি ধমগত ন অহ্বং মহ্;

উজেবং সমারে জধাবান ধরি

নেযেবং ইয়োর গরি শাসগর ব্যারিকেড।

আমি মুক্তির তিরোঝত একগঙ্যে ধাবা দি

মেরেবং কাদাবন ফরেবং ঝার,

আমি তুবোলর গঙে বরব’র চঁদে

থুত্যে বোয়ের সান চুজি খেবং বেক অনাচার

অত্যাচারির বুগোত মারিবোং লাধি

গাল বেরেই চুওরেবং কালা এনোরে।

যেদক ওহ্ক আন্ধার চেরোপালা, থুম ওহ্ক পত

তোগে লবং পহ্’র, ধরেবং লুরো বানেবং নুও পত

তুও আমি ওল ন অহ্বং, দিক্কাবুলো ন অহ্বং।

আমি পাদারা নই, আমি ঘিলে দাদ’

আমি ভাঙালা নই, আমি একজধা এগত্তর

পোরেয়ের কুজোগত ভুল ন অহ্বং

পিঝুম্মে কধাত জধা ন ভাঙিবোং,

আমি বুক দর’ আমনর জধাত বিচ্ছেচ রাঘেবং

লারেয়োর মাধত আমি মুক্তির খুদো গারেবং

খামাক্খাই এই মুরো দেঝত মুক্তির বাবদা উরেবং।

——-০——-                           (রাঙামাত্যে)