মেয়েরেগা কবিতা থুপ ১১

 ৫২। আহ্‌ভাল

০১/০৫/’১৪, ব্রেসুপবার, ৭:৪৫ পিএম

 

তেপ তেপ পরে ঘাম, ভিজি যায় কেয়েআন

এক্কেনা পুঝিবার নেই সময়ান,

নিআলসি এগেমে গরি যর বানা কাম ।

দাংদাঙ্যে পাগানা রোদ, উর্‌উজ্যে ঝর

বেক ত মাধা উগুরে ও কাম্মো বর !

রোদ-ঝরে ছেক্যে কেয়ে নীলমরা রং

বলফেলেনেয় কেয়ে ভাংঙ্যে, ন ভাঙে মনর গং,

নেঅহ্‌রান তুঅ তুই, মন ডাঙর বালাদানে-

কামাদে দেজর ধন ।

মাদে-ঘাধে, খেদে-বাগানে এগামার গরি

 

কল-কারখানাত, জংশনে-বন্দরে নিগুরি রেইদদিন,

আঝিপুঝি নিগিরেই ঢালি দোহ্‌র বেক

ত বলে ত গুণে ভালেদ অহ্‌র দেজ ।

তাগোয়েত্তুন তাগোয়ে অহ্‌য় কুধি টেক্কে মাহ্‌জনে

অদল-বদলে তুই প’র অজনরও তলে

ধিকচুঝো পেরেই খার গদা রদ বল

কদক নিধুর! মাহ্‌জন মানেয়োর মন ।

 

স্যে কয়যুগ কয়পিরি পার অহ্‌য়্যে পিত্থিমি

মানেয়ুন উধি এস্‌সোন ধকবদলর আহ্‌দ ধরি,

আদিম যুগ, লোহ্-পাত্থর যুগ বদলি

সামন্ত, দাস সুদোমর কাইক্কে পার গরি

অনাজার-অবিজের বালায়্যের (কাম্মো) উগুরে

নেইয়ে নাদংছা’র পেদ’ভুক দজাহ্মরা গরিনে,

চলি এস্‌স্যে এ সুদোমে পুরোনী সমাজ

মানথিদির অজল যুগোত ইয়ান কি আমার লাজ!

ইয়ান কী অজ্‌সুদোম মানেয়জাদত ?

তাগোয়ের লাধি খানা নেইয়্যে মান্‌সোর কবালত।

এ পিত্থিমির যদ’ সুঘ বানা কি তারার?

দুঘ্‌খ্যে মান্‌সোর কবালত নেই স্যে ওধিগার !

ন মানং এ বিধেন,ন মানং সুদোম

এমানর পালত মিঝি কেনে বাজিদুং !

 

ও কাম্মো ! ও গুণী ! দেজ বানেয়ে কালিগর

কয়দিন আর অলর থেবে,এক্কা কেয়ে মজর,

মূরগুজি জুরো গরি ন সোয় অবিজের

মুহ্‌ধভিরী ঠিয়েই উত মূ অজলে বাজিবের

তর পাওত্তি মুহ্‌ধছিরি ল খুজি দিদাক নয়

সেদাম নিনেই টিগি থানা লেধা অহ্‌নেই নয় ।

নাধা এ্য সমাজত মাগানা কিচ্ছু নেই

তোগেবিগে কারীহ্ খা গং দেঘেনেয়,

লেদারেহ্ উহ্‌রি ঠিয়েনা যুনি অহ্‌লে বলির মান

সে ঠেঙানত কুপ মারানা ইয়ানো তর আহ্‌ভাল ।

-------------------০০------------------------          (রাঙামাত্যে)

 

র ভেদ : ১) আহ্‌ভাল=অধিকার ২) পুঝিবার=মুছবার ৩) কাম্মো =কর্মী; শ্রমিক

৪) ছেক্যে=ঝলসানো ৫) বলফেলেনেয় =পরিশ্রম করে ৬) নেঅহ্‌রান =অক্লান্ত ৭) বালা =শ্রম ৮) অজন= প্রয়োজন মত; ৯) ধিক =জলজ জোঁক ১০) ধিকচুঝো = জোঁকের ন্যায় শোষক

১১) নিধুর= নিষ্ঠুর ১২) পেরেই =পেষণ/নিষ্পেষণ করে ১৩) কাইক্কে =ভেলা ১৪) বালায়্যে= শ্রমিক (বালা+দিনেই+খেয়ে) ১৫) মানথিদির =মানবতার (মানথিদি=মানসুদোম) ১৬) অজ্‌সুদোম = চিরায়ত নীতি; ১৭) ওধিগার =অধিকার ১৮) কালিগর=কারিগর ১৯) মূরগুজি = মুখবুজে ২০) পাওত্তি =প্রাপ্য ২১) খুজি =স্বেচ্ছায় ২২) সেদাম =সামর্থ্য; সাহস ২৩) লেধা =অসমর্থ ২৪) নাধা =নিকৃষ্ট ২৫) কারীহ্ =কেড়ে ২৬) লেদারেহ্ =দুর্বলকে ২৭) লেদা=দুর্বল

=====

 

 

 

৫৩। ফিরেই দে

১৬/৬/’১৪, সোমবার, ১:২৮ পিএম

 

মরে আর দমেবার ন চেইজ্,

দমানার্ ঘান্ধি মুই পার ওহ্‌য়োং।

মরে আর গারেবার ন চেইজ্

মুই ভালুদ্দুর্ অজল ওহ্‌য়োং।

মিধে  কধালৈ আর মরে ন ভুলেচ্

মুই সে অক্ত ফেলেই এস্সোং।

 

মর আরাং চাহ্‌না তুই মরে দে

মত্তেই যিয়েন লাগে মুই সিয়েন মাগঙর,

এক কোলোই মাদি, মর মা,

একফুদো সিরোপানি, মর ভোন,

একছলা মিধে রোদ, মর বাপ,

এক ঝল্গা জেুরো ব, মর ভেই,

ইয়েন মর সুক, আঝল গিরিত্থি

দে ফিরেই মরে ও দারিত্ত্যে!

 

মরে আর পজ্জন ন সুনেইজ

মুই পজ্জন বানাং,

তালা তালা বিল্ডিঙোর সবন ন দেঘেইজ

বেরহ্ ঘরত্ মুই সুঘে থাং,

অজল বিদ্যের কধা মরে ন সিঘেইজ

যিদ্দুর্ সিক্খোং সিয়েন্ মর অজন।

 

মর অজ্ আহ্‌ভাল তুই মরে দে

মর যিয়েন্ গরজ্ সিয়েন মুই চাহ্‌ঙর্

একজরা ভাত মর জিংকানি

নিরুগী ওহ্‌ই থেবার একধার্ পহ্‌ন্ পানি;

এক কেহ্লা উভোগীত একলামা গেইংখুলি

চুচ্যেঙ্যে-কা নাগ’নিজেইচ্, ম চিন, পিনোন-খাদি,

দে স্যে দিন্নো মরে, সিগেরী কুগুরোর ডর যিয়োত নেই

স্যে রেত্তো মরে আনি দে, নিচিদে মুই থেইম ঘুমলেজা পুরেই।

দে স্যে অক্তয়ান্ মরে, ডরনেইয়্যে বেরানচেরান যিয়োত আঘে

দারায় দারায় বেউজিদে চিন্‌পুচ্চো ন মাঘে,

রাঙাচোঘে মুগোর ঘুরেই যে মরে ন ডাগে

চিগোন্ ভাবি ম উগুরে চেলা ন তাদে।

ইয়েন্ মর খুঝি, দবদবা পরিবেজ

দে ফিরেই মরে ও তুচ্চ্যেল্ল্যে!

 

তর ইবেন উভোন জাজানা!

স্যেনি মর এক্খানো দরগার নেই,

ন লাগে পগরা উন্নয়ন, ন লাগে সাদাঙা দোয়ে

পেঝেরা-সেকসেগিন্ধি আহ্‌দি পারং মুই- সোয়্ পারে বেক এ্য কেয়্যে।

খাজাত বানি রাঘেই মরে সোজ আগাঝর্ সবন দেঘাজ

আহ্‌দে-ঠেঙে সিঙোল বেরেইদি মরে আহ্‌ধেবার চাহ্‌জ্!

কাদা বিজেয়্যে ফুলো বিচ্ছোনত মরে পরিবার কহ্‌জ্

গাধেবার চাহ্‌জ্ তুই মরে বিচ মিঝেয়্যে সোনার ঝরত।

মুই ন দেঘিম, মুই ন আহ্‌ধিম,

পরিদুং নয়, গাধিদুঙো নয়।

এক্কানো ন গরিম ত ধগে ধগে

যিয়েন মাঘঙর সিয়েন দে-

মর আরাং চাহ্‌না, অজ্ অধিগার

ম সুঘে, ম গমে, ম ধঘে চাহ্ং মুই থেবার।

দে ফিরেই দে ঝাদি ঝাদি- ও কুজোক্যে!

=========================              

 (রাঙামাত্যে)

 

 

 

 

৫৪। আমি দেঘেবং পথ

২৪/১১/২০১৪, সোমবার, ১০:০০ পি.এম

কন্নাহ্ দেঘেব’ পথ? নুঅ মুঝুঙর্ ধজ্?
কন্নাহ্ ধরেব’ লুরো? উরেব’ বাবদা?
শুনেব’ নুঅ গীত, জাগেব’ মনত আঝা।

আমি দেঘেভং পথ, নুঅ মুঝুঙর্ ধজ্
আমি আহ্‌দিবোং লুরো ধরি, জয় বাবদা বুগোত গরিহ্
ঘুব্ আন্ধারত্ পহ্‌র্ ছিদেবং।
নুঅ গীত আমি গেবং, নুঅ কধা আমি কবং
খাল্ল্যে এ আঝার বারেইঙ্ তিপ্‌তিপ্পে গরিহ্‌বং।।

অসয্য(অসহ্য) এই পরাঅক্‌থ কমলে যেব’ ছারি?
নুঅ দিনর্ আলাঅক্‌থ কমলে এভ’ ফিরি?
কমলে উদিবো রাঙাবেল, উদিবো পুনোংজুন
আমা নাঙে কমলে ফুদিবাক নুঅ ফুলুন্‌?

আমি ধাবেবং পরাকাল, ছিনি আনিবং দোল অক্‌থআন
অহ্‌বং আমি পুনোংজুন, আমি অহ্‌বং রাঙাবেলান্,
এ পিত্তিমির নাধা ভুইয়োত্ আমি ফুদেবং দোল ফুলুন্
দোল অহ্‌ব’ আমা রঙে অঝার দুনিয়েআন্ ।।

কদক ঝরিবো রাঙা লো? পাত্থর মাদি কদক গলিবো?
আর কদক চোঘপানি? ধেকদীঘোল নিজেইস টানানি?

কদক আর আঙিবো বুক? ছেই অহ্‌ব’ মন’ সুক্?

জধার ঝরে এ পিত্তিমিত ধোই ফেলেবং লো
কোচপানালৈ পেজেরা মনান ছুদি গরিহ্‌বং ধো,
মেয়েরেগা বানি লভং খারবো চিদোর এগত্তরে
চোঘপানি পুঝিফেলেবং খুঝির বোয়েরে;
সুঞ্জুগোর নিজেইস টানি আঙ্যেবুক জুরেবং
গুঞ্জিমুঞ্জির সুঘোর ভুইয়োত বিজ্‌বিজিদি কুজিবোং।

আমি দেঘেবং পথ, নূঅ মুঝুঙর্ ধজ্
কংঘ্রং চবা ধানত আমি ভরেবং রস,
আমি অহ্‌বং আমা লুরো, মুক্তির বাবদা
রাঙা বেলান অহ্‌বং আমি পহ্‌র্ ছিদেবং গদা।
আমি অহ্‌বং মিদে আহ্‌ভা, খরান পজ্যে অহ্‌রান যুগোত
ঝলপল’ ছরা অহ্‌বং দাংদারাজ্যে ধুল্যেভুইয়োত্।

------------------------------                          (রাঙামাত্যে)

 

 

 

৫৫। গাভুর্  

২৬/১১/২০১৪, বুধবার, ৯:২২ এ.এম

কারেহ্ আর বাস্সেই থেবা, কার পধে চেই
তুমি গাভুর্ তুমি তরুন বাক্ ধরি য পথ ফরেই,
আহ্‌লেয়ে বেলর কি আঝা চার্বো রোদর ছদক
নুঅ দিন্নো তুমি আন’ পোত্ত্যে বেলর রোদ বাঝোক।

গাভুর মানে তরুনো ফুল পোত্‌পোত্ত্যে পাগোরে
আমন’ রঙে অহ্‌রেই লনা বেক মান্‌সোরে,
পেলেপেলে গাভুরো রস মিধে মধুসান
সান্দা-গুন্ডোই বর্‌বাদ যানা নয় গাভুরর্ মান।
গাভুর মানে চিদো খুলুঙোত ভরন কোচপানা

দেজর জাদর ভালেদত্তেই সিয়েন ঢালি দেনা,
একপাচ্ছে একজনরে বানা মন দিনেই
পাগল অহ্‌না গাভুর্ নয় লাঙর সেগা খেয়;
মদ বদল আ’ গাঞ্জাভুদি, হেরোইনর্ নচ্
গাভুর কালর এনজয়মেন্ট সিয়েন কেনেহ্‌ কহ্‌চ্?

বারিঝে কালর ভরন গাঙত্ ছর্‌ছরেই যায় নাল আহ্‌দি
তোমার এস্স্যে সে অক্‌থআন্ গ্যেনে-গুনে সার্ বাডি,
তুমিই গঙার তুমিই দরঅ কাঝি ছরান্ বেক্কানত্
লো গরম্মে তুমিই আঝল ফুল্ ফুদেবার পাত্থরত্।
কাম্মো গঙে রদে-বলে তুমি কুঞ্জ-রাধামন
বিদ্যে গুনে তপ-সাধনে সাধক সিবচরন।
তুমি অহ্‌লা বিজয়গিরি লারেঈ গরিহ্ রেজ্জ্যা জিদি
আপস্‌নেইয়ে এম.এন লার্‌মা ন থেয় তুদিপরি।

তুমি গাভুর, তুমি বলি, অহ্‌লিপ গরিহ্ থেবার নয়
গাভুর কালান কামর অক্‌থ, লারেঈ চেবার দোল সময়,
এ সময়ান বর্মাহ্‌মূরোহ্ করত্ দিনেই পার্ অহ্‌বার
কুল ন দেক্খ্যে দোজ্জ্যে বুগোত্ একুল ওকুল সাঝুরিবার;
কালাজামুরোর গাদত সমি লেজত ধরি নিঘিলেনা
বাঘর লঘে খারা খেলি বিঝোর কুমোত মূ ধনা।

গাভুর তুমি, কাম্মো তুমি, এগজা কাম গর’
নিবিলি ঝারত কামত লামি দব্‌দবা পথ ফর’,
উচ্চোমী অহ্, উহ্‌জ্‌কারি অহ্, নিআলসি মন গরিহ্
দেজ জাদত্তেই কামত ধর’ বুগোত সাওজ বানি।
কারেহ্ আর বাস্সেই থেবা, কার পধে চেই
তুমি গাভুর্ তুমি তরুন বাক্ ধরি য পথ ফরেই,
আহ্‌লেয়ে বেলর কি আঝা চার্বো রোদর ছদক
নুঅ দিন্নো তুমি আন’ পোত্ত্যে বেলর রোদ বাঝোক।

--------------০০------------                          (রাঙামাত্যে)

** জুম্ম জাদর বেক্ গাভুজ্জ্যে-গাভুরী দাঘির উদিজে এ লামাভো ডালি দিলূং।
---------------

র ভেদ: ১। গাভুর= যৌবন (গাভুজ্জ্যে=যুবক, গাভুরি=যুবতী)

২।সান্দা-গুন্ডো= (সান্দা=অসামাজিক/বেশ্যা, গুন্ডো=মাস্টান/বাটপার) কুকাজে নিয়োজিত ব্যক্তি।
৩। বর্মাহ্‌মূরোহ্= আগ্নেগিরি

=================০============

 

 

 

 

 

 

 

 

 

 

 

৫৬। গোঝেইন্

২৮.১০.’১৪ ইং, মঙ্গলবার ৯.৩৩ পিএম

 

আন্ধার কালা রেদোত বর্‌ব মুঝুঙোত

যুনি লাঘত পাঙ্ বিঝল্যে কালাজামুরো,

কালাবাঘ যুনি গুজুরে পোগোনগুলো ঝরানি কিজেগে

বর ন মাগিম মরে বাজা, ও গোঝেইন !

 

আগাজ ফাদি যুনি ঝরে আঘুনোর্ ঝর

পেরাগে পেরাগে যুনি পরে দোকদোক্ক্যে থাদাল,

গারেং ভুজোলে যুনি গিরগিরেই গদা আগাজ পাদাল

ধোর ধোর ওহ্‌য় ফাদি যায় মেদিনির বুক

বর ন মাগিম মরে বাজা, ও গোঝেইন ।

 

দবদবা আহ্‌দানা পধত যুনি সেম সেম কাদা উধোন

বির্বিচ্চ্যে পত্থান যুনি বিজোল ওহ্‌য় যায়,

চেরোপালা দেঘং যুনি সোত্রুর ঈংঝে

সমাস্যের মঝানে পাগারা খাস্যেক

বর ন মাগিম মরে উদ্ধোর গর্, ও গোঝেইন ।

 

ভর্‌নকাস্যে দুঘে যুনি জনমান কাদি যায়

মানসোর এহ্‌লাফেলায় নজরত নলাক্যে গরিহ্,

কনা সেরে যুনি পরি থাঙ্ জাঙারে খেয়্যে চুচ্যেং তাগল’ ধক্

পিজোরর্ সেকসেগেলিত্ এধাপাদা সান;

ন দুঝিম মুই গোঝেইনরে, ন দুঝিম্ কবালরে

ন মাগিম বর, ন মাগিম দোয়ে ভিক্‌খে মুই কারর্ ।

 

মুই গোঝেইন্ মর্, মর ভাগ্য মুই জুগলেম্

ম সমার বানাহ্ মুই, মর সেদামান্ ম বর ।

ম গ্যেনান্ মর পধ, ম খাস্যেক্কান মর অহ্‌ত

মর ইঞ্জেপ ম সুদোম্, মর আক্কল বেলছদক,

ইয়েনিরে কামত লাগেইম মরে মুই উদ্ধোরত্ ।

=============০০============              

(রাঙামাত্যে)