মেয়েরেগা কবিতা থুপ ১০

 ৪৭। হিল চাদিগাং

২৬/০২/২০১২, রবিবার, ১০:৩৩ এ.এম

 

চেরোকিত্যা মুড়োমুড়ি
কি দোল সর্গ পুরী
আমার এ হিল চাদিগাং,
গাজে বাজে সাবাক এইলে
দীঘোল অজার ছড়া গাঙে
দে' লে চিত জুড়ায়।

জুরো জুরো আহ্বা খেলে
মোন তুগুনর তারুম' ছেরে
নানান পেইঘে গীত গা'ন,
নানা রঙর ফুল ফুদোনি
ভঙরার গুজূরোনি
তুম্বাজে গলগলায়।

ঝরঝরি নোনেইয়ে সুরে
রানজুনি সাত রং,
সাজ্যেগুজ্যে তরে মুই
কদক দোল দেঘং।
মনে কয় চেই থাং
বানা এক রেনি
যেদক চাঙ চিত জুরায়
তর দোলাণি।

তুই মর চিতজুরনি হিল চাদিগাঙ
জিংকানিত বেক এরি
বানা তরে কোচপাং,
তুই মর বেক আঝা
দি চোঘর সবন
তর বুগোত থেদুং চাং
শেজ দিন্নো সং।।

=== ===           (বিলছড়া)

 

৪৮। বেআহ্‌ল্ ধারোজ্

১৭/১২/’১১ সনিবার ৩:৩৫ পিএম

 

দুক্‌খ্যে মানেয় বেক্কূন্ আমি আমা চাঙমায়ূন্

কমলে পেভং কাঝি ছরান্ বেআহ্‌ল্ দুঘোত্তুন্।

কাদি যাদন দুঘে কচ্‌টে খাল্যে দিনানি,

পরাধরা গঙেই যার্‌লোই আমা জিংকানি

গোঝেইন’ইধু বত্তা মাঘং দি আহ্‌ত্ জুর্ গরি

জনম্ জনম্ আমি যেনে দুঘোত্ ন পরি।

থেয় ন পেধং ছিদিকুদি আমা চাঙমায়ূন্

থেদং সুঘে এক্‌খান্ জগাত্ এক অহ্‌য়নেয়্ বেক্কূন্।

সংসমারে বেক্কূনোর্ আমার্ কোচপা’পী থেদ’ মনত্

কন’ বাবদর ঈংসে পিঝুম্ ন উদিদো ঈদোত্।

খুনোখুনি মারামারি বিচ দেঘাদেঘি

ন গরিদোং কিয়োই কাররে খেইজ রজারজি,

কামেকজ্জে রিদিসুদোমে বেগে কাবিল অহ্‌দং

নিজো জাদর আরাং সুদোম ফুদেয় তুলিদোং।

এঙিরিনেয় সব্‌পুরো পেয়্ আমি ভরন অহ্‌দং

সুঘো রেজ্জোত্ জিরেনি খলাত্ উধি রেইং দিদং।

=== ===                              (ধনুবাগ)

 

৪৯। বাত্যেনি

২৫/০৩/১৪, মঙ্গলবার, বেন্যে ১১.২০ বাজি

 

যিধু আঘে এইল মোন সিধু অহ্‌ল’ ম ঘর

যেবেনি ও ভাই তরে উজুলাঙর।

মোনো লেজা থল কলগত ওঝার গাঙ’ পার

সিধু আঘে সকুরি ঘর, আদামান আমার ।

জুরো আহ্ভা, পেঘো গীত, ফুলো তুম্বাজে

চিত জুরাং, মিঝি থাং তারাহ্ সমারে ।

ঝরঝরি নাল আহ্ধে কল্‌কলেই পরে,

তাগলগত গাবুরী যিধু কুম্ ভরে ।

পিবির পিবির জুরো আহ্ভা ছরা ধুরে বায়

দাংদাঙ্যে খরানত চিত জুরে যায় ।

গুলোগুলি ফলপাগোর অনু বার’মাজ

আহ্‌ত দিলে লাগত পেবে যেক্কে যিয়ান চাহ্‌জ্ ।

রজ্‌কো, নলাম, কেঁত, দেমল, বরাগুলো

ওত্যেল্, কাধামলা, সর্বেক, জগনাগুলো ।

গুতগুত্যে, কুঝুমগুলো আর’ কজকুঝুম

পাল্যেং, পিলেগুলো, কোগুলো, উধুম ।

ঝারবো মোক্কে, পোবাংবিজি নাঙ্ ন সুনোজ

ভারত্তগুলো তুই কন’বার খেয়োজ?

ঝার’গুলো বারী সুওত সিধু গেলে দেভে

দিক্‌বার ন খেয়ে ফল সিধু চাঘী চেহ্‌বে ।

যেবে ভাই যেবে তুই, তরে উজুলাঙর্

আমাসিধু বিঝু খেবার মুই বাত্যেঙর্ ।

 

সংসমাজ্যে বারী গম্, দোল তারাহ্ মন্

লোবিয়োদে কোচপানা দিবাক জনেজন্ ।

গাভুর্ মিলে ভোন্‌লক্কুন সদর ভাবিভাক

খুঝিয়ে এহ্‌ধে-আগেরে আদাম লোইবেরেবাক ।

বুরো-বুরি বর্‌জন বারী দোয়েলি

গোজি লবাক তারা তরে পুঅ ধক্ক্যেন গরি ,

কির্বে আদরে তরে উব’দেজ দিবাক

পুরোনি সুদিনো কধা পজ্জন সুনেবাক ।

গুরোগুরি বেক্কুনে সংমেয়েলি

মান দিবাক তরে দে’লে আহ্‌ত্জুর গরি,

গাহ্‌ক গরি আওজ মনে ত কধা সুনিবাক

অজলসিক্খে গ্যেন’কধা পুঝোর গরিবাক ।

যেবেনি ও ভাই, যেবে আমাসিধু ?

সংসমারে উচ্ছোমুচ্ছোই খেবঙ্গোই বিঝু ।

 

বেক্কুনে খুঝি অহ্‌ন্ এলে বিঝুদিন

জনম দুক্খে মানেয়োত্তেই তিন্নো সুঘোর দিন ।

ফুল-মুল-গোজ্জেপোজ্জে, তিন্নো তিন্ ধগে

পালান সিধু আমা আদামত পুরোনি সুদোমে ।

ফুলবিঝুত আন্ধারপহ্‌রে ঘুমোত্তুন উধি

জিদেজিত্তে ফুল তুলোন গাভুর্, গুরোগুরি ।

বেন্ন্যে পোত্যে ছরাত গাধী সাংসাঙ্যে ওহ্ই

গোজেন বুদ্ধোর তবনা গরন ফুল-বাত্তিলৈ ।

ফুল গাধেনেই আহ্‌ম্ সাজেবাক চোকচোক্কে গরি

বত্তা লবাক বুরোবুরি, বাপমা ঠেঙত ধরি ।

ঘরে ঘরে উধোনত যেই কুরোহ্ আধার দোন্

বুরোবুরি ঘরত্ গাধেয় পুন্নোর সেপ লন্ ।

গিরিত্তি ঘরর্ মা-ভোনুনে লাক্সা বদিনেই

বিঝু পিধে দুবোন তারা খুঝির গীত্ গেয় ।

দিন্নো ভাগে মিলিঝুলি গাভুজ্জে-গাভুরি

নাধেং, ঘিলে, গুদু খারা অহ্‌বাক ঝাক গরি,

ঈরুগোর বিদেঝি খারা সিয়ানিয়ো অহ্‌ন্

কুরোযুদ্ধোর জিদেজিত গুরোউনে দোন ।

গদা দিন্নো খেলেমেলেই যায় ফুলবিঝু

আকসাঝন্যেত্ রেদোর আগে বাগী থায় কিঝু ।

ঘরে ঘরে বাত্তি জালান বেক্কুনে মিলি

গোজেনত্তুন বত্তা মাঘন সুঘোর জিংকানি ।

গাঙত যেনে জল’বুদ্ধো আঃ গঙা মা’রে

বাত্তি আঙেয় জূ জূ গোজান বেগে তারারে ।

ঘরত, মাদিত, গাজত থেয়ে বেক্ দেবেদারে

বাত্তি আঙেয় পুন্নো গোঝান সমান সমানে ।

খানাপিনে সাংগ’ গোরি গাভুজ্জে-গাভুরিউন

ঘিলে খারা অহ্‌বার লামন জধেয় সমারুন ।

ইন্ধি ঘরত মামা, বেবেই, মুঝি, পিঝেই দাঘি

নানাবাবত্ত্যে পিধে বানান গদা রেত্তো জাগি ।

এঙিরিনে সুঘে কাদে বিঝুর পৈলে দিন

আহ্‌ঝি আহ্‌ঝি ভেদা দেগি মুল বিঝু দিন ।

 

বেন্ন্যে অহ্‌লে ঘরে ঘরে গুরো ঝাক বদি

বিঝুত বেরান সংসমারে গরি মন খুঝি ।

বুরো, গাভুর, মিলে-মরত বিঝু খা লামন

সান্ন্যে, বরা, বিনি পিধে আর’ খান পাজন ।

সিমেই, পায়েজ, কলা-মুরি, কোন, কেজপিজি ভাত

নারেই পিধে, সরপ সরপ পিলেগুলো সাজ ।

নানা ধোক্কেন সত্যে দরপ, মিধে মিধে রজ্

পেত্তা ভরন ইঝু খানা উধিবে য্যে ঘরত্ ।

পাজন খানা বেজ গরিনেই সাত্তান ঘর বেঈ

গাবন অহ্য় ডাঘে কহ্‌ন্ গদা বঝরত্তেই ।

মদ, জঘরাহ্, কাঞ্জি খানা ধুগে একধুক কোই

বঝর’ মাধাত এক্খো দিন কাদানা উচ্ছোলৈ,

উহ্‌জ্ রাঘেনেই গীদে-রেঙে দিন্নো ফেলানা

মন’ বেজার, ঈংঝে-পিঝুম কিচ্ছু ন রাঘানা;

গাভুর-বুরো সিধেসাধা বিঝু খেইধেই থাঝা

মুলবিঝুদিন কাদেই গরন গোজ্জেপোজ্জের আঝা ।

 

গোজ্জেপোজ্জে নুঅবঝরত গদা আদাম্মেউন

গুরো-বুরো, মিলে-মরত কিয়ঙত্ যেই বেক্খুন-

একে অহ্‌ন্ধোয়; বুদ্ধোপুজো, সিবোলীপুজোর দান

আক্‌জিনিচ আঃ সাঙিকাবর, সিয়োং নানাক্খান্ ।

সীলে লোনেই ধর্মসুদোম, বুদ্ধো ধগে ধগে

ভান্তেত্তুন ধর্মকধা সুনি গমেদালে,

নুঅ বঝরর্ সুক ধারাঝে গরি তবনা

দেঝর জাদর ভালেদত্তেই গরি ভাবনা;

সদ্ দেবেদার বল মাঘিনেই, পুন্নো বিলেঈ দি-

পরান্‌বলা বেক্কুনত্তেই সমান বর্ মাঘি,

আবতবিবত, ফারাদঝা বেক কাদা যেই

সুঘেসান্দিয়ে থে পারি যেন্ মৈত্রী গরিনেয় ।

এঙিরিনেই বিঝু পালেই আমা আদামত

গম ভালেধে কাদে বিঝু পত্তি বঝরত্ ।

যেবেনি ভাই আমাসিধু, আমা আদাম চেহ্‌লে

রুক্খেঙ’মায় মোনে-ঝারে এক্খো বিঝু খেলে ।

খুঝিরাজি মন গরিনে বারী আওজ্ গরি

উধোউত্থ্যে দিলুং তরে বিঝুত বাত্যেনি ।।

------------------------------------------                           (রাঙামাত্যে)

র ভেত: ১) বাত্যেনি= নিমন্ত্রণ ২) সাঙিকাবর= চীবর ৩) সিয়োং= আকভাত

 

৫০। মুই জুম্মজাদ কঙর
৮।৪।'১৪, মঙ্গলবার ১২.৪৩ পিএম

মর চোঘো কনাত একফুদো চোঘো পানি
অহ্মাদোজ্যের ঝলঅপলঅ পানিত্তুন বেজ,
তুই কি কনঅবার রেনি চেয়োজ ম চোঘো কিত্যে?
কনদিন বুঝিবার চেয়োজ কিত্তেই এ চোঘোপানি ।

মর চিমোর বুগোত কাদাকাত্যে ব নিজেচ
আহ্ভাগুণ্ডেল'র অতালেয়ে বোয়েরঅ সান,
তুই কি কনবার ঠাহর গোরি পাচ্সোজ?
সুন্যোজ নি মর পঝঅ পজঅ খগানী?

আহ্ত-ঠেঙ তাঙুরো বোত্যে, মূঅকধা থুম ওহ্য়ে
জীংকানির গীত্থুন ঘঝা মিলেই যেয়োন,
আঝার সাগরান ধুল্যেচর, সবনর আগাজ্সান চেরোপালা আন্ধার,
সুঞ্ঝুগোর আহ্ভাআন হ্ম ওহ্য়ে, গর্গরি গঙার নাল খাক্খাক্যে সুগুনোহ্ ।

তুই কি খবর পাজ? কিত্তেই?
বুঝোং, তুই খবর পাজ, বেক উধিজ রাঘাজ
তর বেউধিজ কিচ্ছু নেই।
বেককিঝু জানিসুনি চেইচিদি দিচোঘে, দিকানে, ভরন গ্যেনে,
জাদর ভালেদিত্তেই, সরানর লারেয়োত এঝ' এগাহ্মার।
খালিক, কুভোত যেনে খীনো আঘে!
সিয়ানো তুই উধিজ পাজ।

মর মরা কিজেক, বুকফাদা কানানি তুঈ কী সুনোজ?
বিচ্ছেজ গরং সুনোজ, সুনি আঘজ।
কিত্তেই এ কানানি, মরা কিজেগর সঝানি?

তুই খবর পাজ, বেক উধিজ পাজ।
বেক তর দিচোঘোত্তল, আদেঘা কিচ্ছু নেই ।
আগরবো ভেয়োর ভুলান দেঘে দিবাত্তেই, দুঝোর সেজা বুঝেবাত্তেই,
লামিলে তুই গুজ দি, মত্তেই বিলিনে।
মাজারা টিগেবার লারেয়োত গাভুরোর গঙে
নুঅ আঝালৈ নুঅ কধাকোই, নুঅ উচ্চোমে ।
মাত্তর কি অহলঅ? কুভোত যেনে কি বাগী রলঅ!
সিয়ান তুই গমে বুঝি পারজ।

তোমার সিয়ান যে অহ্ভঅ ওহ্ক, মর কিচ্ছু কহ্বার ন থেলুন
যুনি মর নিরাপত্তা থেদঅ।
বাঘঅ কেনা যুনি ঢাগত ন পত্ত,
তোমার পুজ্যে বিগুন্নো যুনি ম ভাগত ন এধঅ।
দেঘর নি, সুনোর নি? সুজাতার কানানি,
তুমাচিং, বলিমিলে, ভারতীর ডাগনি-
'মরে বাজঅ, মরে বাজঅ' কিজেক সারানি।
যুধিষ্ঠিরর দুমুরোনি পরান বাজেবার
চিগোন চিজি অর্কিমনির ঝরা কুঝি পাদার।
মর জাগা ঘর'ভিধে, জীংকানির ভাত পিলে
এভঅ আহঝি যার রমচক্র আহ্দত
ঊনাঝিত্তুন ধরি আহরেই এস্সোং,
ইত্তুকআত্তুক যা আঘে সিয়ানো নেইয়ার ।
এঝঅ ভাদঅ রাত পরে রুমা, লামা, সাজেক
পেত পরায়, ভুগোর জালায় আমাদি কিজেক-
আগাজে বাদাজে মিঝি আঘে, মোনে গাঙে ধুরে ধুরে।
এঝঅ বেজভাগ মানসে কাদাদন নাদংছারা জিংকানি
চোঘোত মুওত আঝা বানি, বানা তোমারে চেই,

তোমা পত্থান চেই।
মনর দুঘে বানা কানঙর যুগ যুগ ধরি,

ইক্খু দ চোঘো পানি ফুরেয়ে,
মাত্তর
মর চোঘো কনাত একফুদো চোঘো পানি এভঅ আঘে
অহ্মাদোজ্যের ঝলঅপলঅ পানিত্তুন বেজ,
তুই কি কনঅবার রেনি চেয়োজ ম চোঘো কিত্যে?
কনদিন বুঝিবার চেয়োজ কিত্তেই এ চোঘোপানি ।

মর চিমোর বুগোত কাদাকাত্যে ব নিজেচ এভঅ আঘে
আহ্ভাগুণ্ডেল'র অতালেয়ে বোয়েরঅ সান,
তুই কি কনবার ঠাহর গোরি পাচ্সোজ?
সুন্যোজ নি মর পঝঅ পজঅ খগানী?

খবর পাং, খবর পাজ।
মর আর কিচ্ছু কবার নেই, কিচ্ছু মাঘিবার নেই
আতজুরে, আহ্ত পাদি, তোমাসিদু বানা এক্খান আঝা
ও দা, ও দা, মরে বাজা মরে বাজা ।

=== ===                                             (রাঙামাত্যে)

র ভেত: ১। আহ্‌ভাগুন্ডেল= বায়ুমণ্ডল

 

 

৫১। তরে কোচপাং
১৮।৪।১৪, শুক্কোরবার ৯.৪৭ এএম

আগাজত জুনানে যুনি ন উধে
মনে গরিম জাগা ন দোজ ত মন ভিদিরে
ফুলফুদি ঝরি যায় যুনি অকালে
বুঝি লোম কোচপানা নেই ম নাঙে।
ন উধিলে সুবতারা সাঝন্যে অক্তত
খবর পেইম তুই নেই ম জীবনত।

ঘুরঘুরে দেবাবো যুনি ঝর ফেলায়
বুঝি লোম তুই কানর মরে চিতপোরায়,
আজি আজি যুনি উধে রানজুনিয়ান
মনে গরিম ভাঙি ফেল্লোজ মনঅ বেজারান।
ঝরঝরি নাজি নাজি যুনি গীত গায়
অনুভব গরি চেইম খুঝি ত মনান।

পেইক্কুনে যুনি গান নোনেয়ে সুরে
জানি লবে মুই আগং ত কায়কুরে,
বোয়েরানে পিও পিও যুনি সিককারে
বুঝি লবে এভঅ আঘং ত সমারে।
সোজ রঙে ভরি থায় যুনি আগাজসান
বিস্সেজ গরিজ এভঅ তরে কোচপাং ।

=== ===                       (রাঙামাত্যে)