মেয়েরেগা কবিতা থুপ ৯

 ৪২। ছলং

০৮/০৫/২০১২, মঙ্গলবার, ০৭:৪৩ পি.এম

 

ইয়েন হেজান মর নাধংছাড়া জিংহানি!
পিত্ত মরা ইত্তুক পরান
ধঝা ঘঝা খেই ঝকপোস্সে চঙরা সান,
ইদো মুরোত লেম্বেই যায়
লিল্লিক্কে আগুন' জিল।
লালস্যে রাঙা চোখ্খুন মরে চেই থান;
মর গদা কেয়ে চিত পরান,
নিলস্যে আঙে নেযাই কালা ধুমো তুলি।
লুদুক হোচপানা রংচঙ্যে সবন
সোজ চেরোপালা মর আওজসানি,

তক্কানত দাংদাঙ্যে ধুল্যেভুই।।

মর বিরবিস্যে বুগর আঝা সাংসাঙ্যে ঘর দুওর,
দোগিনর ফুগুদি কানা জেত ঘর' ইজর;
ঝুর'তুর' পুঘে খেইয়ে আধং কজরা
খের-পদনা লুদি-লম্ব বেরেইয়ে ঝার জঙলা।
ধারোজর গঙার নালত বান পরি-
শুগুনো খরান্যের শিল্লো ছড়া,
রঙ্যে ভুদোর রম' গজগে
আগার পিড়েল্যে মুই,
খেই নেযার গদা মুর রিবেং
বানা ছলঙা'ন মর উগুরে উগুরে।।

মর কদে কি আঃগে? নানু কলেবার কি সেদাম!
বেক দ গজক ওইয়ে, অবাং গজক।
চুধো মুই ভাঙা ছারাঘর
পাগস্যে বেরেইয়ে এক্কো গাজ।
লুক লুক পরানর উগর ছোলা বনিজেস!
তুও দ মরণ ন অঃয়-
মূহ্ আঃত-ঠেং অচল এগোর ওগোর বিচ্ছনত,
পরানান হক্কে নিগিলি যেব;
সেই অক্তয়ান বার্চেই আগং
চোখ ফেল্হে ফেল্হে।

=== ===                  (বিলছড়া)

 

 

৪৩। ডর মিজেল

২৯/০৩/২০১২, ব্রেসুপবার, ১০:৩৭ এ.এম

 

বিঝু এল' বিঝু এল',
নুও রঙে নুও ঢঙে পিত্থিমী সাজিল।

ফুল ফুদি রং বেরঙর
রাঙা ধুব ভালক বাবদর,
গাবুরে তিনেং ওই উলমত্য গরি
আঃঝি আঃঝি হুন হুনেই ভেদা দিলগী।

আঃদ' ইজিরেই ডাগিযার মরে
আল্যেঙ হির্বে ঢালি
চোঘ' তারে তারে,
আধুলি হোচপানা গজে দের পরানত
রঙচঙ্যে সবনানি দেঘেই যার জিবনত।

আওজ উরম্বা এই মন ধুঝিত
ঈন'সান জুরে গেল দাঙাপোরা চিত,
ভাঝি যায় হুদু ধুন্ধুগ' আরাচাক
হানক্কন রেইঙ মেলি
ছাবা নেইয়ে জিরেনি হলাত।

উম উম জুরো ব অঃরান হেয়েত বাঝি
সুঞ্জুগে এজং এজং বানা ঈল পুদি,
ডর পুদে পরানত ঝারবো রেক্ষজর
জিবনান হা আঃদত গজেই দিলুং মর!
উবো অঃয় হেয়ে হেজ জার' হাদা উদি,
চোঘত ভাঝেই ফারাদজা যার যিয়ান ঘদি।

=== ===                            (বিলছড়া)

 

 

৪৪। মা

২০০৬

 

থুম নেইয়ে গুণে গুণী মেয়েলি মাদো,
তর অফুরন্দি মেয়ে দোয়ে লৈ
বাজি আঘং সংসারত এ জিংহানি লৈ।
দচমাস দচদিন রাঘেয়োচ রেইত দিন
তর নরম পেদ' ভিদিরে,
দুঘে কস্টে হদক মাদো মরে জর্ম দিলে।

তর বুগর দুধ্ত্যে মধু মু'ওত মিদে হাঝি,
পিয়েই খেই মুই মাদো দোলে আঘং বাজি;
কধক আদর ভরা কির্বে দোয়ে মেয়েই,
থুম নেইয়ে মৈত্রী করুণা মুদিতেই।
রাঘেয়োচ খুব যত্তনে তর নরম কঅরত
নদিলে এক্কায়ো পেবার দুঘ দরদ।

কাম ছারা দিন আ’ ঘুম ছারা রেইত
কাদেয়োচ মত্তেই বিলি ওই এক কেইত।
চোঘোত ঘুম পেদত ভাত উদোত ঠুদোত পানি
বেক কিঝু ত্যেগ গরিনেই মরে আনিলে পালেই।

মত্তেই বিলি অতালিয়ে কদক কস্ট পেয়োচ,
সুজিবার সেই ঋণুন নেই মর সাওজ;
মাদো তুই পরানর খোনি মর দি চোঘোর মানেক,
তর মেয়ে দোয়ের পহ্রত পিত্থিমিয়ান দেঘঙর খালিক।

শ্রদ্ধাভরি সিত্তেই মা গরঙর সালাম,
আশির্বাদে যেনে মুই সুঘে জনম কাদাং;
তর শিক্ষেই তর আল্যেগে এই জিবনান,

পেয়োং সত্‍সুদোম গুণ, মান আ' দোল গ্যেনান।
সিত্তেই মা সংসারত তুই বারীহ্ ডাঙর,
তর জাগা যেরে আঘে বুদ্ধ তিরত্নর।

দোয়েলি মাদো তর কির্বে মেয়েলৈ,
সুঘোর ওক এজিংকানি পদ্দ ছাবালৈ;
অফুরন্দি সালাম গঝাঙ তর ঠেঙত্তলে,
এ সংসারত বেগত্তুন বেজ তুই সদর হলে।
কেয়ে ছাবা কেয়ে সমার যেন নিত্তাগে,
তর আশির্বাদ থোক সে’ন মর লঘে লঘে।।

==০০==                           (ভালুক্যাছুড়ি)

 

৪৫। বড়গাঙ

২০০৭

 

বড়গাঙ বড়গাঙ

অবাং দুনিয়েত
অঝার এক নাঙ।
লুজৈহিলোত জনম তর
এস্সোচ সিত্তুন লামি,
ডেনে বাঙে চিগোন ডাঙর
মোনমুরো ফারি;
লামি এই ঝরঝরেই
পলেগৈ বঙ্গোপ সাগরত,
তর ওইয়ে অঝার মিলন
ভারত বাংলা দি দেজত।
মা তর সাগরান

বাব অঃল' লুজৈহিল,
দেজকুল পুগকুল
তল্লোই আঃগে মিল।

ছড়া মধ্যে ডাঙর তুই
হিল চাদিগাঙত,
তর নাঙ ফুদি আঃগে
চাঙমা বিজগত;
বিলেইছুরি চেঙে ছরা
আর' কাজলং,
বড় ছদ' উরিঙে
ঠেগা তৈজং।
সাজেক অঃল' ছ তর
ঝি য়ো বেগে কন,
এ ছরানিত চাঙমাউনে
ছিদিপরি আঃগন।

রাঙামাত্যে'ন থিদ' আঃগে
ত কঅরত বজি,
হিল চাদিগাঙানরে
আনিলে পালিপুযি;
বেগুদো আগত্তুন ধরি
গদা চাঙমাউনে,
তর মেইয়েত বা'ঝি আঃগন
এদে উজন্যে।
ভঙি পলাক রেইংখং
চেঙে কাজলং,
বড় ছদ' উরিঙে
ঠেগা তৈজং;
কান্দ্যে বসন্ত এই জাগানিত

এবসং তারা আঃগন
সলক জুরোছুরিত।
যারা যেইয়ন বড়পরং
অরুনাচল ধিকছরা,
লুজৈহিল পুগকুল
উত্তোরকুল তিপুরা;
ঈদোত গরন এয' তরে
তারা বক্কুনে,
আঃগয তুই তারা মনত
উমোর ধরি সোমে।

বিজগর নাঙপাদাত
তরে বেগে দেঘন,
চাঙমা ল'গে তরে নিনেই
দেঘির কদ' সবন;
তর সমারে উমোর ধরি
কাদেবার জনম,
আঃগে না নেই কবারে
কবালত লেঘন।
তর বুগোত সাজুরি
গাধী বুরপারি,
কাদেবার সবনানি
থোয়েই ত গরি।।

কিজেনি সে সবন
পত্থমে অঃব' নি?
পেবং নি আমি বেগে
সুঘোর জিংকানি;
ন থেব' যেই জাগাত
ঈংযের নিজেনী,

খুনোখুনি ন থেই অঃব'
মৈত্রী মিলনি।
জাদে জাদে ভেইয়ে ভেইয়ে
কোচপানালৈ,
থেবং সিয়োত সংসমারে
এক জধা ওই;
নথেব' কন' ভেজাল
এক্কা গন্দগুল,
ন পরিবো আগ'ধক
ধা নার উরুত্তুল।।

আমা কধা আমা ভায
আমা অঃরগকৈ-
লেঘিবোং; গনিবোং-
আমা নাদালৈ।
আমা পোজাক আমা সুদোম
আমি পালেবং,
কন' এক্কান গত্ত চেলে
অডার লোই নপেবং;
নিজসাধীনে চলিবোং
খুলোমেলা গরি,
নথেব' কন' ডর
কুন্দি ধরাপরি।
কন' জনে আমা উগুরে
চেলা নচেদেবাক,
চিগোন জাদ বিলি কিয়োই
হেয় ন গরিবাক।
ভরন ভত্তি আমি এক্কো
থিদ'মিদ' জাদ,

সানে শিক্ষেই বেক কিযুলৈ
তজিমপুর' জাদ।।

বড়গাঙ মা তুই
আমা নিযেনি,
ভাগলচ আমা জাদর
বেক দুঘকানি।
সাক্ষি ওই জনম জনম
চাঙমা জাদর বিজগত,
ছিদেই দিবে আমা নাঙ
অবাং জগদত।।

==== ====        (উজ্যাংছুড়ি)

 

 

৪৬। বিঝু

২০০৭

বিঝু তুই এলে..
অঃয় মানস্যর কিযু,
বেগর মন খুযি অঃয়
নুঅ রঙে রাঙা অঃয়
তর কি আঃগে জাদু?

বিঝু তুই এলে...
কোগিল ডগরে
ডগরে কাত্তল পেইঘ,
বিঝু পেইঘ ডাগি উদে
খুযি অঃইনেয় বেজ;
তরে পেলে মিলে মরদ
গুরো আর বুড়ো,
গীদে রেইঙে ভরি তুলোন
গদা আদাম পুরো।

বিঝু তুই এলে...
ঘিলে খারা, নাঢেং গুদু খারা,
উমেআমে ভরন থায়
গদা আদাম পাড়া;
মনে অঃয় রাধামন ধনপুদির
সেই পুরনি দিন,
এই যিয়ে আমাইদু
আঃগ' সুঘো দিন।

বিঝু তুই এলে...
নাক্স রেবেচ
বিঝুফুল ফুদন,
পিত্থিমীয়ান রুবেরঙে
দোলেই সাজেই তুলন;
মনে অঃয় সংসারত
কিচ্ছু দুঘ নেইয়ার,
বেই যার আমাইদু
সুঘশান্দির বোয়ার।

বিঝু তুই যক্কে যেবে...
মর মনত দুঘ উদে,
কানি উদে কুঝি মনান
আমা জাদর দুঘে;
নেই আমার নিজ জাগা
নেই ঘর' ভিধে,
বেক কিযু আঃরেইনেয়
ওই গেলং চিধে।

বিঝু তুই কিত্তেই যাস?

যুনি নযেদে
মর মনত দুঘ ন উদিদো,
জাদর দুঘে পরানান
ন কানিদো;
কুদু গেল' সেই পুরনি জাগা
পুরনি রাজবাড়ী,
অতালিয়ে জাগা জমিন
এইল মুরোমুরি।

কুদু গেল' সেই ছোলা
আঃজার ধানে ভরি থেদ'
মানস্যর ধান' গোলা;
নেইআর সে দোল জাগানি
নেইআর এইল ঝারানি,
কাপ্তে গধা পানিয়ানে
কারি নিলো আমার-
দোল জিংকানি।

ধেই এই পেলং তল জাগাত্তুন
উদিলং মুরো উগুরে,
কারি ললাক দোল জাগানি
বাঙাল শুত্তুরে;
উদি পেলং বড় মোনোত
ঝারত রিজেবত,
কাবা ধল্লং এইল ঝারানি
পরি ইঞ্জেবত।

নেইআর সেই ঝারানি
খেই ফুরেলং বেক,
ওই গেলং আস্তে গরি

বা' আঃরেইয়ে পেইঘ;
ধেই গেলং অরুণাচল
লুজৈহিল তিপুরা,
কুধূ আর যেবার আঃগে
অঃলং আধামরা।
বল ভরেই ল তা'জে গরি
ও বাব ভেই লক,
উজেবং আর' আমি
সায়ত্ত লাড়েইয়ত;
পেদং চেই পুরনি জাগা
আমি আর' ফিরি,
এয' যেই লাড়েইয়ত
আঃদে আঃদ ধরি।
ঈংযে পিযুম ফেলেইদি
দুরোত এক্কুরে,
জোধা ওই লাড়েইয়ত
লামি বেক্কুনে।

বিঝু তুই এযস...
আমারে সান্তনা দিবেত্তেই,
হাক্কন অঃলেয়ো আমারে-
সুঘ দিবেত্তেই;
বিঝু তুই থেইচ আমাইদু
জনম জনম ধরি,
আঃজি ন যেইচ আমাত্তুন
তুই জুরো গরি।
বিঝু তুই আমার বল
আমার সত্‍সাহজ,

আমা জাদর দুঘকানি
তুই ভাগ লচ।

=== ===  (ভালুক্যাছুড়ি)