মেয়েরেগা কবিতা থুপ ৮

 ৩৭। কোজলী

২৪/০৪/২০১৩, বুধবার, ০৭:৩১ পি.এম

 

রাঙামাত্যে খাগারাছরি আর’ বান্দরবান

এ তিনজাগা মিলি অহ্‌য়ে হিলচাদিগাঙ,

মিলিমিঝি আঘি আমি এগার’ জুম্মজাত

সায়ত্তসাসন বেক্কুনর্ পেবার আঘে ধাব।

সায়ত্তসাসন পেবাত্তে প্রায় দিযুগ ধরি

লারেই অহ্‌ল’ সরকার্‌লৈ যদেবদে গরি,

লারেয়র দিযুগ পর ৯৭’য়র ২ ডিসেম্ভর

চুক্তি গরিনেই জমা দিলাক আহ্‌ত্যের।

নিগিলি’লাক বেক্কুনে সান্দিবাহিনী

পেবার আঝায় বেক্কুনর্ গজ্যে চুক্তিগানি।

মাত্তর মনত দুঘ উদে ---

ঈদোত উদিলে জাদ’ দুঘ্‌কানি।।

 

চুক্তি অহ্‌নার ল’গে ল’গে অহ্‌লাক ইউপিডিএফ

ভাগ ওহ্‌ই গেলাক দিদলে যা ধগে তে,

দিন বিদি মাস যেই এঙিরিনেই বঝর

ফুংপাঙে ঝরা ধ’ল্ল কজমা ফুল’পাগর।

দিআহ্‌জার আট সাল এক এগার’

বাংলার রাজ্‌সুধোম খনিজেস্সে অহ্‌ল’

পরিল’ উরুত্তুল বাংলার চেরোপালা

জেএসএস’ ইদুয়ো এল’ ফিবলা।

সংস্কার নাঙ্‌ দি জেএসএস লারমা

একঘরে ফারক ওহ্‌ই বানেলাক ফার্মা।

এঙিরিনেই হিলট্র্যাক্ট মুরল্যা চাগালা

চাহ্‌দে চাহ্‌দে ওহ্‌ই গেল’ মূর্‌ছো ভাঙালা।

জেএসএস ইউপিডিএফ জেএসএসএমএন

পাত্তলি কারাকারি কুধু দার বাহ্‌-না!

জাদ’ ন কুদু যার কুন্দি ভিরেল্লোই?

আধ্‌পধত কালা মোরত ভাঙি ডুবেল্লোই

বৈজেখ্যা কালাঝর সিলেবোয়েরত

বর্‌ ব দেবাপেরাক ‍তুবোল গঙারত,

আন্ধার চেরোপালা আঙস্যা রেদোমায়

বমভুলে বাঘ’মূহ্‌ওত ছাগল নাজায়।

কালা বাঘে খাপ দিয়্যা পিজেমুজুঙে

দেইন ভুদে গাঝা গজ্যা গদা ডেনে বাঙে,

রাহুদঝা যম্‌দোরত জাবারাং জাবারাং

কাদেবার ভ নেই ভয্ যেব পরানান।

 

এ ধগে খ্যেচ রঝেই যা ধগে তে

আহ্‌ঢা ধজ্যন তিন মূহ্‌ওই তিনান পধে,

কার’ পধ্‌ দবদবা নই এক্কেনা

কাদা ঝারে ঘিরি আঘে যিন্দি যেবে যা;

যুনিয়ো খবর পেই ধুঝি বানা এক্কান

তিন পধে যানা সালেন কুবোত আঘে লাভ্‌পান?

কাররেস হর্সরেস নই কম্পিটিসন

ফুটবল ক্রিকেট বা কি ম্যারাটন,

পুরনী বলিখেলা ঈরুগর রেসলিং

কা উগুরে কন্না পেই পারে র‌্যাঙ্কিং।

সায়ত্তসাসন সালেন কি জুম্মজাদত্তেই

তিন দলর লরালরি খেলা চেহ্‌বাত্তেই?

তিন দলর ভাগ অহ্‌না মারামারি চেহ্‌ই

বাবর পুত্‌ খলাদন জাদ’ এরাহ্‌ খেই,

কেনাকেন্যে তে তারে খেমাখেমি নেই

নাধা মনত পাল্লে অহ্‌ল’ এক্কা ঈল্ ফুদেই।

 

সেনে মর পুঝোর উদে তিন দল কিত্তেই?

কা ইদু কেধক্যান কি ভুল রয়ে,

ভাগ অহ্‌লাক কিত্তে? কি কারণে?

কার দুযে কার ভুলে তারে তে ন মানে।

একজাত একধক একরক্তর ভেই

একজধা ন অহ্‌নেই ফারক কিত্তেই?

যা ইদু যে ভুল আঘে দেঘে দেদি গরি

মিলেমিঝে অহ্‌না গম বুঝোপারা গরি।

খবর পেই বেক্কুনে সায়ত্তসাসন চেহ্‌ই

একজধা ওহ্‌ই ন চেহ্‌লে কেঙিরি পেবং চেই!

ঈদোত উদে লুজৈহিলর কুগিগুনোর কধা

লারেই গজ্যন মরংবাজং অহ্‌নেই একজধা,

মিলে মরত গুরোবুরো বেক্কুনে মিলি

সায়ত্তসাসন আনিলাক কাক্কেনে ছিনি।

আমিয়ো ওহ্‌ইনা তারা ধক, তারাধগে গরি

ঠিয়েই উদি যদেবদে দর’মর’ গরি,

ন অহ্‌নেই দল দল, ওহ্‌ই এক দল

তুলি আমি আমা বারাত যেদক আঘে বল।

কধা আঘে জধারে যমেয়ো ডরায়

জধা ছারা সাধিনতা পেদং নয় কারাই।

 

বাপ-ভেই লক!

কি গরির আমি দোলেই ভাবি চেহ্‌ই

একজধা ন অহ্‌লে এক কধা ন কহ্‌লে

কন’ উবয় নেই।

এয’না এক ওহ্‌ই বেক্কুনে উজি

ন গরি তে তারে ভুল বুঝোবুঝি।

কোজলী গরং আহ্‌তজুরে তোমা তিন দল’ইদু

ভেইয়ে ভেইয়ে খুন অহ্‌লে জাত থেব’ কুদু?

তুমি অহ্‌ এক অহ্‌ ঈংযে পিঝুম ঝারি

জুক্কে থেই লারেয়ত আহ্‌দেআহ্‌ত ধরি।।

-------০০-------                      (বিলছড়া)

 

 

 

 

৩৮। এক রেদোর সবন

১১/০৪/২০১৩, ব্রেসুপবার, ০৩:০৩ পি.এম

 

দবদবা এক রাজ পথ, লর্বো মুই সে পধত্

আহ্‌ঢঙর বানা যাঙর্ নেই মর কন’ ধঝ্ ।

কুদু যেই থামেম্বোই কুদ্দুরোত লুমিম্বোই

লর্ দুঅং কুদ্দুরোত কন উদিজে ?

যাঙর মুই বানা যাঙর মাধা নিগুরি

ডেনে বাঙে কিচ্ছু ন চাহ্ং আঢঙর পত্থান বিলি,

যাদে যাদে অহ্‌রান্ অহ্‌লুং একলেজা জিরেলুং

চোঘ্ মেলিহ্ রেনি চাহ্ং চেরোপালা –

দেঘঙর্ রিমিঝিমি; চোল্‌চোল্যা এক লাঙেল্ বেহ্ই

এজের সিবে কন্না ?

 

কেয়েন তার জলং জলং ধক্কান অন্‌সুর আহ্‌ঝং আহ্‌ঝং

চেরো কিত্যে ছদক ফুত্যে দোল নানা রঙর্,

মনত কন’ চিদে নেই কন’কিচ্ছুর ডর্ নেই

নিমনে খুজ্ বারেই পধ’কিত্যে চোঘ ফেলেই

এযের্ তে ম মোখ্যে ।

 

কন’ সাধু অহ্‌ব’!

সুন্যং মুই সেই ভালোক দিনো আঘে

জগদর মেয়ে-দোয়েত যারা বাঝি থেবার ন চাহ্‌ন্

ঘরদোর বেক্‌কিযু তারা ছারি যান্,

অহ্‌য়দ’ সিগুনোর ইবে একজন্

সংসারর্ লুভলালোজর নেই যার মন্ ।

মাধা চুল মুরেই চোকচোক্যে পোঝাক ফেলেই

লোয়ে তে এক জুদো পোঝাক

যে পোঝাগে থেদ’ নয় কন’ লুভ্‌ধাব্,

সাধু মান্‌সোর সাধু কাবর্ গদা ওলোদ্যে

বারেদি যেন্ দোল তে ভিদিরেয়ো ঝ্‌ক্‌ঝক্যে ।

 

যেদক্‌পায় লুমেল্লি কায়কুরে মর্

যদ’ এযের তদ’ পরান লারি উদের মর্

কোজেই উদের চিদ্‌কলজে আহ্‌জিক ভক্তিয়ে

আঘং চেহ্ই আহ্‌তজুরে চোঘ্ ন ফিরেয়ে

মনে মনে ভাবঙর্ পেলুং দ’ এক পহ্‌র্

যে পহ্‌রত্ দোল ভালেত এব’ জীবনর্ ।

 

যেদক কায় এযের্ সেদক মর দিবে চোঘ্ পহ্‌র অহ্‌দন্

আমঘে চেহ্‌ই আঘং বানা তার কিত্যে ।

মর আহ্‌ত্ ঠেং বেক্ জুরেই যার্ পরানান্ ঘদত্ নেইয়ার্

ঢালি পজ্যে গদা তার কিত্যে ।

 

অহ্‌রেই নিলো মর বেক্ ভাবনানি

করান্যে কবা ধক্ আহ্ গরি চেহ্ই আঘং মুই,

আমঘে ওহ্‌ই থাদার; কন’ লরাচরা নেই

চোঘ’পাদা নই একলাগার্ ।

 

কক্কেনে যে ম কাই এ’য় মুজুঙোত আঘে ঠিয়েই

মর কিচ্ছূ উদিজ্ নেই,

ডাগি কল’ মরে মেয়েলি সুরে

“কন্না তুই? কুত্তুন্ এ’লে আমা রেজ্য ভিদিরে?”

তুঅ মু্‌ই অলর্ কন’কিচ্ছু নবুঝঙর্

তে কি কর্ কি ন কর্ কন’ উদিজ্ ন পাঙর্ ।

আর’ এক্কা কাই এ’ল’ মরে আহ্‌দত ধরিল’

তার পরে-

কন্না মুই কুত্তুন্ এ’লুং পুঝোর গরিল’।

কল’ যক্কে আহ্‌দত্ ধরি এ’ল’তে মর গ্যেনান্ ফিরি

উত্তরে কলুং তারে- ও গোজেন্ মর

এস্যং মুই সিত্তুন্ মানেই পুরিত্তুন্,

যেবার চাহ্ং মুই সিদু যিদু নেই দুঘ্‌দরত

কন’ ঈংসে পিঝুম্ ।

আঘে যিদু সুঘ্ নেই কন’ দুঘ

লুভ্ ঈংসে অগ্যেন্ নেই ইত্তুক্ ।

“সিয়েন্ দ’ আমা জাগা আমা রেজ্য; এগজা-

যিয়েন্ তুই ছিদি তগর্ আওজে ধারাজে

কুজ্ বারেয়োজ যে উদিজ।”

 

কল’ মরে বুঝে সুঝে বেক্ ভাঙি দিল’

সেক্কে তে গ্যেনান্ মর গদা ফিরি এ’ল’,

কলুং তারে ঠেঙত্ পরি

স্রদ্ধা গজেই আহ্‌তজুর্ গরি

নেযা মরে ত লঘে ও গোজেন্ ও প্রভু

তোমা মুর্ ঘর’ ভিদিরে ।

 

“যেবেদ’ যেবে নাকি ফিরি এ’বে উল্লো ফিত্তি তুই?

যুনি চাহ্‌জ থেবার আমা রেজ্যত তুই

সালেন্ তরে লঘে গরি নেযে পারং মুই”।

 

উমোর্‌ধরি থেম আর্ ফিরি ন যেম

কন’ কিত্যেত্ মুই,

ইদু দিন্ কাদেম জন’মান ফেলেম

তোমা লঘে; তোমা ধগে ধগে

যিয়েন্ গর’ গ’ত্তে রাজি থেম ।

 

“সালেন্ সুনিজ চিত্‌ মন্‌ দি, কঙর্ তরে মুই

বেক্ ভাঙি খুলি,

আমাইদু যেবার চেহ্‌লে আমা লঘে থেবার চেহ্‌লে

অহ্ পুরিব’ ত’ত্তুনো আমা ধক্

থ পুরিব’ এ’ই পোঝাক খুলি।

তর যুনি কন’ চিদে মনানত্ থেলে

লুহ্‌ঙীমারি ফেলেই দে দুরোত এক্‌কুরে,

কেয়ে কধা মন তুই উহ্‌জে রাঘেবে

সেক্কে তুই আমাধগে চলি পারিবে।

আহ্‌ঢিবে লারে লারে কধা কবে কম

উহ্‌জে উহ্‌জে থবে নিত্য তর চিত্ মন্।”

 

ঠিক্ আঘে ও গোজেন বুঝি পারিলুং

এ ধগে চলিম মুই খাম্ মানিলুং,

এবার মরে নেযা লঘে তোমা মুর ঘরত্

সিদু যেই উজু মনে বজিদুং ধ্যেনত্ ।

গেলুং তা পুনে পুনে তারা রেজ্য ভিদিরে

সমেনেই দেঘং গদা রেজ্যবাযিঘুন্

সিদেসাদা অলর গরি ধ্যেনত্ বজি আঘন্ ।

 

দেঘিনেই চিত জুরোর্ মর্ পরান্ চুলো আগাত উদের

এধক্যেন্ জাগা কার মনে কয় এরিবের?

চাহ্‌ঙর্ মুই রেনি রেনি গদা মানুচ্চুন্

সত্য গ্যেনে গদা রেজ্য ভরেই ফেলেয়োন্;

মনান্ মর কদ’ খুঝি এ’নেই এ জাগানত্

নেই ইদু কন’ দুঘ্ আঘে বানা সুঘ্

লুভ ঈংসে অগ্যেন্ নেই, নেই কন’ লালোজ।

ইদু আঘে মুক্তি নির্বান বিমুক্তি

এ পজা কেয়েগানর বানা বিসুদ্ধি,

ইদু আঘে মার্গ গ্যেন ফলগ্যেন্ আর্

আহ্‌যি আহ্‌যি কদ’সুঘে পরান ফেলেবার।

বজিলুং ধ্যেনত এক সুঘো আসনত  

চোঘ্ কাদি স্মৃতি গরঙর্

কানক্কন যেরে চাহ্ং আহ্‌ভা লঘে উরঙর্ ।।

 

মাত্তর্ কি এক্ বেসুঞ্জুগে মর ঘুম ভাঙিল’

সে রেদোর্ সবনান্ ইদ্দুরোত থুম অহ্‌ল’।

ঘুমোত্তুন্ জাগি চাহ্ং দে’লুং ইয়েন কি সবন্

আমঘে দরাং দরাং দুম্‌দুমোর্ পরানান্।

 

আযলে সবনে সবনে ইদ্দুরোত লুমোনা

পত্থম’ জীংকানিত সিয়েন্ কি অহ্‌ব’না?

এয’ মর্ সে সবনান্ অক্তে ঈদোত উদি

জার’কাদা উদি যান্ বনা বদি বদি ।

 

কি এক উর্গো ধারাজে যেদুং চাহ্ং আহ্‌ঝি

সে সবনানর্ সুঘো রেজ্যত মিঝি,

আযলে জীংকানির পত্থমে সেধক্যেন্ অহ্‌বার্

মনানত তিরোজ ফুদিল’-

আওজে ধারাজে সেনে মনানত জবিল’।

মনানরে দর’ গরি রিবেং ঝাগেরেই চেহ্‌লুং

পত্থমে সিয়েন্ পেবার্ এগেম গরিলুং,

মাত্তর্ কবালর্ কি এক অদেঘা সুধোম

যিয়েনর্ পুনে পুনে আহ্‌ঢা পরে;

সে সুধোম্ ধরিনেই জনমান্ গঙা পরে।

 

যিয়েন্ গরিবার্ চেহ্‌লুং মন’ এগেমত্

পরি গেল’ সিয়েন্ মর কুদ্দুর্ সুরুঙোত্,

ধরিল’ মরে কন্না যেন্ জাবেরেই

গরিল’ দুরেোত্ ফারক এগেমান্ কারিনেই।

মুই ইক্কু লদক্‌ধধক্ কদ’ লেদাবল্

কন্নাজানে ধরি গল্ল মরে যদ’ কাল্,

সবনান আর্ দ’ ন অহ্‌ল’ পুরন্

পুরেদ’ চেহ্‌লে অহ্ পুরিব’

আর’ এক নুঅ জনম ।।

=== ===                    (বিলছড়া)

 

 

৩৯। ফাগোন এলে

৩০/০৩/২০১২, সুক্কোরবার, ০৫:৪৫ পি.এম

 

ফাগোনত আরগানি অঃয়

ভঙরার গুজুরনি,

ঝাক বদি মুপুগর মধু থুবনি।

গাজে গাজে কুঝি পাদা ক’রত উদি যায়,

চেরো পালা এইল চাগ চাদে চোঘ জুরায়;

জাগি উদে পিত্থিমী গাবুরর ঢঙে

সিনেলির লালোচ মনে সাজে নানা রঙে।

 

লুদুপুদু মজি থায় মেয়ে আল্যেঙত

ফুলপরি বৌ সাজে ফুল বিচ্ছনত,

চোনা চোনা তুম্বাজে মাত্তল বেউজ গরি

লামি এই মেদিনিত বানেলে সর্গপুরী।

 

চিত মেলা আওজে বুনি হির্বে জাল,

নোনেয়ে আঃঝিলৈ গরিলে বেআল।

লাঙ' মন ছতপত উজুলাই অনসুর

আয়পায় নিলোজ গঙেই যেদ চায় ভালুদ্দুর।

ফুল ঝরত ভিজিনেই ঈল মনে গাদিবার

সবনর মেয়ে খলাত জনমান ফেলেবার।

 

ফাগোনর হি জাদু ফুলে পাগোরে

মধু সরভ এগাদারু গুণেমন্দরে,

পেগো গীত মিদে সুর বোয়েরত রুচ্যেল

তিনেঙর সুঞ্জুগোত দরমর পুচ্যেল।

উরম্ভায় তিনেংফালাং লুজুরুক এ মনান

বনা বনা সবন দেঘে এগাঝারা জিবনান।

 

চোঘ ফে’ লে ভাবি ভাবি যায় হুদু মিঝি

সুঘো রেজ্যর ফুলবাগানত আঘে তে বজি,

রেজ্যমায় মানে'লগর বেগর এক পরান

মেয়ে দোয়ে কোচপানালৈ ভরন তারা মনান।

সাংসাঙ্যে খেলাং মনত তুদো হিচ্ছু নেই

বেগে মিলি একভাব আমি আরাং মানেই,

আইহ্ল্যেঙ্ কির্বে মেইয়ে মানেয়র সুদোম

জগদর পরাণবলা আমি বেগ' উত্তোম।

নেই কন' রিঝারিঝি  হি্ংজে পিজুম

সংসার' গম ভালেদি ইয়ান আমার গুণ।

 

ফাগোন এলে এগামনে হদক ভাবনা উদে পরে

ওল গরি দলামজা গরং মনানরে,

জুরো গরি হি ভাবং হি সবন দেঘং

আবাদা গরি চেদন ফিরি মু চিমে চিমে আহ্ঝং।

ফাগোন তর গুণমন্দর টুর ভজমান

তর ডগ-এ বেহুজ অহ্য় মর এ মনান,

চাদে চাদে রঙানি বদলের ফাগোনর

চেদনর হাবিলেজত মুই এভ' ঝুরঙর।

=== ===                          (তাংগুম)

 

৪০। পত্যা তবনা

০৯/০২/২০১৩, সোনিবার, ০৭:০৪ এ.এম

 

বুদ্ধ ধর্ম সংঘর গুণ
মাধাত তুলঙর
মা বাবর ঠেঙত তলে
কবাল বাজাঙর,
শিক্কেগুরু দিক্কেগুরু
আঘন যেদক মর
তারারেও শ্রদ্ধা মনে
সুরন গরঙর।

এ পাচসান থুম নেইয়ে গুণ
ভক্তিয়ে পুজো গরি
দিন্নো গমে কাদি যেবার
গরঙর আরগানি।
অপদবিপদ ফারাদঝা
ন এদঅ বিলিনেই
সুঘে যেনে থেই পারিদুং
বেক্কুন্ধোই মিলিনেই।

 

পরেয়ের উবগারত এ দিন্নো মর

কামত জুও দ বেক অক্থআন গম ভালেদর

বজঙ্ ধগে ন অহ্‌দ’ কন’ কামকরজ

দুক ন দিদুং কধায়-কামে মুই কারর মনত।

এ তবনা পাচগুনো কায় নিগুরি গরঙর

পরানবলা বেক্খুনরে পুন্য বিলেঈ দোঙর,

আগাজ-মাদিত-পানিত যদ আঘন ভুত দেবেদা

এহ্জাল দিনেই মর সমারে লদোক পুন্য মজা;

মৈত্রি মনে বত্তা মাঘং বেগর সুঘোর দিন

গমেদালে বেক্কুন থাদোক তারাহ্র মনমুজিম।

=== ===                            (বিলছড়া)

 

 

৪১। ছরান

১৫/০৭/২০১২, রবিবার, ০৮:৪২ এ.এম

 

পেজেরা পধত লাঙেল দীঘলি

আঃঢঙর এগাঝারা,

ডেনে বাঙে রুঅ ভূই কুজুরুক ছলা জাবুর;

সাঙেত সমার চেরেই পুক

দাংদাঙ্যে বৈজেক্যে পাগানা রোদ।

ঊদিস কারে?

পত্যে সবনর তজিম ধারাজে-

এগামার মুই গজাঙে প ফেলেই

যাঙর মোন মুরো করত দি।

 

তারেং রিজেং ধুধুক বিজোল ফারি

হনিজেস্সে পাদারা এরি

একবুক সাঅজ লোনে,

কালাঝার কালাবাঘর মুঝুং ছেরে ছেরে;

লাড়েয়র যুক্কলত ওই দর'মর'

নখ ধারেই লেঙুর মজরি

রম'সম' কিজেক সারি-

পোগোন গুলো মর ঝাগেরেই উদে

কেয উভো বনা বনা জার' কাদা,

তুও মুই বুক দর'-

জিংকানির মেয়ে ছিনি কেপদারি ভরযা লৈ

লুম্ব গুজুরেই এক লামার আরগানি।

 

কুইয়েং সমার তাগী,

গুজুরে কুওং

আগাজত দেবাপেরাক বোয়েরর সজানি লগে

মিঝেল অই মর পেদাসারা রন' কিজেক-

কু উ উ উ উ উ উ উ উ উ,

এয অ অ অ অ অ অ ও ও,

উজ অ অ অ অ অ অ অ অ।

 

পৈনালি সমার এজন ঝাক বদি

এজালে সরিদ ওই জোধা বাণাত তলে।

তেম্মাঙে লাক্সা বদি লর্বুঅ সাজি

পরানর মেয়ে সুদো সাত নাল কাবি,

জিংহানি আমার নয় এগেমে সার গরি।

রাইফেল কানাত লৈ বারোজর উমেয়ে বাচ,

আল্যেঙে সদর ভাবি

শেয লামার ধারাজে..

 

পাল টিগে ঝারবো ডেইন

ঢালা পোরেই সমি আমা চাগালাত,

শুজি খেবার চা'ন আমা লো সট্যে এরাচাজ!

বানেদাক ডেইন পাড়া আমার এই মানেই পুরী,

কারি লৈ গদা সজপদর-

পাদারত চদর' বানেই।

 

আমি কি সেই তুচ্চ্যে সো'ই পারি?

কন আল্যেগে আমনরে আধার কোলেই পারি?

এই জিংকানি বানা আল্লো নয়,

ধারোজ বিলি এক্কান আঃগে

তজিমপুরো ভরনভিরন-

মানেয়র সুদোম, জাগা

দোলে বাজি থেবার;

ছড়ান পেয়ে বলপেয়ে মন

অবাঙে চলন ফিরন।

 

খেলাঙে মুক্ত জীবন

কার' অধিনত নয়,

গোলামর সাদাঙা আঃঝি

সিয়ানদৈ খুজি নয়;

মর মনজুক অবাং সাধীনতা

কধায় কামে চলন ফিরনে,

পেঞ্জুরো ছাস্যে সোনাত্তালি।

 

মন খেলাঙে চরি বেরেম

এদে আগেরে গদা চাগালা,

ইয়ান মর আরাং ধারোজ

ইয়ানই সাধীনতা,

লারেয়র এই ফল,

বান্যে জিংহানির দুঘর ধুঝি।

ইয়ানই ছরান পানা।।

=== ===                 (ভালুক্যাছুড়ি)