মেয়েরেগা কবিতা থুপ ৬

 ২৭। মুই জিত্তো

৩০/০৮/২০১৩ শুক্কোরবার বেন্যা ১০:৩৫ বাজি

 

পরান খুলি গেই যেবার চাং মু্রোহ্‌দেজর গীত্তুন

টেঙাভাঙা-উভোগীত-গেইংখুলিঘুন

চান্দবী বার’মাস বা কি তান্যেবী

রাধামন-ধনপুদি পালা, নিলংধন-নিলংবী,

ক’বী-ঢ’বী পজ্জন ডুলুকুমোরী

ক’বার চাং ঊহ্‌চ্‌সো মনে পেজাঙত পরি।

ধুধুক-সিঙে-খেংগ্রং-বেলা-বাঝিলোই

সমার কুরেই দিন কাদেদুং নানান কধালোই,

গোজেনর তবনা গত্তুং সিপচরনর ধঘে

সাদেংগিরির সর্গত যেদুং ধর্ম সাধনে;

বিজয়গিরির রেজ্যজিদি আরিঙ্যে রাজার গঙে

বুগোপাদা অজল গরি থেদুং বার্‌বো মনে।

নিচিদে গরি বিঝু খেদুং খুঝির আহ্‌ল পালেদুং

নাঢেং-ঘিলে-পত্তি খারাত অক্ত বিদেদুং

জুমচাগালাত রেইং কারিদুং খেলাং মনভরি

গস্যে-সুধো বিচ্‌বিজিদি আহ্‌ঝিয়ে লদুং তুলি।

ভরন্দি আদাম, আহ্‌ম বানিনেই পারাল্যে লঘে মিলি

সিক্খ্যে-দীক্‌খ্যের ফদাং পহ্‌রত যেদ’ উমোর কাদি

গ্যান-বিগ্যেনে উজন্দি ওহ্‌ই বির্‌বিচ্যে দিনমাদান

উজন্দিগঙার সমাজ বানি সাজিদ’ সংসারান,

ভরনবিরোন সীরিসুধোম, রিদিসুধোম ধরি

বিজকথিদি ঝালাব্বরে ভরন বুগোত গরি।

এ পিত্থিমিত থিদ’ অহ্‌দ’ চাঙমা জাদর নাঙ

মর ধারাজে তজিমপুরো ইয়ান পেদুং চাঙ।

 

এ ধারাজর গঙারনালত গধাবান দিনেয়

তুই কি মরে থামেদে চাহ্‌জ নাল্‌লো সুগেয়দিনেই?

মর গীদোসুর মুই তুলি গেইম তুই কিয়া মানা গরজ

উত্থোমুত্থোই অহ্‌রআহ্‌মিযে তদা চিবি  ধরজ,

চোক জলেনেই দম্ভক লাগাজ মাধাত মুগোর ঘুরেই

কধায় কধায় পেইজ বেরানা নানান্ কেইজত ফেলেই।

কুগুর সুয়েইদি মরে লরাজ নিজ ঘরত্তুন লামেই

কধাগরত চুওরথাবারা এহ্‌মান’ চিত দিনেই,

পিচ্ছোআহ্‌দি গুইবান দি গাজত টাঙেনেই

আক্কলছারা মারজ মরে মাদিত পরেনেই।

মিজে মিজে দুঝোত ফেলাজ বানাজ আযামী

দুঝনেই বাদে নল বুলেদত পরান নেযাজ কারী,

সয়সম্পত্তি লুডি নেযাজ মা-বোন্‌ সুম্‌মারেই

মর আহ্ওজর ঘর আদামান দিনে’ আঘুন বাঝেই।

মর সুধোমত তুই আহ্‌ত বাবাহ্‌জ ভান্যে সুধোম মিঝেই

ম লেঘা-ভাজ কারি নেযাজ ত লেঘা দোজ গঝেই,

ম জাদ’চিন লুগে দিনেই নাঙ বদেবার চাজ

চাঙমা নাঙান ফেলে দিনেই বাঙাল কবার ধাব!

ডেলা বানাজ চিগোন বানাজ আর’ কদক কি

মরে নিনেই কিত্থেই তর এদক কিরিমিরি!

আগর্‌কুল্যে এ জাগাত মুই তুই দ’ ভালক যেরে

তুঅ কেনে তুই চিগোন ভাবি এহ্‌লা গরজ মরে?

 

যেদক মরে তুচস্যে গরজ সেদক লরিম মুই

মর গজগে মুধোত রাঘেম মোনোদেজর ভুই

পরান দিয়োঙ পরান দি যেইম মর ভালেদি গঙে

আহ্‌ভাল আনিম মর দি আহ্‌দত জধাসুধোমে।

রমচক্র বের ভাঙিম মুই সক্তমহ্‌ক্ত আহ্‌দে

ভুব’র বুগোত নাঙ লেঘি যেইম সোনার অহ্‌রঘে,

মুই জিত্তো যুগে যুগে লাম্বা বিজক ধরি

চাঙমা মর জাদর নাঙ থেব অমর গরি।

----০০০----                     (রাঙামাত্যে)

 

র ভেত:

১) ঊহ্‌চ্‌সো=আনন্দিত ২)আরিঙ্যা=শ্রেষ্ঠ; আর্য ৩) বুগোপাদা=সাহস

৪) উজন্দিগঙার=প্রগতিশীল ৫) সীরিসুধোম=সভ্যতা

৬) রিদিসুধোম=সংস্কৃতি; রীতিনীতি ৭)বিজকথিদি=ঐতিহ্য

৮) থিদ’=প্রতিষ্ঠা; স্থাপন ৯) তজিমপুরো=স্বয়ংসম্পুর্ণ

১০) গঙারনাল=গতিশীল; খরস্রোত ১১) গধাবান=বাধ দিয়ে আবদ্ধ

১২) উত্থোমুত্থো=কতৃত্ব ১৩) অহ্‌রআহ্‌মিযে=হরহামেশা

১৪) দম্ভক লাগাজ=ভয় দেখাও; দমক দাও ১৫) কেইজ=কেইস; মামলা/Case

১৬) কুগুর সুয়েইদি=কুত্তা লেলিয়ে দিয়ে(পল্লানে যেঙিরি কুগুর সুয়েই দি উরিং, সুগোর লরান সেঙিরিনেই আর্মিঘুনেয়ো সেটেলার বাঙালুন বাঝে দিনেই জুম্মঘুনরে তুচ্স্যা গরন- কাবন, মারন, ঘরদোর পুরি ফেলেই দোন)

১৭) কধাগরত=কথার ছলে; কথায় কথায় ১৮) চুওরথাবারা=চড়থাপ্পর

১৯) পিচ্ছোআহ্‌দি=পিঠমোড়া ২০) ভান্যা=অপ; খারাপ

২১) বদেবার=উঠিয়ে দেওয়ার চেষ্টা ২২) ডেলা=শাখা

২৩) কিরিমিরি=ছিনিমিনি খেলা ২৪) আগর্‌কুল্যা=আদিবাসী

২৫) এহ্‌লা=অবহেলা ২৬) তুচ্স্যা=অত্যাচার

২৭) আহ্‌ভাল=অধিকার ২৮) জধাসুধোম=ঐক্যবদ্ধ নিয়মে

৩৯) রমচক্র বের=কঠিন দেয়াল ৩০) সক্তমহ্‌ক্ত=কঠোর; শক্ত

৩১) ভুব’=ভুবন ৩২) জিত্তো=বিজয়ী

৩৩) ধাব=সাধ ৩৪) লরিম=লড়াই করব

--------------------

 

 

 

 

 

২৮। মা ভাচ

২৯/০৮/২০১৩ ব্রেসুপবার দিবোচ্‌স্যা ৩:২৩ বাজি

 

চাঙমা মর জাদর ভাচ কাম্মো মামাহ্‌র ওলি ডাক

চাঙমা মর চিদ’বধু কির্বে চিজির নোনেইভাচ,

এ ভাঝে মুই পরান জুরাং বর খরানর গরম ট’ত

মুর রিবেঙর রেইঙ তুলিনেই ভাঙং ছিনং মরাজত

আজু নানুর পজ্জন শুনং বেল্যা বিচ্ছনত

পিঢিত বুগী নাগর মাদং বাবাহ্‌র আদরত।

বেবেই-দাদাহ্‌র কঅ্‌রত গরি আদাম বেরাং নিমন গরি

পত্থম পৈধে লেঘা সিঘং চাঙমা অহ্‌রক ধরি,

চুচ্যাঙ্যা কা গুজঙ্যা খা অঝাপাদর বোই

বার’মাত্রা মাদাং মুই গনং নাদা লোই

এ ভাঝে মুই গেই বেরাং মনর সুঘে গেইংহুলি

গীদর সুরে গাঙর নালে নাঝি উদে ঢেও তুলি।

 

গাব-গাবুরির লাঙরকধা কির্বে নাগর গালি

লাঙেল’ পধে গাজ’ছাবাত আহ্‌দেআহ্‌ত ধরি,

চেলা-চেলির জাদর কধা মিটিং মিছিলত

পরবুঅ লঘে ভাচমাদিবাক বেগর ইচ্কুলোত;

ধর্মগুরু ভান্তেদাগীর ধর্ম পৈদেনত

সীলে সুত্রোর ভেত ভাঙিবাক আমন’ মা ভাঝত,

মা ভাঝর সদর মেয়েত আবুজি গুচ্‌ধরি

জাদর ভালেত ফুদি উদে ফদাংতাং গরি।

 

মা ভাঝত জাদর পরান উজন্দি গঙারত

নাক অজলে চিন্ ফুদে দে সংসার আলামত,

ভাচ নথেলে চিন লুগি যায় মাঝারা সুপ ন পায়

পাগচ্স্যা ধরা গাচ যেঙিরি জনম বদলি পায়;

গাচ যেঙিরি উগুরি পরে চর্বো সিঙোর অহ্‌লে

এক্‌গো জাদ্ও ভচ্ যেদ হয় ভাঝা আহ্‌রেলে।

ভাচ্‌সান আমার মূর্ সিঙোরান রিদিসুধোম ডেলা

বিজক্‌থিদি ফুলপাগোরে পাদায় যেব’ মেল্হা,

গুলোগুলিয়ে ভরন অহ্‌ব’ ঝালাব্বরে ধরি

সিরিসুধোমর বাগান ব’ভ’ বিচবিজিদি পরি।

----000----                          (রাঙামাত্যে)

 

র ভেত:

১) কাম্মো=কর্মত ২) ওলি ডাক=ঘুম পাড়ানির গান

৩) মরাজত=শক্ত গিট ৪) পজ্জন=রূপকথা;গল্প

৫) পিঢিত বুগী=পিঠে চড়ে ৬) নাগর=মিষ্টি কথা

৭) বেবেই=দিদি ৮) দাদাহ্‌=দাদা ভাই; বড় ভাই

৯) পত্থম পৈধে=প্রথম শ্রেণী ;প্রথম ধাপ ১০) নাদা=সংখ্যা

১১) গাব-গাবুরির(গাবুচ্‌স্যা-গাবুরী’র টেক কাবা ধক)=যুবক-যুবতী

১২) লাঙরকধা=ভালোবাসার গালগল্প ১৩) চেলা-চেলি=নেতা-নেত্রী

১৪) ধর্ম পৈদেন=ধর্মীয় বিষয় ১৫) আবুজি=আশ্রয়ে

১৫) গুচ্‌ধরি=অনুসরণ করে ১৬) চিন=পরিচয়

১৭)মাঝারা=চিহ্ন ১৮) সুপ ন পায়=খুঁজে পাওয়া যায় না

১৯) চর্বো=ভাসা ভাসা ২০) বিজক্‌থিদি=ঐতিহ্য ২১) সিরিসুধোম=সভ্যতা

২২) ব’ভ’=বসবে; সৃষ্টি হবে ২৩) বিচবিজিদি=শস্য

২৪)ঝালাব্বর=প্রাচুর্য্য ২৫) গুলোগুলি=ফলমূল ২৬) ট=উত্তাপ

------------------------

 

 

২৯। জুম্ম ভাচ

১৬-০৮-২০১৩ ইং সুক্করবার বেন্যাহ্ ১০:৩০ বাজি

 

জুম্ম দেঝত জনম তর জুম্ম মামাহ্‌র কহ্‌রত

জুম্ম ভাঝত তর গীদ’ সুর খুঝি বেজারত।

জুম্ম ভাঝে তর তবনা চোলে-সুদোই সেপ

খরজাগুলুক ভাচসুধোমর ভাঙিবে আলামভেত।

বুক ফুলেনেই বার গরিবে মা ভাঝরে ধরি

খেলাং চিদে মা ভাঝত্তেই দিবে পরান এরি।

 

ন লুগেবে আমন’ ভাচ আমন’ জাদর চিন

পরেয়ে জাদর ভাঝত সমি ন খলেবে ভিন।

পরেয়ে জাদর ভাচ সিঘিনেই কদগী খলেলেহ্

আমন’ ভাঝত করাহ্ ওহ্‌নেই নাবুঙ গালিলে,

জাদ’ আলামত ফুত্যে ফুল তুই অহ্‌দে নয় দোল

সাবাঙ খলেই জাদ’ গিরিত্তিত পাদেই দিবে জোল।

আমন’ ভাচসান সাদাঙা গরি পরেয়ে ভাচসান সদর

তরে নিনেই সেহ্‌ক গরং মুই জার্বো জনম তর,

জুম্ম অহ্‌নেই বিচ দেঘিলে জুম্ম জাদর ভাচ

জুম্ম জাগা ছারি সালেন বিদেজ কিত্তেই নযাচ?

যে ভাঝে তুই মা ডাগিবে বাবাহ্ মুঝি বেবেই

ওন্নো ভাঝত সে ডাগনিত কন’ তিত্তি নেই

মনর কধা পরান খুলি আমন’ ভাযে কহ্

পরেয়ে ভাচ্সান জুচ্ গরিনেই লুহ্‌ঙি মারি থ।

---০০০---                             (রাঙামাত্যে)

 

র ভেদ :১) কহ্‌র=কোল ২) খরজাগুলুক=জট পাকানো

৩) ভাচসুধোম=ব্যাকরণ/ভাষারীতি

৪) আলামভেত=ব্যাখ্যা বিশ্লেষণ/টিকা টিপ্পনী(ভেদালাম)

৫) দিবে পরান এরি=প্রাণ ত্যাগ (দান) করবে

৬) করাহ্=কচি ৭) নাবুঙ=আনাড়ি ৮) সাবাঙ/সাবাঙি=সদস্য

৯) সেহ্‌ক=সন্দেহ ১০) জার্বো=জারজ ১১) তিত্তি=তৃপ্তি

১২) জুচ্=চুপ ১৩) লুহ্‌ঙি মারি=ছুড়ে ফেলে ১৪) থ=রাখ

=== ===

 

 

৩০। কবালর লারেয়ত

১৭/০৮/’১৩ সুনিবার ০৮:১০ বাজি

 

সবনানি কিত্তেই তদা রেনি মরে চায়

আঝাআনি কিত্তেই মুরগুজি পরি থায়,

কবালর ভাগ্যয়ান কিত্তেই বিজিদে

এ মনর ভাবনানি বানা ভেবেরা দ্যে।

জীংকানির পত্থান অনসুর পেঝেরা

পত্তি খুজএ খুজএ বিঝে লেদেরা

খুঝির আগাচসান অমকদ' মেঘুলো

বেল্‌-জুনো পহ্‌রান ম নাঙে ঝালাবুলো।

আঙস্যা আন্ধারত খুচ ফেলাং গায় গায়

কাদা বন ফুরি যাং কিয়োই নেই ম কাই।

 

তারেঙর মাধায় মাধায় মর খুচ ফেলানা

সঙঘরর রঙ্গ খলাত বেলাইন্যে রেইঙ কারানা,

সভাগীত বিগিদি চিত মেলি আহ্‌ঝা আহ্‌ঝি

দেবংসি আহ্‌দর গুমোর ইজিরেই থানা উদি বজি।

গাই আহ্‌দং খিঝি দুমুরোং কবালর লারেয়ত

গং তুলি সেদাম বানং অবেলা পাদারত,

ঝিগেফুল মুই ফুদেম ফেজা ছেরে জাবুরোত

কবালর ভাগ্যয়ান তুলি লোম আওজে লর্‌হজ্জে দি আহ্‌দত।

---০০০---                                          (রাঙামাত্যে)

র ভেদ: ১) সঙঘর=ক্লাব/সাংস্কৃতিক কেন্দ্র/Casino

২) বেলাইন্যে=এলোমেলো ৩) সভাগীত=অনুষ্ঠানে পরিবেশিত গান

৪) বিগিদি=কৌতুক ৫) দেবংসি আহ্‌দ=অদৃষ্ট হাত

৬) গুমোর=গোপন ৭) ইজিরে=ইশারা

৮) লর্‌হজ্জে=সন্ত্রস্থ; ভয় ও লজ্জায় প্রকম্পিত

-----------

 

 

৩১। মানেই ফাজা

১৭/০৮/’১৩ সুনিবার ০৬:১৫ পিএম

 

সাঝন্যে পেইক্কুন বাআত ফিরদন সুঞ্জুগর কিজিককাজাগে

খুঝির ঝরত গাধি লদন জুরো আহ্‌ভার আল্যেঙে,

মেয়েবানর সংপরানে গভীন ঝুবোর ছেরে ছেরে।

ফি ঝারিনেই নেইআবদে কাদেবার এক্কো রেইত

গোজেনর উদিজে আহ্‌জারে আহ্‌জার জূ গোজেই,

জিংকানির উমোরান গমদোলে যোক কাদেই

চিত রিবেঙর ইয়েন তবনা।

রেইত বিদি পহ্‌র ছিদিলে রাঙাবেলর ছদগে

চোঘে মুহ্‌ওত আহ্‌ঝির ঝিমিত ঝিমিলেব আহ্‌মিজে

সং জধায় উর্গো দিবাক মিলনি গীত গেই,

সদরর ডাগনিলোই এয’ যেই যেই

নুঅ দিনর নুঅ আঝা বুক রিবেঙত বানি

মেয়েরেগার সাঙু পাদেই আহ্‌ত বাঃবা বাঃবি।

পেইক জগদর জাত সমাজত সংখানা ফাজা’ঘান

কি দোল কির্বে ভরা ওঝার এ সংসারান।

 

মানেয়র সুধোমত সাংসাঙ্যা ধর্মঘান

ঝালাব্বর চেরোপালা তজিম খলাঘান,

মানেয়র গুন’ধর্ম খেলাং দয্যা সান

ইনজেব মেয়েদোয়ে আল্যেঙ সদরান।

এ গুনে আলাঝালা আরাং মানেই অহ্‌লে

কাস্যেগর রাত নঅহ্‌ব’ গদা উমোরকালে।

 

মানেই ডাঙর মানেই আরাঙ জগদর আলামত

যুগে যুগে জিত্তো তারা ধকবদলর লারেয়ত,

সিরে উজু বার্বো নাঙে জয়গীদর বাবদা ধরি

ঠিয়েই আঘে মানেই জাদি অজল বুক গরি।

সিক্খে-দীক্খেই গ্যেন-বিগ্যেনএ উজন্দি ধুর বেঈ

রিদিসুধোমর মোন তুগুনত বনবন্যা লুরো জালেই।

 

সীঝিভরন অজল নাঙান তম্ভুগত পরি গেল্

রাহু গন্ধায় ঢাগা পস্যা তুর দিবোরর বেল্।

সোনাযুগত পেলাং বেদ’ কির্বে দোয়ে-মেয়েই

মানুযে মানুযে সদর কুদুম এক মা পেদর ভেই।

ঈরুগর দিনমাদানত ঘুর উঙুদোত পরি

দোয়ে ধর্ম মানেই চিদত্তুন যেইয়ে উরোনএ ঝরি।

মানুচ্‌সুনে মুনুচ ওহ্‌য়োন দ্যেন-দেঙরির গজগে

মেয়েরেগা ভাঙি যেইয়ে চিমেয়ে মনর কুজগে,

দুরোত ফারক গদে গদে লাগত পাহ্-পি নেই

সুঘো-দুঘোর ঘুলোত পলে আহ্‌ত বাবেয়ে নেই।

 

ইনজেবি মানেয়ুন সুধোম আহ্‌রা অহ্‌য়োন

চিতরিবেঙর কোচপানা সুরুঙত লুগেয়োন,

ঝগলা গাওলি লঘে চগলা মাধাত গরি

সিংআজনত বজি আঘন অহ্‌মা রাজা সাজি;

পিঝুমে রিস্সো পিরেই ধুলোত গজ্জে পরি

ঈংযের বর্‌মাহ্ বুগোত যাদন জলিপুরি।

লাংলাঙনির আল্যেঙ নেই, রিস্সো পিরের জোল

নেগেমোগে বিচ্চেজ আহ্‌রা পরপাগলত কোল,

বাবে-পুদে ভেইয়ে-ভেইয়ে সংপরানা নেই

ননন-ভোজে জালে-জালে দি ওলোনর ছেই।

আদাম্মে পারাল্লে লঘে পিস্সে চোঘে চেহ্‌ই

সদরে সদস্সে ঘরত উদোন-বজন নেই,

সমাস্সে’রে সত্তুর ভাবি লারেয়ত লো সুঝি

এমান’রে ডিয়েই যেনেই কেনে থানা বাজি!

মানেয়র ফাজাঘান বুঝিবার নেই

বুকচিরি দেঘেলেয়ো চিনিবার নেই

হাক্কে ইয়েন হাক্কে উভোন বদলের অনসুর

গম কলে বজং অহ্‌য় পহ্‌ন কলে ঘুর।

লুভিতিরোজে জিদি লয়ে মুনিচ্চরর্ গ্যেন

মানুচ নাঙে গত্তন বেগে অমানুযর ধ্যেন্।

---০০০---                            (রাঙামাত্যে)

 

র ভেদ : ১) সংপরান=(সংচিত)/(সংমন)= একই প্রাণে,

২) মেয়েবান=মায়ার বন্ধন ৩) ফি=আপদ ৪) নেইআবদ=নিরাপদ

৫) তজিম খলা=পরিবেশ ৬) ফাজা=স্বভাব

৭) ইনজেব=কাণ্ডজ্ঞান ৮) ধকবদল=বিবর্তন ৯) চিমেয়ে=সংকীর্ণ

১০) কুজগ=কুটিলতা ১১) বর্‌মাহ্=আগুন

১২) পিস্সে চোঘে=বাঁকা চোখে ১৩) সংপরানা=সঙ্গ দেওয়া

১৪) ডিয়েই=ডিঙিয়ে ১৫) তম্ভুক(তম্ভুক গাত)=এক প্রকার অতি গভীর নিম্নমুখী সুরঙ্গ ১৬) ওলোন=চুলা ১৭) সদর/সদস্সে=আত্মীয় ১৮) আল্যেঙ=আলিঙ্গন

১৯) দ্যেন-দেঙরি=হিংস্র অশরিরী/ডাইনি ২০) বার্বো=গৌরব

২১)সীরি সুধোম=সভ্যতা

-----------------