মেয়েরেগা কবিতা থুপ ৭

 ৩২। অহ্‌দুং যুনি

১৩/০৭/২০১৩ শনিবার ৫.১০ পিএম

 

অহ্‌দুং যুনি দুর আগাজত পত্‌পত্যা রাঙাবেল

পহ্‌র গরিদুং এ পিত্থিমি মর ছদগে,

যুনি অহ্‌দুং পহ্‌ন দেবাত ভরন পুনং জুন

মানসোর চিদ রিবেঙত জাগা জুগুলেদুং।

অহ্‌দুং যুনি চেরোকিত্যের দেবংসী বোয়েরান

অহ্‌রান্যে মানেয়োরে জুরে দিদুং পাচপরান

যুনি অহ্‌দুং মুই কনঅ এক তুম্বাচ ফুল

গুণ সুধোমর তুম্বাজে মানেইকুল ভরেদুং।

 

পারিদুং যুনি ওহ্ই খেলাং দয্যে সান

অজল নীযো অঝরেনেই গরিদুং বেক সমান

ঝরফুদো যুনি অহ্‌দুং বারিঝে খরানত

গাধেদুঙ বেগরে কোচপানার ঝরত।

সাংসাঙ্যে সুদ্ধ অহ্‌দঅ এই মানেপুরী

কাজরবিজোর ধোই যেদঅ গদা পুজিসারি।

যুনি পেদুং সংসারর বেক গুনোরা’ন

সং ভাগ দি মানেয়োরে ধাবেদুং বজঙান,

লুগেদুং অনতিত্যে লুভ ঈংযে পিযুম

দুনিয়ের যদ’ অসান্দি ওহ্‌ই যেদ’ থুম।

---০০০---                         (রাঙামাত্যে)

৩৩। সিডিউল

১৩/০৭/২০১৩, সোনিবার, ০৩:০৭ পি.এম

 

দিন যায় রেত এযে সাপ্তা মাহ্‌যে বঝর এযে

এযন কয়েক্কো এনিভার্সারি

আজের নেইয়ে ওই আমি সে কামত,

ফেস্টুন প্লেকার্ড লাম্বা বেনার আহ্‌দত!

লামে মিছিল নঅলে মানেই সুর

তদাসারি কিজু কধা কোই যান আমা নেতা

কহ্‌ন অধিকারর কধা স্বাধিকারর কধা

স্লোগানে স্লোগানে উম সে দিন্নো

ভরন আনুষ্ঠানিকতা।

তারপর জুরো..

কন নাঙবাচ নেই, বানা কয়েক্কো সিডিউল এগামার ছারা ,

সিডিউলোত উদি থায় হোমওয়ার্ক বা এক্সারসাইজ

চদরঅ কারবার,

জাদর ভালেদি শচ্য পুরোনা

ফলন্দি ঝুবুর গাজর শিঙোর তুলোনাহ্।

 

এঙিরি বিদিযায় বঝরর পর বঝর

যুগ ফিরি আরগানি অহই নুঅ যুগর

আমার রুটিন যে নবদলে সিডিউল সেধগে চলে

ভাগ্যর চাক্কাবো ঘুরি ন পারে

রোঙ্যে জাঙারে ঝরি ঝরি পরে

আর কয়যুগ এই সিডিউল থেব?

নুঅ রুটিনর নুঅ সাবজেক্ট কমলে বদলিব'?

এক লেসন কদক পড়িবং

বেক দ মনত সোম্মে আহ্‌রে আহ্‌রে কেজ্এ কেজ্এ।

এক বাবদর পেঘাত্যে অহ্‌য়ে।

 

নুঅ পেজেজত উদিদং চেই

নুঅ লেসন যেদং মাদেই

আমা মনত ঊস্সো উদোক

পড়া কিত্যে মন বজোক।

আমি অবার চেই আপগ্রেড

ওল্ড ভার্সন বদলেই

নিউ ভার্সনর নিউ অপশন আমি পেদং চেই।

 

ফরমেট ওহ্‌ক গদা ভাইরাস এটাক্‌ড্ মেমোরি

এন্টি ভাইরাস প্রটেক্শন দি ফীল গরিবং নিউ মেমোরি,

ব্রাউজিং সিস্টেম সিকিউর তোগেনেই

আনট্রাস্টেড ব্রাউজার ইনস্টল ন গরিনেই

আমি লেটেস্ট আমি আপডেট

সিডিউল পেবার চেই।

---০০০---                      (শিজোকদোর)

 

 

৩৪। মুই আঘং

০১/০৬/২০১৩ শনিবার ১০:৪৬ এএম

আবাধা যুনি কন’দিন মরে ঈদোত উদে
লুজুরুক মনানত মেয়ে তিরোজ ফুদে,
সেক্কেনে তুই মাদেই চেহ্‌চ মর কবিতেঘুন
সুর তুলি গেই যেচ মর লেখ্যে গীত্তুন।
মর সে কবিতের পত্তি কেহ্‌লায় কেহ্‌লায়
মিঝি আঘং গীদো সুরোত মিদে মিদে কধায়।
আঃ যুনি চিকচিক্কে পাজ তুই ঘুমোত পলে
সুপ তারাবো রেনি চেহ্‌চ সোজ আগাজত তলে;
তগেলে পেবে মরে যেক্কে যিয়োত চাহ্‌চ

জুনো পহ্‌রত মিদে আহ্ভায় ঝার্বো ফুলোর তুম্বাচ।
কোগিলোর গীদো সুরে বিঝু ফুলে ফুলে
ভঙরাবো গায় গায় উরি ভঙিলে,
ছরা গাঙে নালে নালে মুহ্-রো আধ্দাবত
তল কলগত রিজেং ভুইয়োত অঘুর তারুমোত।
পত্যেরাজি রাদাডাগত পোবাং ডগরিলে
আলসে পেজায় ঘুম ভাঙিনে জাগি উদিলে,
কাম্মো মিলেই খবং বানি ওলোন জালিলে
গাঙর পধে নিমন গরি এগেমে আহ্‌দিলে;
ফুল চাবুগির আরে আরে রাঙা খাদি পেঝোত
আলাম জঘা পেবে মরে সুলো’বেয়ে ফুলোত,
জুমচাগালার ঘজ্যেতাঘাত সুদো গলাহ্ সেরে
ছদরক ফুলোর কির্বে ধঘত মরে সুপ পেবে।
দিবোজ্যেমায় ক কুরিলে ঝুবুর গাজত পরি
সামলক্কো ধাবাদিলে গত্তনা রাঙা গরি;
লাঙা-লাঙি কিজেক দিলে রুঅ বনে বনে
সোনাত্তালি উর্গো ঝাগত তোগেচ মনে মনে।

কুঝি চিত্তির কজমা আহ্‌ঝিত মেয়ে আন্দলে
লুক্‌দি আঘং খারোস্যে অক্তর দেঙর তালে তালে,
গুলিহ্ কজ্জাল লুঙিহ্ মারি বোইবু আহ্‌দত লোই
গুরোগুরি উচ্সো মনে ইস্কুল দেহ্‌লেগৈ;
পরবুঅ ওহ্‌নেই অজল অহ্‌লে গাভুস্যে গাভুরি
জাদর মেয়ে জাবেরে থেবাক সুধোম বুগোত গরি।
সেক্কেনেয়ো আঘং মুই তর লঘে লঘে
ওল অহ্‌নেই নিবিলি ঝারত পথ্থান আহ্‌রেলে,
ফারা দঝায় গাঝা অহ্‌লে জাদর কবালত
লামন্দি সলায় ঝুরুত গরি ফেলেলেহ্ নাদারত;
উহ্‌ব ফিরিনেই বুদ্ধি গ্যেনে ধুর ধরি দিম মুই
ফি ফেঝেরা ঝারি অহ্‌বে সুদ্ধসাঙ্ঘ তুই।

মরে পেবে জাদর দুঘোত সুঘোতও এক্কুঝান
ভেবেরাদি ছিদি আঘং উমোর দিনমাধান।।

মরে পেবে বৈজেগত কালা বর্ব’ লঘে
জেত মাহ্জর পাগানাহ্ রোদোত গরম আহ্ভা ধঘে,
আঝার মাস্যে দেবা দরত মিঝি থেইম মুই
সাগোন-ভাদ’ দেবা পেরাগত যুনি তগাচ তুই;
পেবে মরে আঝিন-কাদিত পাগানাহ্ ধান ভুইয়োত
বেন্যে পোত্যে ঝলং ঝলং সিরোপানি ফুদোত,
আঘুনে-পুঝে জার পরিলে রেদোর সম্ভাগত
ঈন বদিলে খের’ উগুরে জুরো মাঘ মাহ্ঝত।
ফাগুনোর দঘিনো আহ্ভা যুনি ফিরি এযে
পুরোন ঝরি নুও পাদা ফুদিলে গাজে গাজে,
চোত কাবারী সুগুনো দিনোত মনান চিগোন অহ্‌লে
আলাঝালা খুঝির পহ্‌রত মরে লাগত পেবে;
বার’ মাহ্জত বার’ ধঘে দিনুন বদলিলে
সেই ধঘে মরে পেবে আওচ গরিলে।।

---০০০---                               (তাংগুম)

 

 

 

 

৩৫। আল্যেক

২৯/০৫/২০১৩ বুধবার ১:৪০ পিএম

 

মুই এক্কো কজমা ফুলো করি

ফুদিবার চাঙ এইল তারুমোর গাজে গাজে।

মুই এক্কো গেইয়ে কোগীল

ঘঝা দিবার চাঙ এইল মোনর আহ্‌ভা লঘে।

মুই এক্কান চিগোন পাদা জুরি

এগামনে মিঝিদুং চাঙ খেলাং দয্যা সমারে।

রিজেঙর মুই জুরো তামজাং

কাম্মোগঙার মর ভেদের আঘে।

জুমো কলগত মুই সাঝন্যে জুনি

জলিদুং চাঙ মেলাহ্‌ খুঝিয়ে।

মুই ফাগুনর ঝল্ঘা বোয়ের

বেই যেবার চাঙ লাঙেল দিঘলী।

মর ধাপ আঘে, ধারোজ আঘে

আঝা আঘে সবন আঘে,

মুই অহ্‌বার চাঙ ডাঙর দীঘোল

কাবিল কদগী কামে কজ্জে

সিক্খেই আল্যেগে রিদিসুধোমে,

চাঘি চেদুং চাঙ সংসারর নুন-আনুনি

অহ্‌দুং চাঙ পাংঘা বাগস্যে।

 

তুমি কি দিবা মরে সে সুযুক?

আধ্‌দানত আগা কাবি ন মুচ্চেবা মরে,

কুঝি কেয়েত নক ন ফুদেই

আক রাঘেবা মরে।

 

তুমি কি দিবা মরে সে সুদোম?

সাংসাঙ্যে মনত কাজর ন এদ’

রুঘোরুক্যে অজবা মুওত ন বজিদ’,

সমাজ্যের কোচপানা পুনোত ন পুযিদুং

পারাল্যে মানুচ্চুন সুত্তুর নভাবিদুং।

 

তুমি কি দিবা মরে সে সিক্খে?

জাদর পৈদেনে পরান ফেলেদুং

নিজো আলু খুরি ফাঘারা ন অহ্‌দুং,

বিজগত লিবি থেদ’ মর নাঙ

অজল বার্বো সেদাম।

সীঝি মনে যারা মরে ঈদোত তুলিবাক

সোনার অহ্‌‌রগে মর নাঙ লেঘি রাঘেবাক।

 

তুমি কি সিঘেবা মরে সে কাম?

লহ্‌ক ধরিবাক মরে আহ্‌জার জনে

লেবেদে থবাক চিতরিবেঙত,

ভালক যেরেও ওহ্‌ম মুই তারার আল্যেক

যারা এবাক আহ্‌জার বঝর যেরে।।

---০০০---                              (তাংগুম)

আল্যেক=ideal

ডালি দেনাহ্‌ : ভেই মারনি লারেয়ত যারা মুকপাত্তি ওহ্‌ই কাবিদেঙি গত্তন তারার উদিজে এ কবিতেবো ডালি দিলুং।

===

 

৩৬। কাম্মোর জিংকানি

০৩/০৫/২০১৩, সুক্কোরবার, ০৪:০৯ পি.এম

 

কোগিল্লো ডগরের, জুরো আহ্‌ভা বা’র
উম রোদে আহ্‌ভায় আহ্‌ভায় বারী গম লাগের।
ঝারত ফুত্থোন লুদিনাক্‌স’ তুম্বাজ ছিদাদন
নুও জুমোর তুগুনোত বোই নানান কধা ভাবঙর।

কেরকেরার্ সেইরবো আধাপোরা গাজসোত
ঝাকবদি উরি যাদন সত্থা বরোনি,
চাগালার এক্‌কুনে কুন্‌কুনার গাবুরি
উবোগীদে জুমচাব থোয়ে উম গরি।
নুও জুমোর আরাকাযা বেগর ধুম্‌ধাম
আলু কুজু রেং লাগায় জুম্মোবির ঘাম।

এরেয়ে মোন’ধাক কাম্মোর কাবিলে
জিংকানি লারেয়ত মুজুঙে লামিনে,

ঝরে রোদে ভিজি পুরি রন্‌দুঘ্ খিঝি
গরি যান কাম’ তপ নিগুজ এগেম গরি।
কবালর সুধোম বানি অদেঘা গোজেন
একমুত ভাত খেনেই জনমান থরেই,
মাদিপুক সদর তারা কাম্মো দেজর গমে
ফলে যান খেবার দরপ ঊচ্‌সৈ নিমনে।
ধান-চোল গচ্ছে-সুদো এলাপাদি ভরি
বাইবাগানর ফুলে ফলে টুলি মাদি সং গরি,
এগেম সাধন তারার মাদির মেয়ে ধরি
মাদির বুগোত কির্বে ঢালি যাদন কাম গরি।

ঈরুগোর রংঢঙ বিগ্গেনর্ জোয়ার
মাহ্‌জনর আলা খানা দবদবা সংসার,
কুদি টেঙার মূরো বানি ফুলোবিচ্ছন গরি
গীদে রেঙে বেরান্যেদি কেদেক কেদেক আহ্‌ঝি।
কেয়ে জঘা তুম্বাজর ঝাল্লো চদক গালি
সাজপোঝাগে রাজপুত্তুর কন্যে ঢং তুলি-
কাম্মোর মন’মায় সবনত নভাঝে
বেন্যে বেল্যে খুঝি তারা দিবে খেই পেলে।
লুক লুক পরানান বাজেবার চেহ্‌ই
নেই সেনে থঘা বুদ্ধি ইন্‌জেব গরিনেই
উজুসুরুং ধল্ চিত কাম্মোর জনম
দেইন জুগে তুও কেনে তারারে সুঝি খাদন!

সিরে ঘাম ঠেঙত ফেলেই জিংকানির আয়ু খেই
জুগুলাই বেগর খানা পরানান খুলিনেই
পত্তি দিনোর রুস্যেলানি চেলা চেলি ঘরত
তেলে ঝুলে সদ্যা খেই বারের তেল সরপ।
অজলর সিখ্যেলোই গ্যেনি পুন্ডিক ওহ্‌ই
পয়নাঙি রাজসুধোমি বর ঠাগুর ওহ্‌ই,

বাবুগিরি পর্বুও জাদর পাত্তলি
ডাক্তর ওবিসার কুদি বেবসায়ি।
চেয়ারমেন মন্ত্রী উগিল বেরিস্টার
জজটজ কদ’ বাবু রাজা রাণী মাষ্টার।
সমাজর ডাঙর তপ্ফা অজল নানুগিরি
গজ্যন অবাঙে যারা যুগ যুগ ধরি।
এব’ সং অজল তপ্ফা থাগয়্যে মানুচজন
পুঁজিবাদে দুনিয়েগান ইযু খল্গাদন।
রাজসুধোম জাতসুধোম টেঙাসুধোম আর
তপ্ফা ভাঙি একলাগার যে গরিবার চাহ্‌র।
গরি যান নিচিদেই যার যিয়ান কাম
সিয়ানি বেক আহ্‌জার আহ্‌জার দুখ্যে মানসোর ঘাম।

দেজ জাদর থক ধরিয়ে কামেই খেয়ে মান্‌সে
মূরখাম্মো তারা; আঘন সক্ত গরিনেই,
তুও তারার দুঘ ন খরে, ন থামে ওত্ত্যেচার
পর্‌সালে গজক তারা নেই বাজিবার।
চিবি ধরি খেই যার রম’ পর্‌সালে
ভালেদর সবন তারার যেয়ে নাক্‌সালে,
গরা ধরি আগা সং পিত্থিমির জনম
কামেই খেয়ে মানেয়ে ব’ধন দুঘোর পং।
চিত নেয়ে সমাজত কাম্মোর অবদান
নেই কন’ নাঙবাজ নেই কিযু মান,
অনালে রাত্তিছারা পরাধরা পেই
বেসুঞ্জুক্কান আজা গরি যান জনম কাদেই।

=== ===                             (বিলছড়া)