মেয়েরেগা কবিতা থুপ ৫

 ২২। আঝল তারাহ্

০৬/১১/'১৩ বুধবার রেইত ১১.০০ বাজি

 

আহ্জার আহ্জার মানসো সেরে এ কয়েক্কো দেইন

লো চুজনি খাগিনি-মগিনী

চিন্ধেবাজ চূমী, কাজাএরাহ্ খাওন্যা ভ্যাম্পায়ার!

যারা চূজদন জাদর তজিম ভালেত্তান

সমাজ তারার চদরঅ জাল'ঘেইয়োত বান্যাহ্।

তারাহ্ সুধোমি রাজসুধোমী

ত্যেগী, সাধু ,জাদর চেলা মাধাঝুধো

পরবো-পুন্ডিক ডাঙর ডিগ্রীবলা।

গ্যেইনঅ ভান্দাল তারাহ্, অজল ইঞ্জেব

ভালেইত অভালেইত বেক তারাহ্ বুঝোন,

তারাহ্‌র পত্তিকধায়, কামে-কজ্জে জাদর ভালেদি চিদে

তারাহ্ই আঝল তারাহ্ই আরাং লরবো জাদর গমএ!

 

চোক এরেই দেঘির আমি তারাহ্'র সে কামআনি

জাদর ভালেদত্তেই যিয়েন গর'দন

চোকচদামাঝি সান জাদর চোঘেমুহ্ওত

চদরঅ তুস্যাগানি, নাদংছারা কারবার,

মাজারা লুগেবার বিজোলপধত

আমনর আহ্ঢু কাবি পালু বেঙা আহ্ঢানাত।

আল্‌বলা বিজোসেল ভেইয়োর বুগোত গুদেই

উদোন্দি পহ্‌র তারাঘুন এক্‌কুবে ভজমারেই

ঝর্‌ঝরি, রানজুনির সুর রং পুঝিফেলেই

দোল্‌ঘঝা মিদে গলা তদাচিবি বুব গরেই

কজমা করিগুন কজদি মারুভাঙি

মালুম্‌ভাঙা মরালাত, কুদুম্মোর চোঘোপানি

ইয়েনি জাতভালেদি আরাং কাম!

তারাই গরি যাদন বঝর বঝর ধরি

যেন সিনেমা, যাত্রাপালাত এক্কান রংচঙা চেহ্‌বার

নায়ক-গুন্ডোর ডায়লগ, একশন

তারপর-

ভংপাদারে রুক্যা, রোগোনি মরালাত।

আর আমি?

আমি বানা চেইয়্যা, জুরো রেনিয়্যা।

নাটগ'পালাত আমার কি পাহ্‌ত্ নেই?

আঘে-

আমি লারেয়োর রন'খলা, মিয়োবন ছনখলা

বাঘে-মোজএ লারেই চলে

মিয়োদুবোর কবালপুরে।

===০০০===               (রাঙামাত্যে)

 

র ভেত:

১)দেইন=ডাইনী

২)খাগিনি-মগিনী=পিশাচ; প্রেত

৩)মরালাত=মৃত লাশ

৪)চেইয়্যা/রেনিয়্যা=দর্শক

৫)রন'খলা=যুদ্ধক্ষেত্র

৬)পাহ্‌ত্=সিনেমা চরিত্র

৭)রুক্যা=আহত

৮)রোগোনি=রক্তাক্ত; জখম

৯)পুঝিফেলেই=মুছে ফেলে

=== ==

 

 

 

২৩। এরান দিলুং তরে

৬/১১/'১৩ বুধবার বেন্যা ৯.০০

মুই তর দবদবা পধত পাদারিগাজ ন ওম
ফেজেরা নিবিলি পধত উগুধো সাল ন ওম।
তর রেনানা চোঘোপহরত আন্দল ন দিম
বেরানা মনজক্কাত কাঝি এরি দিম
যা তুই আলা গরি যিদু পরানে কয়
তর দি চোঘোত বিজকাদা সাল মুই আর অহ্দুং নয়।

তর বোয়েরত ধুল্যেকোলোই মুই সাজি ন থেইম
বর খরানে ঘামে গরমে তুস্যে ন লাগেইম
জারেবানে গিরগিরানাত ঈন কনদিন ন ওম
তর আবাজত কধায় কামত ভালেইত্যাকধা ন কোম
তর ধগে তুই যা গরি যা যিয়ান ঈল ফুদোচ
এরান দিলুং ছরান দিলুং যা যেদে চাহ্চ যিয়োত।

=== ==                                  (রাঙামাত্যে)

 

 

২৪। জুম্ জিংকানির্ খুঝির্ মাধান্

২৪/০৯/’১৩ মঙ্গলবার দিবোস্যা ২:৪৫ বাজি

 

অহ্‌গলক্ ডগরের্ রেদো সম্ভাগত্ গচ্‌গচ্‌ গজরক্

এক্ দুই তিন্ গনঙর্ অনসুর্‌, কক্কে পরিবো ঝরি,

পং পং পোবাং ডগরে দোগীন্ পঝিম্ কুণে

পর্‌লে পোবাং পর্‌ কোহ্‌ই অহ্‌রান মুই তা পুনে পুনে।

চেরোপালা গুমুরোর্‌ জিনিনিত্ ডগরানি

কানসুক্, কানজোল্ কি কোহ্‌ম্ কিজেনি!

 

ভাদঅ-আযিনোর চেরাংভেরাং দোল্ মাধানত্

মাদিপানি সুগেই উদে একঘিলে সমানত্,

কাদি-আঘুনে জার্‌ ভেদা দে জুরো আহ্‌ভা আনে

দেবারাজে ঝরতুলি লয় অস্‌সুধোমর্ বিধেনে।

কি দোল্! এ দিনুন্, দোল্ গদা রেইত্তুন্

জুমচাবর্ মোনোঘরত্ পেজাঙত্ বোই ইজোরত্,

টংঘরত্ নহ্‌লে সুগোর্‌রাঘা বাজেয়ত্

পোতপোত্যা জুনোপহ্‌রত্ পাগানাহ্‌ ধান্‌সিজে সিরোপানি ফুদোত্-

ঝিমিলাই রুবো রঙে জুনানর্ আইল্যাঙে,

চিত্‌জুরোনি চেহ্‌বারানি চেহ্‌ই কাদাং অক্তআনি

দিচোঘোত্ নএযে ঘুম্, ধুধুক বেএই গাহ্ং উভোগীত্তুন

পিও পিও সিক্ নহ্‌লে কুইয়েনা সমাস্যা তাগী

আহ্‌দঅ খুল্ ডগরেই, সিঙে-খেংগরং বেহ্‌ই

উম্ গরি নেইঘুমে যান্ রেইত্তুন কাদি।

 

পোত্যা আমল্ পরিলেগী পহ্‌রফাদিনেই উদে

রাত্তোল্যার্ ডাক্‌কারানিত্ বেলছদক্ ফুদে,

বিদিযায় এক্কো রেইদোর্ পুক্‌জুগোর্ রঙ্গমেলা

সংসার্ রাঘোনি পালাপাল্যাত্ মানেই, পেইক্-এহ্‌মানর্ পালা

সুরু অহ্‌ই এক্ নুঅ দিন তপ্‌-তবনার্ খেলা।

ধল্ খোও বেল’পহ্‌রে গুলোগুল্যা মিঝেইল্‌কজালে

সাজিউধে নুঅ পিত্থিমি অঝার্ কির্বে ধঘে,

সিরোপানির্ ঝিমিলানি জুরো আহ্‌ভা লঘে-

নাজিউধে দান্‌সিজে গাবুর্ মাত্তলে।

গোজেনরে সুরন্ গরি দিন্‌ভাগর্ পালা ধরি

যার্ কামত্ তে লামন্ আঝা বুগোত্ গরি,

পেইক্-এহ্‌মানে চরা ধরন্ আমলে নিমনে

জিংকানি তরানা লারেই গরন্ পত্তি জনে জনে।

কিঝিক্‌কাঝাক্ পেইগো গীত্, সগদার্ চেজেক্‌চেক্‌

অহ্ং গুজুরি উহ্‌রিং বেরাই ফেলাবনান্ বেক্,

বান্দরর্ কুহ্ কুহ্ র লেজাই তুগুনে

গুই-সাবে অহ্‌লর্ চরে ফেঝাদুবো ছেরে ছেরে।

 

ঘুম্ এরিনেই আন্ধার্‌পহ্‌রে জাগিউধে জুম্মোবী

ওলোন্ জালি ঘর্ সুরেহ্ তে মাধাত্ খবং বানি,

নিমন্ খুঝে প বারেনেই পরেগোই কুঅ গাঙত্

কগরা ভাত্তুন্ খলা গরে মেলাহ্‌ক তেলোনত্।

কানি বেণা ধরেই রাঘাই চিজিরে ধুলোনত্

জুম্মোধনএ তাগল্ ধারাই বোইনে সাঝিপেরোত্,

বুরো আজু ছানাত্ বঝি বুনে ন-ছ তোলোই

জুম্‌গাবুস্যা যুক্কোল্ অহ্‌ই গুলিহ্-বাদোল্‌লোই।

খারোস্যা তুংঙো খলাভাত্ খাই ভেইয়ে-বোনে মিলি

জুম্‌গাবুরী দোলে সাজে আনা-পুনি ধরি।

ব্যেন্ মাধানর্ ছারি লোনেই ঘরর্ নিত্তোকাম্

ঘর্‌বো লঘএ সংসমারে ধান্‌ দ্যেবাত্তেই যান্,

ধান্‌পাগানাহ্ ঈরে-ঈরে দাবে-দাবে দোল্

থল্‌ কলঘে চাগালা ধরি কাম্মো মানে’র্ জোল্।

জুম্‌গাবুরী কুন্‌কুনে গায় লাঙর্ উভোগীত্

লাঙর্ মনে গাবুস্যা কারেহ্ পিও পিও সিক্,

বাদল্ মারি তদেক্ ঝগাই, ঝগাই উগুদো পেইক্

উগুরিক্ লোরেই সমার্ বদে দভাকাধি বিরেইস্।

বাগ’মাধাত্ চিন্‌দিরে তগাই খারোস্যা তুংঙোধন্

কুঝি কুঝি মাম্বারা করাহ্ তা’ত্তে আদেয়ধন্,

ধাগাসুমি গাজে-গাজে তগাই সিম্‌পুক্

পাগানাহ্ চিন্‌দিরে পেলে গরে নাক্‌কুবিনেই ভুক্।

ঠিক্‌ দিবোরত্ আহ্‌মত্ ফিরি দিবোস্যা সাচ্‌সো খেই

বেল্যা দিবোর্ কামত্ লামন্ ঘুমো বিচ্‌সান্ মারেই,

এঙিরিনেই মেয়ে রাঘেই পাগানাহ্ ধান্‌ভুইয়োত্

জুম্মো মানেই মাধান্ ফেলান্ খেলাং সুঞ্জুগোত্।

 

গোস্যা গাজত্ ফুল্ ফুদি যান্, সুদো গাজত্ বাদানা

মুরিচ্ গাজত্ ভংপাদারে মুরিচ্ পাগানাহ্,

গুলোগুলিয়ে ভরন্ অহ্‌ই তিদে-সুগুরিসাক্

গুলো-গুলো দেঘে বানা বিগুন্-মোগোই-বাহ্‌স।

আলু কুজু অক্ত অহ্‌য়োন্ মোক্‌ক্যা জেদেনা

কেচপিজি-কোন্ ছরা-ছরা খুঝির্ আহ্‌ঝানা,

ফুঝি সাবারাং ভেদের্‌সেদের্ মেইয়্যা-ওঝোন্‌সাক্

রাঙা-ধুপ্ পুঝোক্ ঝাবুর্ আমিলে, নারেইচসাক্;

নানা জাদর্ এহ্‌লাপাদি লাদাপাদা তোন্‌পাত্

ঘর’ উঢোনত্ বাজার্ বঝায় মোনোদেজর্ জুম্‌চাপ্।

 

জুম্‌জিংকানির্ এই অক্তঘান্ বারী খুঝির্ দিন্

ভাদে-কাবরে রেইঙে-গীদে কাদে সুঘোর্ দিন্,

সরঙ্ ভরন্ ধান্ তুলিনেই গারে বজর’ খুধো

দাদন্-উধোর্ সুঝিবাত্তেই আয়সায় গস্যা-সুদো;

জুম্মো দেজত্ জুম্‌চাগালার্ তজিম্ এ ধক্কান্

জুম্মোউনোর্ জুম্ জিংকানির্ খুঝির্ মাধানান্।

----00----                          (রাঙামাত্যে)

 

র ভেত্:

১)অচ্‌সুধোম্=প্রকৃতি; চিরন্তন ধারা ২)নিত্তোকাম্=নিত্যকর্ম

৩)চেহ্‌বারানি=দৃশ্যগুলি ৪)চেহ্‌বার্=দৃশ্য ৫)কানসুক্=কর্ণসুখকর

৬)কান্‌জোল্/কাংঘোল্=শ্রুতিকটু; ৭)গুলোগুল্যা=একসাথে একাকার

৮)মিঝেইল্‌কজালে=সংমিশ্রণে ৯)প=পদ;পা ১০)আদেয়ধন্=দৈবধন

১১)এহ্‌লাপাদি=সবুজ শাকসব্জি ১২)লাদাপাদা=সব্জি ১৩)তোন্‌পাত্=তরিতরকারি ১৪)সরঙ্=ধান রাখার খামরা

১৫)মাধান্=মুহুর্ত; ক্ষণ

=================

 

 

২৫। উযুলানিহ্

০৮/০৯/’১৩ রবিবার রেইত ১০:৩০ বাজি

 

অজল পাগচ্যা নিযো ঝুপ

ইক্কু পচ্যাগী কলিযুগ,

কলিযুগত সত্য নেই

বুকছিরি দেঘেলেয়ো পত্য নেই।

ঈংযের আগুন দুমদুমার

গদা সংসারান পুরিযার,

সংসারত থেয়ে মানেয়ুন

এক্কুই অহ্‌য়োন এমানুন।

এমান’ চিদে তিনানত

মানেয়ো চিদে সপ্পানত,

মানেই এমান ফারক নেই

চিন্দে ধান্ধায় সমান ভেই।

এয’ বাপ-ভেই এয’ যেই

এমান’পুরিত্তুন উদি যেই,

মানেই কুলোর মানসুধোম

চিদে-মনে কজা যেই।

মুনিচ্চোরর গ্যেন ভান্দাল

মুধোত পিজি লোই সুখ জাঙাল,

ধুঅ জাঙালে বেরেবং

বেল’ পহ্‌রান লরেবং।

 

কানচোক্কুনত পহ্‌রফুদেই

বরা কানা’নি ফহ্‌র গরেই,

বিঝো মুহ্‌আন সামেলেই

কেয়ে-মনে সং গরেই।

গোজেন বুদ্ধোর লহ্‌ক ধরি

ধর্মসুধোম তাক গরি

সংঘ জধায় মিল অহ্‌বং

ধরাধচ্যায় চলিবং।

গ্যেনে ধর্মে চলিলে

বেক ভালেদি সুখ মিলে,

দুঘদরত্তান আর নথায়

ফারাদঝা কাদি যায়,

ফী ঝারিনেই সাংসাঙ্যা

অহ্‌বং বেক্কুনে ফনফন্যা।

 

জাদেকুলে গম থেবং

যুগে যুগে ঠিঘিবং,

নিজো মঞ্জক্কায় নিজ দেজে

চলি-ফিরিবং সজমজে।

পুরনি রেজ্য চাঙমাদেজ

চম্পকনগরর পরিবেজ,

বানেবং গরিবং জালাব্বর

অহ্‌ব’ চাঙমা জাত থিদব্বর।

---০০০---            (রাঙামাত্যে)

 

র ভেত:

১)পত্য=পথ্য ২) মানসুধোম=মনুষ্যত্ব ৩) মুনিচ্চোর=মানুষ ৪) ভান্দাল=ভান্ডার

৫) মুধোতপিজি=মুষ্টিবদ্ধ ৬) জাঙাল=প্রশস্ত পথ ৭) ফহ্‌র=ফুরফুরে

৮) লহ্‌ক=অনুসরণ ৯) তাক=নিশানা ১০) সাংসাঙ্যা=চাঙ্গা

১১) ফনফন্যা=মজবুত ১২) সজমজ=ঢিলেঢালা ১৩) থিদব্বর=প্রতিষ্ঠিত

১৪) উযুলানিহ্ /উযুলানাহ্=কোথাও যেতে বা কোনকিছু করার জন্য অনুরোধ জানানো

-----------------------

 

২৬। সাজঙ্যে পর্‌বাজ

০৮/০৯/’১৩ রবিবার সাঝন্যা ০৬:১৫ বাজি

 

ঘিলেবেঙ ডগরে বিলো পারত বোই

সংসারর রঙ্গ চেই অহ্‌লুং বেক্কান চোই

উল্লোহ্ মনানে কিচ্ছু নমানে

তিনেঙর লালোজে কি কি পেদ’ মাঘে

খাক্কন্যে জিংকানির সাজঙ্যে পর্‌বাজ

গর্‌বাআহ্‌দি এলুং খেলুং তিদে-খরই সাজ।

 

আমনর থিদি কদে কন’ কিচ্ছু নেই

চূধো এচ্‌সোং চূধো যেইম বানা চোঘে চেই,

ধরিবের নানু অহ্‌বার সেদামত নেই

হোটেলর খানা খেই বিল গনি যেই;

সংসারানে উজু বারী তা ধঘে তে

যা রুজে খেই পারিবে নি পাত্তে নই লঘে।

 

পতথো সাজি আধাপধত তরমর মুহ্‌ওমি

এস্টেসন’র বোদোত গারিত সমারে দেঘাদেঘি

ধাগাধাক্যে বোই থানা নহ্‌লে মুঝুং দেদি

আহ্‌ঝিরঝ্এ কধাবাত্তায় খাক্কন সময় বিদি,

খুঝি বেজার সে মাধানান দিদিন্যে জিংকানিত

কিঝু কাদে রেঙেগিদে কিঝু চোঘো পানিত।

 

চাক্কা আহ্‌দি গারি চলে ঘরিকাদার তালে তালে

সে গারি’নত পাজিন্দার আমি বেক্কুনে

যেইর আমি সিয়োত চরি যার যিদ্দুর ধজ

লামিপের গায় গরি উজু সে অক্ততত্।

খা’ক্খনর দেঘাদেঘিত মেয়ে ফুদেনেই

ফেলে যেবার মনে নকয় কাররে এরিনেই

সাজঙ্যে পরবাজত মা বাবর কহ্‌রত

সংসমাজ্যে ভেই-ভোন মোক-পুঅ সদরত

ঘর-দোর জাগা-জবিন নানান রুচ্যেলত

তিরোজ ফুদেই আধামরা মক্তবা জনমত।

 

গ্যেত পরে মরাগ্যেত গদা খরপাক বদি

তিরোজত্তুন তিরোজ এজে ঝাবাঝাপ্যে গরি,

খুলি খুলি উদো নেই টানি টানি থুম

অহ্‌রানে তাঘত গরি এজে কালর ঘুম।

যম’ঘরত সাঙু আবুজেই বিচ্ছোন-পাদি বিঝেই

কালর ঘুমে ছরল সিয়োত এগালা গরিনেই,

লগর সমার কিয়োই নেই সদর-আদর জন

টেঙা-পয়জে ঘর-সংসার লাঘর কামেয়ে ধন;

কোচপেয়ে মোক-পুঅছাবা বেগরে ফেলেনেই

যা পরেগৈ চূধো আহ্‌ত্যে  বেক্কানি এরিনেই।

---০০০---                            (রাঙামাত্যে)

 

র ভেত: ১) সাজঙ্=সকালে গিয়ে বিকালে ফেরা (বেন্যা যেনেই বেল্যা ফিরানা)

২) পর্‌বাজ=প্রবাস ৩) সাজঙ্যা পর্‌বাজ=দিন বেলা প্রবাস

৪) চোই=দেউলিয়া ৫) উল্লোহ্=অবাধ্য; বিপরীত ৬) গর্‌বাআহ্‌দি=অতিথি হিসেবে ৭) সাজ=ভোজ(ভাত সাজ) ৮) চূধো=খালি ৯) বিল=bill

১০) রুজে=রুচি ১১) পতথো=পথিক ১২) মুহ্‌ওমি=মুখোমুখি

১৩) ধাগাধাক্যা=পাশপাশি ১৪) বোদোত=in boat (বোত=কল’ ন)

১৫) মুঝুং দেদি=সামনা-সামনি ১৬) আহ্‌ঝিরঝ্‌এ=হাসি আনন্দে

১৭) সময় বিদি=সময় কাটিয়ে ১৮) মাদানান=মুহুর্তটি(মাদান=মুহুর্ত)

১৯) দিদিন্যা=দুইদিনের ২০) পাজিন্দার=যাত্রী/ passenger

২১) ধজ=গন্তব্য; সীমা ২২) জাগা-জবিন=জায়গা-জমি

২৩) মক্তবা=ভঙ্গুর; অনিত্য ২৪) গ্যেত=গিট

২৫) মরা গ্যেত=শক্ত গিট ২৬) খরপাক=জটপাকানো

২৭) তিরোজ=তৃষ্ণা ২৮) ঝাবাঝাপ্যা=একটার উপর আরেকটা আটকানো

২৯) তাঘত=হঠাৎ; ব্যাথা ৩০) যম’ঘর=যমালয়

৩১) সাঙু=সিঁড়ি ৩২) আবুজেই=আশ্রিত করে; হেলে দিয়ে

৩৩) বিচ্ছোন-পাদি=বিছানাপত্র ৩৪) বিঝেই=বিছিয়ে

৩৫) কালর ঘুম=মৃত্যু(কে বোঝানো হয়েছে) ৩৬) ছরল=নিষ্প্রাণ; অনড়

৩৭) এগালা=নিঃসঙ্গ ৩৮) লঘর=অনুগামী; সাথে যাওয়ার

৩৯) কিয়োই=কেহ ৪০) সমার=বন্ধু

৪১) সদর-আদর=প্রিয় আপন জন ৪২) লাঘর=সাধের;

---------------------