মেয়েরেগা কবিতা থুপ ৪

 ১৭। কুধু দোল?

২৫/১১/’১৩ সোমবার বেল্যা ৩:৩০ বাজি

 

দোল দোল কি দোল?

কেয়্যা না মন দোল?

কাম না কধা দোল?

আহ্‌ঝি না কানানি দোল?

খুঝি না বেজার দোল?

চালাক না গ্যেনি দোল?

ফুল না পেইক দোল?

কি দোল, কি দোল?

বেক দোল, বেক দোল।

 

দোল দোল, দোল দোল

চেরোপালা বেক দোল

সোজদেবা চাহ্‌দে দোল,

মেঘচাগা আহ্‌দে দোল।

আগাজর তারা দোল

জুনোপহ্‌র চাহ্‌দে দোল।

এইল দোল, রাঙা দোল

মুরোহ্‌-মুরিহ্ যদ’ দোল।

গাজ-বাজএ তারুম দোল

ঝর্‌ঝরি লামে দোল,

রানজুনি খিঝে দোল

বোয়েরান বাঝে দোল।

বেলানর ছদক দোল

খেলাঙে পিত্থিমি দোল।

দোল দোল, দোল দোল,

মিলিঝুলি বেক দোল।

দোলো সেরে নেই দোল

আহ্‌জিক দোলে ওলোঝোল।

সংসারান গদা দোল

মানেয়ুনে নেই দোল,

দোল ফেলেই চেহ্‌ই দোল

দোল তোগেই বাঝে কোল।

ঘর থেলে গিরীহ্ দোল

দোল গিরীহ্‌র্ সুধোম দোল,

দোল সুধোমে মানুজ দোল।

দোল মানুজে জাগা দোল, দেজ দোল।

নেই দোল, নেই দোল

দোল সাজি কুজুরো বেগে-

মঝানে-তঝানে।

 

দোল দোল, দোল দোল

কামে-কর্জে বেগে দোল!

সীলে নেইয়্যা ঠাগুর দোল!

বেআকল্যা নেতা দোল!

তুস্যাবলা রেজ্য দোল!

ঘুজ মাঘে বাবু দোল!

কাবর-চুবোরে গুন্ডো দোল!

কু-কাস্যাগী মানুজ দোল!

বেক দোল, বেক দোল!

দারুদিয়্যা জিনিজ দোল!

আজলত্তুন নগল দোল!

দোল দোল, দোল দোল

দোল তোগেই ওল্‌ঝোল।

নেই দোল, নেই দোল

দোল নাঙে ভান্যালৈ-

কাদি যার জিংকানি

যাদন-এত্থন দিনানি,

সমাজ আর দোল নেইয়ার

দেজদুনিয়ে বরবাদ যার।

কুদু দোল? কুদু দোল?

চগলা দোলোত্ জনম পোল।

===০০০===               (রাঙামাত্যে)

 

র ভেত:

১) সোজদেবা=নীলআকাশ ২) আহ্‌জিক=অতি; ৩) ওলোঝোল=বিভ্রান্ত

৪) গিরীহ্=পরিবার ৫) কুজুরো=হিংসুক; কপট ৬) বেগে=সকলে

৭) তুস্যাবলা রেজ্য=অত্যাচারী রাষ্ট্র ৮) কু-কাস্যাগী=দুশ্চরিত্রবান

৯) দারুদিয়্যা=বিষ মেশানো; ফরমালিন যুক্ত ১০) আজল=খাঁটি

১১) নগল=নকল ১২) ভান্যা=খারাপ ১৩) দেজদুনিয়ে=বিশ্বজগৎ; সংসার

১৪) চগলা=বহিরাবরণ; খোলস ১৫) পোল=পরিল’র তেককাবা ধক (পোল=পড়ল)

======================

 

 

১৮। ভাবনর রাঙামাত্যা

২৪/১১/’১৩ রবিবার সাঝন্যা ৬:০০ বাজি

 

সুকতারাবো উত্থ্যা পজিমো আগাজত

দোকদোক্যা রাঙামেঘ আকসাঝন্যায়ানত

ধল ধল লিত্তিরিক জলিউত্থোহ্‌ন চেরোপালা

কি দোল দেঘঙর্‌ রাঙামাত্যা সহ্‌র্।

আগাজত উরোদন একঝাক বরবাদোল

গাঝ’ঝুবোত সুনোযায় কবার কিঝিককাঝাক

কিয়োঙত সুর আহ্‌ত্থ্যা একঝাক পুজিয়ে

মায়েগত ভাঝি এযে সুত্রোর কানসুক র

উম্ লাগে বারীহ্ গদা সহ্‌রা’ন্।

 

দিন্নোবুঅ যার যে কাম গরি

আহ্‌মত ফিরি সাংসাঙ্যা ওহ্‌ই

সাজিগুজি লামন বেগে, নেগে-মোগে মিলি

আঃ নহ্‌লে সং-সমারী খুঝির মার্কেটিঙত্,

সুর আহ্‌ত্থ্যা মানুচ্‌সুন পধে পধে; সপিংমল’ত

আজেইর নেইয়্যা কিজেকিস্যা অটোরিক্সার দুমুরানি।

 

মাঞ্জোর আহ্‌ঝিখুঝি চেঙেরাহ্, মঞ্জুক বেরানা দেহ্‌লে-

পারাপাহ্‌ঙ্ মুই আঘং সুঘো জাগাত্, এরান দেজত্।

কাক্কনে ভাবি চেহ্‌লে দেঘং-

আমি দ’ এরান নয়, নিজোর মঞ্জুগও কন’কিচ্ছু নেই

আমি গিরিত্তি মাঞ্জোর গর্বো আহ্‌ধারামাহ্,

মন্‌মুজিমে চরি বেরেলেয়ো পরানান তা আহ্‌দত্

যেক্কে মনে কয় সেক্কে সাজর তোন বানায়।

===০০০===               (রাঙামাত্যে)

 

র ভেত:

১)আকসাঝন্যা=গোধূলি ২)লিত্তিরিক=বৈদ্যুতিক বাতি; bulb ৩)ধল=শুভ্র

৪)সহ্‌র্=শহর ৫)বরবাদোল=বাদুড় ৬)কবা=কাক ৭)সুর আহ্‌ত্থ্যা=লাইন হওয়া

৮)পুজিয়ে=পূজারী ৯)সং-সমারী=বন্ধু-বান্ধবী ১০)নেগে-মোগে=স্বামী-স্ত্রীতে

১১)আজেইর নেইয়্যা=ব্যস্ত ১২)কিজেকিস্যা=জরুরি; দ্রুত

১৩)পারাপাহ্‌ঙ্=বোধ হয়; মনে করি ১৪)এরান=স্বাধীন ১৫)এরান দেজত্=স্বাধীন দেশে ১৬)নিজোর মঞ্জুগ=স্বইচ্ছা ১৭)গিরিত্তি=সংসারী; ঘর-সংসার ১৮)আহ্‌ধারামাহ্=গৃহপালিত জীব ১৯)মন্‌মুজিম=মনের মত

২০)সাজর=ভোজের ২১)তোন=তরকারি

===========

 

 

১৯। আনিভোং জয়

১৪/১১/'১৩ ব্রেসুপবার রেইত ৮:০০ বাজি

 

বার্গী, ঊহ্‌পূক্ লুগী যেয়োন কনালে

রহ্‌ঙ্‌রাং, কেত্‌কেত্যেয়ো নেই,

কালর গঙারে হুদু ভাজি যেয়োন তারাহ্

নাঙঈনি, নাঙ জবির আমি বানা এগজা।

বিজগর পাদায় পাদায় চাঙমা জাদর সমার

এলাহ্‌ক তারাহ্ বিজয়গিরি রাধামনর সার।

পাগালা রাজা, হালিন্দি রানী, ত্রিদীপ মানবেন্দ্র,

হুদু গেলাক সে লুরোঘুন পহ্‌র ছিদেয়ে আন্ধারত।

আহ্‌ঝার তগেলেয়ো ন পেবং তারাহ্রে

যুনিয়ো ধারাজ গরি এগাকরা,

এঢাক তারাহ্! এঢাক তারাহ্!

 

নেই বার্গী, নেই রহ্‌ঙ্‌রাং, তেহ্ কি ওহ্‌ইয়ে?

এযঅ দ’ আঘন বিরেইজ-সোনাত্তালী,

সেইর্-সত্থা জাগেজাক, এইত্‌ধাগা, জুরবো পেইক।

এভঅ ডগরন তারাহ্ মোনে মোনে ঝারে ঝারে

এভঅ উরোন তারাহ্ মিধে মিধে বোয়েরে,

সুঘো রেজ্যর গুমোহ্‌র্‌ সবন দেঘন তারাহ্ মনে মনে।

এভঅ তারাহ্ বুক বানিহ্‌দোন আমারে

দেঘে যান সবন, সিঘে যান সুধোম জধা ওহ্ই থেবার সমারে।

 

বিজয়গিরি-লারমা নেই, নেই কালিন্দি-ত্রিদীব;

কল্পনা-সমর-সুকেস, মনতোজও নেই খালিক।

তারা নেই তেহ্ কি হ্ইয়ে! ডাগিলে দ ন পেভং

আমি দ’ এভ’ আঘি লারেয়োর নিবিলি পধত, আমি লারমা অহ্‌ভং।

আমি অহ্‌ভং বীর রাধামন, ধনপুদির কির্বে লাঙ্

জাত ভালেদর কোচপানালোই লারেই গরি যেবং।

সমর সুকেস কল্পনার লো মাগানা দিদোং নয়

গরজ অহ্‌লে আমা লো'য়ো সে লঘে মিঝেভং।

ধরিবোং আল্যেক আঢেভং পধ, যিয়ান দেঘে যেয়োন,

উজেবং উজেবং বুক দরঅ ওহ্ই, পিত্ ন লামিবোং।

পোত্‌পোত্যে বিজক ধরি, সেদামর বাবদা ধরি

বাজেবং রণঅ ঢুল, পাদেবং উরুত্তুল,

যেই যেই যেই, সংসমারে যেই

জোগারে জোগারে দেবা-মাদি ধিকধিগেই।

মহ্ ন অহ্‌ভং ন জিরেবং, এহ্‌ভা দিদোং নয়

সেদাম বাজেই লারেই গরি আমি আনিভোং জয়।।

=====                             (রাঙামাত্যে)

 

 

 

২০। মুইধ’ কবি নই

০৬/১০/’১৩ রবিবার রেইত্ ০১:৫০ বাজি

মুইধ’ কবি নই তুঅ কবিদে লেঘং
কলমর্ নিপ্ কুবি কাগোজত্ আঙুদোং,
কম্পিউটারর্ কীবোর্ড্ ভিন্ধেই ভাবনার্ জাল্ বুনং।
রাঙা-কালা, ধুপ্-এইল্ চিদিরেভদরা
কদ’ চিদে এ মনানত্ অহ্‌ই দলামজা,
সবনর্-ভাবনর্ ভেভেরা-দ্যে মনজুক্‌কানি
একলামাহ্ লারেই গরে ঈদো সুরুঙোত্
মন্-অমনে বাজ্জেবারি খেই ঝিমিলেই ছদক্ ছিদাই

সে ছদগে ফদাংতাঙে ভাঝি উদে জগদর্ চাবা আরুক্‌কানি।

যিয়োত্ আঘে সমাজ্-দেজ্-জাত্-ধর্ম-রিদিসুধোম্
ভাচ্-বিজক্-বিজক্‌থিদি-আহ্‌ভাল্-রাজ-টেঙাসুধোম্
শিক্কে-আল্যেক্‌-উজন্দিগং বেক্কানি মিজেইল্‌কজালে
ভরন্‌ভিরোন্ সজ্‌পদরে সাজে এক্কান্ জাদআলাম্।
সে আলামর্ ফুল্‌চাবুগী-সামুলেজ্-কেরেং-করঙায়
সাজেয়ে টানা পোজ্জেনর সংমিল্ দোল্ সাজনান্,
বিয়োং-তাগলক্-তাম্মো-সিয়েং-তারামে
বকাদি-থুর্‌সুমোই সুদো নালর্ বুননে
যু তুলি যু মারেই, বাক্ ধুঝে বাক্ আরেই
মেলি উদে এক্ দোল আলাম।

থদাথস্সেই থেবরগে থত্তস্সে আহ্‌দে-কলমে
লেঘি যাং বেসেদাম্মে সন্দরং কধানি
আগা-গোরা উদিজ্ ছারা বেভুলো ভাবনানি
যিয়োত্ মুই কাবিল্ নয়্, কদগীর্ সাগেরেতও নয়্
বেরান্যের্ বেরানাগঙে একপয়্‌দে সাঙু ন-লামং
পর্‌বোপুন্ডিগর্ নলাহেজো সমান্ নয়্
কবি-সাহিত্যিগর্ কেয়েপের্গায়ো নয়্
মুই বানা মুই, গুলো গাজর্ নজরত্ নলাক্যে ফুল্,
সে ফুলে গুলো ধরেব’ নেনা তার্ কন’ গেরান্টি নেই
নাকি ঝরি যায়্ অকালে, অনালে পাদারে!

অবাঙ্ আঝায়ানি মনদোজ্যাত্ তুবোল্ তুলে
উঙুদোই ঘুল্ উদি থামেযায়্ তুবোলর্ গং
দোজ্যা হাজাত্ আভর্ খেইযায় এক্কা আণে আণে
নিগিরেয়ে সে নিধুক্‌তুক্ ভাঙাছোরা আঝায়ানি-
কবিদে ওহ্‌ই ঝরিপরে এহ্‌দে আগেরে।
সুর্ নেই ঘঝা নেই, নেই রস্ সরপ

সুগুনো, সুওত্ ছারা হন’ খেবার্ দরপ্
মানসোর মন’মায় চিদে-চজ্জার্ খরাবী-
যুগেই নপারে ইত্তুকও মুই কন্ কবি!

এগামনে লেঘি যাং তুঅ দেজর্-জাদর্ কধা
রুচ্যাল্ জরানি ছারা পাঞ্ঝা আনুনি তাবা
সুঘ্-দুঘ্ আহ্‌ভিলেজ, জিদ্-ঘিনর্ গধা
বান্ দোং, বান্ খুলোং, বাগান্ সাজেই ফুল্ তুলোং
লারেইও গরিযাং বাঃরী দর’মর’
জোব্ মাঘী জোব্ ফিরেই মুহ্‌পেজালাম্ গরং
অক্তে কানং অক্তে আহ্‌ঝং অক্তে যদ’ গম্ভির্ অহ্ঙ্
বেক্কানির্ মিজেলে মর্ জনম্, আঘং হন’রঘম্
সিধে-ভুলে মর্ চলানা জিংকানির্ দীঘোল্ পধে পত্থম্ খুচ্ ফেলানা।
ইয়োদই আর্‌গানি মর্ বেক্ কাম্‌করচ্চানি
গরি যেইম্ এগেমে যেদক্‌দিন্ বাজি থাং
যদ’ মানা এব’ এযোক্, যদ’ বিপদ্ লাগত্ পাং
লেঘি যেইম্ মর্ লেঘা, গীত্ কবিদে, দেজ জাদর্ ভালেদত্তেই
নিধুক্‌থুক্ গ্যেনে সুধোমে যেম্ মুই কাগোজ্-কীবোর্ড্ আঙুদেই ।

---০০০---                                            (রাঙামাত্যে)
র ভেত্ : ১) আঙুদেই=আচড়দিয়ে  ২) ভিন্ধেই=গুঁতামেরে
৩) ভেভেরা-দ্যে=অগোছালো  ৪) মনজুক্‌কানি=ইচ্ছাগুলো
৫) একলামাহ্=এক অধ্যায়(লামাহ্=কবিতা)  ৬) ঈদো=অন্তর; অন্তরাত্মা; মন; চিত্ত ৭) সুরুঙোত্=সুরঙ্গে  ৮) মন্-অমন=ইচ্ছা-অনিচ্ছা  ৯) বাজ্জেবারি=সংঘর্ষ
১০) চাবা আরুক্‌কানি=লুক্কায়িত চিত্রগুলো ১১) ভাচ্=ভাষা
১২) বিজক্=ইতিহাস ১৩) বিজক্‌থিদি=ঐতিহ্য  ১৪) আহ্‌ভাল্=অধিকার
১৫) রাজসুধোম=রাজনীতি  ১৬) টেঙাসুধোম্=অর্থনীতি  ১৭) আল্যেক্‌=আদর্শ
১৮) উজন্দিগং=প্রগতি ১৯) সজ্‌পদর্=সরঞ্জাম ২০) থদাথস্সে=তোতলামি
২১) থেবরক=বাকরোধ ২২) থত্তস্সে=কম্পমান ২৩) বেসেদাম্মে=অযোগ্যতা
২৪) সন্দরং=অস্থির; পাগলের ন্যায় ২৫) বেভুলো=বিভ্রান্ত ২৬) কাবিল্=দক্ষ
২৭) কদগী=বাগ্মী ২৮) সাগেরেত=অনুগামী; শিষ্য ২৯) বেরান্যে=পর্যটক
৩০) বেরানা=পর্যটন করা ৩১) একপয়্‌দে=একধাপ ৩২) সাঙু=সিঁড়ি
৩৩) পর্‌বোপুন্ডিগ=বিদ্বান্; শিক্ষিত পণ্ডিত ৩৪) নলাহেজ=পায়ের লোম
৩৫) কেয়েপের্গা=শরীরের মল ৩৬) মনদোজ্যা=মন সমুদ্র
৩৭) তুভোল্=ঢেউ ৩৮) উঙুদো=তরঙ্গ ৩৯) ঘুল্=আবর্ত; ঘুর্ণিজল

৪০) আণে আণে=মৃদু; অস্পষ্ট ৪১) নিগিরেয়ে=নিংরানো
৪২) নিদুক্‌তুক্= অপ্রতুল ৪৩) মুহ্‌পেজালাম্=বিতর্ক; তর্ক-বিতর্ক
৪৪) সিধে-ভুল=সহজ সরল; বোকা ৪৫) ইত্তুক=সামান্য
===================

 

 

 

 

 

২১। পিরেরেস্যা জাদর জিংকানি

০৭/১১/'১৩ বৃসুপবার বেন্যা ১০.০০ বাজি

(নুও গরি তুনানা ০৪/০৫/’১৮)

 

জাদর গাওলী এক্কায়ো গম নেই

পিরেরেস্যা অহ্ই যেইয়ে অমকদ'

আল্যম নুও পিরেই জাবেরেই ধরের

এক্কান্ গম ন অহ্দে আর'ক্কান এজের্।

কেয়্যেমন্দা দেঘা দিল' সাতচল্লিজত

দেজভাগে দুর্গুদি জাদর কবালত।

সায়েদত অহ্’ল' ঘা আভাকভাক

কাপ্তেগধার বান

ডুবেল' দেজ, ধাবেল' মানুজ ইলেপাদারে

অহবা অহবা, কবা কবা জাগা আহরেয়্যে জাদএ।

 

বাহত্তুরত সাধীন বাংলার নুও সংবিধান

মুজিবোর বার্বো কধায় বানেল' বেক্কুন বাঙাল

ঠিয়েই উদি জোগারপারি এম এন লারমা কল'

আমি জুম্ম তজিমজাত বাঙাল দ নয় কন'।

 

তিরাঝি সনিদঝা জাদর কবালত

লাম্বা-বাদি ভেইভাঙালা সায়ত্ত লারেয়ত

ঘর'কোজ্জেত ডালিত প'ল' লারমা জাদরখুল

একসমারে ঝরি গেলাক জলজল্যে তারাফুল।

 

ঊনাঝিত্তুন্ ছিয়েনোব্বোই জাদর গাওলী ধক্খান

অমকদ' মরাপেধেরাহ্ পিরেপজ্জে কেয়্যেঘান

আহ্জারে আহ্জার জুম্ম মানেই

আমনর বাব-ভেই মা-ভোন

আর্মি-সেটেলার অত্যাচারত নিজো পরান আহ্`রেয়োন।

ঘরপোরা কালাধুমোই আন্ধার জুম্মল্যান্ড

সেটেলারর্ অ-গজগত ভিধেমাদি গেল।

 

সাদানোব্বোয়ত্ চুক্তি অহল' জেএসএস-সরকারে

আগারপিরে ভেদা দিলো চুক্তির যেরে যেরে,

জর্ম অহল' ইউপিডিএফ চুক্তি উল্লোহ্ গরি

মরন'ব্যেধি ক্যান্সার' সান জাদে-জাত মারনি

লো চুজনি দেইনর খেলা অহল' আরগানি

পালা-পাল্যে ডালি দেদন মংঘা জিংকানি।

জেএসএস ভাঙি গেল' দিআহ্জার আট সাল্

জনম লল' আরেক ঢেলা জাদর জঞ্জাল।

 

পন্দর' সালত দিলাক তারা লারেই জিরেনী

কয়েক বঝর সুঞ্ঝুক অহ্'ল মুরোহ্'র জিংকানি,

শেজকাদাল্যে সত্তর' সালত ইউপিডিএফ ভাঙি

নুও গরিনেই জনম লল নাঙে গণতন্ত্রী,

সুরু অহ্'ল এক্কুই খেলা জাদর লো খানা

ঢালাঢাল্যে পরা ধল্লাক কাজা পাঘানা।

 

এঙিরিনেই আগার পিরে গারুত্তুন গারু ওহ্ই

জাদর ঈয়োত কমি যার আগাসুচ্ছো ওহ্ই।

দলে দলে ফারক তারা তা এরাহ্ তে খাই

জাদর কবাল গাজত টাঙেই নিচিদে আহ্ঝি যায়।

মুরে মুরে বাঙাল এত্তন নিত্তো ঝাগেঝাক

মুরোহ্ জাগা গজক গত্থন ধভাচিলোর তাক,

উন্ধি নিত্তো বলেজুরে ঝাবেই দেদন মা-ভোনুন

সেনা সাসনে পিত্তোমরা বেক জুম্মোউন;

ধক বুঝিনেই দারিহ্ বলাই গাভুরলগরে

পার গরাদন তারা ধর্মত বারিহ্ সলেমলে।

 

ইন্ধি আমা পাটিউনে তিন্নো চেরভো ওহ্য়

জাদর নাঙান লুগেবার ওহ্য়ে তারা পাচ্চেমিলৈ।

জাদর গাওলিমায় তারা আগারপিরে ক্যান্সার

নীলমরা কেয়্যা জগা বিজ ছিদি যার,

সিরেই সিরেই রগে রগে লো আহ্দের অসিঝি

খেঙেদা কেয়্যেন আহ্'রুখাত্তুঙ্ আঘে চামত বাঝি,

বেরঙা গাওলী গরন নরুচ্যে চেঙেরাহ্

ঝুরোতুরো ওহ্ই যেইয়্যে মন সবন গদা।

ঈয়োত ফুরোনা অক্ত ওহ্য়ে এঝের সাজ লামি

ঘুব আন্ধারান ছিদি পরি নেযার পহ্'রান ঢাগি,

নুও দিনোর পোত্যে বেলর দোকদোক্যে সদক্খান

লুগি যেইয়্যে সুঘো সবন, মারুভাঙা আঝাঘান;

এ ধগে যুনি চলে আমা জাদর ফাজা

বেজ দেরি নেই লুগি যেইয়ে জাদর মাজারা,

পরানান নিঘিলি যেইয়ে চিবেচিপ্যা অক্তত

সাংপজ্যে তাঙোন' বাজ জাদর চবাসালত।

====০০০====                    (রাঙামাত্যে)