মেয়েরেগা কবিতা থুপ ২২

১০৭।মেঘুলো মন
২২/০৬/২০১৬, বুধবার, ০৯:০০ P.M.

গুরুঙে গুজুরে বানা মেঘুলো আগাজে
সাঝি পেরোত বোই আঘং চিত ন ভিজে
আনং আনং গরি ঝর তুঅদ ন আনে
কি দুঘে কা রাদে বানা মুরে মুরে কানে।
ও কুলে ঝারানি দুলে ঝল্'গা বোয়েরে
তারে চেয় এ মনান বিরুংবিরুং গরে
ভাবি যাঙ মনে মনে কারে চিত পুরে
কন লাঙর মেয়ে আগে বুগো ভিদিরে
তোগে চাঙ সুপ ন পাঙ কারে কোচপাং
কিয়ে নেই এ মনত আওজর লাঙ।
ও দেবা ন গুজুরিস মেঘুলো ন ওজ
ত সমারে চুধো মরে ফাগত ন লোজ
ত ধগে মেঘুলো অয় মর এ মনান
অকারনে দুক পায় পাঞ্ঝা জনমান।

             =0=                         (তাংগুম)

 

১০৮। নাধা যুগ
২৩।০৬।২০১৬, ব্রেসুপবার, বেন্যে ০৭:৪০ বাজি

ঈরুগত্ গ্যেন' কধা কলে গ্যেনী জন
সমাজত রাত্তি নেই অগ্যেন' কারন,
ধেং পাজি ফাগারা মানেয় ঈরুক রাজা
কুসাসন কুনিয়ম তারা অজ্ ফাজা,
তারা গ্যেনি সমাজত চেলা মলাধার
উত্তোমুত্তো বেক্কানিত তারার বাজার,
জয়গীদে লঘে ভঙি পুন লেয়্যে দল
অসত কামত মজন বেরি কুন্দল,
তারা দঘে আঃস্সি পরে পুন্দিক সমাজ
উরোমারাত ভের্গুদি গ্যেনী মান লাজ,
এলভুই রানজুনি মিধে ব ঝর্ঝরি
ফুলো তুম্বাজ ছরানালে অঘা লর্বরি,
ছাগলর রেইং সুনি বাঘ কানে ডরে
অগ্যেনী খলাত নাজে গ্যেনী কনাছেরে।

            =0=                    (শিজোকদোর)

১০৯।বারিঝে
২৩।০৬।২০১৬, ব্রেসুপবার দিবুজ্যে ০১:১৫ বাজি

আগাঝত দেবা কালা লামিল আঝার
চাধে চাধে ঝর আনে ফাজা বারিঝের।
উরুজ্জে ঝর পরে চেরোপালা আন্ধার
ঝুপ মেলি বলি অঃয় গদা বাম ঝার।
পেইক্কুনে ছ উরান বৈজেক্খে বা বানি
ছরাছরি ঘোনাঘোনিত উভুংপুং পানি।
ভাঝি এঝে আরাচাক বান পানি লঘে
পুকজুগো কবালত যানে দঝাপাঘে।
পথঘাট বিজোল অয় সেকসেগিলি
আদামানি ফেজেরা অয় পথ নিবিলি।
মঝা পুগি ডাচ জুক নিঘিলন বেজ
মোজ গোরু আঃদারামা পান দুঘো লেজ।
মাধেঘাদে ঢেবা জঘা বেঙ দগরন
চিগোন ছরানিত কাঙারা নিঘিলন।
ঝরমায় ঘরত্তুন ন পারে নিঘিলি
দর মাদি নরম অঃয় চেং যায় গলি।
চাযিউনে আঃল সোন এঃল খুন্দো ভুই
নিঘিলন সাপ চেরা মাঃলমুরো গুই।
কাম্মোই কামত্তে ভুই-জুমোত লামন
কমরত বেনা বানি কামত ধরন।
তুঝো আলসে ধুমো দিনে মঝা পুগিরে
বুরো-গুরোই বোয় থান ঘর ভিদিরে।
গুরোলগে নানা বিজি খলা-পুরি খান
কাম জিরেন দি মাঞ্জে কিয়ে ঘুম যান।
বোয়েরত গাচ বাচ এঃলোনিহেলোনি
অঃমা অঃমা দেবা পেরাক আঃ ঝিমিলেনি।
বারিঝেত ফুল ফুদে কদম রেগেজ
মিধেয়ে তুমবাজে গলগলায় দেজ।
ঝার জঘা ফুদোন আঃ নানা রঙ' ফুল
ধুব রাঙা ওঃলোতদে চাদে লাগে দোল।
টুপটাপ ঝরফুদো রিমিঝিম সুর
চিত ন ভিজ্জে সময়ান লাগে ঘুর্ঘুর।
লেজা ধরি দর ধরে এগামার ঝর
খাদে থাদে বেসুঞ্জুক অঃয়দে বেগর।                        (তাংগুম)

=০=

১১০। সুদোমী মানেয়
২৯-০৮-২০১৬, সোমবার, ৯:৫৭ এএম

বোয়েরত্তুন গঙ্ উধোর লোয়
আমনরে মুজুঙেন্ধি নেযেবার,
বেলানত্তুন ট উধোর লোয়
আমনর তেজ মেলি দেঘেবার।

অহ্মা দোজ্জের আল্যেক লোয়
আহ্’জার বানতও কুল ন ভাঙে,
খেলাঙ পিত্থিমির দোল সুদোম লোয়
ধোজ্জো সোজ্জো থেদ’ অবাঙে।

মোন-মুরোত্তুন লক্খি উধোর লোয়
ফ্যেস-বাইনিত মন ন লরিদ’
অঝার দেবাবোর রুহ্মুজ মাঘি
মন ডাঙরে জনম চলিদ।

দোল ফুলোত্তুন গুন উধোর লোয়
বেক্খুনত্তেই ফুদিদোঙ্ গমে,
বর গাজত্তুন এ শিক্খে লোয়
ছাবা দিবার বেগরে।

আহ্’দানা পধত বাগে-তেগে
গমান থেদ পদে পদে,
গুনসুদোমে নিত্য অহ্’দ’
চলন ফিরন জনে জনে।
সুদোমী মানেয় ভুবর বুগত
উমোরত্তেই বিজক লেঘে
মান ডাঙরে এ জগদত
বাজি থায় তে যুগে যুগে।

=0=

(রাঙমাত্যে)

১১১। জারহালর এক বেন্যে

07/12/2016, বুধবার, 08:30 am

 

জারহালর এক বেন্যে আঃদঙর আদাম’ পধে
হেঃলাঙ হেঃলাঙ ভুইয়োমাদ ডেনে বাঙে
হোওয় ঢাক্কে চেরোপালা বানা ধুপ ধুপ
সিরোপানিলৈ ভিজি যায় টেঙ’পিত,
ঈনজুরো ছরাপানি হেয়েত বাজিলে
সেঁত সেঁত জার'হাদা উদোন ঝল্গা মারি।
লক্খি ঘরর গাভুরি পিলে হেজে গাঙত
আঃ! হি হাম্মো! জার নেই তা নাঙে!
আঃল চুয়ার জারেবানে গাভুর মরদে
গরুউনো আঃদদন জুরে লাঙল টানি।
হিঝু দুরোত দেঘঙ আর' পাওয়ার টিলারলৈ
আঃল চুয়ার এক্খো আধবুরোস্সে মান্সে,
তার ঠিক দঘিনেদি আর' এক্খান ভুই
নারাঃ হাজাদন সিয়োত দিজন মিলে।

ইত্তুক জুরো আঃভা ধুরে ধুরে এজে
হোও-আঃভা জধা ওঃয় নাগেমূওয় সমে
ধুপ অঃয় চুলানি আঃ চোঘোভঙ
হোও পরি ভিজে ভিজে সর্বাঙহেয়ে।
বেল' আঃত-ঠেঙ ফুরি এঝে হোও সেরেসেরে
সিরোপানি হেঃর’ আগাত ঝিমিত ঝিমিত জলে
মন্দামন্দা বেলানর নিবিলি সদগে।
হুদ্দুর যেয় মুজুঙত পরে আঘুনো পুজো ঘিরি
বোই আঘন লঙ্গুর বুরো-আধবুজ্জে-গাভুর-হারস্সে মিলে-মরদ
জারর লগে বদাবদি গরি আঘুনোর আরত,
তনক অঃয় জুম্মো মানেয় জুমহাবা লামিবার
চিগোন গুরোই সিমেআলু পুরি হাঃন হারাহারি গরি
ভাগাভাগিত থেবরক হেঃলে পরে হানাহুদি।

চোঘো লেজে চেয় যাঙর যা দেঘঙর
নিমনে যাঙর বানা ম পত্থান ধরি;
পধ’ পাজারাত ভুলোঙ বনান ফুলে ভরি আঘে
ধরিবার মনে হর মর নরম হুঝি ভুলোঙ ফুলুন।
উভোমরা গাচ্ছোত একজুর হ ধাগাধাক্যে গরি
ফোর হুঃদি রোদ বাস্সেই ফেজেরা ভাঙে,
হুদ্দুর যেই দেঘঙ আর’ এক্কো আঃত্যে রাদা
জুত্যে ফের্গেই গঙদি আঃদে আদারর নাঙে
ছরমা হুরোভো একঝাক ছ লোই হের-মাদি আঙুদে
চিলে রাদাভো ডোও ঝাগেরেই ডাকহারি উধে।
আদামর পুগে-পঝিমে চিগোনচাগোন মূরো
এঃল এঃল গাচ-বাঝে চাগালা ভরন।
ভরন্দি আদাম আগ’ সান ঢিঙি নেই
বারাঃ ভাননি র ন সুনে
এঃদে আর আগারে বানাঃ ধান ডলনী হল্ গুজুরে।
মাধে মাধে গোরু চরন পিধিত বুক্কে বগা
চনা-মনা-চরোই ঝাক উরি যান ইয়োত্থুন ঊভোত,
এগাঝারা আঃদঙর মুই আজিরেন
আদামর দোলানি রেনি চেই যাঙর ম পধে।

            =0=                               

(তাংগুম)