মেয়েরেগা কবিতা থুপ ২১

১০২। ভালক বঝর যেরে

০৩।০৬।২০১৬, সুক্কোরবার, বেল্যে ৫:৩০সো বাজি

আদিক্যে ভালক বঝর যেরে
এচ্যে তরে ঈধোত উদের,
ত নোনেয়্যে রবো কানত ফুদে
কির্বে আহ্জিবো মুজুঙত দেঘঙ,
বিগিদি কধানি চোঘোত ভাজে
কদক কিরিমির চলাচলি
কুগিলুদি সান বেরাবেস্যে আল্যেঙানি।

এঝ দেঘঙ তরে পরাক পরাক গরি
তর চোক্খুন, দাত্তুন, চুলানী
কুদি কুদি বেক জাগাজরাআনী,
মত্তুন মনত পরে তরে বেউদো ভজমান
তুইও মরে কোচপাজ চেগার
সিঝি মনর আক কোচপানা তর মর দিজনর
লগত ফুত্যে তরুনো ফুলো সান।
ন এল কন পগরা খার্বো রুহ্মুজ
বানা চিত পুরাপুরি নিগুচ কোচপানা।
এধক ঘুঞ্জিমুঞ্জির সেরেয়ো
কন দাগকাল ন এল মনত
বেধক্যে কিচ্ছু মনত ভাঝা ন দে।
সিয়েন কি বয়ঝর দুঝে না সিধে ভুলে,
না বানা লক্খি রুহ্মুজে
মুই মুরোত পরি চিদে গরঙ।
তুই খবর পাজ নি সিয়েন?
না। সংসারর নুনজো পানজা বেক
মানেয়োর ভাজ বুঝিদোঙ দ গমেদালে
মানেয় ফাগত দ সমেয়েই সেক্খেনে
তুই মুই এলঙ যে আবিধি গুরো সান।
কদক সিঝি পহন এল মনানী
এল ঝোকঝোক্যে কোচপানা।

এচ্যে তুই নেই
বানা আঘে ত নিজেনী।
সেদিন্যে তর সরল কেয়েআন চেই
ইত্তুক চোঘোপানি ফেলেয়োঙ,
মাত্তর সিত্তুন বেজ এ বুগোত পরানান আহ্মুরেয়্যে
চিমোর বুগোত নিজেচ বন ওহ্য়্যে
মুইয়ো যেবার এলুং ত লঘে
মাত্তর যেয় ন পারঙ
তুই ন নেযাচ।
সিত্থুনধরি দিচোঘোত ঘুম ন এযে
ভাতপানি ন রুজে
সপ্পানত বানা মুজুঙোত দেঘঙ তরে
মরে আজা গরচ, ধাগত সুস্সুরেই দোচ
কানি কানি আহ্জঙ,
বানা তল্লোই কধা কহ্ঙ।
গর্বোউনে, সমাজ্যেউনে এগজা কধাক
মরে বুঝেদাক।
লারে লারে মর মনান দর অহ্য়
নুঅ পধত প বারেলুং নুঅ ধগে,
বুঝিলুং এ জিংকানি খানক্খন্যে
সয়সাগর দুঘোর ভুধি সংসারান
দুঘোর আগুন বেক্খুনোর ফুঅ পরে,
বুঝি পাস্সোং সংসারর রুচ্যেল
কানানা আহ্জানা সুক দুক বেক্খানি।
এঙিরিনেই পুরিহ্ ফেলেয়োঙ তরে
চিদোত্তুন মনত্তুন ডুবি যেয়োচ তুই
সেনে আর তরে ঈধোত ন রাঘা'ঙ।
খালিক,
কিত্থেই কিজেনি এচ্যে তরে
আবাধা গরি ঈধোত উধিলো
ভালক বঝর যেরে!
=0=

...তাংসাবি  (তাংগুম)

র ভেদ:
১। মনত পরে= গম লাগে/ দোল লাগে
২। আবিধি= কুঝি গুরো/ ৬ বঝর তলে চিগোন গুরো
৩। মানেয়ো ভাচ= মুনিস্সোর গ্যেন
৪। মানেয় ফাগত= মরদ/মিলে গাভুর অহ্'না; যৌবনে পদার্পন

১০৩। আয় চান্দো
০৪।০৬।২০১৬, সোনিবার, বেন্যে ১০:৩০সো বাজি

সাজিগুজি আয় তুই, জলি জলি আয়
একবার আয় বানা আয়না ম কায়,
মর লঘে তরে পেবার পরানান ধরপরায়
আয়না আয় ও চান্দো তুই পিত্থিমিত লামি আয়।
সোনার দুলোনত রুবো বিচ্ছোন
হীরে মানেগর সিধেন পৈদেন
ঘুমোত পরেয় তরে দ দুলেম
ওলি ডাগিনেয় ঘুমান নেযেম
আয়না চান্দো আয়।

তারা জাঙাল কাবি মেঘর রেজ্য ফারি
বোয়েরর পুনে পুনে মেয়েরেগা বানি
আয় আয় ম কায় দেবংসি সাঙু লামি।
রেদো আন্ধার ভাঙি কোচপানা বুগত ভরি
জুনপহ্'র ঢালি ঢালি মরে গাধেই দেগীই
বাস্সে আঘঙ তরে চান্দো আয়না আহ্জি আহ্জি।
আলুলোদুলুলো দিজনে থেবঙ
বিগিধি কধায় দিন ফেলেবঙ,
কির্'বে মনে নোনেই গালিবঙ
মেয়ে আইলেঙে জরা বধিবঙ
আয়না চান্দো আয়।

     ==০০==

                                                …তাংসাবি(তাংগুম)

১০৪। কার এ কাস্যেগী?
৭/৬/২০১৬, সোমবার, ১২:৪৫ এ.এম

এ পিত্থিমির পহ্‌র, আহ্‌ভা ম নাঙে কি সাদাঙা
ছড়াছড়ি গাঙ’ পানি ম নাঙে নয়
সোজ দেবা ধুপ মেঘ জোলজোল্যে তারা
জুনোপহ্‌র রানজুনি কিচ্ছু মর নয়
ঝরঝরি গরগরি পহ্’ন পানি নাল
এহ্‌ল তারুম ভুইয়ো মাঠ অজল মোন-মূড়ো
দবদবা পথ-ঘাট খেতখিত্তি পাঘানা ধানভুই
ম নাঙে কিচ্ছু নেই উরোইঝারা মুই,
দেঝর বনা বনা উন্নয়ন, তোজ্যে ভযু
সেনি মর নয় ম নাঙে নয়।

মুই সিধে নিমাদারা লোক্খি মানেয়
শান্দিয়ে থেদুং চাঙভিলি কি
মরে বেগে সজ পাহ্‌ন!
কোজ্জে ন গরিবার চাঙভিলি নাহি
মল্লোই এগজা তাকতাগান।
মাদি ঘিলেসান মুই ন মাদং আহ্‌বতজাবত,
ঘাম ফেলেই পেত তরাং
পরেয়ের অহ্গত ভাগ ন বঝাঙ
কারর কবাল মারি অজল অহ্বার ন চাঙ
ম অজসান মুই পেলে খুঝি থাঙ
সেনত্তেই নাহি মরে যে তে কবাল পুড়েই দোন,
মাধা মুরেই দোন।

মানেয়োর যে গুন থানা দরগার
যে গ্যেনে অহ্‌না গ্যেনী-
যে ধগে সুদোম পালেই সুদোমী অহ্‌য়া পরে
যে এইন মানিলে দেঝত তোজি ঠিক থায়
সে বেক খাস্যেক্খানি মর আঘেভিলি কি
মর দুজ মর অপরাধ?
মর ভাঙা কবাল লাধি খেয়্যে কাত্থোল।
জগদত গমরে সজ পাআন, নরমরে আহ্’র খান
উজুরে ঠগেয়্যে বেজ লক্খিরে রোজেয়ে বেজ
বল ন থেলে পেরেই খান, মান ন থেলে ঘাদি যান।
কুধু আর যানা সালেন, কেনেহ্ আর থানা?
কা নাঙে এ পিত্থিমি? কার এ কাস্যেগী?

=0=

...রাবিরা (রাঙামাত্যে)

র ভেদ:
১। কাস্যেগী= সভ্যতা ২। তোজ্যে ভযু= নাগরিক সুবিধে (তোজ্যে= নাগরিক, ভযু= সুবিধে)
৩। অহ্ক= ন্যায্য প্রাপ্য ৪। অজ্= আসল/প্রাপ্য; (অজেঅজ= মূলধন) ৫। তোজি= নাগরিকত্ব

                                            =========

 

১০৫। লর্বো

০৮/০৬/২০১৬, বুধবার, সাঝন্যে ৭:২০ বাজি

হিমালয় মোনোত্তুন বেজ মাধা অজল মুই
পিত্থিমির বুগোত দরহ্মর ঠিয়েই থেম
মুই উজু কাঙেল উজু মাধা ন লোঙেম।
জিংকানিত ওধিবাত্যেয় মর জনম ন অহ্য়
কারর আঞ্জামে সিঙোলবান্যে উহ্গুমর গোলাম নয়
মুই মাধা অজল, পরত্তুল্লো সিঙোল ছিনিয়্যে।
মুই লারেয়্যে, অহ্মা লারেয়্যে
বর্মা চক্কর’, ইন্দ্র থাদার, কামান, মিসাইল
মুই বর ব, আঘুনো সেইঙ, টর্নেডো, স্যুনামি
গারেঙভুজোল, বরখরান, অনুবারিঝে
ধোর ধোর গরঙ মুই এ পিত্থিমি আগাজ পাদাল
গদা আঙি ছেই গরঙ বিশ্ব ব্রহ্মাণ্ড।
মুই ঈশ্বোর, গোঝেন, ভগবান মুই বেগ’ ডাঙর
মুই সৃত্থি মুই ধংস মুই চেলা এ সংসারর
ন মানং কন’ এইন মুই সুদোম বানাঙ।

মুই ভাগ্য, মুই কর্ম, মুই লক্খী মানেয় কবালর
মুই মন্দর, ফু বিদ্যে, বেক বৈদ্য তন্ত্র সাধগর
মুই ধর্ম, মুই পুন্য, মুই মুক্তি সংসারত
লাদি মারং ফাগারায় পেরে খেয়্যে গুরুর কবালত।

মুই সুদোম, রাজসুদোম, মুই রেজ্য বানাঙ

দঝধারা, জনধারা, মুই স্বৈরাচারী

উত্তোমুত্তো বেক মর ম উহ্গুম থিদব্বর

রেজ্যর শাসক মুই অনিয়ম লুঙি মারঙ্

মাধা কাবি মালুম ভাঙঙ তুস্যেল্যে সংবিধান

রেইঙ দি গাআঙ মুই গণমানুজোর গান।

দেজ নানু খলেই যে জাত ভাগ গরে

চিগোন ডাঙর দঝরা দেঘেই মানেয়োর মান লারে

মন্ত্রী তন্ত্রী যদ আঘে সরগার পরিষদ

দেনদেবেদা লো তিরোজী লালোস্যে কুগুরো ধক,

ধারাধারা লেত্তো মূয়ে জনগণর ভাগ্য শুজে

পরান লোই খারা অহ্য় দিন মাঝ বঝর ধরি

মুই সিউনোর লো খেবার এক রেক্ষস

যক্ষ মুই কোজেই লবার তারার বেক সম্পদ,

মুই চুর মুই ডাগেত গুন্ডো মুই জগদত

অসাম্য সুদোম ভাঙিয়ে গদা বিশ্ব দেঝত।

মুই উহ্‌ঙ্কার মুই অভিশাপ, আট্যো মহানরক

মনব-দানব বেক কিঝু মুই শক্তি এ সংসারত

ন ডরাং কাররে মুই, ন লাজাঙ কাররে

মানেয়আহ্ভাল থিদ’ গরঙ পিত্থিমি ভিদিরে।

মুই মানেয়, অজল মানেয়, মুই রাজতরু

জেত মুই ডাঙর মুই তিনভুবনর গুরু।

হিমালয় মোনোত্তুন বেজ মাধা অজল মুই
পিত্থিমির বুগোত দরহ্মর ঠিয়েই থেম
মুই উজু কাঙেল উজু মাধা ন লোঙেম

উমোরধরি জগতভরি লারেয় গরি যেম।

মুই লারেয়্যে অহ্মা লারেয়্যে উল্লো উঝুদি

অনিয়ম দুর্নীতি ভজ মারেম মারু ভাঙি কজদি,
মুই লর্বো রণঅহ্’রান সেদিন্যে অলর ওহ্’ম্

যেদিন্যে তুস্যে খেয়্যে মানেয়োর মরা কিজেক জুরেব’

আগাজে বোয়েরে সুঞ্জুক ইঁহি ইঁহি কব’,

সেদিন্যে মুই অলর ওহ্’ম্-

যেদিন্যে পিত্থিমিত মানেয়আহ্ভাল ফিরি এব’

রাজা-ভিগেরী এক পোইয়োত সমারে ভাত খেব,

দেমেলাক এ সমাজত সঙ্ তলবিজর ফুল ফুদিব’।

            =0=                          

(তাংগুম)

র ভেদ:

১। লর্বো= লড়াকু ২। লারেয়্যে= লর্বো

৩। গারেঙভুজোল= মহাভুকম্প (গারেঙ্যে মঝা= ডাঙর মঝা)

৪। দঝধারা= সমাজতন্ত্র ৫। জনধারা= গণতন্ত্র

৬। মানেয়আহ্ভাল= মানবাধিকার ৭। জেত= জ্যেষ্ঠ

৮। রাজতরু= মহাবৃক্ষ ৯। দেমেলাক= অসমান/অসাম্য

 

(উচ্চোনী পানাহ্- বিদ্রোহী কবি কাজী নজরুল)

 

১০৬।অসুক্যে অক্ত
১৯/০৬/২০১৬, রবিবার, রেইত ১০:০০সো বাজি
'
ঈরুক মানুচ্ছুন বাভাক্কে ঘভা চিত
বাজন্যে পানিয়ে নিত্তো তেনেয়্যে
চিমোর বুগোত কাদাকাত্যে ব নিঝেচ
ধুন্ধুগর ফুয়োং ফুদে এগাকরা দুঘে
খা ন যেয়্যে তিদেয় ভের্গুদি আঝা
লাঘাঝাগা মুজুঙত উমেয়্যে সবন।
ঝেদেরাক আওঝে ছিনেকুদো আইল্যেঙ
কোচপানা অন্সুর লামালাম্মে থায়
আনুদোর মনমায় ফাগারা তুবোল
পগরা মেয়েগানী সাদাঙায় জরাবদে।
ঝুরোতুরো বান ছিনে ভাঙা মেয়েরেগা
জনগদে ধেভো সুদোমে আইল্যেগে
উজন্দি সাঙুআন পোয়ধে ভাঙা
খুচ দিবার পত্থান জতবোত্যে নিবিলি,
বোয়েরত ঊরে বানা ইয়েঙর চিন্ধেবাজ
ঝর লঘে ঝুরি পরে ফুদো ফুদো বিচ
রোগোনিয়ে নাল আহ্দে পহ্'ন গঙাধার
সোজ ফদাঙ দেবাবোত গন্ধাধজ্যে বেল উধে।
দেমাদেম্যে সময়ান লরালরি গরে
মানেয়োর সুদোমত অঙরাপিদেয়
ইঞ্জেপ্পানে আন্ধারত গুধুং পাক খায়
ফাওয়ে আহ্জিলৈ পুকচেরা ফুল ফুদে।

            =0=                        

 (শিজোকদোর)