মেয়েরেগা কবিতা থুপ ২৯

 ১৪২। জিংকানি

09/06/’18, সনিবার

জিংকানি তরেলোই প্যাগাত্যে নই

অহ্’রান অহ্-লুঙ্ মুই

তর নোনেয়ে হজলা হাদে

মেলোমাচ অহ্-লুঙ্ মুই।

বাজি থেবাত্যে চিদে নহ্ এঝে

দুক্খানি ভুধি বুগি পেম

আহ্জি আহ্জি থেয় সুঘো মঝানে

হজ্জ সুঝি যেম।

আহ্জিবো ধ বানা আহ্জি নই

ঠুদোত দুক লেভেদে আঘে।

জিংহানি তর আহ্জার ধুন্ধুক

সিয়োত ধ মুই নুও সদর পাহ্ঙ্

মুওমি অহ্ঙ্ হালা ধুমোলোই

হালাসাবাত নিত্তো জিরাঙ্।

আন্ধারত ধ উরেহ্ ধুমো

পহ্’রানর গরজে।

এচ্যে বানা ঊরুস্যে গরি

দি যার এগঝা ঝর

হেল্যে সিয়োত হক্খে এঝে

চেরাঙবেরাঙ দিন বর।

বাস্যে থাদে তারে তগাদে

অক্থ হোরে যায়।

====0====      

                    (রাঙামাত্যে)

১৪৩। দঙ্গাপিরে

23/08/'18, ব্রেসুপবার, রেইত 11:40

 

এহ্'ল মোনর বুকছিরি রাঙা লো বেই যার

তাঞ্জাঙ ঝোরঝোরি ছরা নালে নালে,

গাঝে গাঝে গুলো গুলো ঈংঝের বিচফল

ফুদদন চেরোপালা দলা দলা ঘুমোনি ফুল

বোয়েরত উরে বানা চত্তার ছুঙছুঙি

সেনেহ্ ইধু মানুচ বেক্কুন পীরেল্যে অনুবারমাজ।

 

ইধু বৈদ্য ডাক্তর ঈলেপাদারে

খালিক কন' তালিগে দারুয়ে ন ধরে

দঙ্গা পিরেত বেক্কুন চুন্ধুল

সাজুরের সে পিরে মুরোহ্ ছেরেছেরে।

 

পধে ঘাধে ছেত্তেরা স্যেল ফেবো চরদন

রোঙ দি দি মগদা খাদন

ইধু তারার আলা সিগের আলা আধার

ওহ্য় উধদন পোক্তা আ' তেলতেল্যা।

=====0=====                 

                                                    (রাঙামাত্যে)

১৪৪। সবনত লুগি যায়

25/08/’18, সুনিবার, সাঝন্যে 06:35 বাজি

বরগাঙ’ আহ্’বায় আহ্’বায়

জুরেবার চেয়োঙ্ কেয়ে

বর খরানে এল’ আবাধা

গরমে কেয়ে-মন যার জলি।

 

নাল আহ্দি যার চিগোন ছরা

তাঞ্জাঙ গোর্গোরি ঝোর্ঝোরিনি

ধারা ধারা লো বানা বেক ছরামায়

কুওবদি মোর ওহ্য়ে চোঘোপানিনি।

এহ্’ল্ ঝারানি রাঙা ওহ্য়ে

মোনমুরোহ্ আহ্’মিঝে যাদন আঙি

থল কলগর ভুইমাদি বেক

ধুল্যেচরত যার বোদোলি।

সবনে সবনে বাজি থানা

পত্তমে মিল নেই সবনানি

সে সবন ওহ্য়ে বানা বেক কুসবন

সবনত লুগি যায় জিংকানি।

======                

                     (রাঙামাত্যে)

১৪৫। মুই আর পরঙ যেবার ন চাহ্ঙ

২৬/০৮/১৮

মুই আর পরঙ যেবার ন চাঙ

তুও যেই পেম নাহি বার বার?

মুই গেলে মাআ থায় গায় গায়

বুক-চিত আঙে মর মাআল্লাই।

মাআ ন পারে লরিচরি

এক্খান জাগাত থে পাই পরি

মুই ন পারঙ তারে এরি

কেনেহ্ যেদুঙ চিতনেই গরি।

মুই মাআরে কোচপাঙ

তারে চেই চেই চিত জুরাঙ

তা কঅরত মুই পরি থেম

মরন এলে মুরি যেম।

=====          

                (রাঙামাত্যে)

 

১৪৬। সময়র গঙারত সবন আঝা

29/08/'18, বুধবার, রেইত 09:14

 

সময়র আহ্দত দবাঘি দিনে বেক আঝাগানি

অদ্ধেক তার অদ্ধেক মর,

খালিক ন অহ্য় সং ভাগাভাগি।

মরে ফারুকাবি ফাগারা গরি

ঘুত্তি মারি কাহ্'রি নেযায় বেক্খানি

মুই অহ্ঙ ইলাল্লা, আহ্ত দুহ্লো দুহ্লো।

সময়র সমারে ভেইল দেদে দেদে

তারে মর খেদারত ভরেবার চাহ্দে

উগুধো মুই চোই আঝার ভান্দালত।

আঝা আর সময় পুনোপুন্যে নয়-

নয় বাহ্'রি সদর;

সময়র লঘে আহ্দি ন পারিলে

লেঙ্ মারি ফেলে থয় মরাআঝার ফেজাকুরোত।

গঙারর লগে চাহ্ঙ্ সবনর জিতবাত

কন্নাহ্ বেজ দেঘি পারে; পুরে পারে সবন

মাত্তর মুই চেগার ধাবা দোঙ্; বুরে ন এঝঙ

গঙারে আহ্দি যায় গঙ্ দি মরে মেহ্'রেনেই,

মুই বানা সবন চাহ্ঙ, সবন বাজাঙ

গঙারর সমারে ন খাদে সবনসিলে

তে আহ্দি যায়, বেএই যাই

মুই ন পাহ্ঙ লাঘত; ন পারঙ মোহ্ই নেযেই,

আধাপধত মুরগুজি মুই চুন্ধুল অলর

চাহ্দে চাহ্দে সবনত জিংকানি পাদারি

ভাজে নেযায় গঙারে বেউদো সুরুঙোত।

===0===                     

                                      (রাঙামাত্যে)