মেয়েরেগা কবিতা থুপ ২৮

 ১৩৭। সাক্খীনামা

04/05/'18, দিবুজ্যা 2:28 বাজি

মত্তুন আর চিত পুরিবের কিচ্ছু নেই

চিতপোরা খাদে খাদে

আঙুরি ওহ্ই যেইয়ে গদা।

আহ্ভিলেজ খেবার আর কিচ্ছু নেই

চকচক গত্থে গত্থে রেহ্ ওহ্ইয়ে ইঞ্জেব,

আগ'সান আর বুক ধিবেধিপ্পে ন পাআঙ

মরামরি দেঘদে দেঘদে চোকঘা ওহ্ইয়ে।

আগ'সান আর কানানি ন এঝে

কয় জনত্তে মুই নিত্তো কানিম!

ব নিজেজ ন এঝে আর ফঁজত গরি

ভান্যে খবর সুনদে সুনদে পরানান নিজ্ বস্যে।

সুনিনেই আর আহ্মক ন অহ্ঙ-

জাদর ডরে জাদে যার পরঙ,

চুধোমায় মনানরে জাগুলুক ন গরঙ

এ চিদে ও চিদে গরি গরি একমন্যে ন অহ্ঙ।

বিজগর এই কালা মাধানত মুই জুরো সাক্খী

লেঘি যাঙর এ কধা মুজুঙ তম্বা উদিঝে,

তুমি এয় রেনি চেয়ো আঝিপুঝি সিরে পাঘেই

জাঙারবত্যে আক্কলবলা তোমার আকপিরিহ্,

তারারে গ্যেল দি, দুজ্ দি

নুও কন' বিজক যুনি জরা দিবের চ

সালেন বানেয়ো মেয়েরেগা, সোনারেগা

জাদর কোচপানাত, অঝার সুদোমত

সাতনাল সুদো বেরেই থয়ো তোমারে ঘিরি,

যেনে ছিনি ন যায়, ভাঙি ন যায়

এলে মুজুঙোর আহ্জার পিরিহ্।

==============       

                             (রাঙামাত্যে)

১৩৮। উর্গো মেঘে

25/05/18, সুক্কোরবার

 

উর্গো মেঘে উরি যায় আগাঝত

চনচন্যা বোয়েরান সিক কারে

তাঞ্ঝাঙ' নাল আহ্দি যায় লামনি

ছরা আল্যাঙর গঙারে।

 

মনমোরঙত ডুবি আঘে

ত নোনেয়ে কোচপানা

চিদরিবেঙত লিবি থয়োঙ

অহ্দ' নয় আর সাদাঙা।

এ মনর সুন্ধুগোত ত নাঙান

লুগেবার নেই আর কুধু

যিধু থেবে যিধু যেবে

ঈধো ঘরত থেবে বানা।।

 

যুনি কনদিন বরব' এঝে

দি যায় এগঝা সিলো ঝর

দঙ্গা ভাঙি যায় মেদিনি

পরে উগুরি ঠুনি ঘর।

ন যেবে ফাজারা তুই ফারি

ন থবে বেজারত দম মারি

সাজেবং ফুদেবং জিংকানি

দিজনে দিজনর আহ্দ ধরি।।

==0==       

                    (রাঙামাত্যে)

 

 

 

১৩৯। গ্যান ধন

25/05/18, সুক্কোরবার

 

গ্যান মোরঙর তলা কানা

কিচ্ছু দ নেই বাস্যা বানা,

বেক ঝগলা রঙ চগলা

চদক গালে এক মনা।

ও মর

চদক গালে এক মনা।

 

মন চদগত নেই সদক

চেরোপালা আন্ধারত

দিন কাদি যায় রঙতামাঝায়

থিদো ন অহ্য় বর ঘরত।

ও মর মন

থিদো ন অহ্য় বর ঘরত।

 

আঘে দে তর কি জমা

ধনদোলত আর আহ্দারামা

কন ধনে তুই পার ওহ্য় যেবে

ভব ঘাদর দমদমা।

ও তুই

ভব ঘাদর দমদমা।

 

কন জাগা তর বজত্তি

কন পিরিদর গিরিত্থি

কন জমিনর তুই নানু

তিন ভুবনর সিরিত্তি।

ও তর

তিন ভুবনর সিরিত্তি।

 

এ ধন, ও ধন আধেয় ধন

তিন ভুবনর যদ ধন

সিয়েনি কিচ্ছু ডাঙর নয়

মঙ্ঘা সেদক মঙ্ঘা নয়।

গ্যান’ ধনান আজল ধন

তরি পারে বেক ভুবন

ল কামেই ল সে ধনান

অহ্’বার চেলে বর মাহ্জন

ও তুই

অহ্’বার চেলে বর মাহ্জন।

==0==         

                        (রাঙামাত্যে)

১৪০। মুই জেউধিম

28/05/18

 

চেগার এহ্'লাফেলা, রাত্তিছারা মুই

চুজাখেয়ে, পেরাখেয়ে, পিজাখেয়ে মুই,

অমকদ ঈংজের চোঘোত, পিজুম্যে মনত

চোঘোসাল বিচকাদা পধ'ঘুত্যে মুই,

মর পত্তি খুঝে খুঝে পোই-কাভুক পাত্যে

মর পত্তি নিজেঝত এদা জুরোনি ব সমে,

পত্তি পানি ধারত ইন্দ্রেলর ফুদো পরে

নিত্তো ভাদ গরাঝত ঈরেধার' বিচ মিঝে।

 

খুত্যে তেঙেরাহ্ ওহ্য় কধক গম থেম

খদাউজুদো খেই কধক দর' থেম,

পিদেয় পিদেয় কুত্থুর ডাঙর ওহ্ম

বিচঝাবা খেই কত্তমান ঈয়োত পেম!

ইধু মরে গমপেয়ে নেই, নেই কোচপেয়ে

ম জাগা ম মাদিত মরে গোর দিবার চায়,

ম বুগোত থুনি গারেই ঘরপাদা জুগুলাই

লুগে দিবার চায় ম চিন, মাঝারা।

 

খালিক মুই অমর, আহ্জার বঝরর বিজগত-

মুই জেদা এলুঙ; এলুঙ তন্দেমন্দে তনক

মেলাহ্ দিলে ঠিয়েই থাঙ, মুই কাঝি সরান,

কদ' বান কাংঘেত পার ওহ্য় অদিন কাদেয়োঙ

অজংসং রাজা সৈন্নো সলেমলে ওধেয়োঙ,

মুই জিত্তো, মুই তেজি, মুই উমরর ঈয়োদি

মর মরন নেই, মুই মত্তুঙ নয়,

কেয়ে পুরি ছেই ওক, চবাসালত খের উধোক

মাদি লগে মিঝি যোক গদা মাঝারা

বোয়েরত, পানিত, গদা এই ব্রহ্মাণ্ডত-

যুনি মিঝি যায় মর কেয়ের চের রুচ্যেল

যুনি আণে আণেয়ো কিচ্ছু ন থায়,

মুই জেউধিম ফিনিক্স পেঘোসান

মুই জেউধিম ফু পারানাসান,

অজংসং মুই, আহ্জার আহ্ত্যে বোলি ওহ্ম্

লারেয়োত লামিম নুঅ গরি,

ঢুলপিদি জানেই দিম মুই আঘঙ

টিগি থেবার লারেয়োত রমচক্র ওহ্ম্

রন্ তুলি রনখলাত মুই জিনিম

মুই থাদি উধিম, থিদি ওহ্ম্

বিশ্স বুগোত ম নাঙ লুগিবার ন দিম।

====0====            

                      (রাঙামাত্যে)

১৪১। যেক্খেনে তুই এভে

07/06/’18, ব্রেসুপবার

 

যেক্খেনে তুই এবে ও পরানি

বাগানত ফুদিবাক ফুলুন

দেবাবো ফেলেব ঝর

তেদের তেদের,

দিজনর মনানি মিলিবো এঙিরি

অহ্বঙ আমি এগত্তর।

 

চোঘ হাজলানি তর

লুদি লয় ম পরানান

চোঘতারে পাগল গরে

মুরগুজিদুঙ ত বুগোত,

ধুগধুগনি বেজ অয় পরানঘরত

ঘন ঘন নিজেজত।

 

চানানে জলে নাগর রেদোত

জীংহানি গজেলুঙ ত মুজুঙোত

ঝিমিলান তারাউন তেবদত

এজ্ পরান বর দেবা দরত,

সবনানি যিয়োত পুরেব পেলেপেলে

সুক্খানি জেদা অহ্ব তুই হায় থেলে।

           ==0==           

                      (রাঙামাত্যে)