মেয়েরেগা কবিতা থুপ ২

 ৬। মনান মর পুঝুনো মনা

২৫/১১/’১৩, সোমবার, ৩:০০পিএম

 

কেয়্যে পিঞ্জুরোত পুঝঙর মনা

দোয়ে-আদরে লবিয়োত গরি,

তার মনজক্খায় যেক্কে যিয়েন চায়

সেদাম বাঝেই জুগেই যাং আধার-

কন’ তে পুজ্ মানে নি !

দি’ দি’ কুল নেই- খেই খেই ঈল নেই

যেদক দোঙ সেদক মাঘে,

আঝিক আদরে নোনেয়ে গালে;

কির্বে দি, মেয়ে দি, পিত পুস্যেলুং

অমকদ’ কোচপেনেই মাধাত তুলিলুং ।

মনর পেইক্খো বারী স্যেইন, কারাই পুজ ন মানে,

চিগোন এক্কা জু পেলে উরি যায় পিঞ্জুরো ছারি

আলা গরি চরে তে মাধে-ঘাদে

মন মুজিমে তোগায় আধার, যিয়েন পরানে মাঘে ।

 

উরি ভঙে চিলো চোঘে-

ঠির দি নজর ফেলায় আহ্ওজোর জিনিঝোত,

পিত্তিমির কদ’ সোত্যেনাত্যে, রঙচঙ্যে পালঙর রুচ্যেল

আমলে ঝামদি পরে কাদা আঘুনোর সেরে সেরে;

দোকদোক্যে আঙারাত্তুন তুলি খায়-

তেল সরভর এহ্‌রা দমাবো ।

 

তোগাদে দাঙর সোত্যা, মিধে মধুর সরপ্পাহ্‌ন্

বাঝি যায় আঢা ছুলিত, সংসারর ইধি কেরাবত

উগুরি যায় কেয়্যে ফোর, ডোঅ-লেবাং লাংটা কেয়্যে;

ধরা খেই রাজসিগেরির আহ্‌দত

কালর ঘুমোত বূং দি পায়-

ডুবি ঈল নেইয়্যে তিরোজ’ নালত ।

 

ও মন ! মর পুঝুনো মনা,

মর পিঞ্জুরোত তুই থাক না,

ন যেইচ উরি এগালা গরি, মর কধা তুই সুন না ।

তুই ন তোগেচ আলা আধার

পহ্‌র নাঙে সিয়েন কালা আন্ধার,

যিয়ান পেয়োচ সিয়ান ল,

তম্ ন ধরিচ নুন্‌ঝো-পান্‌ঝার ।

ঝিমিত ঝামাত রঙচঙানিত

ন বাঝেচ তুই ঘুর পালং,

সিয়ানি তর মরন’ ভুধি, মরা বভার ঘর আলং ।

 

এ সংসারান বিঝো আহ্‌রি

তেবেই তেবেই যার পুরি,

মধু ভাবি ও মন তুই

আঘচ কিত্তেই এগজা বূরি?

জাগি উত্ জাগি উত্, অগ্যেনর ঘুমোত্তুন

চোক মেলি রেনি চা, গ্যেনর পথ তোগা,

ধর্ম পধে যা আহ্‌দি সোলসোল্যা দবদবা ।

 

দানে-সীলে, গ্যেনে-গুণে, ভাবনা তপ গরি

ভেবেরা দিয়্যা লুভ-তিরোচ্ছান ফেলেই দে না ঝারি,

সুদ্ধোসাঙ্গ ঝোকঝোক্যা অহ্ ঈংজে পিঝুম এরি

উমোর কালর অমক্‌ঘর্, লোই পারিবে জুরি ।।

===০০০===                     (রাঙামাত্যে)

 

 

 

৭। দুঘোর ভাবনত

১১/০৮/২০১৩, রবিবার, ০২:০ পিএম     

তেদের তেদের দেবা ঝরত বোই আঘং ফুগুদি কাই

ঝরফুদো মিঝেয়ে মিদে আহ্ভাগানে মরে লেভেই যায়।

চেহ্ই আঘং বাহ্‌রেদি চেরোপালার ধক্খান

চুবুরোনাহ্‌ভুরো গাচ, ঝরত ভিঝি-

ঝুবো ছেরে এক্কো জুর্বো পেইক তেয়ো ভিঝেপুরো;

ডোঅ ফের্গেনেই কেয়্যে ঝাগারাই

ফেজেরা ফোরানি নিমনে খুদে ।

দুরোত ডগরি উদে নাক্কোন, ডগরে বেলপুক

দেবা ঝর তুঅ ন থামাই ।

 

মেঘুলো দেবা চাহ্‌দে চূধো মূহ্

নরুচ্যে আহ্‌জানি এক্কা আহ্‌ঝি যায়-

একচিমিত ঝিমিলেনেই,

যে আহ্‌জিত কন’ রচ নেই

নিধুর দুঘোত যেন আহ্‌জে রেজ্য আহ্‌রেয়ে রাজা ।

গুরুং গুরুং মুরোত গুজুরে, একমাধান আলেয়ে গরি

পুঅ আহ্‌রেয়ে মায় যেন গুজুরি গুজুরি কানে

চিত পোরাই বুক চাবেরেই।

তেপ্ তেপ্ ঝরফুদো যেন চোঘোপানি-

লাঙ্ আহ্‌রেয়ে লাঙোনির ধুন্ধুগোর কানানি,

বাপ্ আহ্‌রেয়ে পুঅয় কানে, নেক আহ্‌রেয়ে মোক্

ভেই আহ্‌রেয়ে নোনেয়্যে ভোনর পান্যে রাঙা চোক্ ।

 

দেবা ঝর দেবা দর বারিজে মাধানত

চিক্‌চিক্কে গরায় মরে দুঘোর ভাবনত্ ।

ঝরফুদো ঝরলেজা ধক্খান চেহ্ই চেহ্ই

কবি মনত তুভোল উদে বেগোচ্চে গরিনেই ।

ঈরুগোর মাধানত ঘুলোত পজ্জে জুম্মজাদর

কবালর দঝা দেঘি দিবে চোঘে রেনি

গরি যাঙ মুরোত পরি দারিত্ত্যে ভাবনানি ।

লাম্বাচুগুরো চিদেচজ্জা এ মন’ ধুঝিত

সুঘো সবন উদি যেয়্যে বেনাল্যে জিংকানিত,

ঝর থামি মেদিনি সাংসাঙ্যে ওহ্ই যায়

ভাবনর বারিঝে মনান অনসুর মেঘুলো থায় ।

===০০০===                 (রাঙামাত্যে)

 

 

৮। আমি জাদর গাবুস্যা-গাবুরী

০২.০১.'১৪, ব্রেসুপবার, ০৯.০০ এ এম

 

নুঅ আঝা বুগোত বানি ধো-পেঝেরায় যেবং আহ্‌দি

নমানিবং কনঅ মানা, ন দরেবং রাঙাচোক,

ফরে' যেবং রমঅ বের, ভাঙিবোং দরঅ বান;

জধাবলে একছিজিত বোয় মিলনি বাবদা উরেই

আমি জাদর গাভুস্যা-গাভুরী,

ন থেবং চোক এরে বানা রেনি চেই।

যেই যেই যেই- একপধে একধগে বেগে উজে' যেই

দম আঘে কম নয়, গঙ থামে থেদং নয়;

এঝ এঝ ভেইলক, এঝ এঝ বোন,

জাদর টানে সংপরানে এক্কান কধা কোহ্ই-

চেই চেই চেই- আমি জধা চেই-

কেনাকেন্যা খেইচ রজানা আমার গরজ নেই।

নাদংছারা রাজসুদোমর কজরা কধা-কাম

চোঘোত মুদা খে' কান সাজিনেই ফেলেদং জনমান !

ঈদোত রাঘঅ আমি গাভুর, আমি বলি লকলক্যা

ইক্কু আমার দাকজু অক্ত লারেয়ত অহ্‌বার তক্‌তক্যা

ঘরঅ কোজ্যা বাবা-কাক্কা-জিধু ভেইয়র লঘে,

খেমা খেমি নদঅ দেঘির, তে ফেলে দের তারে;

এ জালেয়ন দাঙা আঘুন পুরের চাগালা,

সে আঘুনোত যেইর দ আঙি আমি কাজা-মরা।

বাবর পারা পুঅ ঝি আমি রদেবলে সং

কিত্যে' সালেন বেসেদামে এগজা অলর থেদং?

 

সয়সম্পুদে ছারানাধা ঘরেদোরে ছেই-

মানসে খেদাক আমন’ ভাত, বগলত আহ্‌ত ভরেই!

ন পারিবং এ সুযুক দি, যেদক্খন জেদা থেই

এঝ বেক্কুন এক র সারি তারার কোস্যা সরেই।

 

থিদঅ অহ্‌বং কোস্যা থামি, নুঅ গরিনেয় যুক্কেবং

তেবন্যাত্তুন এরান পেবার লারেই গরি যেবং,

নিরেতিত্যাত নাঙসেদাম বেক আমা আরাং চিন

লুগী যাংযাং মাজারা গদা পরসালে বেরেয়ে দিন-

আমি বাজেবং; আমা জাত, থাজা লারেই গরি

ইয়ান আমার মূর সমক্ গাবুস্যা-গাবুরী ।

=========                        (রাঙামাত্যে)

 

 

৯। নুঅ ছলং

২০/১১/’১৩, বুধবার, ১০:০০ এএম

 

আদামর পুঅ-

যিবের লেঘাপরা সাঙুদোরোত থুম অহ্ইয়ে,

নেইয়্যে বাপ-মা’র জুরনত নেই

অজল সিক্‌খে সিঘেবার;

কিজুকাজু থেলেয়ো-

পুঅবুঅর ধাপ নেই,

একতাল নপরিয়ে গুরোগুরির সমারে

তে’য়ো বারী উদের-

অসিক্‌খে কুসিক্‌খের আরাচাক মাধাত গরি।

আদামর পুরোনী সমাজ, সিদুগোর খাস্যেক

অমকদ’ নিরোজ, কাজর কুসংস্কার

মদ, জু খারা, সয়সাগর ছিনেলী কাম

চিগোনত্তুন ধারি দিচোঘে রেনি

যে চিজি ডাঙর অহ্‌র্ সিয়ানি আহ্‌দত ধরি,

ইত্তুক বয়জত্ তে’য়ো চুঝো ধরে-

বিরি-সিগিরেত-দাবা-তুবি,

জেবত গরি ভঙায় গাঞ্জা ভুধি

মদ-কাঞ্জির বদল যেন্ তার পানিকুত্তি!

ছিনেলর লালোজ, চুল্‌চুলি মারানা

বানা সিয়েন আজল, ইক্কো মোক লনা।

ডগা বয়জত গিরিত্তি ধরী, দীঘোল জীংকানি-

অহ্‌মা পিত্থিমি নঅহ্‌য় দোলে রেনানা,

গ্যেন-বিগ্যেনর অজল সিক্‌খে-

নঅহ্‌য় দেঘানা, নঅহ্‌য় সিঘেনা।

‘সেধক্যান আদামত, সমাজত মর জনম

চিগোনত্তুন ধরি ডাঙর-দীঘোল সং

দেঘিলুং সমাজ’ ধক্কান, এভ’ দেঘঙর।’

 

ইত্তুগো ন বদলে, বদল্যা সিস্টেম

আধুনিক কালচারে ঈরুগোর টেইম।

মুই ইক্কু দোল জাগাত, সহ্‌রত থাং,

যাং মু্ই ইস্কুলোত, কলেজ-ভার্সিটি,

পুরোনা কুখাস্যেক ইক্কু নেই, আঘে মডার্ণ সোসাইটি!

কুঝি বয়জত মোক ন লহ্‌ঙ

লাঙ্যা-লাঙনি গিরিত্তি গরং,

কেলাব’ত্ যেই হেরোইন খেই,

বাউন্নোপাদা তেপ্পান্নো গরি

মদে মাত্তলে মজিনেই এক্কা এনজয় গরং!

 

পুরোনী সমাজে ন সিঘেই সিক্‌খে

সিঘেয়ে মান্‌সুদোম-

দোয়ে-মেয়ে মান্‌সোমায়, ফেলাংবেয়্যে কোচপানা।

ঈরুগোর পরবুঅ মুই, অহ্‌য়োং পাঘারা

গাই মুই, ম’ আলু মুই খুরোং

কারর চিদে মর নেই,

কোচপানার বদলে জানং মুই

যা’ত্তারে মারে ফেলেই।

 

পুরোনী সমাজে ন সিঘেই বিগ্যেন

সিঘেয়ে বিচ্সেজ।

ঈরুগোর মুই ডাঙর বিগ্যেনী

ধর্ম-পূণ্য সেনে ঠেঙ’ নলাকেজ।

 

পুরোনী সমাজে ন সিঘেই বুদ্ধি

সিঘেয়ে বিদ্যে।

ঈরুগোর মুই বুদ্ধিবান-চালাক একজন

বিদ্যে চেহ্‌লে কিচ্ছু নেই-

বানা ডিগ্রী বুঘী আঘং।

ন জানং বুনোকাদা, ন গরং ঘর’কাম

ভুই-জুমোর বাগত লামিম্, অমকদ’ লাজাং,

নেই মর কন’ বিদ্যে, চালাক-বুদ্ধি ছারা

সেনে মুই জানং বানা মান্‌সোরে ঠগেই খানা।

 

পুরোনী সমাজে ন সিঘেই বার্বো

সিঘেয়ে সম্মান ।

ঈরুঘোর মুই ডাঙর চেলা, কাররে ন ডরাং

মুই পুন্ডিক মুই মুরুব্বী, সমাজ-জাত চরেই পারং ।

সেনে মুই ন মানং বাপ-মা

মায়মুরুব্বীর কধা,

ন ধরং কার’ উবদেজ, বিচ দেঘং তারা গজ্যে কাম ।

 

বাহ্‌রেদি মুই ঝোকঝোক্যা, চদক এস্টাইল-

কাবরে-চুবরে; দজ ফেলেই এক বাবু,

সিভিল ভালেত্যে কামেকজ্জে;

ভিদিরোর বেক কিঝু গদা ঝগলা

বিনয়ে-সুদোমে, খাস্যেগে-আল্যেগে

বেরা’ই ধজ্যা জগনাগুলো ।

 

পুরোনী মানুচ ভুলুক-চুলুক ইক্কু মুই কহ্‌ঙ

যুনিয়ো ডাক-পুন্ডিগোর কধা এভ’ল্হক ধরং ।

আদামর সমাজ, রিদি-সুদোম ঘিনেই নাক চিবোং

যুনিয়ো তারাত্তুন বেজ সুদোম জুরী ন পারং ।

পুরোনী কোচপানা, মেয়ে-দোয়ে, পুরোনী সীরিসুদোম

এক্কানও ন লহ্ঙ্ মুই, এবাদে লুঙিহ্ দিহ্‌য়োঙ,

যে সুদোমে মুই চলঙর্, মডার্ণ মরে ভাবং

নুঅ ছলঙে করলাহ্ যুগোত লুদুপুদু আঘং।

====০০০===                       (রাঙামাত্যে)

 

র ভেত :

১) নুঅ ছলং=নতুন খোলস ২) ছিনেলী=যৌন; নরনারীর অবৈধ সম্পর্ক

৩) ছিনেলীর লালোজ=যৌনাকাংখা ৪) চুল্‌চুলি=যৌন তৃষ্ণা; চুলকানি

৫) টেইম= time; চাঙমা ঘাচ্ছারাই ‘টেইম’ । ৬) করলাহ্=নোংরা; অসভ্য

৭) সিভিল=ভদ্র; সভ্য ৮) ভালেত্যে=উন্নত; সমৃদ্ধ ৯) মান্‌সুদোম=মানবতা

=======

 

 

১০। জাগি উধো পরিবো

০৫/১০/’১৩ সুনিবার সাঝন্যা ০৬:১৫ বাজি

 

বেন্যের্ পেইক্‌কুন্ ঘুমোত্তুন্ জাক্‌খোন্

ঝাগে ঝাগে করিঘুন্ ফুল্ ওহ্‌ই ফুত্‌থোন্

লাজরিয়ে জাগ্‌ক্যে পাদা মেলিনেই

পত্‌পত্যে ঈক্খু তারা বেল’ ছদক্ পেই।

এক্‌ফুদো সিরোপানি এব’ জাগি আঘে

দোক্‌দোক্যে বেল’ ট গাই সোয়েনেই

অবাং দুনিয়ে তদারেনি চেহ্‌ব’ তে

আমনর্ মাজারা বুকফুলি দেঘেনেই।

 

অঝার্ এ সংসারত্ মাজারা টিগানার্ লারেয়ত্

এগে এগে বেক্কুন্ সেদামী লর্‌বো

কিয়োই টিগী আঘে বারীহ্ গমেদালে

ছাদেয়ে ছাবার্ দোয়ের্ কহ্‌রত্,

কিয়োই বারীহ্ নিরেতিত্যেত্ ঘুপ্ তেবোন্যের্ ডর্‌চাবত্।

কিয়োই এজ’ টিগী আঘে নিজ্ সেদামে লুক্‌পরানে

এরান্ পেবার্ লারেই গরি দেবংপহ্‌রর্ জুর্ গঙে।

কিয়োই লুগেইয়ে মাজারা, আধাপধে তল্‌ফেঝার ধগে

সাক্কোন’র্ গরম্ চাবত্ তলে।

 

আমি সে ঘুপ্‌ তেবোন্যার্ জাদিগাজ

রিবেং দর’ জারোল্-নাক্‌স-কুম্বোই

কালর্ গঙারে, ধক্‌বদলর্ ঘুরন্দি পাগত্

ঈক্খু আমি কুঝি চারা; এব’ টিগি আঘি

উধোন্দি ছলার্ ভরন্‌ভিরোন্ গাবুরে-

ঢেলাই ঝুবে জাবুর্ বদি সাজি উদিবার্ গরজে।

অজলত্ সিরে বাবেই বল্‌পেয়ে নিজেচ্ ছারি

সোজ্ আগাজর্ বেক্ দোলা’নি সুঞ্জুগে রেনিবার্

রাঙা বেলর্ দোক্‌দোক্যে ছদক্কান্ সদরে গজিবার্,

চেরোপালা একতাল্ গাজ’ ধগে, তারা সমারে পিত্থিমি সাজেবার্।

 

মাত্তর্ আমি নই কারর্ কির্বেদলা তুম্‌বাজ্ ফুল্

নই কন’ মেয়েছাবার্ জিরান্যেঘুন।

আমি দাঙ্‌গারোদোত একফুদো সিরোপানি

তেবন্যের্ ফেজাহজা গাজ্‌গাজারানি,

আমি ডরচাবত্ আঘি সপ্পানত্

আমি পাডাত্ পিচ্যে ঝাল্লো মুরিজ্।

জালাতুস্যে অবিজের্ চোক্‌পিস্যে চিদিরে মুগোর্

অনসুর্ আমা লঘে আঘে

আহ্‌মিজে আমারে ডলিদ’ মাঘে,

মাজারা লুগেইদি ভজ্ নেযেদ’ চায়

পাগস্যে বেরেনেই মারিদ’ চায় কালা রেক্খজি গাজে।

 

আমিদ’ সে সুযুক দি নপারি

নিম্মো পরানে খুজি মরি নপারি

আমার দ আঘে গং, দর’ রিবেঙর বর্‌মাহ্ গরম্

আঘে আমার্ বারন্দি সলা জলিবার্ ছদক্

ফুলেপাগোরে ঝুবুর বদি দোল সাজনি ধক্।

দিবোর্ বেলর্ চার্‌রোদ সোজ্ আগাজর্ বুগোত্

পোত্‌পেত্যা নিজ্ সেদামে নাকঅজল্ সিয়োত্

কারর্ দোয়েলৈ নয়; যুনিয়ো মেঘে ঢাগে তারে

উমোর্ সং সেঙিরি ঢাগি রাঘেই নপারে।

একদিন্ তে মেঘ্ ভাঙি নিগীলে

পিত্থিমি দোল্ অহ্‌য় তা’ আরাং পহ্‌রে।

আমারও জাগা পরিবো, মেঘ্ ভাঙি উধো পরিবো

ন অহ্‌লেয়ো রাঙাবেল্ বা কি ধল্‌ জুন্

জুনি ওহ্‌ই আমন’ পহ্‌রে আহ্‌ঢা পরিবো।

 

আমনর্ চিহ্‌নপুচ্চোই আমনে ঠিয়েনা

মুহ্‌ অজলে বাজি থানা,

কারর্ মেয়েলোই নয়্ নিজ্ সেদামে

অজল্ জাত্ বিলি সংসারর আলাম্ জঘা-

আমনর মাজারার্ থম্ গারা পরিবো,

বেক্ ‍নিরেতিত্যে দঝা কাদি উধি

কেয়্যে মজরি জাগি উধো পরিবো।

---০০০---                     (রাঙামাত্যে)

 

র ভেত :

১) জাগি উধো=জেগে ওঠো ২) অবাং=ব্যাপক; ৩) তদারেনি=মুখ তুলে তাকানো ৪) আমনর=আপনার ৫) মাজারা=অস্তিত্ব ৬) বুকফুলি=সাহসের সাথে

৭) অঝার=প্রশস্ত ৮) টিগানা=টিকে থাকা ৯) সেদামী=সাহসী; সামর্থ্যবান

১০) ছাদেয়ে=গোছালো ১১) ছাবা=ছায়া ১২) কিয়োই=কেউ ১৩) বা:রী=খুবই

১৪) নিরেতিত্যা=সংকট ১৫) ঘুপ=গভীর জংগলের অভ্যন্তর ভাগ; অন্ধকারাচ্ছন্ন

১৬) তেবোন্যা=ছায়াচ্ছন্ন; ১৭) ডরচাব=দাবিয়ে রাখা; (ভীতি প্রদর্শন করে)

১৮) লুকপরানে= না মৃত না জীবিত অবস্থায় ১৯) দেবংপহ্‌র=বিদ্যুৎ

২০) জুর=দ্রুত; জোর ২১) তলফেঝা=জঙ্গলের তৃণ-গুল্ম ২২) সাক্কোন=সেগুন গাছ ২৩) জাদিগাজ=মুল্যবান বৃক্ষ ২৪) রিবেং=সার ২৫) জারোল=জারুল

২৬) নাক্‌স=নাগেশ্বর বৃক্ষ

২৭) কুম্বোই=এক প্রকার মূল্যবান বৃক্ষ। এ গাছের কাঠ দিয়ে ঘরের খাম্বা দিলে দীর্ঘদিন টেকসই হয়। এ গাছের প্রশংসা সম্বলিত প্রবাদ আমাদের চাকমা সমাজে এখনো প্রচলিত আছে যেমন-

“ভাধিয়ে কয়দে আঝি, জারোলে কয়দে শত

কুম্বোই গাজে উধি কয়দে কেল্যার কধা কি কহ্‌জ”।

২৮) কালর গঙারে=কালের স্রোতে ২৯) ধকবদলর ঘুরন্দি পাগত=বিবর্তনের ঘূর্ণী চক্রে ৩০) গরজ=প্রয়োজন ৩১) ভরনভিরোন=পরিপূর্ণ

৩২) সোজ=নীল ৩৩) দোক্‌দোক্যা=উজ্জ্বল

৩৪) রেনিবার=দেখার(রেনানা/রেনি চাহ্‌না=দেখা) ৩৫) কির্বেদলা=অতি আদরের ৩৬) জিরান্যাঘুন=বিশ্রাম নেওয়া ব্যক্তিগণ ৩৭) মেয়েছাবা=স্নেহের ছায়া ৩৮) দাঙ্‌গারোদ=তপ্তরৌদ্র ৩৯) জালাতুস্যা=অত্যাচার

৪০) অবিজের=অনাচার ৪১) ফেজাহজা=আবর্জনা; আগাছা

৪২) গাজ্‌-গাজারা=গাছ-গাছড়া ৪৩) চোকপিস্যে=বাঁকা চোখে

৪৪) ডলিদ’ মাঘে=নিষ্পেষণ করতে চায়

৪৫) চিদিরে=বিবিধ বর্ণ বিশিষ্ট(কবিতায় দুঃশাসন অর্থে)

৪৬) পাগস্যা=পরজীবী ৪৭) রেক্কজি গাজ=রাক্ষসী বৃক্ষ(কবিতায় নিপীড়ক-নির্যাতক রাষ্ট্র) ৪৮) নিম্মো=শান্ত ৪৯) খুজি=ইচ্ছাকৃত ৫০) চার্‌রোদ=উজ্জল রোদ ৫১) নাকঅজল=গর্বিত ৫২) জুন=চাঁদ ৫৩) জুনি=জোনাকি পোকা

৫৪) চিহ্‌নপুচ্চোই=পরিচয়ে ৫৫) ঠিয়েনা=দাড়ানো ৫৬) মুহ্‌ অজল=গর্ব

৫৭) থম=স্তম্ভ ৫৮) গারানা=প্রোথিত করা ৫৯) সিরোপানি=শিশির

৬০) সাজনি=সাজবার ৬১) পোত্‌পেত্যা=উজ্জল ৬২) পাডাত্ পিচ্যা=পাটায় পিষ্ট হওয়া ৬৩) মুগোর্=দন্ড; লাঠি ৬৪) উদোন্দি ছলা=উঠতি ধাপ

৬৫) গাই সোয়েনেই=সহ্য করে

=================

 

 

১১। নুঅ বঝরর তবনা

০১/০১/২০১৪, বুধবার ০৯.৪৬ এএম

নুঅ বঝরর নুঅ আঝা চিদত-মনত বানি থাঝা
যোক বিদি যোক গমেদালে কাদা যেনেই ফারাদঝা।
এ তবনা মন্-সুরুঙত সংজোগারর দেবা গুরঙত
ঈংযে-পিঝুম কাযর-বিযর গদা ধোই যোক মোত্রী ঝরত।
লো-রঘে রোমে রোমে, আহ্'রে আহ্'রে, কেঝে কেঝে
ছিদি পরোক জধা-কোচপানা, অরগন্দিয়ে আমা দেঝে।
সুঘোর বেলান পহ্'র ফুদিদোক, বোয়েরানে বে'যোক আহ্'ভা
তারুম ঝারে গাজে-বাঝে, আলা'য় বারো'ক কুঝি আগা।
ছরা-ছরি মুরোহ্-মুরিহ্ নালে-মোরে থলে-দাবে
খুলামেলাহ্ই উঝন-লামন, উদন-বঝন গরি বেগে
গঙেই যেদ' জনম-জিবন ভান্যেচিদে নেই গরি
নুঅ বঝরত এ তবনা গরং আহ্তজুর গরি।

=== === ==                  (রাঙামাত্যে)