মেয়েরেগা কবিতা থুপ ১

 ১ । ফিরি এইম ত বুগোত

২০/১২/’১৩, সুক্কোরবার, ৮:৩০ পিএম

 

মুই যুনি কন’দিন এ জাগা ছারি

যে’ পাঙ বর্‌পরঙ্ ওহ্ই দেজান্তরি,

ইদুঘোর এ্হ্‌ল্ ভুই, মিদে রোদ, জুরো ব’

সোজদেবা, ঝরফুদো, পেইক্-পেগোলি র,

চিত জুরোনি তজিম্‌খলা এ দেজর চেরোপালা

ফারক ওহ্ই দূরোত থে’পাঙ মুই এগালা,

যেইম মুই বানা ছলঙান, ফেলে যেম পরানান্

পর্‌বাঝে দিন কাদেম জবি জবি ত নাঙান;

ও মা পরানঘরান, আওজোর জুম্মল্যান্ড

ফিরি এইম ত’ বুগোত দিলুং এ কধাগান ।

 

বিদ্রোহী লর্বুঅ ওহ্ই, সরানর লারেয়ত

গঝি লোম আহ্ত্যের সক্ত দিআহ্দত্,

লো দিম, লো নিম, জাদর মুক্তিল্লাই

সোয়েম মুই যদ’ দুক, ঘরপাদা পেবাল্লাই ।

জে্ইল-আহ্‌জদর আন্ধারত, যোক্ জনম যোক্

অনাজার অবিজের যেদক এব’ এজোক,

জালাতুচ্স্যা মাধাত নিনেই লরিম জনমান

তুচ্চ্যাল্যা অমাঞ্ঝোত্তুন বাজেম ত’ লাজ্‌চান ।

 

মুক্তির তিরোজত অতিত্তি এ জিবন

নাদ’ত্ টাঙেই যুনিয়ো, অহ্‌লে মর মরন,

সেক্কেনেয়ো জবিম মুই বানা ত নাঙান

ফেলে যেইম ত’ কহ্‌রত মর পরানান ।

 

আহ্‌ত্যেরে বা সুদোম্‌মুজিম অঘুর লারেই গরি

সরান পেলে কন’কালে আমা দেচ্চান যুনি,

মন খেলাঙে গেইম-আহ্‌জিম, ফুল-পেঘো ধগে

দিনুন কাদেম সমাচ্চ্যেলৈ খুঝি-উল্লাজে ।

আমন’ আহ্‌ভাল খুলোমেহ্‌লা আগাজ’ পেঘো সান

থান-থমগে থিদোমিদো গঙিবো দিনমাধান,

তজিম্‌পুরো এ দেজ’মায় জাতভেই সমারে

আলুলো-দুলুলো জনম কাদেই বেক্কুন একলঘে;

যুনিয়ো থে’পাং ঝুবুরো টাঙেই তিন কেদাগ’ মাধাত

মরন এলে সুঘে মরিম আমন’ ঘরপাদাত ।

কোচপানা মর এ দেজ’মায় অঝার বুক ভরন

ঈল ন’অহ্‌ব’ কোচপানাগান বানা এ জনম,

কোচপে’ যেইম মা জাগা মর, গভীন চিদোমুরোত

কোচপেবাত্তেই জনম জনম ফিরি এইম ত বুগোত ।।

               ===০০০===        (রাঙামাত্যে)

 

র ভেত : ১) বরপরঙ্ = এক দেশ থেকে আরেক দেশে স্থানান্তর; স্থায়ীভাবে স্থানান্তর; রাজনৈতিক আশ্রয় ।(১৯৬০ সালত পাকিস্তান সরগারে কাপ্তে নাঙর জাগা’নত বরগাঙান গদা দিলে চাঙমাউনোর ৫৪,০০০ (চোপ্পান্নো আহ্‌জার) এঘর বলা ভুই ডুবি যায় । যেরেদি ভারত সরগারে তা’ দেজত আর্(আশ্রয়) দে’নার রাজডাগনি দিলে নিজ জাগা, ঘর’ভিধে আহ্‌রেইয়ে চাঙমাউনে ১৯৬৫ ইংরেজি বঝরত ভারদর অরুণাচল প্রদেজত বরপরঙ্ যে’ পা’ন্ ।)

২) দেজান্তরি=দেজছারা অহ্‌না; দেজ ফেলেই যানা । ৩) তজিম্‌খলা=পরিবেশ

৪) এগালা=একলা ৫) পর্‌বাঝে=পরবাসে  ৬) জবি জবি=জপ করে

৭) নাঙ্=নাম ৮) বিদ্রোহী=উল্লোহ্; বিরূদ ৯) সরানর=স্বাধীনতার

১০) সোয়েম=সহ্য করব (সোয়=সহ্য) ১১) অনাজার=অনাচার

১২) অবিজের=অবিচার ১৩) জালাতুচ্স্যা=অত্যাচার  ১৪) তুচ্চ্যাল্যা=অত্যাচারী ১৫) অতিত্তি=অতৃপ্ত ১৬) নাদ’ত্ টাঙেই=ফাঁসিতে ঝুলিয়ে ১৭) নাদ=ফাঁসি;

১৮) সুদোম্মুজিম=নিয়মতান্ত্রিক ১৯) আহ্‌ভাল=অধিকার ২০) থান-থমগে=ভুমি-শক্তিতে; ২১) থিদোমিদো=প্রতিষ্ঠিত ২২) আলুলো-দুলুলো=ভ্রাতৃত্ববোধ;

২৩) ঝুবুরো=ঝুপড়ি ২৪) তিন কেদাগ’ মাধাত=(বাগধারা)কুঁড়ে ঘরে ।

২৫) ঈল=তৃপ্তি ২৬) চিদোমুরোত=হৃদয়ের অন্তঃস্থলে

 

 

 

২ । ধারাজ

০২/০১/২০১৩, বুধবার, ৯.০০ পি.এম.

 

পরানর আভিলেজে চিদ’ মূরান আঙি যায়
বেউদো ধারাজসান খরপাগে জট খায়
ভাবি বুঝি ন পারং চিদে চর্যায় লন্দরং
মুই এক বামভুল, রাজভুল কাজভুল
গীদো লামা গেই চাং সুর তুলি সুর আহ্‌রাঙ্
ঘঝা টানি মিলেই যায়, আধ পধে আভর খায়
বেসুঞ্জুগে খুয়োঙ গুজুরে।
নাধা, পিত্থিমিত কিত্তেই এলুং

গম এক্কান ন গরিলে?

নাধা কাম নাধা মন নাধা বেক চলন ফিরন
নাধা সমার ঘরদুওর, সমাজ দেজ জাদর
যিদু যাং যিদু থাং আগে আগে খুচ পাং
নাধা জনর র শুনং।
আহজিখুঝি কলঅ কলঅ
সিদিরে নিলোজে দাত ভেগাত্ত্যে
কদক আর চেয় পেম অহল' বেক পেগাত্যে।

গাজ ধরং বাজ ধরং এগামনে সার গরং
নাদান্যে মানেয়রে ফেলেদিম ভং,
বদলেম কু দিন কু মনর জিদঘিন
থামে দিম নিলোস আহ্ঝি পকতু কেয়ের রেক্খজর পাজি।

এমানর হাস্যদে জিদি লয়ে এ সমাজ
নেই কন মানসুদোম নেই কিজু লাজ।
চেরোপালা ব খেলে বংবঙ্যা কজরা বাজএ
মানেই সুদোম লুগি যিয়ে আক্কলর রাদ অহ্ইয়ে
ভেজাল ফাগারায় দেজ জাত ডুবি যিয়ে
পুনো বিজ মাদাত উদি ঝালাবুলঅ মাধা লোই
এমানর আক্কলে গজক ওয়ে মানেইয়ে
লালোজর লেত্তোলৈ গদা সরবরঅ।

থাদারত মারা পরের সীঝি মনা মা ঝি
চদর’ গারি ছারা পাদারত পরি।
খাক্কনর আঝা নেই জীংকানির ঝিগে ফুল
কক্কেনে ঝুরি পরে, পরে উরুত্তুল,
জাদরে জাদে ঘিনেয় বাপ পুদোর সং নেই

বংঝমা চাগালা ধরি পরাধরা বেক পেই
আইল্যম রুঘোরুখ্যা শুগোরর কেবার দাত
সুঘে খেবার নেই মাদান রনদুঘো ভাত।

চাঙ্ মুই বদলেবার এই কিরিমিরি
ভাবনাত তব গরং জুরোগরি বজি
ও গোঝেন! কিত্তেই মর সেদামছারা জনম!
এলুং এই পিত্তিমিত বেআলে বেনালে,
নহ্ পাঙ কিত্তেই সে সেদাম
জাতকুল গমেদালে ধুঅপধে নেযেবার।
মা বোন’র ইজ্জোত বাজেদুং সোত সোত
সবপানত অহ্দুং মুই কান মানেয়র লুধি
রদ নেইয়ে মানে'লগর বোই দিধুং ভুদি।
পিরে পস্যা মানসো কায় অহ্দুং সীঝি দরব
তিদে খর রুস্যালত অদুং মিদে চরব।
নেইয়ে দুখ্যা মানসো মায় ধরিদুং থক
বান্যে জাদর দুঘ বিজগত অহ্দুং মুক্তির পথ।

========                      (বিলছড়া)

 

 

৩। খেমা গরিচ বা

৮.২.২০১৪, সনিবার ১.২৩ পিএম

কেঙিরি কোম বা'দো মর রিবেঙর কধা
কেঙিরি জানেম মর মন কৃতগ্গতা
চিগোনত্তুন ধরি খানা যুগেয়োচ
কাবরচুবোর উরোনপিনোন,
মরংবাজং সেদামে অভাব পুরেদোস।
মর জিংকানিত্যেই, বাজিবার তরিবার গমেদালে
পরভো অহ্বার ইচ্কুলোত পাধেলে,

রনদুঘে কামেয়ে টেঙা, রদবল, আয়ুর বদলে
দলকদি আহ্ধি যেম, ম ভরে মুই ঠিয়েম বানা এ ধারাজে।

খালিক, খালিক মুই নিরোস সেদামছারা
এভ’ আঘং ফাত্থো ওই, নেই কন কামেই
বানা তর কানাহ্ত চরঙর সে চিগোনত্তুন ধরি,
একজরা ভাত একধুক পানি-
বানা তর লোকধোক্কে কেয়ের তেবেয়ে ঘামানি।

বয়জর ভারে থত্থস্যে দিআত, কংগ্রং কাঙেল ন লঙে
দিচোঘত খোও ঘুর, একধেক্কে নিজেযে ঘিরঘিস্যে আধানা,
এজান্যে নিরেতিত্যে অক্তদো তুই এঝ-

তাগল ফাগারাহ্ এরি ন পারস
আন্ধারেপহ্‌রে ভুইয়েমাধে, লাঙেল মুরো আঙুদোচ।
এ অক্তয়ানত মরই দায়িত্তো তরে খাবানা,
ঘর বোইধে নুনেভাধে আহ্ওজে পালানা।
মাত্তর, মুই দ সেদামছারা,

দেবংসী আঝালৈ বিদ্যের ধারাজে আঘং অজল সিঘনি খলাত,
এবঅ সিঘঙর, উহ্ভেই ন পারং সিক্‌খের দীঘোলিবাক।

সাত্থপর এ বিদ্যে, নাদান্যে এ সিক্‌খে!
যিয়োত বাপ-মা'র দুঘো ভাগ আণেও লোই ন পাস্যে।
নিজো আলু খুরানাত সময় ফেলানা
বেসদর কারত্তেই সে আলু রানানাহ্।
যেক্কে সিঝিবো ভাতপিলে সেক্কে তুই নথেবে!
থেলেয়ো তেলসরভর উদিচ ন পেবে।
একজিংকানির যুগেয়ে সবন অকুল দজ্যেত পরিবো
আহ্‌জি যেব’ বরঅক্তর কালা সুরুঙোত,
সেক্কেয়ো মুই সেদামছারা।

মর মনরুহ্মুজোত উহ্‌ব বানা এক্খান-
পত্যেনা আ’ খেমা চা না
বা, বা দো! খেমা গরি দিচ বা,

তর এ নাধা, অগুনোর পুঅভোরে।

তিগিনি সং গারা যেয়োং তর বরমঙ্ঘা দাদনত্তলে
সুঝী বুরেই ন এলুং মুই, এ জনম’ কালে।

===========                   (তাংগুম)

 

 

৪। যুনি ডাগচ মরে

১৫/০১/’১৪, বুধবার, ৭:৩০ পি এম

 

কন’দিন যুনি ডাগচ মরে

ভর্‌ নকাস্যে কন’ ধুল্যে ভুইয়োত,

আঘুন্‌গরম ধুল্যেকোলোই-

জুরো ভাবি ধাবা এইম ত’সিদু ।

আহ্‌জার কচ্টর্ মেল্যে পাঘোর

উরে’ দিম বেক ধুল্যে লঘে

কায়কুরে বানা পেবাত্তে তরে ।

 

তত্তেই বিলি মুই ওহ্‌ই পারিম-

গদা ছারানাধা,

দি পারিম উরেই যদ’ সবনর ফদনাহ্ ।

ছোতপোত্যে রুহ্‌মুচ ভাঙি

ঐ দূরোত নেযেবে মরে,

তুই এনেই আজা গরি

ছাভাসাঙেত অহ্‌বে ।

 

তত্তেই বিলি মুই দি পারং-

জিংকানিয়ান বন্ধক,

থে’ পারঙ বঝরলাক্ষো

যে কারর্ আঞ্‌ঝামত ।

দুলুহ্‌কগাঙ সাঝুরি ওহ্ই লুধিআদুরী

এইম মুই ত ধাগত-

যাং-থাং পরানে,

যুনি ডাগচ মরে ।।

===০০===                    (রাঙামাত্যে)

 

র ভেত:

১) ভর্‌নকাস্যে=দুঃসহ

২) ধুল্যেভুই=মরুভূমি

৩) আঘুনগরম=অগ্নিতপ্ত

৪) ধুল্যেকোলোই=বালুকণা

৫) জুরো=ঠণ্ডা; স্নিগ্ধ

৬) ছারানাধা=বিপর্যস্ত

৭) ফদনাহ্=প্যারাস্যুট; ফানুস

৮) ছোতপোত্যে=অস্থির

৯) রুহ্‌মুচ=মনের অবস্থা; বৈশিষ্ট্য; চেহারা;

১০) ছোতপোত্যে রুহ্‌মুচ=অস্থির অবস্থা

১১) আজা=আলিঙ্গন

১২) ছাভাসাঙেত=ছায়াসঙ্গী

১৩) বঝরলাখ্কো=বছর লগ্নী;

১৪) আঞ্ঝামত=অধীনে

১৫) দুলুহ্‌কগাঙ=ক্ষারনদী;

১৬) দুলুহ্‌ক=ব্লেড; বাঁশের ধারালো ছিলকা

১৭) লুধিআদুরী=কষ্টের বোঝা নিয়ে; লাঠিতে ভর দিয়ে

১৮) যাং-থাং=বাঁচি কি মরি অবস্থা

======================

 

৫। দেবংসী  

১৬/০১/’১৪, ব্রেসুপবার, ২:৪৭ পি এম

 

যুনি মিদে আহ্‌ভা অহ্‌দুং, তর কেয়্যেত বাঝিদুং

যুনি ঝরফুদো অহ্‌দুং, তরে গদা ভিঝেদুং

তর কেয়্যেত বাঝানাহ্, ন থেদ’ কন’ মানা ।

এদক কায় আঘচ তুঅ বাঝি দ’ ন পারং

এত্তমান কোচপাং তুঅ ‍দি’দ’ ন পারং ।

 

তরমর দি’সেরে দেবংসী সীমিনে

দূরোত ফারক রাঘাই সেই সুদোমে,

আহ্ওজি মন’ পেইক্‌খো উরি এধ’ চায় ত’ সিদু

সংফোরে ডুঅ ভাঙা তে-

ন পারে এয় দেবাল ভাঙি ।

দেবংসী সিঙোলে বেরেহ্ই আঘে এ কেয়্যে

লেজে আর কাঙেলে,

এ সিঙোল ভাঙিম সাহজ ! কন বিধেনে ?

বিয়েত্রা এচ্চ্যে পিঠ দিয়্যে মরে-

সেনে মর এ মনর, কোচপানা জনমর

থেব’ যুরো গরি, সুন্ধুগোত কুলুপমারি,

সেক্কে’ তেহ্ ভাঝা দিবো যেক্কে’ এইম নুঅ গরি ।।

===০০===                      (রাঙামাত্যে)

 

র ভেত:

১) দেবংসী=অদৃষ্ট     ২) সীমিনে=সীমানা   ৩) দি’সেরে=দু’য়ের মাঝখানে

৪) বাঝাহ্‌নাহ্=স্পর্শ; স্পর্শ করা

৫) দেবাল=ওয়াল

৬) আহ্‌ওজি=অনুরাগী; বেপরোয়া

৭) লেজে-কাঙেলে=(বাগধারা)সর্বাঙ্গে

৮) বেরেহ্ই=পেচিয়ে

৯) সাহজ=সাহস

১০) বিধেনে=মন্ত্রে; আইনে;

১১) সিঙোল=শেকল

১২) বিয়েত্রা=বিবাহ দেবতা

১৩) কুলুপমারি=তালাবদ্ধ ভাবে  ১৪) যুরো=নীরব; মৌন

====================