পরানি ও পরানি *বি.বি চাঙমা মেয়েরেগা(১৩২)

গীত ৩৩

পরানি ও পরানি

মরে কি তর ঈধোত উধেনি?

তুই ফুল তুই তারা

তুই আগাঝর চান

তরে ন দেলে কাই ন পেলে

কানে পরানান।

বারিঝে দিনোর ঝরফুদো তুই

রেগেচ ফুলোর তুম্বাচ

উধোন্দি বেলর রাঙা সদক তুই

রানজুনি মর মন আগাঝত।।

তুই ফাগুনোর জুরো আহ্‌ভা

তাঞ্জাঙর নোনেয়ে সুর

কোগিলো মিধে গানে

মিঝি আঘচ ম ইধু।

কারিহ্ নেযায় বেক কিঝু মর

তর মেয়েলি ধগে

পরি থাঙ বানা ছলঙান

ধমান যায় ত লগে।।

সর্গ কুলোর উর্বসী তুই

তিলোত্তমা মেনগা

এ সংসারত কিচ্ছু দ নেই

তরে দিবার তুলনা।

                     ভাছু ২০০৫

============