মুই এক যাযাবর *বি.বি চাঙমা মেয়েরেগা(১৩৮)

গীত ৩৯

মুই এক যাযাবর

মুই অহ্‌লুঙ বেগর পর

নেই কন তোজি ধুজি

নেই কন ঘর।

আহ্‌দি বেরাঙ পধে পধে

দিন কাদাঙ দাঙাপাদারে

চেকচেগি ভেদভেদি পধপাজারা

সাগিন মর ফুতপাদে।

ঘুরঙর মুই ঘরে ঘরে

আহ্‌ত পাদি দোরে দোরে

কিয়োই মরে রেনি ন চান

কোচপেনেই কায় ন থান

এহ্‌লাফেলা গরন মরে।

ন ভাবপো তুমি মরে পর

অহ্‌ঙ ভিলি দুঘি যাযাবর

অহ্‌য়দ মর দুঘি কবালত

ঝিগেফুল ফুদদে

দেরিয়ো কদ।

              ভাছু ২০০৫

=======