মা *বি.বি চাঙমা মেয়েরেগা (৫৪)

থুম নেইয়ে গুণে গুণী মেয়েলি মাদো,
তর অফুরন্দি মেয়ে দোয়ে লৈ
বাজি আঘং সংসারত এ জিংহানি লৈ।
দচমাস দচদিন রাঘেয়োচ রেইত দিন
তর নরম পেদ' ভিদিরে,
দুঘে কস্টে হদক মাদো মরে জর্ম দিলে।

তর বুগর দুধ্ত্যে মধু মু'ওত মিদে হাঝি,
পিয়েই খেই মুই মাদো দোলে আঘং বাজি;
কধক আদর ভরা কির্বে দোয়ে মেয়েই,
থুম নেইয়ে মৈত্রী করুণা মুদিতেই।
রাঘেয়োচ খুব যত্তনে তর নরম কঅরত
নদিলে এক্কায়ো পেবার দুঘ দরদ।

কাম ছারা দিন আ’ ঘুম ছারা রেইত
কাদেয়োচ মত্তেই বিলি ওই এক কেইত।
চোঘোত ঘুম পেদত ভাত উদোত ঠুদোত পানি
বেক কিঝু ত্যেগ গরিনেই মরে আনিলে পালেই।

মত্তেই বিলি অতালিয়ে কদক কস্ট পেয়োচ,
সুজিবার সেই ঋণুন নেই মর সাওজ;
মাদো তুই পরানর খোনি মর দি চোঘোর মানেক,
তর মেয়ে দোয়ের পহ্রত পিত্থিমিয়ান দেঘঙর খালিক।

শ্রদ্ধাভরি সিত্তেই মা গরঙর সালাম,
আশির্বাদে যেনে মুই সুঘে জনম কাদাং;
তর শিক্ষেই তর আল্যেগে এই জিবনান,

পেয়োং সত্‍সুদোম গুণ, মান আ' দোল গ্যেনান।
সিত্তেই মা সংসারত তুই বারীহ্ ডাঙর,
তর জাগা যেরে আঘে বুদ্ধ তিরত্নর।

দোয়েলি মাদো তর কির্বে মেয়েলৈ,
সুঘোর ওক এজিংকানি পদ্দ ছাবালৈ;
অফুরন্দি সালাম গঝাঙ তর ঠেঙত্তলে,
এ সংসারত বেগত্তুন বেজ তুই সদর হলে।
কেয়ে ছাবা কেয়ে সমার যেন নিত্তাগে,
তর আশির্বাদ থোক সে’ন মর লঘে লঘে।।

==০০==

                          ২০০৬