অদলবদল *বি.বি চাঙমা মেয়েরেগা (৭)

২৬/০৬/’১৫ সুক্কোরবার, ১০:৫০ পি.এম

মর গদা দিন, মেঘুলো দেবা ঝর তরে গোজেলুঙ
মর বেক চিদোমেয়ে, কোচপানা তরে গোজেলুঙ
সাঝন্যের এক ফুদো পহ্’র্ মরে দিলে অহ্ভ’
সে পহ্’রত মুই লেঘিম যদ’ গীত কবিতে।

মর গদা মিধে ব, দোল ফুল তরে গোজেলুঙ
মর বেক কির্বে আহ্‌জি, নোনেয় তরে গোজেলুঙ
সাঝন্যের এক ছলা পহ্’র মরে দিলে অহ্‌ভ’
সে পহ্’রত আহ্‌দি যেইম মুই নিবিলি মুঝুঙত।

মর গদা খুঝি, মন’ আঝা তরে গোজেলুঙ
মর বেক চিতপুরানা, আইল্যেঙ তরে গোজেলুঙ
সাঝন্যের একমূত পহ্’র্ মরে দিলে অহ্‌ভ’
সে পহ্‌’রত তোগে’ লোম মুই সুঘোর নিজেনী।

মর গদা কেয়্যে পরান, লো ফুদো তরে গোজেলুঙ
মর বেক তিনেঙ আ’ লোক্ষি রুহ্মুজ তরে গোজেলুঙ
সাঝন্যের ধিমে ধিমে পহ্’র্ মরে দিলে অহ্‌ভ’
সে পহ্’রত সাজে’ লোম মুই ম’ জদন ঘর।

অদলবদল