এচ্যে হালপালনী/হাল ফেলানী আ’ বিস্সো বাব’ দিন *বি.বি চাঙমা মেয়েরেগা (৮)

১। এচ্যে আঝার মাজ ৭ তারিক, আমা চাঙমা জাদর তথা সাক্য জাদর সিঝি হাল পালনী/হাল ফেলানী দিন। এচ্যেত্তুন ধরি ২৫০০ বঝর আগে এ দিন্নোত কপিলাবস্তু নগরত সাক্যরাজা সুদ্ধোধনএ নিজে ভুইয়োত লামি হাল সুওদ’ । আ’ গদা সাক্যরেজ্যর মানুস্সুনে উস্সোমুস্সোয় এ দিন্নোরে পালেদাক। গোতম সিদ্ধাত্থর ব’জ যেক্খে সাত বঝর ঠিক এ দিন্নোত এক্খো জাম গাঝত তলে ধ্যান গরি জগদর পরানবলাউনোর দুক্খানি উপলব্দি গরি পাস্যে। তে দেক্খিয়্যে এক্খো ব্যেঙএ উইপুক খার, সে ব্যেংঙোরে এক্খো সাবএ খার, সে সাপ্পোরে এক্খো চিলএ খার। এ বাবত্যে গরি মানুস্সুনেয়ো সে নিরিহ পরানবলাউনোরে খাদন। সে বাহরায়ো মানুজ মানুজোরে তচ্ছার গত্থন। জাতপাত ভাগ গরি সংসারত অমানুজোর রংঢং গত্থন।

এ দিন্নোত আদামর জুমবলা আ’ ভুইবলা চাঙমাউনে হাল পালাদন। সহর’ চাঙমাউনে উদিজ ন পাদন। মুইয়ো হাল পালাঙর, গোতম সিদ্ধাত্থর চিদেচজ্জার হ্লক ধরি।
বেক্খুনোরে সিঝি হালপালনী/হাল ফেলানীর পাত্তুরু-তুরু।

২। এচ্যে বিস্সো বাব’দিন। এ দিন্নোত বেক বাপ্পুনোরে গভীন চিদােত্থুন ঈহ্‌দোত তুলি স্রদ্ধা গঝাঙর। একজন বাপ মানে এক্খো গোঝেন। বাবর আগাত্যে কস্টসাধন আ’ রদবল খয় গরানার ফলে এক্খো পুঅ(মরত পুঅ/মিলেপুঅ) মা পেদত জাগা লোই পিত্থিমির বুগোত এভার যু পায়। এক্খো পুঅ পিত্থিমি বুগোত গমেদালে বাজি থেবাত্থেই, ভাত-পানি, উরোন-পিনোন, দারু-দর্ম, সিক্খে-দীক্খে আ’ কামে-কজ্জে ভরনভিরোন ওহ্‌য় আরাঙ মানুজ অহ্‌বাত্থেই বাপ্পোই যে কত্তমান চেরেস্টা গরে সিয়েন কন’ কধালৈ কোয় বুরেঈ এধ’ নয়। এক কধায় অতালেয়্যে গুনোর ভান্ধাল অহ্‌ল’দে একজন বাপ। এক্খো বাবএ তার দোয়ে আ’ সাসন’র মিঝেলকঝালে এক্খো পুঅরে যেধক্যেন গরি আর্ দিনেই দি রোক্খে গরে অন্য কন’জনে একজন মানুজত্থেই সেধক্যেন ন গরন। সেনত্থেই বাপ অহ্‌ল’দে এক্খো আঝল সমার।
গোঝেন বুদ্ধো জগত গুরু, মানেয়-দেবেদার মাস্টর। সে বুদ্ধোর কধা ধগে যুনি রেনি চেয় এক্খো বাপ্ও পুঅছাবাউনোত্থেই এক্খো বুদ্ধো। কারন বুদ্ধো তার বাণীত কোইয়্যেধে- জগদত পাচ্ছ্যেন থুম নেইয়্যে গুন আঘে,সিয়েনি অহ্‌ল’দে ১. বুদ্ধোর গুন, ২. ধর্মর গুন, ৩.সংঘর গুন, ৪.মা-বাবর গুন(এক লঘে), ৫. মাস্টরর গুন। এ পাচ্ছ্যেন গুনোর কীত্তোন গেঈ বুরেই ন এঝে। এ গুনা’নিরে পুজিলে, ভক্তি গরিলে যে কন’জনর সুক মিলে, মুক্তি মিলে। উগুধো যুনি খতি গরিলে, এহ্‌লাফেলা গরিলে, আঘাত গরিলে উদো নেইয়্যে দুক আ’ অসান্দি ভুক গরা পরে। বুদ্ধো আর’ কোইয়্যে- জগদত পাচ্ছ্যেন কাম আঘে যিয়েনি গরিলে যে কন’জনর অগনন জনমধরি আগাত্থ্যে দুর্গুদি ভুক গরা পরে। সিয়েনি অহ্‌ল’দে ১. বুদ্ধোর কেয়্যেত্থুন লো ঝরেই দিলে, ২. অরহত মারিলে, ৩. বাপ মারিলে, ৪. মা মারিলে, ৫. সংঘ বা সমাজ ভাঙি দিলে। কাজেই কন’ পুঅছাবায় যেনে বাপ-মা’রে ন মারন, কস্ট ন লাগান, ব-নিঝেজ ফেলেই ন দোন ইয়েন চেদনত রাঘা পরিবো। বুদ্ধোরে যেধক্যেন গরি স্রদ্ধা, সম্মান,পুজো, বন্দনা গরা অহ্‌য় ঠিক সেধক্যেন গরি বাপ-মারেয়ো স্রদ্ধা, সম্মান, পুজো, বন্দনা গরা পরিবো। যে পুঅ-ঝিউনে এ সুদোমে চলিবেক তারার জিংকানি খামাকখায় ভালেত এভ’, তারা যে কামত ধরন সে কাম পরিপুন্নো অহ্‌ব’।
ডাঘ কধায় আঘে-
‘যার মা নেই তার কেয়ে ভদরা,
যার বাপ নেই খুত্যে টেঙেরা।’


০৭/০৩/১৪২৬ বিজকগ্রী
২১/০৬/২০১৫ খ্রি:

এচ্যে হালপালনী/হাল ফেলানী আ’ বিস্সো বাব’ দিন