পিরেরেস্যা জাদর জিংকানি *বি.বি চাঙমা মেয়েরেগা (৩১)

০৭/১১/'১৩ বৃসুপবার বেন্যা ১০.০০ বাজি

জাদর গাওলী এক্কায়ো গম নেই

পিরেরেস্যে ওহ্ই যেইয়্যে অমকদ'

আল্যম নুঅ পিরেই জাবেরেই ধরের

এক্খান্ গম ন অহ্দে আর'ক্খান এজের্।

কেয়্যেমন্দা দেঘা দিল' সাতচল্লিজত

দেজভাগে দুর্গুদি জাদর কবালত।

সায়েদত অহল' ঘা আভাকভাক কাপ্তেগধার বান

ডুবেল' দেজ, ধাবেল' মানুজ ইহ্লেপাদারে

অহ্‌বা অহ্‌বা, কবা কবা জাগা আহরেয়্যা জাদএ।

বাহত্তুরত সাধীন বাংলার নুঅ সংবিধান

মুজিবোর বার্বো কধায় বানেল' বেক্কুন বাঙাল

ঠিয়েই উদি জোগার্‌পারি এম এন লারমা কল'

আমি জুম্ম তজিম্‌জাত্ বাঙাল দ নয় কন'।

তিরাঝি সনিদঝা জাদর কবালত্

লাম্বা-বাদি ভেইভাঙালা সায়ত্ত লারেয়ত

ঘর'কোজ্জেত ডালিত প'ল' লারমা জাদরখুল

একসমারে ঝরি গেলাক জলজল্যা তারাফুল।

ঊনাঝিত্তুন্ ছিয়েনব্বোই জাদর গাওলী ধক্কান

অমকদ' মরাপেধেরাহ্ পিরেপজ্জে কেয়্যেঘান

আহ্জারে আহ্জার জুম্ম মানেই

আমনর বাব-ভেই মা-ভোন

আর্মি-সেটেলার অত্যাচারত নিজো পরান আহ্`রেয়োন।

ঘরপোরা কালাধুমোই আন্ধার জুমল্যান্ড

সেটেলারর্ অ-গজগত ভিধেমাদি গেল।

সাদানোব্বোয়ত্ চুক্তি অহল' জেএসএস-সরকারে

আগারপিরে ভেদা দিলো চুক্তির যেরে যেরে,

জর্ম অহল' ইউপিডিএফ চুক্তি উল্লোহ্ গরি

মরন'ব্যেধি ক্যান্সার সান জাদে-জাত মারনি

লো চুজনি দেইনর খেলা অহল' আরগানি

পালা-পাল্যে ডালি দেদন মংঘা জিংকানি।

জেএসএস ভাঙি গেল' দিআহ্জার আট সাল্

জনম লল' আরেক ঢেলা জাদর জঞ্জাল।

এঙিরিনেই আগার পিরে গারুত্তুন গারু ওহ্ই

জাদর ঈয়েত কমি যার আগাসুচ্ছো ওহ্ই।

দলে দলে ফারক তারা তা এরাহ্ তে খাই

জাদর কবাল গাজত টাঙেই নিচিদে আহ্ঝি যায়।

জাদর গাওলিমায় তারা আগারপিরে ক্যান্সার।

নীল্‌মরা কেয়্যা জগা বিজ ছিদি যেইয়্যে-

সিরেই সিরেই রগে রগে,

সীঝি লো অহ্ই যেইয়্যে অসীঝি

চামত বাজ্জে খেঙেদা আহ্‌রবো কেয়্যে

বে রঙা গাওলিগরন্‌ নরুচ্যে চেঙেরাহ্

ঝুরোতুরো ওহ্ই যেইয়্যে মন সবন্‌,

ঈয়েত্‌ ফুরোহ্'না অক্তত সাঝ লামি

ঘুব আন্ধার ছিদি পজ্যে,

নুঅ দিনোর পত্যা বেলর-

দোকদোক্যা ছদগর আঝা লুগি যেইয়্যে।

পরান নিঘিলি যেইয়্যে চিবেচিপ্যা আক্তত

সাংপজ্ঝ্যে তাঙোনঅ বাজ জাদর চবাসালত।