মনান মর পুঝুনো মনা*বি.বি চাঙমা মেয়েরেগা(১৬৯)

৬। মনান মর পুঝুনো মনা

২৫/১১/’১৩, সোমবার, ৩:০০পিএম

কেয়্যে পিঞ্জুরোত পুঝঙর মনা

দোয়ে-আদরে লবিয়োত গরি,

তার মনজক্খায় যেক্কে যিয়েন চায়

সেদাম বাঝেই জুগেই যাং আধার-

কন’ তে পুজ্ মানে নি !

দি’ দি’ কুল নেই- খেই খেই ঈল নেই

যেদক দোঙ সেদক মাঘে,

আঝিক আদরে নোনেয়ে গালে;

কির্বে দি, মেয়ে দি, পিত পুস্যেলুং

অমকদ’ কোচপেনেই মাধাত তুলিলুং ।

মনর পেইক্খো বারী স্যেইন, কারাই পুজ ন মানে,

চিগোন এক্কা জু পেলে উরি যায় পিঞ্জুরো ছারি

আলা গরি চরে তে মাধে-ঘাদে

মন মুজিমে তোগায় আধার, যিয়েন পরানে মাঘে ।

উরি ভঙে চিলো চোঘে-

ঠির দি নজর ফেলায় আহ্ওজোর জিনিঝোত,

পিত্তিমির কদ’ সোত্যেনাত্যে, রঙচঙ্যে পালঙর রুচ্যেল

আমলে ঝামদি পরে কাদা আঘুনোর সেরে সেরে;

দোকদোক্যে আঙারাত্তুন তুলি খায়-

তেল সরভর এহ্‌রা দমাবো ।

তোগাদে দাঙর সোত্যা, মিধে মধুর সরপ্পাহ্‌ন্

বাঝি যায় আঢা ছুলিত, সংসারর ইধি কেরাবত

উগুরি যায় কেয়্যে ফোর, ডোঅ-লেবাং লাংটা কেয়্যে;

ধরা খেই রাজসিগেরির আহ্‌দত

কালর ঘুমোত বূং দি পায়-

ডুবি ঈল নেইয়্যে তিরোজ’ নালত ।

ও মন ! মর পুঝুনো মনা,

মর পিঞ্জুরোত তুই থাক না,

ন যেইচ উরি এগালা গরি, মর কধা তুই সুন না ।

তুই ন তোগেচ আলা আধার

পহ্‌র নাঙে সিয়েন কালা আন্ধার,

যিয়ান পেয়োচ সিয়ান ল,

তম্ ন ধরিচ নুন্‌ঝো-পান্‌ঝার ।

ঝিমিত ঝামাত রঙচঙানিত

ন বাঝেচ তুই ঘুর পালং,

সিয়ানি তর মরন’ ভুধি, মরা বভার ঘর আলং ।

এ সংসারান বিঝো আহ্‌রি

তেবেই তেবেই যার পুরি,

মধু ভাবি ও মন তুই

আঘচ কিত্তেই এগজা বূরি?

জাগি উত্ জাগি উত্, অগ্যেনর ঘুমোত্তুন

চোক মেলি রেনি চা, গ্যেনর পথ তোগা,

ধর্ম পধে যা আহ্‌দি সোলসোল্যা দবদবা ।

দানে-সীলে, গ্যেনে-গুণে, ভাবনা তপ গরি

ভেবেরা দিয়্যা লুভ-তিরোচ্ছান ফেলেই দে না ঝারি,

সুদ্ধোসাঙ্গ ঝোকঝোক্যা অহ্ ঈংজে পিঝুম এরি

উমোর কালর অমক্‌ঘর্, লোই পারিবে জুরি ।।

===০০০===