ছলং *বি.বি চাঙমা মেয়েরেগা (৫২)

০৮/০৫/২০১২, মঙ্গলবার, ০৭:৪৩ পি.এম

ইয়েন হেজান মর নাধংছাড়া জিংহানি!
পিত্ত মরা ইত্তুক পরান
ধঝা ঘঝা খেই ঝকপোস্সে চঙরা সান,
ইদো মুরোত লেম্বেই যায়
লিল্লিক্কে আগুন' জিল।
লালস্যে রাঙা চোখ্খুন মরে চেই থান;
মর গদা কেয়ে চিত পরান,
নিলস্যে আঙে নেযাই কালা ধুমো তুলি।
লুদুক হোচপানা রংচঙ্যে সবন
সোজ চেরোপালা মর আওজসানি,

তক্কানত দাংদাঙ্যে ধুল্যেভুই।।

মর বিরবিস্যে বুগর আঝা সাংসাঙ্যে ঘর দুওর,
দোগিনর ফুগুদি কানা জেত ঘর' ইজর;
ঝুর'তুর' পুঘে খেইয়ে আধং কজরা
খের-পদনা লুদি-লম্ব বেরেইয়ে ঝার জঙলা।
ধারোজর গঙার নালত বান পরি-
শুগুনো খরান্যের শিল্লো ছড়া,
রঙ্যে ভুদোর রম' গজগে
আগার পিড়েল্যে মুই,
খেই নেযার গদা মুর রিবেং
বানা ছলঙা'ন মর উগুরে উগুরে।।

মর কদে কি আঃগে? নানু কলেবার কি সেদাম!
বেক দ গজক ওইয়ে, অবাং গজক।
চুধো মুই ভাঙা ছারাঘর
পাগস্যে বেরেইয়ে এক্কো গাজ।
লুক লুক পরানর উগর ছোলা বনিজেস!
তুও দ মরণ ন অঃয়-
মূহ্ আঃত-ঠেং অচল এগোর ওগোর বিচ্ছনত,
পরানান হক্কে নিগিলি যেব;
সেই অক্তয়ান বার্চেই আগং
চোখ ফেল্হে ফেল্হে।

=== ===