যুনি ডাগচ মরে *বি.বি চাঙমা মেয়েরেগা (১৪)

১৫/০১/’১৪, বুধবার, ৭:৩০ পি এম

কন’দিন যুনি ডাগচ মরে

ভর্‌নকাস্যে কন’ ধুল্যেভুইয়োত,

আঘুন্‌গরম ধুল্যেকোলোই-

জুরো ভাবি ধাবা এইম ত’সিদু ।

আহ্‌জার কচ্টর্ মেল্যে পাঘোর

উরে’ দিম বেক ধুল্যে লঘে

কায়কুরে বানা পেবাত্তে তরে ।

তত্তেই বিলি মুই ওহ্‌ই পারিম-

গদা ছারানাধা,

দি পারিম উরেই যদ’ সবনর ফদনাহ্ ।

ছোতপোত্যে রুহ্‌মুচ ভাঙি

ঐ দূরোত নেযেবে মরে,

তুই এনেই আজা গরি

ছাভাসাঙেত অহ্‌বে ।

তত্তেই বিলি মুই দি পারং-

জিংকানিয়ান বন্ধক,

থে’ পারং বঝরলাখ্কো

যে কারর্ আঞ্ঝামত ।

দুলুহ্‌কগাঙ সাঝুরি ওহ্ই লুধিআদুরী

এইম মুই ত ধাগত-

যাং-থাং পরানে,

যুনি ডাগচ মরে ।।

===০০===

র ভেত:

১) ভর্‌নকাস্যে=দুঃসহ

২) ধুল্যেভুই=মরুভূমি

৩) আঘুনগরম=অগ্নিতপ্ত

৪) ধুল্যেকোলোই=বালুকণা

৫) জুরো=ঠণ্ডা; স্নিগ্ধ

৬) ছারানাধা=বিপর্যস্ত

৭) ফদনাহ্=প্যারাস্যুট; ফানুস

৮) ছোতপোত্যে=অস্থির

৯) রুহ্‌মুচ=মনের অবস্থা; বৈশিষ্ট্য; চেহারা;

১০) ছোতপোত্যে রুহ্‌মুচ=অস্থির অবস্থা

১১) আজা=আলিঙ্গন

১২) ছাভাসাঙেত=ছায়াসঙ্গী

১৩) বঝরলাখ্কো=বছর লগ্নী;

১৪) আঞ্ঝামত=অধীনে

১৫) দুলুহ্‌কগাঙ=ক্ষারনদী;

১৬) দুলুহ্‌ক=ব্লেড; বাঁশের ধারালো ছিলকা

১৭) লুধিআদুরী=কষ্টের বোঝা নিয়ে; লাঠিতে ভর দিয়ে

১৮) যাং-থাং=বাঁচি কি মরি অবস্থা