পিত্থিমির আলামত মানেয় ফুল *বি.বি চাঙমা মেয়েরেগা (২)

পিত্থিমির আলামত মানেয় ফুল

১২/০৭/'১৫, রবিবার, রেইত ৮:২০বো বাজি

সংসার এক্খান আলাম' সান
সে আলামত মানেয়ুন ফুলো সান
ইধু ডাঙর মনদৈ বেইনটানা দ্যে পরে
বুদ্ধির সুদোলৈ পজ্যান বুনো পরে
ইনজেবর ব কাধিলৈ জু তুলো পরে
গ্যেনর সজপদরত থাগোয়্যে অহ্ পরে
ইধু নিআলসি নিমনে কাম গরা পরে
কাবিল চেরেত্থায় মুজুঙে আহ্দা পরে
ইধু যোগ্যতায় ভরনভিরন অহ্ পরে
বিদ্যেসিক্খেয় ঝালাব্বর থা পরে
সালেন ফুদি উদে মানেয় জিংকানির পোতপোত্যে ফুল।

ইধু মানসুদোমে মানেয় খলাহ্ পরে
আ ন'লে এহ্'মানে লাজেবাক আমনরে
যে জাগাত মানেয়োর জয়গান হিমালয় মোনোরে ডিয়েই যায়
সাতগাঙ সাজুরি দোজ্যে পার বায়
দেবেদায় পাদারা অহ্'ন যে মানেয়োর নাঙ সুনি
যিধু জনম অহ্য় দেবগুরু সাধু ঋসি মহামুনি
সে জাগাত মানেয়োর মান মানেয়্যে ন রাঘেলে
এ লাজ লুগেবার কারর কি সেদাম আঘে?
মানেয় ডাঙর মানেয় স্রেস্ঠ মানেয় অজল পিত্থিমিত
ইয়েন সত্য বেগে মানন কিয়ৈ ন গরন উল্লোজিত
তুঅ দ মানস্যে মানেয় নাঙে অমানেয়োর কাম গরন
মানেয় স্রেস্ট এ কধায়ান পেঘত ডুবাদন।
মানেয়োর লো খেয় মানেয়্যে বাজদন
মানেয়োর বুগো উগুরে ঘর' খাম গারাদন
মানেয়্যে বেজদন মানুজ, কিনদনও মানেয়্যে
মানুজোর ভাগ্যত লর্বরি গরদন সিয়েনও মানেয়্যে
আহ্মক কি ন লাগে তর মানেয় ভিলি তুই
কি আঘে মানেয়োর সুদোম কি দেঘঙর মুই
পিত্থিমির আলামত ভরি যেইয়্যে ভুল
মানেয় ইক্খু কাদা বানা নয় দ ফুত্যে ফুল।
ইধু মানেয়োর ইক্খু মন চিগোন
কুজুরো বুদ্ধিলৈ তারাহ্ ভরন অহ্য়োন
ইনজেব আহ্'রা মানেয়্যে বেআক্কলে চলদন
অগ্যেনর সজপদরে আলাম বুনদন
সাজন নেইয়ার সেনেহ্ ঈরুগোর আলাম
সুদোমতারাম ভাঙা ইধু ঢেল পজ্যে বেক্খান।
-- --
র ভেত: ১। লর্বরি= পরিচালক

https://www.facebook.com/notes/meye-rega/%E0%A6%AA%E0%A6%BF%E0%A6%A4%E0%A7%8D%E0%A6%A5%E0%A6%BF%E0%A6%AE%E0%A6%BF%E0%A6%B0-%E0%A6%86%E0%A6%B2%E0%A6%BE%E0%A6%AE%E0%A6%A4-%E0%A6%AE%E0%A6%BE%E0%A6%A8%E0%A7%87%E0%A7%9F-%E0%A6%AB%E0%A7%81%E0%A6%B2/762307453875647