আঝায় বুক বানং *বি.বি চাঙমা মেয়েরেগা (২২)

০৭/১২/’১৩, সনিবার, ০৮:৩০ এএম

আহ্‌জার দুঘোতও মুই মন ন ভাঙং

সুঘ্ এব’ একদিন; এ আঝা মনত বানং,

আন্ধার কালামেঘ ফুরি রাঙাবেল আহ্‌ঝিবো

দাংদাঙ্যে ভুইফাদা খরানত খুঝির ঝর পরিবো।

দাঙা আগুনোত কুঝি ঝার পুরোনা একদিন থামিবো

উম্‌সাস্যে গরম্‌ভাবত জুরো আহ্‌ভা খেলিবো।

সাঝন্যের করীকান একদিন ছারিবো

ঘুর্‌ঘুর্ ঝুর্‌গো চোঘোত দোকদোক্যা পহ্‌র ছিদিবো।

ঘুর্ আঙোস্যে জনমান ন থেব’, পুন্নিমা একদিন এব’

ধল সুঞ্জুক্যে জুনোহ্‌পহ্‌র্ অবাঙে ফুদিবো।

মু্‌ই সবনে দেঘং, আঝায় আঝায় বুক বানং

এবাক তারাহ্, ঝরি যেয়্যে আহ্‌জার তারা,

জুম্মোজাদর আগাজত উধি জলিবাক

বলাবল্যে জধাবলে তারাহ্  বলি অহ্‌বাক্;

সংজধায় পোতপোত্যে পহ্‌রে জাদর আগাজ্‌সান সাজেবাক্ ।

এবাক আর’ সুবীর ওস্তাদ-অনিমেষ-সুদীর্ঘ

রনতিষ্য-নিলয়বাবু-শশাংক-কুসুমপ্রিয়,

গোর্কী-প্রদীপলাল-পেসকা-নন্দকুমোর

নাঙ্ ন পেয়্যা আহ্‌জার তারা যিয়ুন ঝরি যেয়োন।

দেঘং তারাহ্ একদিন এভাক আহ্‌দেআহ্‌ত ধরি

কেনাকেন্যা রুঘোরুখ্যা ঈংঝে পিঝুম ঝারি।

কোচপানালৈ একজধা ওহ্‌ই একপরানে গরি

জাত ছরানর অডং লারেই যেবাক তারাহ্ গরি।

জুম্মো দেজর জুম্মো মানে’র্ মরা পজাবাজ্

থান্‌বোত্যা চেরোপালা লো’র্ চিন্ধেবাজ্,

মরাকিজেগর্ কানাকুদি মুঝুং নদেখ্যে চোঘোপানি

বুক খিলমাজ্যে বনিজেইজ্ যেব’ থামি, যেব’ থামি;

সংখেয়্যে ঝরে ধোই যেব’ বেক্ আধং কজরা

এগত্তরর্ ঝল্‌ঘা আহ্‌ভাত্ গল্‌গলেব’ তুম্বাজ্।

নুঅ আঝায় নুঅ ধাবে সজপদর ধরি

সাজিবো আমা দেজ্, আমা জাগা খেলাং-খিলিং গরি।

দব্‌দবা পধ, ঝাকঝাক্যে গাঙ্, সোলসোল্যে মূরোহ্‌-মূরিহ্

পহ্‌ন্ পানিয়ে নাল আহ্‌ধিবো বেক ছরাছরি,

এহ্‌ইল্ মূরোহ্, এহ্‌ইল্ ভুই, চোঘজুরোনি সোনার্ দেজ্

তজিমপুরো সাংসাঙ্যে গরি সাজিবো জুম্মো দেজ্।