গিরিত্থি *বি.বি চাঙমা মেয়েরেগা (৯৬)

২৪/০৩/’১৫ মঙ্গলবার, বেন্যা ৭:৩৪ এএম

তর রাঙা ঠুদোত যে আহ্‌জি

সে ভিদিরে লুগি আঘে কত্তমান পাজি,

ত আহ্‌জিবোর জাদুত বাঝি ওহ্‌ই যান্দোই বেগে মাঝি

ভনভনেই উরি পরি মিধে আহ্‌রিত আঝি পারি

সরপ তোগেই মিধে খাদে আঢাচুলিত থান্দোই বাঝি।

ন পাধে জনেজন এহ্‌ত ঘোরা বেগে মানন

কোচপানা অঝার দেঘেই চিত গলেই দ্যে কধা কন

সে কধালোই ফালত পরি জনমত্তেই এগেম গরি

আরগানি অহ্‌য় জদন বানি, দি পরানর এক জিংকানি।

যেক্খে এঝে এমেন সময় জঞ্জালে ভরে ঘর

সুঘোর কুওবো সুগেই যায় বেগর পরানর।

কবাল’ উজু বাজ পরে ধুন্ধুগে বুক আঙে

নিগিলি যেবার পধ তোগায় ভিলভিলেনেয় ডেনে-বাঙে

কুধু পায় তোগেই পধ খাজা ভিদিরে যার ধজ

কাদাকাত্যে জাগাত সমি কানত ধরি গরে উত বজ।

সংসারর ঘান্দি কলত ঘুরি ঘুরি জনমধরি

পিগিরে সান লুভোত পরি পরান কারে মিধে আহ্‌’রি

খানক্খন্যে সুঘ এঝে বারিঝে দেবার ঝিমিলেনী

বেজ ভাক্খান আন্ধারে যায় গিরিত্থি জিংকানি।